Au Uianga a te Aronga Tatau

Aea e akamutu ei te ikianga i te au Kerititiano no te manakonakoanga o te rangi?

Kare te Pipiria i akakite mai i te pauanga tikai ki taua uianga ra. Kua kite ra tatou e i akamata te akatainuanga o te au pipi a Iesu ma te manakonakoanga no ta ratou tuanga i te rangi i te mataiti 33 T.N. (Angaanga 2:1-4) Kua kite katoa tatou e i muri ake i te matenga o te au apotetoro, kua “tupu kapipiti” mai te “sitona” Kerititiano tika tikai i akatainuia ma te au “zizania” Kerititiano pikikaa. (Mataio 13:24-30) E oti, akamata mai i te pae openga o te mataiti 1800, kua maroiroi akaou mai te au Kerititiano akatainuia i te rave i te angaanga. I te mataiti 1919 i akamata ai te kokotianga o te ‘mou pakari rava o te enua nei,’ kapiti mai te akaputuputu mai anga i te aronga openga o te aronga akatainuia.​—Apokalupo 14:15, 16.

Mei te pae openga mai o te mataiti 1800 e tae ua atu ki te mataiti 1931, ko te akakoroanga maata o te angaanga tutuanga koia oki ko te akaputuputu mai anga i te au mema toe o te kopapa o Karaiti. I te mataiti 1931 kua apai te Aronga Apiipii Pipiria i te ingoa tei akatumuia ki runga i te Pipiria koia oki, ko te Au Kite o Iehova, e i roto i te itiu o The Watchtower o Noema 15, 1933, kua akakiteia te manako e ko teia ingoa takake rava, ko te “denari” ia e taikuia ra i roto i te parapore a Iesu tei rekotiia i roto ia Mataio 20:1-16. Kua manakoia e ko te 12 ora tei taikuia i roto i te parapore te piri atura te reira ki te 12 mataiti mei te 1919 ki te mataiti 1931. I te au mataiti i muri mai i te reira, kua irinakiia e kua akamutu te kapikianga no te Patireia i te rangi i te mataiti 1931 e ko te aronga tei kapikiia kia riro ei aronga tuanga ma Karaiti i te mataiti 1930 e te 1931, ko ratou te aronga “openga” tei kapikiia. (Mataio 20:6-8) Inara, i te mataiti 1966 kua raveia tetai akatanoanga ki te maramaanga tikai o te parapore, e kua taka meitaki e kare o te reira pirianga ki te openga o te kapikianga o te aronga tei akatainuia.

I te mataiti 1935 kua maramaia e ko te “aronga maata rava” o Apokalupo 7:9-15, ko te au Kerititiano ko ratou te “mamoe ke atu,” e manakonakoanga enua to ratou, te ka akaputuputuia mai i roto i “taua tuatau openga ra” e ko ratou te pupu ka ora mai mei ia Aramakito. (Ioane 10:16; 2 Timoteo 3:1; Apokalupo 21:3, 4) Muri ake i taua mataiti ra, kua tanga atu te akakoroanga maata o te akariro anga i te tangata ei pipi, ki te akaputuputu mai anga i te aronga maata rava. No reira, i  muri ake tikai i te mataiti 1966 kua irinakiia e kua akamutu te kapikianga no te rangi i te mataiti 1935. I te akaraanga kua akapapuia mai teia i te manako anga te maataanga tei papetitoia i muri ake i te mataiti 1935 e e manakonakoanga enua to ratou. I muri ake i te reira, ko tetai ua atu tei kapikiia no te manakonakoanga i te rangi, kua irinakiia e ko ratou te ka pau i te au Kerititiano akatainuia tei akarongo kore.

Kare e ekoko, e me inga ake tetai tei akatainuia ma te kore i tataraara, ka kapiki a Iehova i tetai tangata ke ei apai i tona ngai. (Roma 11:17-22) Inara kare e kore e, kare e maata te numero o te aronga akatainuia tikai tei akarongo kore. I tetai tua, i te tuatau i aereia mai, kua tae te akakite a te vaerua ki tetai au Kerititiano tei papetitoia i muri ake i te mataiti 1935 e e manakonakoanga rangi to ratou. (Roma 8:16, 17) No reira, i te akaraanga kare e rauka ia tatou i te akanoo i tetai tuatau tikai e akamutu ei te kapikianga o te au Kerititiano ki te manakonakoanga i te rangi.

Ka akapeea ra te akamanako anga atu i tetai tangata tei iki i roto i tona ngakau e kua akatainuia aia e kua akamata i te kai i te oroa i ko i te Akamaaraanga? Auraka e akava atu iaia. Tei rotopu te reira mea iaia e Iehova. (Roma 14:12) Inara, kare te au Kerititiano tika tikai e manono mai i tetai akamanakoanga takake. Kare ratou e irinaki ana e te oronga ra to ratou turanga ei aronga akatainuia i te “tu kite pakari” takake atu, i tei rauka i tetai au mema kite o te aronga maata rava. Kare ratou e irinaki ana e e maata atu to ratou vaerua tapu i rauka i to ratou au oa mamoe ke atu; e kare katoa ratou e tapapa ana kia taviniia mai ratou me kore kare ratou e manako ana e tei runga atu ratou i te aronga pakari i roto i te putuputuanga no te mea e te kai ra ratou i te oroa. E akamaara akaaka ua ana ratou e kare tetai au tangata akatainuia i te anere mataiti mua i tau ana kia tavini ei aronga pakari me kore ei au tavini tauturu. (1 Timoteo 3:1-10, 12, 13; Tito 1:5-9; Iakobo 3:1) Tetai au Kerititiano akatainuia e apikepike katoa rai ratou. (1 Tesalonia 5:14) E kare katoa te au tuaine i apii ana i roto i te putuputuanga noatu kua akatainuia ratou.​—1 Timoteo 2:11, 12.

No reira, te tauta pakari nei te au Kerititiano akatainuia ma to ratou au oa mamoe ke atu kia vai ngaueue kore ua i te pae vaerua, i te tatanu anga i te ua o te vaerua e te akatupu anga i te au i roto i te putuputuanga. Pouroa te au Kerititiano, noatu kua akatainuia me kore no te mamoe ke atu, te angaanga pakari nei i te tutu aere i te tuatua meitaki e te akariro i te tangata ei pipi i raro ake i te akatereanga a te Pupu Akaaere. Te mareka maata ua nei te au Kerititiano akatainuia i te rave i teia me ko to te Atua ia anoano kia noo mai ratou i te enua nei ei au tavini no Iehova.