To Karaiti Aerenga Mai​—Ka Mataku Ainei Tatou?

EAA taau tamanakoanga no runga i to Iesu Karaiti aerenga mai? Te kite ra ainei koe i te reira ei tupuanga te apai maira i te tumatetenga, te akapouanga, e te akautunga anga no te au tangata ravarai? Me te irinaki ra koe e ka takore te reira i to tatou au manamanata katoatoa? E apinga mataku ainei to Karaiti aerenga mai? Me ka tapapa atu ainei tatou i te reira?

No runga i to Karaiti aerenga mai, te akakite maira te Pipiria: “I na, te aere mai na aia i roto i te tiao rangi; e akara te au mata katoa iaia, . . . e ka aue te au kopu ravarai o te ao nei iaia.” (Apokalupo 1:7) Te taiku ra teia aerenga mai ki to Iesu mama anga mai a te tuatau ki mua kia akameitaki i te aronga tika e kia akava i te aronga kino.

Kare i mataku ana i te reira, kua tapapa atu te apotetoro ko Ioane i to Karaiti aerenga mai. I muri ake i te rauka mai anga te eeuanga no runga i teia aerenga mai e ta te reira ka akatupu no te enua nei, kua pure akatenga a Ioane e: “Ka aere mai, e te Atu, e Iesu.” (Apokalupo 22:20) Inara eaa ‘te au kopu ravarai o te ao nei . . . ka aue ei iaia’? Na roto i teea tu e akara atu ei “te au mata katoa” iaia? Eaa ta to Karaiti aerenga mai ka akatupu? Akapeea te akonoanga i te akarongo i roto i te reira i te akapuapinga anga ia tatou i teianei? Ka pau mai te atikara e aru maira i teia au uianga.