Pakipakitai—Inara Inangaro Tikai i te Tavini
Pakipakitai—Inara Inangaro Tikai i te Tavini
I TE aravei mua anga koe ia Leonardo, penei kare koe e manako atu iaia e e tangata angaanga akatu are. Kare e rauka iaia i te taangaanga i tona nga rima, no te mea kua motu takiri ia i mua atu ana i roto i tetai tumatetenga kino tikai i te ngai angaanga. Inara, noatu tona tu pakipakitai, kua angaanga pakari a Leonardo i te ngai akatuanga are i Acajutla, o Ere Taravatoa, ko taau e kite ra i roto i te tutu.
E rauka ai kia o atu ki roto i tera angaanga akatuanga, kua maani a Leonardo i tana uaorai au apinga angaanga. Kua tauru aia i tona poo rima katau ki roto i tetai pokai auri tei kapitiia atu ki te ope o tetai tuapara e kua tuapara karape i te one ki roto i tetai uirapa. Ei mono i nga mouranga, kua kapitiia atu e ia te au porotaka ki te mouranga kia rauka iaia uaorai i te opara i te uirapa. Na teaa ra i akakeu iaia kia o atu ki roto i teia angaanga nei?
Kua inangaro a Leonardo kia piri atu ki roto i te akatuanga i tetai Are Uipaanga Patireia, me kore i te ngai akamorianga no te putuputuanga o te reira ngai o te Au Kite o Iehova. E aka tana au tumuanga i te kotoe kia kore aia e o ki te angaanga akatuanga. E angaanga tinamou tana, e pakipakitai aia, e te tavini ra aia i roto i tana putuputuanga ei tavini orometua. Inara, kua inangaro katoa aia i te rave i te ka rauka iaia i te tavini i te Atua i te ngai akatuanga are.
E vaerua puareinga ainei toou i te tavini i te Atua? Kare i taangaanga ana i tona tu pakipakitai ei kotoeanga, kua taangaanga a Leonardo i tona au tu kite karape i te maani i tana uaorai au apinga angaanga kia rauka iaia i te rave i te angaanga penei kare tikai e rauka iaia i te rave. Te tavini ra aia i te Atua ‘ma tona manako katoa.’ (Mataio 22:37) Me e pakipakitai me kare ra, te aronga angaanga tei o atu ki roto i te akatuanga i te au Are Uipaanga Patireia o te Au Kite o Iehova takapini i te ao katoa e au vaerua puareinga to ratou. Te vai tuera ua nei ta ratou au uipaanga ki te katoatoa, e ka arikiia koe me aere mai koe.