Maara Ainei ia Koe?
Maara Ainei ia Koe?
I reka ana koe i te tatau anga i te au itiu ou o Te Punanga Tiaki? Akara ana ra, me ka rauka ia koe i te pau i te au uianga ka aru mai:
• Eaa ta tatou ka kite mai mei te akatutuanga a Iesu no runga i te tangata akonokono manono? (Luka 11:5-10)
Te akaari maira teia akatutuanga i to tatou tu me pure tatou. E pati akatenga tatou, me kore e pati ua atu rai, i to te Atua vaerua tapu tikai. (Luka 11:11-13)—12/15, kapi 20-2.
• I roto i ta Iesu akatutuanga no runga i tetai vaine takaua e tetai akava eaa te apiianga no tatou? (Luka 18:1-8)
Te akakite pakari maira te reira i te anoano kia pure. Kare i aite ki te akava, e tuatua tika ta Iehova e te inangaro maira i te tauturu ia tatou. Tei runga ravao, e mea tau kia aite to tatou akarongo mei to te vaine takaua i roto i te akatutuanga.—12/15, kapi 26-8.
• Eaa te apotetoro ko Paulo i akakite ei ki te au Kerititiano i Korinetia e kia “maora” ua? (2 Korinetia 6:11-13)
I te akaraanga kare tetai papaki i Korinetia i akangateitei i te au oa irinaki, oiti ua to ratou ngakau, e te aroa kore. Ka anoanoia tatou kia tauta pakari i te akatupu i te akangateitei anga tika tikai no te au oa irinaki, i te tauta anga i te akatupu kia rauka te au oa ou.—1/1, kapi 9-11.
• Eaa te akairoanga te taikuia ra ia Apokalupo 7:3?
Me akatainu te Atua i te au Kerititiano ki te vaerua tapu, kua akairo muaia teia aronga. Inara te taiku ra a Apokalupo 7:3 ki te akairoanga openga, me akapapuia mai taua aronga tei akatainuia e kua akakite pu tikaiia mai to ratou tu tiratiratu.—1/1, kapi 30-1.
• Eaa ta te au metua ka kite mai i roto i te rekoti Pipiria no runga ia Samuela?
Ko tetai tumu, e mea tau kia apii ratou i te tuatua a te Atua ki ta ratou tamariki, mei ta te nga metua o Samuela i apii ana kiaia. Pera katoa, e akamaroiroi ratou i ta ratou tamariki kia akariro i te tavini anga ia Iehova ei ngai angaanga tamou na ratou.—1/15, kapi 16.
• Akapeea tatou i te akaari anga e te mataora ra tatou i te tiaki marie atu anga ia Iehova?
‘Te tatari nei tatou i taua rā o te Atua,’ te tapapa anga i te ora me takore pouroa aia i te aronga akono kore i te Atua. (2 Petero 3:7, 12) Noatu e te anoano maata nei a Iehova i te akaope i te kino, te tapu marie ua nei aia kia rauka i te apai mai i te ora no te au Kerititiano na roto i te mataara te ka akakaka i tona ingoa. E mea tau kia irinaki tatou e te kite ra a Iehova i te taime tau e akatupu ei i tona anoano, e i taua taime rai, e mea tau kia akapaapaa maroiroi tatou iaia. (Salamo 71:14, 15)—3/1, kapi 17-18.
• Kua apai ainei a Noa e tataki itu manu ma me kore e itu pea ma ki roto i te araka?
Kua akakiteia kia Noa e ‘kia tataki itu ïa tana e rave’ i te au manu ma. (Genese 7:1, 2) I roto i te reo Epera, ko te tuatua “tataki itu” te tatau tikai ra te reira e “itu itu.” Te tuatua anga ma taua tu ra kare te aiteanga e e itu pea, mei ta tetai au tataanga Pipiria e akakite maira. Kare e ekokoanga e kua apai a Noa e tataki itu, e toru pea e te itu te ka taangaanga aia ei atinga. (Genese 8:20)—3/15, kapi 31.
• Eaa te au Kerititiano ka “manako” e, e eaa te ka riro mai ki te akarongo o te aronga pakari, te aronga te rave ra i te arataki anga?
Te pati maira te apotetoro ko Paulo ia tatou kia “manako,” me kore kia akara matatio, i te tu akono meitaki o te aronga pakari e kia aru i taua au akaraanga ra no te akarongo. (Ebera 13:7) E rave tatou i teia no te mea kua akaueia mai tatou i roto i te Tuatua a te Atua e kia rave i te reira. Pera katoa, kua akakeuia tatou e te manako tikai maira te aronga pakari i te anoano o te Patireia e ia tatou.—4/1, kapi 28.