Te Au Angera​—Akapeea Ratou i te Akakeu Anga i te Tangata Ravarai

“E i muri ake i te reira, kite atura au i tetai angela ke, i te eke anga mai mei te rangi mai, e mana maata tona; . . . Kua kapiki nui ua maira aia ma te reo maata, na ko maira, Kua inga Babulonia maata e, kua inga.”​—APOKALUPO 18:1, 2.

1, 2. Eaa te akaari maira e te taangaanga nei a Iehova i te au angera i te rave i tona anoano?

I TONA tuikaaia anga i runga i te airani o Patamo, kua orongaia te au orama totou ki te apotetoro kua ruaine ko Ioane. Kua kite atu aia i te au tupuanga umere tikai e i te “akauruia” anga kua tae atu aia ki “te rā o te Atu ra.” Kua akamata te reira ra ki te akaterono anga o Iesu Karaiti i te 1914 e tae rava atu ki te openga o tona Tutara Anga Tauatini Mataiti.​—Apokalupo 1:10.

² Kare te Atua ko Iehova i oronga tika atu i teia eeuanga kia Ioane. Kua taangaanga aia i tetai ravenga. Te akakite maira a Apokalupo 1:1 e: “Te eeuanga a Iesu Mesia, ta te Atua i tuku mai iaia ra, kia akakite atu aia i tona au tavini i te au mea e vaitata i te tupu ra; e kua unga maira aia i tana angela e kua akakite maira ki tona nei tavini ia Ioane.” Na roto ia Iesu, kua taangaanga a Iehova i tetai angera kia akakite atu kia Ioane i te au apinga umere no runga i “te rā o te Atu ra.” I tetai atianga, kua “kite atura [a Ioane] i tetai angela ke, i te eke anga mai mei te rangi mai, e mana maata tona.” Eaa te angaanga a teia angera? “Kua kapiki nui ua maira aia ma te reo maata, na ko maira, Kua inga Babulonia maata e, kua inga.” (Apokalupo 18:1, 2) Kua rauka i teia angera ririnui te tikaanga kia akono i tetai akakiteanga no runga i te inga anga o Babulonia Maata, te patireia akonoanga pikikaa o te ao nei. No reira, kare e ekokoanga e e taangaanga ana a Iehova i te au angera i roto i tetai mataara puapinga tikai i te rave anga i tona anoano. I mua ake i te akara matariki anga i te angaanga a te au angera i roto i ta te Atua akakoroanga e i akapeea ratou i te akakeuanga ia tatou, ka akamanako ana tatou i te kapua angaia teia au angera ora.

Akapeea te Au Angera i te Angaia Mai Anga?

3. Eaa te irinakianga tarevake ta te tangata e manganui e manako ra no runga i te au angera?

³ I teia tuatau, e irinaki ana te au mirioni ua atu tangata e te vai ua nei te au angera. Inara e manganui te manako tarevake ra ia ratou e to ratou kapua angaia mai. Ei akaraanga, e manako ana tetai au tangata aere pure e me mate ana tetai tangata akaperepere, kua kapikiia te reira tangata ki te Atua e kua riro mai aia ei angera. Ko tera ainei ta te Tuatua a te Atua e apii maira no runga i te au mea i angaia mai, to ratou vai ua anga, e te akakoroanga o te au angera?

4. Eaa ta te au Tuatua Tapu e akakite maira no runga i te kapuaanga o te au angera?

⁴ Te angera tei maata rava atu i roto i te ririnui e te mana taoonga​—te pu angera​—ko Mikaela tona ingoa te angera maata. (Iuda 9) Ko Iesu Karaiti taua angera ra. (1 Tesalonia 4:16) I te au tuatau kitea koreia i to Iehova akakoroanga kia riro mai e ko Tei Anga mai, te apinga mua tikai tana i anga mai koia oki ko teia Tamaiti angera nei. (Apokalupo 3:14) I muri akera, na roto i tana Tamaiti anau tai, kua anga a Iehova i te au vaerua ora katoatoa. (Kolosa 1:15-17) I te taiku anga ki teia au angera ora ei tamariki nana, kua pati atu a Iehova i te pateriareka ko Iobu e: “Iea koe iaku i akatumu i te enua nei? ka akakite mai na, peneiake te kite na koe . . . e naai i tuku i te toka kapueutara? Ka imene katoatoaʼi te au etu popongi, e kua maeva ua te au tamariki a te Atua i te rekareka.” (Iobu 38:4, 6, 7) Te taka meitaki ua ra e, na te Atua i anga mai i te au angera, e kua angaia mai ratou i mua roa ake i te au tangata.

5. Akapeea te au angera i te akanooia anga?

 ⁵ “Kare oki te Atua i te tumu o te kononinoni pu ua, no te au ra,” te akakite maira a 1 Korinetia 14:33. Ma te tau, kua akanoo a Iehova i tana au tamariki vaerua ki roto i tetai pupu e toru: (1) te au terapi, te angaanga ra ei rima rave i te terono o te Atua, te akakitekite ra i tona tu tapu, e te akono ra i tona iti tangata kia ma i te pae vaerua; (2) te au kerupi, te akono ra i to Iehova ngateitei; e te (3) te au angera ke mai te rave ra i tona anoano. (Salamo 103:20; Isaia 6:1-3; Ezekiela 10:3-5; Daniela 7:10) Eaa tetai au mataara e akakeu ra teia nuku vaerua ora i te tangata ravarai?​—Apokalupo 5:11.

Eaa te Angaanga a te Au Angera e Akono Ra?

6. Akapeea a Iehova i te taangaanga anga i te au kerupi i roto i te kainga i Edene?

⁶ Te taikuanga mua tikai ki te au vaerua ora kua akakiteia ia Genese 3:24, e te tatau ra tatou e: “Kua tuaru atura [Iehova] i te tangata ki vao; kua tuku iora aia i te au Kerubi, ma te koke mura i te koraparapa ua anga, i te pae i te itinga o te ra i taua kainga i Edene ra, ei tiaki i te ara i te rakau o te ora ra.” Kare teia au kerupi i akatika ana ia Adamu raua ko Eva kia oki akaou ki to raua kainga mua. Ko te akamataanga te reira o te tuatua enua o te tangata nei. Eaa te angaanga a te au angera e akono ra mei te reira taime mai?

7. Eaa te aiteanga o te au tuatua i te reo mua no te “angera” te akaari maira no runga i tetai angaanga ta te au angera i akono ra?

⁷ Vaitata rai e e 400 taime te taikuia anga te au angera i roto i te Pipiria. Ka rauka te au tuatua Epera e te au tuatua Ereni no te “angera” i te uriia e e “karere.” Kua angaanga i reira te au angera ei ravenga no te komunikeitianga i rotopu i te Atua e te tangata. Mei tei akakiteia i roto i te nga parakarapa mua o teia atikara, kua taangaanga a Iehova i tetai angera kia akakite i tana karere ki te apotetoro ko Ioane.

8, 9. (a) Akapeea te au atoroanga mei tetai angera i te akakeuanga ia Manoa raua ko tana vaine? (e) Eaa ta te au metua ka tamou mai mei to Manoa aravei atu anga i te angera a te Atua?

⁸ E taangaanga katoaia ana te au angera kia oronga i te turuturu e te akamaroiroianga ki te au tavini o te Atua i runga nei i te enua. I te tuatau o te au Akava i Iseraela, ei akaraanga, kua inangaro tikai a Manoa e tana vaine pa i tetai tamaiti. Kua tono atu a Iehova i tana angera kia akakite ki te vaine a Manoa e ka anau mai aia i tetai tamaiti. Te akakite maira te tataanga kia tatou: “I na oki! ka to koe, e e tamaiti taau e anau; auraka rava ra ei reta e tae ki runga i tona mimiti: ei Nazira oki tenana tamaiti na te Atua mei te kopu mai: e nana e akamata i te akaora ia Iseraela i te rima o te Philiseti ra.”​—Te Au Akava 13:1-5.

⁹ I te openga kua anau mai te vaine a Manoa i tetai tamaiti, ko Samasona, tei riro mai ei tangata rongonui i roto i te tuatua enua Pipiria. (Te Au Akava 13:24) I mua ake i anau mai ei te pepe, kua pati atu a Manoa e kia oki akaou mai te angera kia raua i te ikuiku ia raua i ta raua ka rave i te utuutuanga i te tamaiti. Kua ui atu a Manoa: “E akapeea i te akonoanga i taua tamaiti nei? eaa te ravenga iaia?” Kua ripiti te angera a Iehova i tana au ikuikuanga i oronga atu ki te vaine a Manoa. (Te Au Akava 13:6-14) Mei teaa tikai to Manoa akamaroiroiia anga! Kare te au angera e atoro ana i te au tangata mei te reira tu rai i teia tuatau nei, inara mei ia Manoa rai, ka rauka te au metua i te kimi i to Iehova manako no runga i te terenianga i ta ratou tamariki.​—Ephesia 6:4.

10, 11. (a) Akapeea a Elisaia e tona tavini i te akakeuia anga i te kaitamaki mai anga te vaeau o Suria? (e) Akapeea tatou e puapingaia ai i te akamanakoanga i teia tupuanga?

 ¹⁰ E akaraanga umere rava tikai tetai no te tauturu a te angera i te tuatau o te peroveta ko Elisaia. Te noo ra a Elisaia i Dotana, tetai oire i Iseraela. I tetai ra i te ara vave anga te tavini o Elisaia i te popongi ra e kua akara atu ki vao, kua kite atu aia i te oire e koropiniia ra e te au oroenua e te au kariota tamaki. Kua tono atu te ariki o Suria i tetai pupu vaeau ririnui i te opu ia Elisaia. Eaa ta te tavini o Elisaia i rave? Ma te mataku, penei kare i kite ana e ka akapeea aia, kua aue aia: “Aue, e taku pu e! Akapeea tatou nei?” Kiaia, i te akaraanga e puapinga kore ua to raua turanga. Inara kua pau atu a Elisaia: “Auraka e mataku: e maata oki to tatou pae, e iti to ratou.” Eaa te aiteanga o tana tuatua?​—2 Ariki 6:11-16.

¹¹ Kua kite meitaki a Elisaia e tei reira te nuku angera i te tauturu iaia. Inara, kare tona tavini i kite ana i tetai apinga. E no reira kua “pure aturā Elisaia, e karanga atura, e Iehova e, teia taku tuatua kia koe, e akapuera koe i tona mata kia kite aia. Kua akapuera akerā Iehova i te mata o taua tangata ou ra; kite atura aia: e i na, kua ki te maunga i te oroenua e te kariota ai i te akapini anga ia Elisaia ra.” (2 Ariki 6:17) I reira te tavini i kite atu ei i te nuku angera. Ma te kite pakari i te pae vaerua, ka rauka katoa ia tatou i te kite atu e ko te au angera, tei raro pouroa i te aratakianga a Iehova raua ko Karaiti, te oronga ra i te tauturu e te paruruanga ki te iti tangata o Iehova.

Turu Anga a te Angera i te Tuatau o Karaiti

12. Eaa te turuanga ta Maria i rauka no ko i te angera ko Gaberiela?

¹² E akamanako ana i te turuturuanga ta te vaine paretenia ngati Iuda ko Maria i rauka mai i te rongo anga i te nuti: “Ka to oki koe, e ka anau taau tamaiti, e naau e tapa i te ingoa ia Iesu.” I mua ua ake i te oronga anga i teia karere poitirere tikai, kua karanga atu te angera ko Gaberiela, ta te Atua i tono atu kiaia e: “Auraka e mataku, e Maria; kua kite aroaia mai koe e te Atua.” (Luka 1:26, 27, 30, 31) Mei teaa atura to Maria akamaroiroiia anga e te akaketaketaia anga e teia au tuatua ei akapapuanga e te akaperepere maira te Atua iaia!

13. Akapeea te au angera i te turuanga ia Iesu?

¹³ Tetai taime akaou i turu mai ei te angera, kua tupu mai i muri ake i to Iesu patoianga i te au timataanga e toru ta Satani i tuku atu Kiaia i roto i te metepara. Te akakite maira te tataanga kia tatou e i te openga o teia au timataanga, “akaruke iora te diabolo iaia, e i na, e aronga angela tei aere mai, e kua matuapuru maira iaia.” (Mataio 4:1-11) Kua tupu tetai apinga aiteite i te po i mua ake ka mate ei a Iesu. Ma te taitaia, kua tuturi a Iesu e kua akamata aia i te pure, i te na ko anga: “E taku Metua, kia tika ia koe ra,  e apai ke atu koe i teianei kapu: kia tupu ra toou anoano, auraka toku. Kua mama maira tetai angela no te rangi mai kiaia, kua akamaroiroi maira iaia.” (Luka 22:42, 43) Inara eaa te tu turuanga a te angera e rauka mai ana ia tatou i teia tuatau nei?

Te Turuanga a te Angera i Roto i Teia Tuatau Nei

14. Eaa te takinga kino anga ta te Au Kite o Iehova e akakoromaki ra i teia tuatau nei, e eaa i reira tei tupu mai?

¹⁴ Me akamanako tatou i te tuatua enua o te angaanga tutu anga a te Au Kite o Iehova, kare ainei tatou e kite ana i te akapapuanga o te turuanga a te angera? Ei akaraanga, kua rauka te iti tangata o Iehova i te autu i te tamakianga a te Nazi i Tiamani e te Opunga o Europa i mua ake e i te tuatau o te Tamaki II o te Ao (1939-45). I raro ake i te tutaraanga Fascist a te Katorika i Itaria, Paniora, e Potukara, kua kite atu ratou i te takinga kino anga no tetai tuatau roaroa atu. E no te au ngauru mataiti, kua akakoromaki ratou i te takinga kino anga i roto i te Toviete Unioni taito e te au pa enua i raro ake i tana akatereanga. Auraka e ngaropoina te takinga kino anga ta te Au Kite i akakoromaki i roto i tetai au pa enua o Aperika. * I teia tuatau ua akenei, kua tupu te takinga kinoanga kino pakari ki te au tavini o Iehova i roto i te enua o Tiotia. Kua rave a Satani i te au apinga katoatoa i roto i tona mana i te akakore i te angaanga a te Au Kite o Iehova. Inara, ei akaaerenga, kua ora mai ratou mei te reira patoianga e kua ruperupe. Kua tupu teia, ei tuanga, no te paruruanga ta te au angera e oronga maira.​—Salamo 34:7; Daniela 3:28; 6:22.

15, 16. Eaa te turuanga a te angera ta te Au Kite o Iehova e kite maira i roto i ta ratou angaanga orometua i te ao katoa?

¹⁵ E tamou meitaki ana te Au Kite o Iehova i ta ratou angaanga kia tutu aere i te tuatua meitaki no te Patireia o te Atua takapini i te ao katoa e te akariro ra i te au tangata ei pipi na te apiianga i te tuatua mou Pipiria ki te au tangata e inangaro ra  i te au ngai ravarai. (Mataio 28:19, 20) Inara, kua kite meitaki ratou e kare e rauka ia ratou i te akatupu i teia angaanga ma te kore te turuanga a te au angera. No reira, kua riro tei akakiteia ia Apokalupo 14:6, 7 ei tumu tamou no te akamaroiroianga kia ratou. Te tatau ra tatou ki reira e: “Akara atura au [te apotetoro ko Ioane] i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata, I te na ko anga ma te reo maata, Ka mataku i te Atua, e akakakā iaia; kua tae oki ki te ora akautunga anga nana; e akamori kotou iaia i tei anga i te rangi, e te enua, e te tai, e te au vai pupui ra.”

¹⁶ Te akakite meitaki ua maira teia au tuatua e te angaanga tutu anga maata a te Au Kite o Iehova takapini i te ao katoa, te turuturuia ra e te aratakiia ra e te au angera. Te taangaanga ra a Iehova i tana au angera i te arataki i te au tangata ngakau tae ki tona Au Kite. Kua arataki katoa te au angera i te Au Kite ki te aronga e tau ra. Te akamarama maira teia i te tumu e i te au atianga e manganui​—e putuputu roa teia i te akamanakoia ei mea tupu ua mai—​kua aravei atu tetai o te Au Kite o Iehova i tetai tangata i te taime tikai e tupu ra tetai manamanata kiaia e te inangaro ra aia i tetai tauturu pae vaerua.

Tetai Tuanga Puapinga Tikai Kare e Roa Atu Ana

17. Akapeea to Asura tamaki atu anga ki te angera okotai?

¹⁷ Kapiti katoa i te tavinianga ei au karere e ei au tauturu akamaroiroianga ki te aronga akamori o Iehova, e akakoroanga ke atu ta te au angera e akono ra. I te au tuatau i topa, kua akono ratou i te au akavaanga tu-Atua. I te tuatau o te varu anere mataiti M.T.N., ei akaraanga, kua tamatakuia a Ierusalema e te nuku maata o te vaeau o Asura. Eaa ta Iehova i rave? Kua karanga aia: “Naku oki e tiaki i teianei oire kia ora, noku uaorai, e no toku tavini no Davida.” Te akakite maira te tataanga Pipiria kia tatou e eaa tei tupu: “Kua aere iora te Angela a Iehova i taua po ra ki vao, kua ta iora i to te puakapa o Asura ra, okotai anere, e varu ngauru ma rima, i te tausani: e kia tu mai te aronga i toe kia popongi ake, i na, e turuma anake.” (2 Ariki 19:34, 35) Mei teaa tikai te puapinga kore ua i te nuku vaeau o te tangata nei me akaaiteia ki te maroiroi o tetai angera okotai ua!

18, 19. Eaa te tuanga puapinga ta te angera ka akatupu i te tuatau ki mua e vaitata mai nei, e akapeea te reira i te akakeuanga i te au tangata ravarai?

¹⁸ Ka taangaangaia te au angera ei au nuku akavaanga na te Atua i te tuatau ki mua e vaitata mai nei. Kare e roaia atu ana, ka aere mai a Iesu “ma tana au angela mana katoa ra, Ma te ai mura ra.” To ratou akakoroanga koia oki ko te apai anga mai i te “mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia.” (2 Tesalonia 1:7, 8) Mei teaa tikai te akatupuanga ta teia ka rave ki runga i te au tangata ravarai! Te aronga tei patoi i te akarongo atu ki te tuatua meitaki o te Patireia o te Atua te akakitekiteia nei i teianei i te enua katoa, ka kite mai i te akapouanga. Ko te aronga anake ua e kimi ra ia Iehova, te tuatua tika e te akaaka ka “uunaia i te rā e riri ei a Iehova ra” e kare ratou e takinoia.​—Zephania 2:3.

¹⁹ Ka rekareka tatou e e taangaanga ana a Iehova i tana au angera ririnui kia tauturu e kia akamaroiroi i tana aronga akamori i te enua nei. To tatou maramaanga i te tuanga ta te au angera e akono ra i roto i ta te Atua akakoroanga, e akapumaanaanga tikai, i te mea e kua meameaau tetai au angera ia Iehova e kua aere mai ki raro i te aratakianga a Satani. Ka uriuri te atikara e aru maira i te au takainga ta te au Kerititiano mou ka rave i te paruruanga ia ratou uaorai mei te akakeuanga ririnui a Satani te Tiaporo e tana au temoni.

[Tataanga Rikiriki i Raro]

Eaa Taau i Kite?

• Akapeea te au angera i te angaia mai anga?

• Akapeea te au angera i te taangaangaia anga i te au tuatau Pipiria?

• Eaa ta Apokalupo 14:6, 7 e akakite maira no runga i te angaanga a te au angera i teia tuatau?

• Eaa te tuanga puapinga ta te au angera ka rave kare e roa atu ana?

[Au Uianga Apii]

[Tutu i te kapi 22]

Kua akamaroiroiia a Manoa raua ko tana vaine e tetai angera

[Tutu i te kapi 23]

“E maata oki to tatou pae, e iti to ratou”