Ao Kino o Teia Tuatau
Ao Kino o Teia Tuatau
E 64 o María mataiti e te noo ra koia anake ua. Kua kitenaia mai e kua mate aia i roto i tona are, kua taiaia e kua tariia ki te taura niuniu.
E toru akava tei taiaia e tetai pupu tangata riri, i te akaapa anga ia ratou no te keia anga i nga mapu tamaroa e rua. Kua riringi te pupu tangata i te penitini ki runga i nga akava e rua e kua tutungiia ki te ai, e kua pou i te ka. Kua ora atu te toru.
Na tetai terepaoni anga kare i kiteaia e naai i arataki atu ki tetai kitea anga rikarika. Kua kiteaia mai te au kopapa o nga tangata turoto e a i roto i tetai aua. Kua tapekaia to ratou mata, e to ratou rima. Kua akaari mai tetai vavai anga e kua tanu ora uaia ratou.
Kare teia au angaanga rikarika nei e e au tutu no roto mai i te au teata kino e te rikarika tikai. E au tua tika tikai teia au ripoti kare i roa akenei kua riro mai ei tumu anga maata i roto i te nuti i tetai enua i Marike Ratino. Inara, kare e ko tera ua te enua te tupu ra taua angaanga rikarika i roto i te ao i teia tuatau.
Te riro nei te au angaanga kino ei au tupuanga i te au ra ravarai. Te au pomuanga, te au ta anga tamatakuanga, te au ta anga, te au takinokino anga, te au pupui anga, e te au kukumi anga vaine kua riro ei tuanga meangiti ua no taua au angaanga kino ra. E manganui te au tuatau, e akaari mai ana te au nuti i te au ripoti taka meitaki tikai no te au angaanga rikarika, e kare te au tangata e manganui e poitirere ana i te kite anga me kore i te akarongo anga i taua tu kino ra.
Penei te manako nei koe e: ‘Eaa te tupu nei ki te ao i teia tuatau? Kua ngaro takiri ainei te akamanako katoatoa anga i te au manako ngakau o tetai ke e te akangateitei anga i te oraanga?’ Eaa ra tatou ka noo ei ki roto i tetai ao mei teia rai?
E akamanako ana ia Harry, e 69 ona mataiti kua tu i te maki cancer. Kua tu tana vaine i te maki multiple sclerosis, inara kua tauturu mai tona au taeake i te pae mai e te au oa iaia. “Kare au i kite e eaa ta maua ka rave naringa kare teia au tangata nei e tauturu mai ana ia maua,” i karanga ai a Harry. I Kanata, te ngai e noo ra aia, kua akaari mai tetai apiianga e kua tere atu e 50 patene aronga akono i te aronga pakari te tauturu ra i tetai tangata kare o ratou pirianga. Kare e ekokoanga e, kua kite koe i tetai au tangata noa ua te akaari ra i te tu takinga meitaki e te tu oaoa mei tetai ra ki tetai ra. Ae, ka rauka i te au tangata kia tangi aroa e kia takinga meitaki kare e kia rave i te kino.
No reira eaa ra te au angaanga rikarika i tupu ei? Na teaa ra i akariro i te au tangata kia rave i te kino? Ko te aronga te akakino ra i tetai ke ka rauka ainei i te taui? Ka ope ainei te tu kino? Me koia ia, akapeea e aea?
[Akameitakianga no te Tutu i te kapi 3]
Train: CORDON PRESS