Eaa Ka Kopae ei i te Au Tu Tau Kore Takiri?

KO IEHOVA te akaraanga meitaki roa atu o te tu tau tikai. “Tei tika rava tana angaanga ra,” e kare rava tona tu tika i te mea ngata, no te mea e kapiti ua mai ana rai te reira i te aroa tangi. (Deuteronomi 32:4) Kare roa tona aroa e ngere ana i te kaveinga tau, no te mea te tavaitai ra aia ki te au ture apa kore. (Salamo 89:14; 103:13, 14) Kua angaia to tatou nga metua mua ma te tu tau tikai i roto i te au tu katoatoa. Kare roa o raua manako ki te au tu tau kore takiri. Inara, kua riro te ara, ei apai mai i te “titoutou” me kore i te kino​—i te tu apa​—tei taopenga mai ki te ngere anga i taua tu tau tikai.​—Deuteronomi 32:5.

Ei akatutu anga: I akaoro ana ainei koe i tetai motoka me kore i tetai patikara takatakai kua puena te kiri? Kare e ekoko kua tuki tuki ua te akaoro anga no tera ngai i puena e ka rokoia katoaia e te kino. Ka anoanoia taua kiri ra kia ripeaia i mua ake ka kino roa atu ei me kore ka paru ei. Pera rai tatou, te tuera ua nei to tatou au tu tangata apa ua ki te au tu kino anake. Me tuku ua tatou kia maata atu taua au ngai “puena” ra, ka tuki tuki ua to tatou aerenga i te oraanga, e ka kino katoa.

Tetai au taime ka riro to tatou au tu memeitaki, to tatou maroiroi, ei tu tau kore takiri. Ei akatauanga, noatu te umuumuia maira te ngati Iseraela e te Ture a Mose kia tui i te veruveru ki runga i to ratou kakau, no te inangaro ra o te au Pharisea i to Iesu tuatau, kia akaraanga tuke takiri ratou i roto i te urupu, i reira kua ‘akamaata atu ratou i te veruveru o to ratou kakau’ ki tetai tu tau kore takiri. To ratou akakoroanga, kia akaraanga tapu atu i to ratou au tangata tupu.​—Mataio 23:5; Numero 15:38-40.

Teia tuatau e titau ana tetai aronga na roto i tetai ua atu au ravenga kia akaraia mai ratou, e na te tapoitirere katoa anga i etai ke. Penei e aue taitaia tikai teia kia: “Akara mai ana iaku! E tangata katoa rai au!” Inara kare te rave anga i te au tu tau kore takiri o te kakau, te tu manako, e te au angaanga, e akamerengo i te au anoano tika tikai o tetai Kerititiano.

Tu Manako Tau no Runga i te Angaanga

Noatu koai tatou e eaa te ngai e noo nei tatou, ko te angaanga memeitaki ua rai te apinga okotai, te ka tauturu i te akariro i to tatou oraanga ei mea puapinga mou. I angaia mai tatou kia rauka te tu merengo i roto i taua au angaanga ra. (Genese 2:15) Kia tau ki te reira, te akaapa maira te Pipiria i te tu kope. Te akakite maira te apotetoro ko Paulo e: “Ko te tangata kare e rave i te angaanga, auraka katoa aia e kaikai.” (2 Tesalonia 3:10) E tika rava, e ka riro te tu kope i te angaanga ei akatupu mai, kare i te ngere anake ua e te tu merengo kore mari katoa ra i te mareka kore o te Atua.

E manganui te aere ana ki tetai tua mai o te tu tau kore takiri, i te angaanga ua anga i te au taime pouroa, ei au tuikaa no ta ratou angaanga. Te akaruke vave anga i te popongi e te oki reiti mai anga, penei ka karanga ratou e ko ta ratou angaanga, ei meitaki rai no to ratou pamiri. Inara, penei te akangereia ra to ratou pamiri e taua tu anoano maata ra i te angaanga. Kua karanga tetai vaine e maata ua atu te au ora e akapou putuputu ana tana tane ki ko i tana ngai angaanga e: “Ka rekareka roa au i te akaoko i te au apinga katoatoa i roto i teia are taurekareka, no tetai taime kia noo mai ana taku tane ki konei iaku e ta maua tamariki.” E mea tau tikai te aronga tei iki kia angaanga ua rai, kia akamanako meitaki i tei tupu ki te Ariki ko Solomona: “Kia maara ra au i taua au angaanga i raveia e taku rima ra, e te au angaanga katoa i  raveia e au ra, i na, e mea puapinga kore anake, e te kai i te matangi.”​—Koheleta 2:11.

Ae, ka anoanoia tatou kia kopae i nga tua tau kore takiri roa ai o te angaanga. Ka rauka ia tatou kia riro ei aronga angaanga pakari, kia akamaara ra e ko te riro ei tuikaa ki te angaanga, ka akangere te reira ia tatou i te mataora e penei i tetai apinga maata roa atu.​—Koheleta 4:5, 6.

Kopae i te Au Manako Tau Kore Takiri o te Au Mea e Navenave Ei

No to tatou tuatau nei kua totou te Pipiria: “E riro te tangata nei . . . ei anoano i te au mea e navenave ei ra, kare i anoano i te Atua.” (2 Timoteo 3:2, 4) Ko te aruaru anga i te au mea e navenave ei ra, tetai o te au apinga puapinga roaia atu ta Satani e rave ra ei akaariu ke i te tangata mei te Atua. Te tupu ua atura ki te maata te anoano nui i te tarekareka e te tamataora, mei te au tu tarekareka tau kore takiri me kore te tarekareka ka rokoia e te kino no te “inangaro navenave” ua nei. Te roroa ua atura te papaanga o taua au tu angaanga ra, e te maata ua atura te numero o te aronga e rave ra i te reira. Eaa ra i reka maataia ai teia tu? E manganui te tangata, no te kare e mareka ana i to ratou oraanga i te au ra, te umuumu ra kia akamaata roa atu i te mataora. Inara e rauka ai te tamou marie i taua tu mataora ra, ka maata rava atu te au tu kino ka tupu. Te au Kerititiano tei akakeuia e to ratou akava ngakau, ka kopae ratou i te au tarekareka ka rokoia e te kino, no te akangateitei i te apinga aroa o te oraanga e no Tei Oronga mai i te ora.​—Salamo 36:9.

I te anga mai anga te Atua i nga tangata mua, i tuku aia ia raua ki ea? Ki roto i te kainga i Edene, tona aiteanga i roto i te reo mua, koia oki “Navenave,” me kore “Rekareka.” (Genese 2:8) Te taka meitaki ra e, e tuanga te oraanga navenave, e te rekareka no to Iehova akakoroanga no te tangata.

Kua vaoo mai a Iesu i tetai akaraanga apa kore no tatou i te tu manako tau no te tu navenave. I te akatupu anga i to Iehova anoano kua akono pu tikai aia i te reira, e kare rava aia i akamutu ana i te tavaitai i tona oraanga ki ta te Atua au ture e tana au kaveinga. E akataka ana aia i tetai taime no te aronga tei ngere, noatu tona roiroi. (Mataio 14:13, 14) Ae, e ariki ana a Iesu i te au patianga kia tae ki te au kaikaianga, e akataka katoa ana aia i tetai taime no te moe e te kaikai i roto i tona uaorai oraanga. Kua kite ua aia, e te akaapa ra tona au enemi iaia no te rave ra aia i teia au mea nei. No runga iaia kua karanga ratou e: “I na, e tangata kakai, e te inu wina.” (Luka 7:34; 10:38; 11:37) Inara kare a Iesu e irinaki ana e te akatakake maira te tu akono mou tikai i te au tu navenave katoatoa o te oraanga.

Te taka meitaki ua ra e, e tu pakari tikai kia kopae tatou i tetai ua atu tu tau kore takiri no runga i te tarekareka. Ko te akariro i te tu navenave e te tamataora ei apinga puapinga roa atu i roto i te oraanga, kare rava te reira e apai mai i te mataora mou tikai. Ka taopenga mai ki te kopae anga tatou i te au mea puapinga maata atu, kapiti mai to tatou pirianga ki te Atua. Noatu ra, auraka e akangere ia tatou i te au tu navenave pouroa e auraka katoa e akaapa atu i etai ke e rekareka ra i te oraanga na roto i te mataara tau.​—Koheleta 2:24; 3:1-4.

Rauka te Mataora i Roto i te Tu Oraanga Tau

Kua tata te pipi ko Iakobo: “Te apa anake nei tatou i te au mea katoa e manganui.” (Iakobo 3:2) Penei ka kite tatou uaorai i teia tu, ia tatou e tauta ra i te kopae i te au tu tau kore takiri. Eaa te ka tauturu ia tatou i te akono i te tu tau? Mei teia te tu, ka anoanoia tatou kia kite i to tatou uaorai au tu maroiroi e te au tu apikepike. Kare taua akakoroanga ra i te mea ngoie. Penei te aere atura tatou ki te tua tau kore takiri ma te kore i kite. No reira, e mea pakari, kia akapiri vaitata atu tatou ki te au Kerititiano tu pakari atu e kia akarongo i te ako tau. (Galatia 6:1) Penei e pati tatou ki tetai taeake tau kia irinakiia me kore ki tetai tangata pakari kite, no taua tu ako ra. Kapiti mai te au Tuatua Tapu uaorai, ka riro taua ako ra tei akatumuia ki roto i te Pipiria, mei “te io ra” no tatou kia akara ua rai e mei teaa tikai to tatou tu ki mua ia Iehova.​—Iakobo 1:22-25.

Te mea mataora ra, kare tatou e anoanoia kia noo i tetai oraanga kare e rauka i te kopae i te au tu tau kore takiri. Ma te tauta pakari e pera ta Iehova akameitakianga, ka rauka ia tatou te tu tau e ka riro mai ei au tangata mataora. Ka meitaki atu i reira to tatou pirianga ki to tatou au taeake e te au tuaine Kerititiano, e ka riro katoa mai tatou ei au akaraanga meitaki no te aronga e tutu atura tatou. Tei runga ravao, ka rauka ia tatou i te aru vaitata roa atu i to tatou Atua aroa e te tau, ko Iehova.​—Ephesia 5:1.

[Akameitakianga no te Tutu i te kapi 28]

©Greg Epperson/​age fotostock