Te Au Temoni​—Akapeea Tatou i te Patoi Anga ia Ratou?

“E te au angela katoa ko tei kore i akono i ta ratou orai taoonga ra, akaruke iora ra i to ratou nooanga tikai, ko tei tapekaia ïa e [te Atua] i te pirianganaoa matara kore ki raro ake i te poiri, e tae ua atu ki te akavaanga i te rā maata ra.”​—IUDA 6.

1, 2. Eaa te au uianga ka uiia no runga ia Satani e te au temoni?

“E AKONO meitaki, e matakite,” i akamatakite mai ei te apotetoro ko Petero. “Te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.” (1 Petero 5:8) No runga i te au temoni, te karanga maira te apotetoro ko Paulo e: “Kare oki au i inangaro e kia kapiti katoa kotou i te akamori demoni. Kare e tika ia kotou kia inu i te kapu a te Atu, e te kapu a te au demoni: kare e tika ia kotou kia kai i te kaingakai a te Atu ra, e te kaingakai a te au demoni.”​—1 Korinetia 10:20, 21.

² Koai ra, a Satani e te au temoni? Akapeea e i naea ratou i te kapua angaia mai? Na te Atua ainei i anga mai ia ratou? Eaa te ririnui o to ratou akakeuanga i rungao i te au tangata? Eaa to tatou paruruanga, me te vai ra tetai, i te patoi atu ia ratou?

Akapeea a Satani e te Au Temoni i te Kapua Angaia Mai?

3. Akapeea tetai angera a te Atua i riro mai e ko Satani te Tiaporo?

³ I te akamataanga o te tuatua enua o te tangata nei, i te akamata mai anga te tangata i roto i te kainga i Edene, kua meameaau tetai angera a te Atua. Eaa te tumu? No te mea kare aia i mareka ana i tana angaanga i roto i ta Iehova akanoonooanga i te rangi. I te angaia mai anga a Adamu raua ko Eva, kua kite mai aia i tetai tuatau i te akaariu ke i to raua akarongo e te akamorianga mei te Atua mou Kiaia. Na te meameaauanga i te Atua e te akavareanga i te nga tokorua mua kia aruaru i tetai tu oraanga ara, na teia angera rai i akariro iaia uaorai ko Satani te Tiaporo. Aere rai, kua piri katoa mai tetai au angera ki roto i tana meameaauanga. Akapeea?​—Genese 3:1-6; Roma 5:12; Apokalupo 12:9.

4. Eaa ta tetai au angera meameaau i rave i mua ake i te Vaipuke i te tuatau o Noa?

⁴ Te akakite maira te au Tuatua Tapu ia tatou e  i tetai taime i mua ake i te Vaipuke maata i te tuatau o Noa, kua akamata tetai au angera i te akara tuke ake rai i te au vaine i te enua nei. No tetai akakoroanga tarevake, “kua akara akera te tamariki [i te rangi] a te Atua ra i te au tamaine a te tangata nei, e te purotu ra,” e akakite maira te Pipiria, “kua rave iora ratou i ta ratou i anoano ra, ei vaine.” Kare teia au akapirianga i te mea natura, e kua anau mai ratou i te aronga toa tei kiteaia e ko te Nepirimi. (Genese 6:2-4) Te au vaerua ora i reira tei akarongo kore i te Atua kua piri atu ki roto i ta Satani akameameaau anga ia Iehova.

5. Eaa tei tupu ki te aronga meameaau i te apai anga mai a Iehova i te takoreanga na roto i te Vaipuke maata?

⁵ I te apai anga mai a Iehova i te Vaipuke ki rungao i te au tangata ravarai, kua matemate te Nepirimi e to ratou au metua vaine. Kua maroia te au angera meameaau kia taui i to ratou au kopapa tangata e kia oki akaou ki te ngai o te vaerua. Inara, kare i rauka ia ratou i te oki akaou ki “to ratou nooanga tikai” ki te Atua. Mari ra, kua tukunaia atu ratou ki roto i te “poiri [pae vaerua] i te po,” tei kiteaia e ko Tateraiti.​—Iuda 6; 2 Petero 2:4.

6. Akapeea te au temoni i te akavareanga i te tangata?

⁶ I te ruti anga te au angera kino i “to ratou nooanga tikai,” kua riro mai ratou ei au oa temoni no Satani e kua akono ratou i tana au inangaro kino. Mei te reira taime mai, kare o te au temoni mana akaou i te taui ei au kopapa tangata. Inara, ka rauka ia ratou i te akavare i te au tane e te au vaine kia piri atu ki roto i te au tu ainga tau kore tukeke. E maroiroi katoa ana te au temoni i te akavareanga i te au tangata ravarai na roto i te ravenga no te purepure, te ka o mai i te au apinga mei te kopere, te akonoanga purepure, e te aronga kimi i te vaerua kino. (Deuteronomi 18:10-13; 2 Paraleipomeno 33:6) Aiteite ua te taopenga anga o te au angera kino ki to te Tiaporo ra​—te akapouanga mutu kore. (Mataio 25:41; Apokalupo 20:10) Inara, i teia taime nei, ka anoanoia tatou kia tu ngaueue kore e kia patoi atu ia ratou. E meitaki tatou i te akamanako e mei teaa rai to Satani ririnui e akapeea tatou i te patoi meitaki anga iaia e tana au temoni.

Mei Teaa Rai to Satani Ririnui?

7. Eaa to Satani mana i rungao i teianei ao?

⁷ Kua pikikaa a Satani ia Iehova i roto i te tuatau o te tuatua enua. (Maseli 27:11) E kua akakeu aia i tetai tuanga maata o te au tangata ravarai. “Te vai ua nei rai to te ao ravarai i raro ake i taua vaerua kino ra,” te karanga ra a 1 Ioane 5:19. Ko te tumu te reira i rauka ai te Tiaporo i te timata ia Iesu na te oronga anga kiaia i te mana e te kaka o te “au basileia katoa o te ao nei.” (Luka 4:5-7) No runga ia Satani, te akakite maira te apotetoro ko Paulo e: “E teianei te arai katoaia nei ta matou evangelia, i araiia ïa i te aronga e ta ia ratou uaorai: Koia te aronga i akapoiriia to ratou ngakau akarongo kore e te atua o teianei ao ra, kia kore te mārama o te evangelia kakā o te Mesia, ko te tutu o te Atua ra, kia kakā mai i roto ia ratou.” (2 Korinetia 4:3, 4) “E pikikaa [a Satani], e e metua oki no te pikikaa,” inara e akatutu mai ana aia iaia uaorai ei “akatutu angela.” (Ioane 8:44; 2 Korinetia 11:14) Tei iaia te mana e te au ravenga tei anoanoia i te akapoiri i te au manako o te au tutara o te ao nei e te au tangata i raro ake ia ratou. Na te akakitekiteanga tarevake e te au tua e te au pikipikikaa a te akonoanga, kua akavare aia i te au tangata ravarai.

8. Eaa ta te Pipiria e akakite maira no runga i te akakeuanga a Satani?

⁸ Kua kiteaia te mana e te akakeuanga o Satani i te tuatau o te peroveta ko Daniela, mei tetai rima anere mataiti i mua ake i to tatou Tuatau Noa. I to Iehova tono atu anga i tetai angera kia akakite i tetai karere akamaroiroi kia Daniela, kua kite mai te angera i tetai patoianga mei “te ariki [vaerua] ra o te basileia o Peresia.” Kua mouriaia te angera tiratiratu e 21 ra e tae ua mai a “Mikaela, tetai ariki maata,” i te tauturu iaia. Te akakite katoa maira te reira tataanga rai i “te ariki [temoni] no Eleni.” (Daniela 10:12, 13, 20) E ia Apokalupo 13:1, 2, te akatutuia maira a Satani e ko “te taae ra” tei oronga ki te puaka taae poritiki “i tona uaorai maroiroi, e tona uaorai terono, e te mana maata.”

9. Koai ma ta te au Kerititiano e tamaki atu nei?

⁹ No reira rai te apotetoro ko Paulo i tata ei e: “Kare oki te tangata anake ta tatou e kukumi nei, ko te au ariki katoa ra, e te aronga mana, e  te au tutara o teianei ao poiri, e te au vaerua kikino i te reva nei.” (Ephesia 6:12) Pera katoa i teia tuatau nei, kare e kitea atu ana te au nuku temoni i raro ake i te akatereanga a Satani te Tiaporo, e akakeu ra i te au tutara tangata e te au tangata ua nei, i te akakokoanga ia ratou kia rave i te au angaanga manako koreia no te angaanga ta i te iti tangata, te tamatakuanga, e te tamate tangata. E akara matatio ana tatou i teianei e akapeea tatou i te autu meitaki anga i teia au nuku vaerua ririnui.

Eaa to Tatou Paruruanga?

10, 11. Akapeea tatou i te patoianga ia Satani e tana au angera kino?

¹⁰ Kare e rauka ia tatou i te patoi atu ia Satani e tana au angera kino ma to tatou uaorai maroiroi, noatu me i te pae kopapa me kore i te pae manako. Te ako maira a Paulo ia tatou e: “Kia maroiroi kotou i te Atu, e i te ririnui o tona mana.” Ka anoanoia tatou i te uri ki te Atua no te paruruanga. Kua karanga katoa a Paulo: “E kakau i te rakei katoa a te Atua ra, kia tika ia kotou kia patoi i te ravenga pakari a te diabolo ra. Ka rave ana oki kotou i te rakei katoa a te Atua ra, kia tika ia kotou kia patoi atu i te enemi i te rā kino ra, e kia ope rava te au ravenga ra, kia tu rai.”​—Ephesia 6:10, 11, 13.

¹¹ E rua taime kua aruaru a Paulo i tona au taeake Kerititiano kia kakau i “te rakei katoa a te Atua ra.” Te akakite maira te tuatua “katoa” e kare te tu manako kore ua e rava ana i te patoi i te au tamakianga a te temoni. No reira, eaa te au tuanga puapinga o te rakei pae vaerua ta te au Kerititiano e umuumu vivikiia ra i teia tuatau kia rauka i te patoi atu i te au temoni?

“Ka Tu”​—Akapeea?

12. Akapeea te au Kerititiano i te tatuaanga i to ratou taukupu ki te tuatua mou?

¹² Te akamarama maira a Paulo e: “Ka tu, ma te tatuaia to kotou taukupu i te tuatua-mou, e ma te tapoki-umauma ra ko te tuatua tika i te kakau anga.” (Ephesia 6:14) Te nga tuanga rakei e rua te taikuia ra i konei ko te ruru, me kore te kiri, e tetai tapoki umauma. Ka anoanoia te vaeau kia tamou piri meitaki i tona kiri kia rauka i te paruru i tona taukupu (nga kaokao, tapa ua, e a raro ake i te kopu) e te amo i te teimaa o tana koke. Mei te reira katoa, ka anoanoia te tuatua mou Pipiria kia tamou piri meitakiia takapini ia tatou, ei akatutuanga, kia rauka ia tatou i te noo rotai atu ki te reira. E papaanga ainei ta tatou no te tatauanga i te Pipiria i te au ra tataki tai? Te piri maira ainei te pamiri katoatoa? E akonoanga tamou ainei ta tatou no te akamanakoanga ei pamiri i te tia no te ra? Kapiti katoa, kua kite ainei tatou i te au akamaramaanga ou i roto i te au puka tei orongaia mai e “te tavini akono meitaki e te pakari”? (Mataio 24:45) Me ko te reira ia, te tauta ra tatou i te akono i te akoanga a Paulo. E au vitio katoa ta tatou e te au DVD te ka oronga mai i te aratakianga mei te Tuatua Tapu. Te akapiri vaitataanga ki te tuatua mou ka tauturu ia tatou i te akono i te au ikianga pakari e ka paruru ia tatou mei te aruanga i tetai tu oraanga tarevake.

13. Akapeea tatou i te paruruanga i to tatou ngakau akatutu?

¹³ Kua rauka te tapoki umauma tikai i te paruru i te umauma, te ngakau, e tetai atu au mero puapinga o te vaeau. Ka rauka te Kerititiano i te paruru i tona ngakau akatutu​—te tangata i roto rava​—na te tatanuanga i te inangaro no te tuatua tika a te Atua e na te aruanga i te au turanga tuatua tika a Iehova. Te paruru ra te tapoki umauma akatutu ia tatou mei te akameangiti anga i te puapinga o te Tuatua a te Atua. Ia tatou e kite atura i te “rikarika i te kino, e kia inangaro i  te meitaki,” te tapu ra tatou i to tatou vaevae mei “te au arataa kikino ravarai.”​—Amosa 5:15; Salamo 119:101.

14. Eaa te aiteanga o te “vaevae te akatamaka angaia i te apinga o te tuatua meitaki o te au”?

¹⁴ E akatamaka meitakiia ana te vaevae o te au vaeau Roma no te au aaere anga roa i runga i te au mataara mamaata o Roma e tikoti ra i te pa enua. Eaa te aiteanga o te “vaevae te akatamaka angaia i te apinga o te tuatua meitaki o te au” ki te au Kerititiano? (Ephesia 6:15) Te aiteanga koia oki kua papa tatou no te angaanga. Kua papa tatou i te akakite atu i te tuatua meitaki o te Patireia o te Atua i te au atianga tau ravarai. (Roma 10:13-15) To tatou angaanga maroiroi anga i roto i te angaanga orometua Kerititiano e paruruanga te reira mei te au “ravenga pakari,” a Satani.​—Ephesia 6:11.

15. (a) Eaa te akaari maira e e puapinga maata tikai te paruru maatamaata o te akarongo? (e) Eaa te “au tao ai” te ka akakino i to tatou akarongo?

¹⁵ ‘E rave oki i te paruru maatamaata ra i te akarongo, ei runga ravao ïa, ko te mea e mate ei te au tao ai ravarai a te vaerua kino ra,’ i karanga katoa ei a Paulo. (Ephesia 6:16) Te akoanga kia rave i te paruru o te akarongo, te piri atura ki te tuatua “ei runga ravao ïa,” ei akakiteanga e e puapinga tikai teia tuanga rakei. Auraka rava to tatou akarongo e ngere i tetai apinga. Mei tetai aka paruru, te paruru ra to tatou akarongo ia tatou mei te “au tao ai.” Eaa ta teia e akatutu maira i teia tuatau? Penei ko te au akakinoanga koputaputa, au pikikaa, e te au tuatua tapikipiki tei akatotoaia e te au enemi e te au apoteiti i te tautaanga i te akaparuparu i to tatou akarongo. Ka riro katoa teia “au tao” ei au timataanga kia maata te apinga materia, te takianga ia tatou kia akapou  maata roa i te tuatau i te oko anga i te au apinga e manganui e te akavare katoa anga ia tatou kia taemoemo atu ki te aronga tei topa atu ki roto i tetai tu oraanga akaariari ua. Penei kua iniveti ratou ki roto i te au are e te au apinga akaoro mamaata atu e te meitaki atu me kore te akaariari ua ra i to ratou au poe oko maata e te au kakau ou. Noatu e eaa ta tetai ke ka rave, kia ketaketa tikai to tatou akarongo i te anga ke anga mei teia “au tao ai.” Akapeea tatou i te patu anga e te tamou marie anga i te akarongo ketaketa?​—1 Petero 3:3-5; 1 Ioane 2:15-17.

16. Eaa te ka tauturu ia tatou i te patu i tetai akarongo ketaketa?

¹⁶ Ka rauka ia tatou i te akavaitata atu ki te Atua na te apii tamou anga uaorai i te Pipiria e na te au pure akatenga. Ka rauka ia tatou i te pure kia Iehova no te akarongo maroiroi e oti kia akono tatou i ta tatou au pure ma te au angaanga e umuumuia ra. Ei akaraanga, e akapapa meitaki ana ainei tatou no te Apii Punanga Tiaki i te epetoma ravarai ma te manakoanga no te paupauanga? Ka ketaketa to tatou akarongo me apii tatou i te Pipiria e te au puka akatumuia ki runga i te Pipiria.​—Ebera 10:38, 39; 11:6.

17. Akapeea tatou i te “rave katoa i te pare ra i te ora”?

¹⁷ Kua taopenga a Paulo i tana akamaramaanga o te rakei pae vaerua ma te akoanga e: “Ka rave katoa i te pare ra i te ora, e te koke a te Vaerua ra, koia te tuatua a te Atua.” (Ephesia 6:17) Kua paruru te pare i te katu e te roro o te vaeau, te ngai tikai no te akonoanga i te tukuanga tika. Mei te reira katoa, e paruru ana to tatou manakonakoanga Kerititiano i to tatou manako. (1 Tesalonia 5:8) Kia kore e akaki ua i to tatou au manako ki te au akakoroanga e te au moemoeaanga materia o te ao nei, ka akamou tatou i to tatou manako ki runga i to tatou manakonakoanga tei orongaia mai e te Atua, mei ia Iesu katoa rai.​—Ebera 12:2.

18. Eaa tatou ka kore ei e akapae i ta tatou porokaramu no te tatau putuputu anga i te Pipiria?

¹⁸ To tatou paruruanga openga i te patoianga i te akakeuanga a Satani e tana au temoni koia oki ko te tuatua, me kore ko te karere a te Atua, tei rekotiia i roto i te Pipiria. Ko tetai tumu akaou teia kia kore rava tatou e akapae i ta tatou porokaramu tamou no te tatauanga i te Pipiria. Te paruru ra tetai kite tika tikai o te Tuatua a te Atua ia tatou mei te au pikikaa a Satani e te au akakitekiteanga pikikaa a te temoni e pera katoa te au karere patoianga rikarika a te au apoteiti.

“Ma te Pure Tukumoe Kore, i te Au Pure Ravarai”

19, 20. (a) Eaa te ka tupu kia Satani e tana au temoni? (e) Eaa te ka paruru ia tatou i te pae vaerua?

¹⁹ Te vaitata maira te akaateaanga o Satani, tana au temoni, e te ao kino. Kua kite a Satani e e “tuatau poto ua” tona. E riri maata tona e te tamaki ra aia i te aronga “tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Apokalupo 12:12, 17) E mea puapinga tikai kia patoi tatou ia Satani e tana au temoni.

²⁰ Kia rekareka tikai tatou no te akoanga kia kakau i te rakei katoa mei te Atua ra! Kua taopenga a Paulo i tana uriurianga o te rakei pae vaerua ma teia akoanga: “Ma te pure tukumoe kore, i te au pure ravarai, i te pati a te Vaerua, ma te akamaroiroi e te tamou i te reira, e te pati anga oki no te aronga tapu katoa ra.” (Ephesia 6:18) Ka rauka te pure i te paruru ia tatou i te pae vaerua e te tauturu ia tatou kia vai ara ua. Kia akamanako meitaki tatou i te au tuatua a Paulo e kia tamou marie i te pure, no te mea ka tauturu teia ia tatou i te patoi ia Satani e tana au temoni.

Eaa Taau i Kite?

• Akapeea a Satani e tana au temoni i te kapua angaia mai?

• Mei teaa tikai te ririnui o te Tiaporo?

• Eaa to tatou paruru i te patoianga ia Satani e tana au temoni?

• Akapeea tatou i te aaoanga i te rakei tamaki katoa no ko mai i te Atua?

[Au Uianga Apii]

[Au Tutu i te kapi 26]

“Kua akara akera te tamariki a te Atua ra i te au tamaine a te tangata nei”

[Tutu i te kapi 28]

Ka rauka ainei ia koe i te akakite mai i te tuanga e ono o to tatou rakei tamaki i te pae vaerua?

[Au Tutu i te kapi 29]

Akapeea te piri atu anga ki roto i teia au angaanga i riro ei ei paruruanga i te patoi atu ia Satani e tana au temoni?