Eaa ta to Karaiti Aerenga Mai ka Akatupu

“TAMATAKUANGA I SÃO PAULO.” I akapera ei te makatini Veja i te akamarama mai anga i te a ra i roto ia Me 2006 i te akainga anga te akaaerenga kino i te oire maata roa atu e te moni roa atu o Paratiri “ki tetai turanga apikepike.” Mei tetai 150 opita akava, aronga kino e te au tangata noa ua tei matemate i roto i tetai “tamatakuanga tei tere atu i te 100 ora.”

Vaitata rai e ko te rave kino te nuti maata i roto i te au tuanga katoa o te enua nei. I te akaraanga kare e rauka i te au arataki tangata nei i te tapu i te reira. Te riro ua maira to tatou ao ei ngai nooanga kino. Penei te taitaia ra koe no te mea noatu taau ngai ka akara atu, e maata tikai te au nuti kino. Inara, te vaitata maira te tuatau no te tauianga.

Kua apii a Iesu i tana au pipi kia pure no te Patireia o te Atua kia tae mai e kia akonoia to te Atua anoano, “i te enua nei, mei tei te ao katoa na.” (Mataio 6:9, 10) E kavamani teia Patireia e ko Iesu Karaiti to te reira Ariki tei ikiia e te Atua. Ka takore te reira i te au manamanata katoatoa o te tangata ravarai. Inara, no te Patireia o te Atua kia apai mai i te au tauianga ki te enua nei, ka inangaroia te tauianga mei te au tutara tangata ki te tutaraanga a Karaiti. Ko teia tikai ta to Karaiti aerenga mai ka akatupu.

E Tauianga Au?

Ka kauraro au ua atu ainei te au pa enua ki te tutaraanga a Karaiti? Kua orongaia ki te apotetoro ko Ioane tetai orama te oronga maira i te pauanga. Te akakite maira a Ioane e: “E kua akara atura au i taua puaka taae ra, e te au ariki o te ao nei, e to ratou au nuku tamaki, kua putuputu e tamaki iaia [Iesu] i tei noo ki runga i te oroenua ra, e i tona nuku.” (Apokalupo 19:19) Eaa te ka tupu ki te au ariki o te ao nei i roto i teia tamakianga? Ka vavai to Iehova Ariki akatainuia ia ratou “i te pāpā auri, e ungaungātiti roa [aia] mei te kapu a te potera ra,” te akakite maira te Pipiria. (Salamo 2:9) Ka takore takiriia te akatereanga poritiki. Ka “akapueurikiriki [te Patireia o te Atua] e e akapou i taua au basileia [tangata] katoa ra, e ka vai rai te reira e tuatau ua atu.”​—Daniela 2:44.

Akapeea te au tangata e patoi ra i te Patireia o te Atua? “Te akakite anga mai i te Atu ko Iesu mei te rangi maira ma tana au angera mana katoa, Ma te ai mura ra” te akatutuia maira a Iesu e ko tetai e tuku maira “i te mate i te aronga kare i kite i te Atua, e tei kore i akarongo i te evangelia.” (2 Tesalonia 1:7, 8, akaaite ia NW) “Ka tipu keia ra te aronga kino i te  enua nei, e te aronga rave ara ra, ka kiriti tumuia ïa,” te akakite maira a Maseli 2:22.

No runga i to Karaiti aerenga mai, te akakite maira te Pipiria: “I na, te aere mai na aia i roto i te tiao rangi; e akara te au mata katoa iaia.” (Apokalupo 1:7) Kare te au tangata e kite atu iaia ma to ratou mata tikai. Mei tona oki atu anga ki te rangi, e peretana vaerua a Iesu “te noo ra oki ki roto i te mārama kare e taea e te tangata katoa; ko tei kore rava oki i akaraia e te tangata katoa, e kare takiri oki e tika kia akara.”​—1 Timoteo 6:16.

Kare a Iesu e anoanoia kia mama mai ei tangata kopapa kia “akaraia” e te au tangata o te enua nei, mei ia Iehova i anoano koreia kia mama mai i tona tuku anga i te au Mate Ngauru ki runga i te au Aiphiti i te au tuatau o Mose. Kare te au tangata o taua tuatau ra i ekoko ana e ko Iehova te akatupu ra i te au mate, e kua maroia ratou i te kite i tona mana. (Exodo 12:31) Na roto katoa i te reira tu, me rave ana a Karaiti i tana angaanga ei Peretana Tamate no te Atua, ka maroia te aronga kino i te “akara” me kore i te nakiro mai, e te taangaangaia ra a Iesu e te Atua i te akava ia ratou. Ka kite ratou i teia no te mea kua akamatakiteia ana te au tangata ravarai i mua atu. Ae, ka “akara te au mata katoa [ia Iesu], e ka aue te au kopu ravarai o te ao nei iaia.”​—Apokalupo 1:7.

Te akapouanga o te aronga kino e te akaateaanga o te tutaraanga kino, e puapinga te reira i mua ake ka akatupu akaouia ai te au tikai e te puapinga ki te enua nei. Na Karaiti e akatupu i te reira. I reira aia e akaaere pu tikai ei i te au angaanga katoatoa i te enua nei, e ka aru mai te au tauianga puapinga maata a muri ake.

Tetai Akatupuanga ka Apai Mai i te Au Puapinga

Kua tuatua te apotetoro ko Petero no runga i te tuatau “e tupu ei te au mea katoa nei, ta te Atua i tuatua maira i te vaa o te au peroveta tapu katoa nona, mei te muatangana mai o teianei ao.” (Angaanga 3:21) Te kapiti maira i roto i teia akatupuanga te tauianga te ka tupu i te tuatau o to Karaiti tutaraanga. Ko tetai peroveta ta te Atua i tuatua atu no te ‘akatupuanga i te au mea katoa’ i runga nei i te enua, ko te peroveta ko Isaia, o te varu anere mataiti M.T.N. Kua totou aia e ka akatupu akaou a Iesu Karaiti, te “Ariki no te au,” i te au ki te enua nei. No runga i to Karaiti tutaraanga, te akakite maira te totou a Isaia e: “Kare e mutu te tupu anga o tona ra basileia, e tona au.” (Isaia 9:5, 6) Ka apii a Iesu i te au tangata o te enua nei kia noo au ua. Te aronga e noo ra ki te enua nei “ka rekareka ratou i te maata o te au ra.”​—Salamo 37:11.

Eaa te ka tupu ki te turanga putaua e te onge i raro ake i ta Karaiti tutaraanga? Te na ko maira a Isaia: “Ei reirā Iehova Sabaota ra e rave ei na te tangata katoa, i teianei maunga, i tetai pokai, e kai memeitaki ra, te kaingakai wina i runga i te ota; e kai matu roa ra, te wina i runga i te ota i akaareare meitakiia ra.” (Isaia 25:6) Kua imene te tata taramo: “E manga sitona okotai rima i ki i te enua nei, i runga i te take o te au maunga ra.” (Salamo 72:16) Tei runga ravao, no runga i te aronga ka noo ki te enua nei, te tatau ra tatou: “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. Kare ratou e patu, e na tetai ke e noo; kare ratou e tanu, e na tetai ke e kai: mei te au rā o te rakau nei te au rā o toku ra iti-tangata; e rekareka tei ikiia e au ra, i te angaanga a to ratou uaorai rima.”​—Isaia 65:21, 22.

Kua totou katoa a Isaia e ka ope te maki e te mate. Kua tuatua te Atua na roto ia Isaia, i te na ko anga e: “Ei reira e akapueraiaʼi te mata o te matapo ra, e e akapu tataiaʼi te taringa o te turi ra. Ei reira te pirikoki e rererere aere ei mei te aili, e imene mai oki te vaa o te murare.” (Isaia 35:5, 6) E oti “kare oki to reira e karanga e, Kua maki au.” (Isaia 33:24) Na te Atua “e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.”​—Isaia 25:8.

Akapeea te aronga mate katoatoa “i roto i te au menema akamaara anga”? (Ioane 5:28, 29, NW) Kua totou a Isaia: “Toou ra aronga mate, e ora ïa, . . . e tu akaou ïa.” (Isaia 26:19) Ae, te aronga e moe ra i roto i te mate ka akaora akaouia mai!

 “To Terono, e te Atua e, e Vai Rai e Tuatau ua Atu”

Ka arataki to Karaiti aerenga mai ki te akaou takirianga i te paraneta Enua. Ka tauiia te enua ei parataito kaka, e ka taokotaiia te au tangata ravarai i roto i te akamorianga i te Atua mou. Ka papu ainei ia tatou e ka autu a Iesu Karaiti i te takoreanga i te kino mei te enua nei e te apai anga mai i te au turanga tuatua tika?

E akamanako ana i te tumu no te mana e te tikaanga tei orongaia kia Iesu. No runga i te Tamaiti, te akakite maira te Pipiria e: “To terono, e te Atua e, e vai rai e tuatau ua atu, e sepeta tuatua-tika ïa te sepeta o toou basileia. I inangaro koe i te tuatua-tika, e te rikarika ra koe i te kino.” (Ebera 1:8, 9) To Iesu terono, koia oki, tona taoonga me kore tikaanga, kua akatumuia ki runga ia Iehova. Na te Atua i Akatumu e i Oronga mai i teia terono. Kare e manamanata e pakari roa ia Iesu i te rapakau.

I muri ake i tona akatuakaouia anga, kua akakite atu a Iesu ki tana au pipi e: “Ko te mana katoa o to te rangi e te ao katoa nei, kua tukuia mai, tei iaku anake.” (Mataio 28:18) “E kua tukuia te au angela, e te aronga mana, e te aronga au, ki raro ake iaia,” te akakite maira a 1 Petero 3:22. Kare e mana me kore e mana akataoonga e autu i te patoi atu anga ia Iesu. Kare e apinga e tapu iaia mei te oronga mai anga i te akameitakianga mutu kore ki te au tangata ravarai.

To Karaiti Aerenga Mai ka Akakeu i te Au Tangata

I roto i tana reta ki te au Tesalonia, kua tata te apotetoro ko Paulo e: “Kare oki e tivata i te manako i te ravenga o to kotou akarongo, i te angaanga o to kotou inangaro, e te akakoromaki o to kotou irinaki i to tatou Atu ia Iesu Mesia, i te aroaro o te Atua o to tatou Metua.” (1 Tesalonia 1:3) Kua karanga a Paulo e kua tupu mai te angaanga puapinga e te akakoromaki mei te manakonakoanga ki roto ia Iesu Karaiti. Te kapiti maira te reira manakonakoanga ki te akarongo i roto i to Karaiti aerenga mai e i roto i te akatupuanga ta te reira ka apai mai. Ka rauka taua au manakonakoanga i te akaora i te au Kerititiano mou, me kore kia akakoromaki ua atu rai ratou noatu te au turanga ngata tikai.

E akamanako ana i te akaraanga, o Carlos, te noo ra ki São Paulo, Paratiri. I roto ia Aukute 2003, kua kite mai a Carlos e kua tuia aia e te cancer. Mei reira mai, e varu ona vaianga tei akatupu i te au tupuanga mamae e te akaparuparu ki te kopapa. Inara, kua riro mai aia ei tumu tamou no te akamaroiroianga ki tetai ke. Ei akatauanga, iaia e tutu aere ra i runga i te mataara i mua i tetai are maki maatamaata, kua aravei atu aia i tetai Kite no Iehova, te aere ra tana tane ki te chemotherapy. I te kite mai anga i te tupuanga kino no te cancer, kua rauka ia Carlos i te oronga atu i te akamaroiroianga e te pumaana ki te tane e te vaine katoa. I muri akera, kua akakite oki raua e kua riro mai te reira pukapukaanga ei tumu tamou no te akamaroiroianga kia raua. Kua kite mai i reira a Carlos i te tikaanga o teia au tuatua a Paulo: “Ko tei akapumaana mai ia matou i to matou au mate katoa nei, kia tika ia matou kia akapumaana i te aronga i rokoia e te mate ra, i te pumaana a te Atua i pumaanaʼi matou uaorai nei.”​—2 Korinetia 1:4.

Eaa te tauturu ra ia Carlos i te kite mai i te maroiroi i te akamaroiroi tamou ua atu rai i tetai ke noatu tona maki? Te manakonakoanga i to Karaiti aerenga mai e ta te reira ka akatupu, te akakeu ra ia Carlos kia “takinga-meitaki” atu.​—Galatia 6:9.

E akamanako katoa ana i te turanga o Samuel, e kua taiaia tona teina e 50 ua mita mei te are o to raua metua tane. E tai ngauru katiriti tei pupuiia ki roto i te kopapa o tona teina. Kua vai ua te kopapa i te pae mataara e varu ora i te akava e kimikimi ra i te tumu i tupu ei teia kino. Kare e ngaropoina ia Samuel i tei tupu i taua ra ra. Inara, kua akamaroiroiia aia e te manakonakoanga e ka takore a Karaiti i te kino katoatoa mei te enua nei e ka apai mai te tutaraanga tuatua tika e aru maira i te au akameitakianga ki te au tangata ravarai. E akamanako putuputu ana a Samuel iaia uaorai e takave ra i tona teina me akatuakaouia mai i roto i te Parataito i runga nei i te enua.​—Angaanga 24:15.

 Eaa Taau ka Rave?

Ka kite mai koe i te pumaana maata i roto i te manakonakoanga o to Karaiti aerenga mai e ta te reira ka akatupu. Papu e ka akakore a Iesu Karaiti i te tumu katoatoa no te au manamanata o te tangata e te au kino te tupu nei kia tatou.

Eaa taau ka rave kia rekareka i te au akameitakianga ta te tutaraanga a Karaiti ka oronga mai ki te au tangata ravarai? E akono meitaki i tetai apii o te Tuatua a te Atua, te Pipiria. I roto i tetai pure ki tona Metua, kua karanga a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) E akariro ei akakoroanga noou kia akara matatio i ta te Pipiria e apii maira. Ka mataora te Au Kite o Iehova i roto i toou ngai i te tauturu ia koe no runga i te reira. Te pati pumaana atu nei matou ia koe kia aravei atu ia ratou me kore kia tata atu ki te aronga nenei o teia makatini.

[Au Tutu i te kapi 7]

Ka arataki to Karaiti aerenga mai ki te akaou takirianga i te enua

[Akameitakianga]

Inset, background only: Rhino and Lion Park, Gauteng, South Africa