Au Uianga a te Aronga Tatau

E ia o te au manu ma e manganui ta Noa i apai ki roto i te araka​—tataki itu i te au manu ma me e itu pea i te au manu ma?

I te oti anga ia Noa i te akatu i te araka, kua akakite a Iehova kiaia: “Ka aere koe ma toou kopu-tangata katoa ki roto i te araka; ko koe oki te tangata tuatua-tika taku i kite i teianei uki, i mua i toku aroaro. To te au puaka viivii kore katoa ra, kia tataki itu ïa taau e rave ra, ko te toa ma tana ua; e to te au puaka viivii ra, e tataki rua ïa, ko te toa ma tana ua.” (Genese 7:1, 2) Tetai au urianga, mei The New English Bible, The New Jerusalem Bible, e te Tanakh​—The Holy Scriptures, ta ratou urianga i te reo Epera mua e “itu pea.”

I roto i te reo mua, ko te tuatua “tataki itu” te tatau tikai ra te reira e “itu itu.” (Genese 7:2) Inara, me ripitiia tetai numero i roto i te reo Epera kare te aiteanga e, kia kapitipitiia te reira au numero. Ei akaraanga, te akataka maira a 2 Samuela 21:20 i “tetai tangata roa, ” e, e “ono maikao i te rima okotai, e ono oki i te vaevae okotai.” I te reo Ebera, kua ripitiia te numero “ono.” Inara, kare te aiteanga o teia e e ono pea (me kore e 12) maikao rima o taua tuputupua ra i te rima okotai e e ono pea, maikao i te vaevae okotai. Te akakite ua maira te ripiti anga o te numero e e ono maikao i runga i te rima e e ono maikao i te vaevae.

Eaa te akamaramaanga ta te ture o te karama reo Epera e oronga maira no runga i te ripiti anga i te au numero? I te uriuri anga ia Genese 7:2, 9, te akakite ra te Introductory Hebrew Method and Manual a William R. Karper e: “Maata te taime e ripitiia ana te au tuatua i te akakite mai i te maata o te numero tataki tai.” Te karanga ra te Gesenius’ Hebrew Grammar (Tataanga Rua i te Reo Papaa) e: “E akakiteia ana te maata o te numero tataki tai . . . na te ripiti anga i te maataanga o te apinga.” Te oronga maira te reira i te akaraanga kia tau kia Genese 7:9, 15 e 2 Samuela 21:20, ko te au numero i ripitiia i reira koia oki e “rua” e te “ono.”

No reira kare te aiteanga o te “itu itu” i roto ia Genese 7:2 e e itu pea, me kore e 14, mei te ripiti anga rai i te “rua” e kare tona aiteanga e e rua pea, me kore e a, i roto ia Genese 7:9, 15. Ko te ripitianga i te numero, e akakite anga ua te reira i te maataanga​—kare no te kapitipiti anga i te au numero. No reira noatu e “tataki itu” rai au manu ma tei raveia ki roto i te araka, e “tataki rua” ua o te au mea viivii tei raveia.

Peea i reira te tuatua, “te toa ma tana ua” i muri tika mai i te tuatua “tataki itu” i roto ia Genese 7:2? Kua riro tera ei arataki i tetai papaki kia manako e kua akakiteia kia Noa kia rave e itu pea o te au tu manu ma ravarai. Inara kare te au manu ma i akaoraia mai no te akakoroanga okotai ua no te akaeva atu anga i te reira. Te akakite maira a Genese 8:20 kia tatou e i muri ake i te tomo anga ki vao mei roto i te araka, “Kua akatu iorā Noa i te atarau na Iehova; e kua rave iora i to te au puaka viivii kore katoa ra, e te au manu viivii kore katoa ra, e kua apai atura i te au atinga karakaratio ra ki runga i taua atarau ra.” Kua riro te itu o te manu mei roto i te au mea ma, ei oronga i tetai manu na Noa no te atinga, i te akaruke mai anga e toru au pea ei akaeva atu i to ratou uaorai tu i te enua.