“Manono Roa Maira Aia ia Matou”

I TE pa enua i te pae Itinga, e mea matauia te ariki maoraora ua i te taeake. Ei akaraanga, i Initia ka akangere tetai pamiri ia ratou i te kai kia rauka i te angai atu i tetai manuiri kare i tapapaia ana. I Irana, ka akaki ua rai tetai metua vaine i te pia akaanuanu kai ki te kai kia rauka iaia i te ariki maoraora atu i te au taeake tapapa koreia.

E kite matauia ana taua tu maoraora ra i rotopu i te au tangata e taikuia maira i roto i te Pipiria. Tetai akaraanga takake roa koia oki ko Ludia, penei e vaine poroteraita ngati Iuda e noo ra i Philipi, te oire maata o te tapere Makedonia. I tetai ra Tapati, kua aravei te apotetoro ko Paulo e tona au taeake teretere, ia Ludia e etai au vaine e putuputu ra i te pae kauvai i vao mai i te oire ko Philipi. Kua akamaora atura Iehova i tona ngakau ia Paulo e tuatua ra i taua atianga ra. Tei tupu, kua papetitoia aia e etai au mema ke mai o tona ngutuare. E kua pati mari atura aia i te au taeake teretere: “Te tuatua na kotou e, e tuatua-mou taku i te Atu, ka aere mai ki roto i toku are nei noo ei.” Kua akakite a Luka te tokorua o Paulo: “[Kua] manono roa maira aia ia matou.”​—Angaanga 16:11-15.

Mei ia Ludia, te ariki nei rai te au Kerititiano i teia tuatau i te au oa irinaki ei au manuiri, mei te au akaaere tutaka rai e ta ratou au vaine. Mei te reira rai te au pu ngutuare i te ‘manono ua mai ia ratou kia aere atu.’ I te openga, kua akameitakiia te aronga e ariki maoraora maira, na roto i te au pukapukaanga akamaroiroi e te taokotaianga pae vaerua. Noatu kare e maata ana te moni a te maataanga o te Au Kite o Iehova, te rave ‘matau nei rai ratou i te takinga-meitaki i te tangata ke ra.’ (Roma 12:13; Ebera 13:2) To ratou vaerua oronga kua riro ei akarekareka ia ratou. E tika rava ta Iesu i tona tuatua anga e: “E mea meitaki i te oronga atu i te rave mai.”​—Angaanga 20:35.