Ka Ope Ainei te Tu Kino?
Ka Ope Ainei te Tu Kino?
TE ARIKI tikai ra te maata anga e ko te tu karapii te tumu tikai i tupu mai ei te tu kino i teianei ao i teia tuatau. Ko te au ua tei ruru takereia i te ngauru mataiti i topa akenei na te uki tei manako e ko au uaorai, i akatupu i tetai taiate te manako tikai ra te maataanga ia ratou uaorai. E maata te ka rave i te ka rauka ia ratou i te rave i te akatupu mai i ta ratou uaorai e anoano ra, te maata anga o te taime e angaanga kino te ka tupu mai. E tika rai teia kare ki te au tangata tataki tai ua inara ki te pa enua katoa.
Te oraanga o te au tangata kare i te mea puapinga. E reka ana tetai au tangata i te kino. E tamataora anga na ratou te reira, mei te aronga apa i te ture tei aaki ana e no te tamataora ua i tamamae ei ratou i tetai ke. E ka akapeea ra te au tangata e mirioni ua atu e reka ana i te au teata te akaariari ra i te ta anga e te tu kino te akamaroiroi ra i te ngai maani anga teata kia rauka mai te moni no taua au teata ra ta ratou e inangaro ra? Te akaari putuputu anga i te au angaanga kino pakari na roto i te tarekarekaanga e te nuti i akaparuparu ei i te tu tangi o te manganui.
Ko te kino i te pae manako ta te tu kino e akatupu maata ra e te akamata anga i te rave akaou anga i tetai turanga kino. I te taiku anga ki te ta anga tei akatupuia mai e te tu kino, te karanga ra a Noemí Díaz Marroquín, te apii ra i ko i te National Autonomous University i Meiko, e: “E mea apiiia te ta anga, e e peu matauia . . . Te apiiia ra tatou e akapeea me rave i te au tu no te ta anga me te akatika ra e te akamaroiroi ra te ngai e noo ra tatou i te reira.” No reira, te aronga tei riro mai e ko ratou tei akakinoia penei ka akakino atu rai ratou i tetai ke i muri mai, penei ake na roto katoa i taua tu i akakinoia ai ratou.
I roto i tetai au turanga, te aronga tei akakino i taua au mea ra mei te kava e te au apinga akakona penei ka rave rai i te kino i muri mai. Auraka e akangaropoina i te aronga tataki tai kare ratou e reka atu ana i to ratou kavamani kare e akono ana i te au anoano o te au tangata. Ko etai ia ratou, te tauta ra i te akakite aere i to ratou au manako, ka anga atu i te rave i te au angaanga kino e te akamaroiroi anga i te tu tamatakuanga, te maata anga o te taime te tamamae ra i te aronga apa kore ua.
Penei te manako ra koe e: ‘Kua apiiia ainei te au tangata kia rave ratou uaorai i te tu kino? Eaa te akakeu ra i teia turanga i teia tuatau?’
Koai Tikai te Akakeu ra i te Tu Kino?
Te akakite maira te Pipiria kia tatou e e akakeu anga pakari tikai ta Satani te Tiaporo e tuku maira ki rungao i teianei ao, i te kapiki anga iaia e ko “te atua o teianei ao.” (2 Korinetia 4:4) Koia te peretana noinoi roa atu e te kino tikai i te ao katoa e pini ua ake. Kua akataka meitaki mai a Iesu iaia e ko te “ta tangata” e te “metua oki no te pikikaa.”—Ioane 8:44.
Mei te tuatau i akarongo kore ei a Adamu raua ko Eva, tei raro nei rai te au tangata ravarai i te mana ririnui o Satani. (Genese 3:1-7, 16-19) E 15 anere mataiti i muri ake i te anga ke anga nga tokorua mua mei ia Iehova, kua aere mai te au angera meameaau ma te kopapa tangata, kua piri atu ki te au vaine, e kua anau mai i tetai iti tangata kairoiro tei tapaia e ko te Nepirimi. Eaa ra to ratou tu tei akataka meitakiia mai? Te akakite mai nei to ratou ingoa i te pauanga. Te aiteanga “e aronga turaki i tetai kia inga ki raro.” I te akaraanga, e aronga kino tikai ratou tei akatupu i te tu kino e te tu tau kore i riro ei e na te vaipuke anake ua no ko mai i te Atua ra e apai mai i te openga. (Genese 6:4, 5, 17) Noatu e kua takoreia te Nepirimi i roto i te Vaipuke, kua oki atu to ratou au metua tane ki te rangi ei au temoni kitea koreia.—1 Petero 3:19, 20.
Kua kitea meitakiia te tu kino o te au angera meameaau i roto i te turanga o tetai tamaiti tei tomoia e te temoni i te tuatau ia Iesu. Kua akatupu putuputu te temoni kia maki utiia te tamaiti, i te uri anga iaia ki roto i te ai e ki roto i te vai i te tauta anga kia mate atu aia. (Mareko 9:17-22) Te taka meitaki ra e, te akaata maira taua “au vaerua kikino” ra i te peretana aroa kore o to ratou pu akaaere kino, ko Satani te Tiaporo.—Ephesia 6:12.
I teia tuatau, te akamaroiroi ua nei rai te akakeu anga a te au temoni i te tu kino o te tangata, mei tei akakiteia mai i roto i te Pipiria e: “Ka tupu te kino maata i taua tuatau openga ra, kia kite mai koe. E riro te tangata nei ei akaperepere ia ratou uaorai, . . . ei akatietie, ei nengonengo, . . . ei mareka kore, ei viivii, Ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, Ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua; E tutu akono i te Atua to ratou, kareka te mana ra, kua akakore ratou i te reira.”—2 Timoteo 3:1-5.
Te akaari maira te au totou Pipiria e e kino maata tikai to tatou tuatau no te mea i muri ake i te akanooia anga te Patireia o te Atua na roto ia Iesu Karaiti i te mataiti 1914, kua titiriia mai a Satani e tana au nuku temoni mei te rangi mai. Te akakite maira te Pipiria e: “E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”—Apokalupo 12:5-9, 12.
Ko te aiteanga ainei teia e kare te turanga e meitaki mai? Te karanga ra a Díaz Marroquín, tei taikuia i mua akenei e, “ka rauka i te tangata i te akakore” i te tu tau kore. Inara, ma te akakeu anga a Satani e akaki aere ra i te enua i teia tuatau, kare e rauka i tetai tangata i te takore i te kino mari ua kia akatika aia i tetai mana tuke e te teitei rava i te akakeu i tona tu manako anga e tana e rave ra. Eaa teia mana?
Ka Rauka te Au Taui Anga—Akapeea?
Ma te mataora, ko te vaerua tapu o te Atua te mana ririnui roa atu te vai nei, e ka rauka i te reira kia autu i tetai ua atu akakeu anga a te temoni. Te akamaroiroi ra te reira i te aroa e te oraanga meitaki no te au tangata. Kia akakiia e te vaerua o te Atua, te aronga katoatoa te inangaro ra i te akamareka ia Iehova e mea tau kia kopae ke i te tu te aite ra ki te tu kino. Te umuumu maira teia i te taui anga i to tetai tu kia aru i te anoano o te Atua. E eaa ra taua anoano ra? E aru tatou i to te Atua tu i te ka rauka ia tatou i te aru. Te kapiti maira teia i te akara anga i tetai ke mei ta te Atua rai e akara ra.—Ephesia 5:1, 2; Kolosa 3:7-10.
Na tetai apiianga i te tu e akono ra te Atua i te au mea e akapapu mai kia koe e kare roa a Iehova e manako kore ana i tetai ke. Kare rava aia i takinga kino ana i tetai ua atu tangata me kore i tetai ua atu manu. * (Deuteronomi 22:10; Salamo 36:7; Maseli 12:10) Te patoi ra aia i te tu kino e te aronga pouroa te rave ra i te reira. (Maseli 3:31, 32) Te tu tangata ou ta Iehova e umuumu maira kia tatanu te au Kerititiano te tauturu ra ia ratou kia akamanako i tetai ke ei teitei rava atu e kia akangateitei atu ia ratou. (Philipi 2:2-4) Te kapitiia maira taua tu tangata Kerititiano ou ra e “te takinga-meitaki, te akaaka, te maru, te akakoromaki maata.” Auraka oki e akangaropoina i te aroa, “ko taua tatua apa kore ua ra ïa.” (Kolosa 3:12-14) Kare ainei koe e akatika ana e ka riro mai teianei ao ei ngai tuke akerai me e maata taua au tu ra?
Inara, penei te manako ra koe e me ka rauka rai te tu o te tangata i te taui takiriia. I na, e akamanako ana i tetai akaraanga tika tikai. E vaa nui ua ana a Martín * i tana vaine i mua tikai i ta raua tamariki e kua papa kino atu iaia. I tetai atianga, kua kino pakari tikai te turanga i oro ei te tamariki ki tetai kainga i te pae mai i te kimi tauturu. I muri ake i tetai au mataiti, kua akamata te ngutuare tangata i te apii i te Pipiria ma te Au Kite o Iehova. Kua kite mai a Martín e, eaa tikai te tu tau kia aru aia e ka akapeea aia i te akono anga i tetai ke. Kua taui ainei aia? Na tana vaine i pau mai e: “I mua atu ana, e tangata tuke rai taku tane me riri aia. No teia tumu nei, marikonga kore tikai to matou oraanga kua roa te tuatau. Kare e rava ana taku au tuatua i te akameitaki ia Iehova no te tauturu anga mai kia taui a Martín. I teianei e metua tane meitaki aia e e tane meitaki tikai.”
Okotai uaia turanga. Takapini i te ao katoa, te au tangata e mirioni ua tei apii i te Pipiria ma te Au Kite o Iehova kua akaruke ratou i te rave i te tu kino. Ae, ka rauka i te taui.
Te Vaitata Maira te Openga o te Au Tu Kino Katoatoa
I te tuatau ki mua te vaitata maira, ka akono te Patireia o te Atua—e kavamani tei akatumuia i teianei ki runga i te rangi ma tetai Tutara tangi aroa, ko Iesu Karaiti—i te mana katoa ki rungao i te enua nei. Kua tama ke ia ana te au rangi ia Satani, te tumu o te tu kino katoatoa, e tana au temoni. Kare e roa atu, ka akamerengo te Patireia o te Atua i te au anoano o tona au tangata te inangaro ra i te au i runga i te enua nei. (Salamo 37:10, 11; Isaia 11:2-5) Ko te pauanga anake tikai te reira ki te au manamanata o teianei ao. Inara, ia koe e tatari ra i teia Patireia, akapeea me ko koe tetai tei akakinoia?
Ko te patoi atu i te kino ki te kino kare e puapingaia. Ka maata ua atu te tu kino te ka tupu Ieremia 17:10) (E akara i te pia te aru maira, “Me Ariu Atu i te Tu Kino.”) E tika rai, penei ka rokoia koe e te mamae no te mea kua riro mai koe ei tangata tei tamamaeia no te angaanga kino. (Koheleta 9:11) Inara, ka rauka i te Atua i te akakore i te au tupuanga o tetai ua atu tu kino, pera katoa te mate. Kia tau ki tana totou, ko te aronga tei roto i tona manako kua mate no te au angaanga kino ra ka akaora akaouia mai.—Ioane 5:28, 29.
mai. Te pati mai nei te Pipiria kia tatou kia irinaki kia Iehova, i roto i tona uaorai tuatau tau ka ‘oronga atu ki te tangata katoa ra i tei tau i tona ra au aerenga, tei tau i te ua o tana e rave ra.’ (Noatu e te vai ua nei rai te manako anga e ka riro mai ei tangata tamamaeia no te tu kino, ka kite tatou i te pumaana i te rauka anga tetai pirianga vaitata ki te Atua e te akarongo ngaueue kore anga ki tana au taputou. E akamanako ana ia Sara, tei akono i tana nga tamaroa e rua kare e metua tane i te tauturu iaia e te akapapu meitaki anga e kua rauka mai ia raua tetai apiianga meitaki. I tona ruaine anga, kua akaruke tana nga tamaroa iaia, kare i akono ana iaia i te pae kopapa e i te maki anga. Inara, te karanga ra a Sara e Kerititiano i teianei e: “Noatu e te maromaroa nei au, kare roa a Iehova i akaruke ana iaku. Te kite nei au i tana turu anga na roto i toku au taeake e te au tuaine i te pae vaerua te akono mai nei iaku. Te irinaki tikai nei au e kare e roa atu ana ka akatikatika aia i toku uaorai au manamanata e i to te aronga katoatoa te irinaki ra i tona mana e tana i akaue mai.”
Koai ma te au taeake e te au tuaine pae vaerua ta Sara e taiku ra? E au oa Kerititiano ratou nona, ko te Au Kite o Iehova. Kua akanoo ratou i tetai taokotaianga taeake i te ao katoa ei au tangata tangi aroa, kua papu ia ratou e kare e roa atu ka ope te tu kino. (1 Petero 2:17) Ko tei akatupu maata i te tu kino, ko Satani te Tiaporo, e tetai atu au tangata tei aite kiaia ra, kare, kare katoa e ora mai. E “tuatau kino pakari tikai” teia, ta tetai tangata tata i kapiki ei ra, e e mea taito ia. Kore koe e apii i teia manakonakoanga na te aravei anga i tetai o te Au Kite o Iehova?
[Au Tataanga Rikiriki i Raro]
^ para. 16 No tetai uriurianga oonu i te au tu e te tu peretana o te Atua, e akara i te puka Akavaitata Atu kia Iehova, neneiia e te Au Kite o Iehova.
^ para. 17 Tauiia tetai au ingoa.
[Pia i te kapi 6]
Me Ariu Atu i te Tu Kino
Te oronga maira te Tuatua a te Atua i te akoanga tau e ka akapeea me aro atu i te tu kino. E akamanako ana e ka akapeea koe i te taangaanga anga i te au tuatua te aru mai nei no te pakari:
“Auraka e karanga e, E tutaki atu au i taua kino nei; e tapapa marie ra ia Iehova, e nana koe e akaora.”—Maseli 20:22.
“Kia akara koe i te ao i te takinga-kino angaia ra, e te ruri ke anga i te tuatua-tau e te tuatua-tika . . . , auraka koe e poitirere roa i taua mea ra; ko tei teitei ra oki tei akara i taua tangata teitei ra.”—Koheleta 5:8.
“E ao to tei maru: e riro ia ratou te enua.”—Mataio 5:5.
“E te au mea katoa ta kotou i anoano ia etai ke ra, na reira katoa kotou ia ratou.”—Mataio 7:12.
“Auraka te kino e tutakiia atu ki te kino i te tangata ravarai nei. Ka akonokono ana i te mea tika tikai ki mua i te aroaro o te tangata katoa nei. Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei. E taku au akaperepere e, auraka e akaoko, tuku ua atura i te riri; kua tataia oki e, ‘Te tuatua maira te Atu, ei iaku te akaoko, e naku e tutaki atu.’”—Roma 12:17-19.
“I mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae: . . . Ko tei kore i akakino atu, kia akakinoia mai aia ra; e kia mate aia ra, kare aia i tuatua tutaki atu; kua tuku ra iaia uaorai kiaia nona te manako tika ra.”—1 Petero 2:21-23.
[Au Tutu i te kapi 7]
Kua apii a Iehova i te manganui kia akaruke ratou i te tu kino