Akapeea i Rauka ai ia Hana te Manako Au

KUA akateitei iora tetai vaine akarongo mou i tona reo na roto i te pure akapaapaa ia Iehova. Kua manako aia e kua apai te Atua iaia mei raro mai i te one ra, e kua akaki maira i tona ngakau taitaia ki te akangateiteianga.

Ko Hana te ingoa o taua vaine ra. Na teaa ra i akatupu i te aka tauianga umere ki te tu o tona manako ngakau? No teaa ra aia i rekareka maata ai i teianei? Peea ra tatou e puapingaia ai mei tei tupu kiaia? E rauka ai te pauanga ki teia au uianga nei, ka akamanako ana tatou i te tua o Hana.

Pamiri tei Rokoia e te Taitaia

Ko Hana tetai o nga vaine e rua a Elikana, e tangata ngati Levi e noo ra i te enua o Epharaima. (1 Samuela 1:1, 2a; 1 Paraleipomeno 6:33, 34) Noatu kare te porikami, i te tuanga no to te Atua akakoroanga mua no te tangata, kua tikaia ra te reira e e au ture tetai no taua akanooanga ra i raro i te Ture a Mose. E akamori ana to Elikana pamiri ia Iehova, inara e maata te taime e tupu ana te manamanata i roto i teia au akaipoipoanga porikami, mei tei akatutuia mai i roto i te oraanga ngutuare o Elikana.

Kua pa a Hana, kareka a Penina, tetai vaine ke mai a Elikana, e maata tana tamariki. E enemi a Penina no Hana.​—1 Samuela 1:2 e.

E manakoia ana te turanga pa ei mea kino i rotopu i te au vaine ngati Iseraela e e akairo tu tau kore katoa te reira i mua i te aroaro o te Atua. Inara kare ua e tuatua e akaari maira e e akairo te tu tamariki kore o Hana no to te Atua mareka kore. Inara kare i akapumaana atu ia Hana, kua akariro ra a Penina i tona uaorai turanga uua kia anau tamariki ei akataitaia roa atu i tona enemi.

Au Tere ki te Nao o Iehova

Noatu teia au taomianga, kua aere rai te pamiri o Elikana i te au mataiti i te oronga atinga i ko i te nao o Iehova i Silo. * Penei e raveia ana teia tere o tetai 60 kiro mita i te aerenga e te okianga mai na raro ua. Kare e kore e riro ana teia au tere ei mea ngata tikai kia Hana no te mea e maata te au tuanga atinga au e orongaia ana na Penina e tana tamariki, kareka a Hana e tai ua rai ana tuanga e orongaia ana. E akariro ua ana a Penina i teia au atianga ei akariri ia Hana, i te taakama anga iaia no te mea i te akara anga kua “paia aia” e Iehova. Ka tupu ua rai teia tamamaeanga i te au mataiti ravarai, e tei tupu mai kua aue a Hana e kare e kaikai. Tika anga e au tere mataora tikai teia nona inara kua riro teia au taime nei ei mea taitaia tikai. Noatu ra, kua aru rai a Hana i teia au tere ki te nao o Iehova.​—1 Samuela 1:3-7.

Te kite ra ainei koe e akapeea a Hana i te akanoo anga i tetai akaraanga meitaki no tatou? Me rokoia e te taitaia, e akapeea ana koe? Te akatakake maira ainei koe ia koe e te akaatea maira ainei mei te taokotai anga atu ki te au taeake irinaki? Kare a Hana i akapera ana. Kua akariro aia ei peu matau nana te piri ki rotopu i te aronga akamori o Iehova. Noatu te au turanga ngata, kia akapera rai tatou.​—Salamo 26:12; 122:1; Maseli 18:1; Ebera 10:24, 25.

Kua tauta a Elikana i te akapumaana ia Hana e i te akamaroiroi iaia kia akakite mai i tona manako ngakau. “E  Hana, eaa koe i aue ei? eaa i kore ei koe i kaikai? Eaa i tumatetengaʼi to ngakau?” i ui atura aia. “Kare ainei te meitaki maata toku i to te tamariki e kia tino ngauru ua atu ia koe na?” (1 Samuela 1:8) Penei kare a Elikana i kite i te tu kino o Penina, e kare e kore kua manako rai a Hana e kia akakoromaki muteki ua e kare i akakite i tona mareka kore. Inara, no te pakari i tona akarongo kua umuumu iora a Hana kia rauka te au, na roto i te pure anga kia Iehova.

Kua Tia Iora a Hana

E kaiia ana te au atinga au i ko i te puakapa o Iehova. Muri ake i te akaruke anga i te pia kaikai, kua pure atura a Hana ki te Atua. (1 Samuela 1:9, 10) “E Iehova Sabaota e,” i pati akatenga atura aia, “kia tika ia koe i te akara mai i te mate o to tavini vaine nei, e kia manako mai koe iaku, kia kore koe e akapoina [akangaropoina] i to tavini vaine nei, kia oronga maira koe i tetai tamaiti tamaroa na to tavini vaine nei, ei reira au e orongaʼi iaia kia Iehova, e ope rava ake ona puke rā i te ao nei, e kare e reta e tae ki runga i tona upoko.”​—1 Samuela 1:11.

Taka meitaki tikai ta Hana pure. Kua pati aia i tetai tamaiti tamaroa e kua tia e ka akatapuia aia na lehova ei Nazira i tona oraanga katoa. (Numero 6:1-5) No taua tia ra ka anoanoia te tika a tana tane, e kua akaari mai to Elikana tu i muri mai e kua akatika rai aia i te taputou a tana vaine akaperepere.​—Numero 30:6-8.

No te tu e pure ra a Hana kua manako te Taunga Teitei ko Eli e kua kona aia. Te kamutamuta ua ra tona vaa, inara kare aia e rongo ana i te tuatua, no te mea te tuatua ua ra a Hana i roto i tona ngakau. E pure akatenga tikai taua pure ra. (1 Samuela 1:12-14) E akamanako ana e mei teaa ra to Hana manako i te karo anga a Eli iaia, i te karanga anga e kua kona aia! Kareka ra kua pau akangateitei atu rai aia i te taunga maata. I te kite anga a Eli e te pure ra a Hana “no te maata anga oki o [tona ra] tumatetenga e [tona ra] aue,” kua karanga atura aia: “Kia akatika mai oki te Atua no Iseraela i taau i pati atu iaia ra.” (1 Samuela 1:15-17) I reira, kua aere atura Hana i tona aerenga i te mataara e kua kaikai iora, e “kare atura tona mata i kinokino ra.”​—1 Samuela 1:18.

Eaa ta tatou ka mou mai mei teia? Me pure tatou kia Iehova no runga i to tatou au manamanata, kia akakite tatou i to tatou manako kiaia e kia pati ma te ngakau tae. Me kare a tatou ravenga ke atu e rauka no te akakore i te manamanata, e vaoo atu tatou i te reira ki roto i tona rima. Kare e mataara meitaki atu i te aru.​—Maseli 3:5, 6.

I muri ake i te pure akatenga anga, kare e kore e ka rauka i te au tavini o Iehova te au, mei to Hana rai. No runga i te pure, kua tata te apotetoro ko Paulo e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) Me tuku tatou i ta tatou apainga ki runga ia Iehova, kia tuku rai tatou e nana e akono mai i te reira. I reira, mei ia Hana rai, kare ia tatou e kinokino.​—Salamo 55:22.

E Tamaiti Orongaia na Iehova

Teianei kua akamaara akera te Atua ia Hana; kua nui iora aia e kua anau maira i tetai tamaiti tamaroa. (1 Samuela 1:19, 20) Ko teia oki tetai o te au atianga tokoiti ua i rekotiia i roto i te Pipiria i rave ei te Atua i te apainga no te anauanga o tetai ka riro mai ei tavini nona. Ka riro mai a Samuela te tamaiti a Elikana raua ko Hana ei peroveta na Iehova, tetai te ka rave i tetai tuanga puapinga roa i roto i te akanoonooanga o te ui ariki tutara o Iseraela.

Kare e ekoko e kua akamata a Hana i te apii ia Samuela no runga ia Iehova mei te varevareanga mai. Inara te ngaropoina ra ainei iaia te tia tana i papau? Kare! “Kia topa ake ana te u i te tamaiti nei, ka apai ei au iaia ki runga, kia kitea aia ki mua i te aroaro o Iehova, kia noo aia i reira e tuatau ua atu,” i karanga ai aia. I te topa anga te u a Samuela, penei e toru paa ona mataiti me kore kua pakarikari ake, kua apai atura Hana iaia kia noo i te puakapa ra o Iehova, mei tana tikai i tia.​—1 Samuela 1:21-24; 2 Paraleipomeno 31:16.

I te oti anga te atinga i te orongaia kia Iehova, kua arataki atura Hana raua ko tana tane ia Samuela kia Eli. Kare e kore te mou ua ra a Hana  i nga rima o tana manga tamaiti iaia i karanga atu kia Eli: “E taku pu e, te ora ra koe, e taku pu, ko au te vaine i tu ua i vaitata ia koe i ko na, ka pure ei au kia Iehova ra. I pure oki au i teianei tamaiti; e kua oronga mai a Iehova kiaku i taua mea ra i taku i pati atu iaia ra: I pure oki au i teianei tamaiti; e kua oronga mai a Iehova kiaku i taua mea ra i taku i pati atu iaia ra: No reira au i oronga atu ei iaia kia Iehova; no Iehova ïa aia e kia ope rava ona puke rā i te ora anga nei.” Ei reira to Samuela akamata anga i tana angaanga takake roa ki te Atua e ope rava ake ra ona puke ra.​—1 Samuela 1:25-28; 2:11.

I te au tuatau i aereia, kare roa a Hana i akangaropoina ana ia Samuela. Te akakite ra te au Tuatua Tapu e: “Kua tui oki tona metua vaine i tetai pona roroa iti nona i te au mataiti katoa ra, e kua apai oki kiaia ra, kia aere aia ki runga ma tana tane katoa, e apai i te atinga mataiti ra.” (1 Samuela 2:19) E mea papu roa e kua pure tamou rai a Hana no Samuela. I te mataiti katoa e atoro ana aia, kare e ekoko e akamaroiroi ana aia iaia kia vai akarongo mou rai i te rave i tana angaanga ki te Atua.

Tetai o taua atianga ra, kua akameitaki iora Eli i nga metua o Samuela i te na ko anga kia Elikana: “Kia oronga mai a Iehova i te tamariki naau i teianei vaine no tana i oronga mai no Iehova ra.” Kia tau ki taua au tuatua ra, kua akameitakiia mai a Hana raua ko Elikana ki e toru au tamariki tamaroa e nga tamaine e rua.​—1 Samuela 2:20, 21.

E nga akaraanga tau tikai ta Elikana raua ko Hana i oronga mai no te au metua Kerititiano! E maata te au metua vaine e te au metua tane tei oronga puareinga ua i te au tamariki tamaroa e te au tamariki tamaine kia Iehova, i na te reira tuatua ai, na te akamaroiroi anga ia ratou kia aruaru i tetai au tuanga o te angaanga orometua tamou i te ngai mamao mei te kainga. Kua tau taua au metua ra kia akameitakiia no te au akaatingaanga ta ratou e rave ra. E ka tutaki mai rai a Iehova ia ratou.

Te Pure Pereperekavana a Hana

Kare e aiteia te rekareka tei rauka ia Hana, tei pa ana i mua ana! E taime ua ake ka rekotiia te au pure a te au vaine ki roto i te au Tuatua Tapu. Kareka ra ta Hana, e rua a tatou i kite. Te mea mua no runga i tona au manako i te rokoia anga aia e te akakoko e te akakino, e te rua e pure akameitakianga rekareka. “Te rekareka nei toku ngakau ia Iehova,” i akamata akera a Hana. Kua rekareka tikai aia e “kua anau ta te pa,” e kua akapaapaa iora aia ia Iehova e “koia tei akateitei, koia tei apai i tei akaaka ki runga mei raro mai i te one.” E tika atura e kua rave mai aia i “tei putaua mei raro mai i te tiringa teita ra.”​—1 Samuela 2:1-10.

Te akaari maira te papaanga o Hana e ka mamae rai tatou no te au tu apa ua me kore no te akakino a etai ke. Inara, auraka tatou e akatika i taua au tu ngata ra kia akangere ia tatou i te rekareka o te tavini anga ia Iehova. Koia oki Tei Akarongo mai i te pure, tei akarongo mai i te aue a tona iti tangata akarongo mou, i te akaora anga ia ratou mei te tumatetenga e i te oronga mai i te maata o te au e etai atu au akameitakianga no ratou.​—Salamo 22:23-26; 34:6-8; 65:2.

[Tataanga Rikiriki i Raro]

[Tutu i te kapi 17]

Kua oronga iora a Hana ia Samuela na Iehova