E Apinga Aroa Mutu Kore Mei Tei Anga Ra

KARE ainei koe e umere ana i te au tumu anga ta te au taineti e irinaki ra e e mea puapinga maata tikai no te oraanga i runga i tetai ua atu paraneta tei taikuia mai me kare tei akakite tikaia mai i roto i te pene mua o te Pipiria? Eaa ra teia au tumu anga?

Kia ruperupe te oraanga, e mea tau kia maata tikai te vai, mei tei taikuia i roto ia Genese 1:2. Kia tano tikai te vaito anga o te vai i runga i te paraneta kia vai vaivai ua. Te umuumuia ra teia e kia tano tikai te mamao o te paraneta mei tona ra. Ko te papaanga o Genese te arataki putuputu ra i te manako ki te ra e ta te reira e akatupu ra i runga i te enua.

Kia nooia e te au tangata ra, ka anoanoia e te paraneta tetai reva kairoia ki te au kati. Kua taikuia mai teia tu puapinga maata e Genese 1:6-8. Te tupu anga o te rakau rikiriki, tei akatakaia mai i roto ia Genese 1:11, 12, te orongaia ra kia maata rava te okitene. Kia ruperupe tetai paraneta e maata te oraanga manu tukeke, te umuumuia ra te enua maro, e te enua uua, mei tei akatakaia mai i roto ia Genese 1:9-12. I te openga ra, no te reva maru, kia arara tau te paraneta e kia akamou ngaueue koreia​—ko te enua nei, ko tetai apinga tei akatupuia na te uuti anga o to tatou marama kia kore e topa. Kua akakiteia mai te vai anga o te marama e tetai au mea puapinga no te reira i roto ia Genese 1:14, 16.

I akapeea i rauka ai i te tangata tata i taito ra ko Mose, kare i tauturuia ana e te taineti o teia tuatau nei, i te arataki anga i te manako ki te au tumu anga i runga akenei? Kua mamao atu ainei to Mose kite i tona tuatau i te ariki anga i to te reira puapinga maata? Ko te akataka anga koia oki kua akauruia aia e Tei Anga mai i te au rangi e te enua. E mea tau tikai te reira i te akamanako meitaki anga i te tikaanga taineti no te papaanga o Genese.

Te akapapu maira te Pipiria e e akakoroanga tetai no te anga mai anga i te au mea umere ta tatou e kite nei i roto i te ao katoa e pini ua ake takapini ia tatou. “Te au rangi ra, na Iehova ïa au rangi,” i akakite ei a Salamo 115:16, “kareka te enua nei, kua oronga mai aia na te tamariki a te tangata nei.” Te akakite ra tetai taramo ke e: “Nana i akamou i te tumu o te enua, kia kore roa e ngaueue e tuatau ua atu.” (Salamo 104:5) Me kua akapapaia e kua angaia te ao katoa e pini ua ake e to tatou paraneta manea e Tei Anga ra, papu tikai e e mea tau i te irinaki e tei iaia katoa te tu kite i te akono i teia. Teia te aiteanga e ka rauka ia koe i te akara papu tikai ki mua i te akatupuia anga te taputou umere e: “Ka riro te enua no te aronga tuatua-tika, ka noo tamou rai ratou i reira.” (Salamo 37:29) E mea papu e, “kare ra [te Atua] i anga [i te enua] ei mea puapinga kore ua” inara “kua anga ra aia kia tangataia” e tuatau ua atu no te au tangata ariki ua tei akakite i tona au takinga meitaki.​—Isaia 45:18.

Kia tau ki te au Tuatua Tapu, kua aere mai a Iesu ki te enua nei kia apii mai ia tatou no runga i te Atua e Tona akakoroanga kia oronga i te ora mutu kore ki te au tangata akarongo. (Ioane 3:16) Kua akapapuia mai kia tatou e kare e roa atu na te Atua e ‘takore i te aronga e takore ra i te enua,’ kareka te au tangata tei inangaro i te au no te pa enua ravarai tei ariki i tana ravenga no te akaoraanga ka ora ua atu ia. (Apokalupo 7:9, 14; 11:18, NW) Mei teaa atura te umere no te oraanga i te kite anga e te rekareka anga te au tangata i te au angaanga umere o te au mea angaia e te Atua e tuatau ua atu!​—Koheleta 3:11; Roma 8:21.

[Akameitakianga no te Tutu i te kapi 8]

NASA photo