Ka Akara Ana! E Marama Umere Tikai!

ME KUA aa aere ana koe kia kitea toou mataara i roto i te poiri, kua kite ia koe e e angaanga maata tikai. Kare e aiteia te pumaana ta te marama ka apai mai! Penei kua o katoa ana koe ki roto i tetai turanga ka tau kia akaaiteia ki te poiri. Penei kua tupu ana teia i te kore anga koe i kite e ka akapeea me rapakau i tetai manamanata. Inara kua marama marie ua mai koe​—e te vai ua ra te ravenga. Ka riro te matara anga mai mei taua tu poiri ra ki roto i te marama, ei tupuanga umere tikai.

I te anere mataiti mua, te noo ua ra te maataanga o te tangata i roto i te poiri pae vaerua. I te tuatua anga ki te aronga tei akaruke i to ratou irinakianga mua e kua ariki i te Akonoanga Kerititiano, kua tata te apotetoro ko Petero e ko: “[Te Atua] tei kapiki ia kotou i to roto i te poiri, kia tae ki tona mārama umereia ra.” (1 Petero 2:9) No ratou, kua aite rai teia ki te taui anga mai mei roto i te poiri tangotango ki roto i te marama kaka. Ka tau katoa kia akaaiteia ki te noo taaka ua anga ma te kore e manakonakoanga e te riro mai anga ei mema no tetai pamiri tei rauka te turanga tinamou no te tuatau ki mua.​—Ephesia 2:1, 12.

“Kua Vaoo Koe i to Inangaro Mua Ra”

Kua kitea i te au Kerititiano mua “te tuatua-mou”​—koia oki te akarongo Kerititiano mou. (Ioane 18:37) Kua kitea ia ratou te marama umereia o te tuatua mou e kua taui mai mei te poiri pae vaerua ki te marama akakakaia. Inara i te openga, kua apikepike te inangaro e te maroiroi mua ta te au Kerititiano i kite ana. Ei akaraanga, kia tae ki te openga o te anere mataiti mua, kua tupu mai tetai aka manamanata i roto i te putuputuanga i Ephesia. Kua akataka mai a Iesu Karaiti tei akatu akaouia, i te manamanata i te na ko anga mai e: “Te vai nei ra taku akaapa anga ia koe, i te mea kua vaoo koe i to inangaro mua ra. E tenana, ka maara i toou inga anga, e tataraara, e rave i te angaanga mua ra.” (Apokalupo 2:4, 5) Kua anoanoia te au Kerititiano i Ephesia kia akaora akaou i to ratou inangaro no te Atua e no te tuatua mou.

Peea tatou? Kua kite katoa ana tatou i te rekareka i te kite anga i te marama, i te kite anga i te tuatua mou umereia o te Tuatua a te Atua. Kua rauka ia tatou te inangaro no te tuatua mou. Inara ka riro te au tu ngata matau uaia ki te tangata i te akaiti mai i to tatou inangaro no te tuatua mou. Penei ka kapiti mai teia i te au manamanata o te “tuatau openga.” Te noo nei tatou i roto i tetai ao tei ki ua i “te kino maata”​—e ao tei ki i te au tangata tei “akaperepere ia ratou uaorai, ei noinoi, ei akatietie, ei nengonengo, ei akakino, ei akarongo kore ki te metua, ei mareka kore.” (2 Timoteo 3:1, 2) Ka riro to ratou tu ei akaiti mai i to tatou maroiroi e te akaapikepike i to tatou inangaro no Iehova.

Me kua ngaro to tatou inangaro mua, ka anoanoia tatou kia ‘maara i to tatou inga anga e kia tataraara.’ Ka anoanoia tatou kia oki akaou ki to tatou turanga pae vaerua mua. Tetai, kia matakite katoa tatou auraka e akatika kia iti ua to tatou inangaro no te tuatua mou. E mea puapinga tikai kia tamou marie tatou i te manakonakoanga papu e te mataora e kia vai ua rai to tatou inangaro no te Atua e no tana tuatua mou!

‘Te Tuatua-Mou te ka Akarangatira ia Koe’

E mea umere tikai te marama tuatua mou o te Tuatua Tapu no te mea te oronga maira te Pipiria i te au uianga puapinga tei akaekoko ana i te tangata no te au tauatini ua atu au mataiti. Teia  oki tetai o taua au uianga ra: Eaa ta tatou angaanga i konei? Eaa te akakoroanga o te oraanga? Eaa te kino i vai ua ai? E oraanga ainei tetai i muri ake i te matenga? Kua akamarama mai a Iehova i teia au apiianga umere o te tuatua mou kia tatou. Kare ainei i te mea tau kia akaari tatou i te akameitakianga ma te ngakau rekareka? Kia akaperepere tatou i ta tatou i mou mai i te apii!

Kua akakite a Iesu ki tana au pipi: “Ka kite ïa kotou i te tuatua-mou, e na te tuatua-mou kotou e akarangatira.” (Ioane 8:32) Na te atinga oko a Iesu i rauka ai te rangatiraanga mei te ara e te mate. Kua akarangatira katoa mai teia au tuatua mou akaperepereia ia tatou mei te tu kite kore e te au tu papu kore o tetai ao tei tapokiia e te poiri. Na te akamaaraara anga ma te ariki rekareka i ta tatou i mou mai i te apii, e tauturu ia tatou i te akamatutu i to tatou inangaro no Iehova e no tana Tuatua.

Ki te au Kerititiano i Tesalonia, kua tata te apotetoro ko Paulo: “I te mea, ka āriki mai ei kotou i te tuatua a te Atua ta kotou i kite ia matou nei, kare kotou i āriki ei tuatua na te tangata, ei tuatua ra na te Atua, e koia tika rai oki, ko tei angaanga maroiroi i roto ia kotou i tei akarongo ra.” (1 Tesalonia 2:13) Kua akarongo to Tesalonia e kua ‘āriki oki i te tuatua [a te Atua] ma te rekareka.’ Kare ratou “i roto i te poiri.” Mari ra, kua riro mai ratou ei ‘tamariki anake no te mārama.’ (1 Tesalonia 1:4-7; 5:4, 5) Kua rauka i taua au Kerititiano ra i te kite e ko Iehova Tei Anga mai e e mana katoatoa aia, e pakari, e aroa, e te tangi. Mei etai atu au pipi a Karaiti, kua apii katoa ratou e kua oronga mai a Iehova i tetai ravenga ei tapara i te ara na roto i te atinga oko a tana Tamaiti, ko Iesu Karaiti.​—Angaanga 3:19-21.

Noatu kare to Tesalonia i kite katoatoa i tei anoanoia kia kite no runga i te tuatua mou, kua kite ra ratou i te ngai e rauka ai te kite. Ka rauka i te au Tuatua Tapu i te akariro i te tangata o te Atua kia “tau tikai i te au angaanga memeitaki katoa ra.” (2 Timoteo 3:16, 17) Ka rauka i te au Kerititiano i Tesalonia kia apii atu rai, ma te kite mei tera taime ki tera taime e e mea umere tikai te marama no ko mai i te Atua. E tumuanga tau to ratou kia rekareka i te au taime ravarai. (1 Tesalonia 5:16) E pera katoa oki tatou.

E Turama i to Tatou Arataa

I te akakite anga i te tumu i riro ei te marama ei mea meitaki roa, kua imene te tata taramo: “E lamepa taau tuatua i toku nei vaevae, e turama no toku nei arataa.” (Salamo 119:105) Ka tauturu te aratakianga tu-Atua e rauka maira ia tatou mei te Tuatua a te Atua, kia tuku i tetai kaveinga papu, e kia rekareka i tetai akakoroanga mareka ua i te oraanga. Kare tatou e inangaro kia aite ki te pai e panu aere ra. Na te kite anga i te tuatua mou e te taangaanga anga i te reira e paruru ia tatou mei te “akapeke aereia e te matangi ra, i tera tuatua i tera tuatua.”​—Ephesia 4:14.

“Auraka e irinaki ki te ui ariki, i te tamaiti a te tangata nei, kare oki ona ora,” e akakite ra te Pipiria. Te na ko katoa ra te reira e: “E ao tona tei te Atua o Iakoba te tauturu iaia; tei tona Atua tei ia Iehova tona irinaki anga.” (Salamo 146:3, 5) Tetai katoa, ka riro te tuku anga i te irinaki ki roto ia Iehova ei tauturu ia tatou kia autu i te mataku e te manako apiapi. Kua tata te apotetoro ko Paulo e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) Ka puapinga tikai tatou kia aratakiia e te marama o te Tuatua a te Atua.

Kia Kaka ei Au Turama i Teia Ao

Tetai tumu ke i riro ei te marama mei te Tuatua a te Atua ei mea umere tikai koia oki, te akatuera maira te reira i te tuatau no te tukuanga angaanga ngateitei roa atu tei orongaia mai ki te  tangata. Kua ikuiku a Iesu i tana au pipi: “Ka aere . . . e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.” Kua akamata aia i te akauenga i te na ko anga e: “Ko te mana katoa o to te rangi e te ao katoa nei, kua tukuia mai, tei iaku anake.”​—Mataio 28:18-20.

E akamanako ana e koai te tauturu maira i te au Kerititiano mou i roto i te angaanga tutu aere i te tuatua meitaki e te apii i te tuatua mou o te Pipiria ki te tangata ravarai i te pa enua katoa. Kua taputou mai a Iesu ki tana au pipi e tei vaitata uaorai aia ia ratou. E tika roa e te turuturu maira aia ia ratou i roto i ta ratou angaanga orometua ia ratou e ‘akakakā ra i to ratou mārama’ na roto i taua mataara ra e na roto i etai atu au “angaanga meitaki.” (Mataio 5:14-16) Kua o katoa mai te au angera ki roto i teia angaanga tutu evangeria. (Apokalupo 14:6) Akapeea ra te Atua ko Iehova? Kua tata te apotetoro ko Paulo e: “Naku oki i tanu, na Apolo i tamauu ki te vai; na te Atua ra i akatupu.” E akameitakianga ngateitei tikai kia piri atu ki te au ‘oa rave angaanga no te Atua’!​—1 Korinetia 3:6, 9.

E akamanako katoa, e te akameitakiia ra ta tatou au tautaanga maroiroi i roto i teia angaanga ta te Atua i oronga mai. Kare e mea e tau kia akaaiteia ki to tatou tikaanga ngateitei i oronga mai te Atua kia ‘kakā i rotopu ia ratou mei te rama i teianei ao.’ Na te akaata anga i te marama o te Tuatua a te Atua i roto i ta tatou au tuatuaanga e te au angaanga, te oronga ra tatou i te tauturu tau ki te aronga tei tika te ngakau. (Philipi 2:15) E ka rauka ia tatou kia pereperekavana, ia tatou e tutu aere ra e te apii maroiroi no te mea, ‘kare te Atua i te Atua tuatua-tika kore, ka akangaropoina atu ei i ta tatou angaanga i rave, e to tatou anoano, i tona ingoa i akakite puia e tatou.’​—Ebera 6:10.

‘Oko i te Vairakau Mata ei Amo Io Mata’

I roto i tetai karere ki te putuputuanga o Laodekea i te anere mataiti mua, kua tuatua a Iesu; “E oko mai iaku nei . . . e e amo oki i oou mata i te vairakau mata, kia kite koe. Ko taku katoa e akaperepere ra, ko taku ïa e ako e e pāpā oki.” (Apokalupo 3:18, 19) Ko te rapakau tau tikai no te matapo pae vaerua koia oki ko te “vairakau mata”​—te au apiianga e te au akoanga a Iesu. Me inangaro tatou i te tamou marie i tetai manakonakoanga tau no to tatou turanga pae vaerua, kia ariki tatou i tana akoanga e kia kauraro ki te reira e pera katoa ki te aratakianga ka kiteaia i roto i te Pipiria. Kia akatupu katoa tatou i te tu ngakau mei to Karaiti e kia aru i tana akaraanga. (Philipi 2:5; 1 Petero 2:21) Kare e rauka ua mai te vairakau mata ma te kore e tutaki. Kua tuatua a Iesu: “E oko mai [i te reira] iaku nei.” Ka o mai to tatou taime e te maroiroi ki roto i te tutaki anga.

Me akaruke tatou i tetai ngai poiri e ka tomo atu ei ki tetai pia marama, ka pou rai tetai taime i mua ake ka matau ei to tatou mata i te marama. Mei te reira katoa, te apii i te Tuatua a te Atua ka pou rai tetai taime e rauka ai te marama o te tuatua mou. Ka pou rai tetai taime i te akamaaraara no runga i ta tatou i apii e i te akamanako no runga i te puapinga maata o te tuatua mou. Inara kare e maata te ka pou. No teaa ra? No te mea, e marama umere tikai teia!

[Tutu i te kapi 14]

“E oko mai iaku nei . . . e e amo oki i oou mata i te vairakau mata, kia kite koe”