E Tuku Na te Tuatua a te Atua e Arataki i Toou Au Takainga

“E lamepa taau tuatua i toku nei vaevae, e turama no toku nei arataa.”​—SALAMO 119:105.

1, 2. Eaa ra te maata anga o te au tangata kare i autu ana i te kite mai i te au e te mataora tika tikai?

TE MAARA ra ainei ia koe tetai atianga i te ui anga koe ki tetai tangata i te ngai taau e akakoro ra? Penei te vaitata ra koe ki te ngai taau e akakoro ra inara kare e papu ana e ko teea te mataara ka taanga koe. Me kore ra kua ngaro takiri koe e te anoano ra kia taui takiri i te ngai e aere ra koe. I nga tua roa rai, kare ainei i te mea meitaki kia aru i te aratakianga a tetai tangata tei kite i tera ngai? Ka rauka i taua tangata ra i te tauturu mai ia koe kia taeria te ngai e inangaro ra koe.

² E tauatini ua atu mataiti, kua tauta ana te maata anga o te au tangata i te arataki i to ratou oraanga e kare i kimi ana i te tauturu anga no ko mai i te Atua. Inara, i te takake anga mai mei te Atua ra, kua ngaro takiri te au tangata apa. Kare e kiteaia e ratou te mataara ki te au e te mataora tika tikai. Eaa ra i kore ei i rauka ia ratou taua au e te mataora tika tikai ra? Kua tere atu e 2,500 mataiti i topa akenei, kua akakite te peroveta ko Ieremia e: “Kare tei te tangata e aere nei, i te akono i tona uaorai takainga tapuae.” (Ieremia 10:23) Ko tetai ua atu tangata te tauta ra i te arataki i tona uaorai takainga kare i ariki i tetai tauturu tau tikai ka aro atu i te taitaia. E tika rai, te anoano ra te au tangata i tetai aratakianga!

3. Eaa te Atua ko Iehova i tau teitei rava ai i te oronga mai i te aratakianga no te au tangata, e eaa tana i taputou mai?

³ Ko te Atua ko Iehova tei tau teitei rava i te oronga mai i taua aratakianga ra. No teaa ra? No te mea koia tei kite rava atu i te tu o te au tangata i tetai ua atu tangata. E te kite tikai ra aia e i akapeea te au tangata i te aere ke anga e te ngaro anga. Kua kite katoa aia e eaa te umuumuia ra kia oki mai ratou ki runga i te mataara tau. Pera katoa, ko Tei Anga mai, te kite meitaki ua ra a Iehova e eaa te mea meitaki no tatou. (Isaia 48:17) No reira, kia irinaki pu tikai tatou i tana taputou tei tataia i roto ia Salamo 32:8 e: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.” Kare e ekokoanga no runga i te reira e: Te oronga maira a Iehova i te aratakianga meitaki rava atu. Inara akapeea aia i te aratakianga ia tatou?

4, 5. Akapeea te au tuatua a te Atua i te aratakianga ia tatou?

⁴ Kua tuatua tetai tata taramo na roto i te pure kia Iehova e: “E lamepa taau tuatua i toku nei vaevae, e turama no toku nei arataa.” (Salamo 119:105) Te kiteaia ra te au tuatua e te au akamaaraanga a te Atua i roto i te Pipiria, e ka rauka i te reira i te tauturu ia tatou kia autu i te au araianga ta tatou ka aro atu i roto i to tatou oraanga. E tika rai, me tatau tatou i te Pipiria e tuku na te reira e arataki ia tatou, te kite mata nei tatou i tei akatakaia mai i roto ia Isaia 30:21 e: “Na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere.”

⁵ Inara, e akara ana e te tou maira te Salamo 119:105 e rua nga angaanga piri vaitata ki te Tuatua a te Atua. Te mea mua, te riro ra ei ramepa no to tatou vaevae. Me aro atu tatou i te au akaaoanga i te au ra ravarai, ka rauka i te au kaveinga tei kiteaia i roto i te Pipiria i te arataki i to tatou au takainga kia rauka oki ia tatou i te rave i te au ikianga meitaki e kia kopae ke i te au ereere o teianei ao. Te rua, te turama nei te au akamaara anga a te Atua i to tatou arataa, i te tauturu anga ia tatou kia rave i te au ikianga te tau ra ki to tatou manakonakoanga no te oraanga e tuatau ua atu i roto i te Parataito ta te Atua i taputou mai. Ma te mataara akamarama meitakiia, ka rauka ia tatou i te akara i te au tupuanga​—te meitaki me kore te kino​—o tetai aerenga tikai.  (Roma 14:21; 1 Timoteo 6:9; Apokalupo 22:12) Ka akara ana tatou i te akataka anga maata e ka akapeea te au tuatua a te Atua tei kiteaia i roto i te Pipiria i riro ei e ramepa ki to tatou vaevae e e turama ki to tatou arataa.

‘E Lamepa i Toku nei Vaevae’

6. I raro ake i teea au turanga i riro ei te au tuatua a te Atua ei ramepa ki to tatou vaevae?

⁶ I te au ra ravarai, e rave ana tatou i te au ikianga. I te akara anga penei e mea rikiriki ua tetai au ikianga, inara penei i tetai au taime ka aro atu tatou i tetai turanga te akaao maira i to tatou tu akono tau, to tatou tu tika, me kore i to tatou turanga neutara. Kia aro atu i taua au timataanga ma te autu tikai, ka rauka ia tatou i te ‘tereni i to tatou kite ngakau kia kite i te tika e te tarevake.’ (Ebera 5:14, NW) Na te rauka anga te kite tika tikai i te Tuatua a te Atua e te akatupu anga i te marama anga i ta te reira au kaveinga, te tereni ra tatou i to tatou akava ngakau kia rauka ia tatou i te rave i te au ikianga te akamareka ra ia Iehova.​—Maseli 3:21.

7. E akataka mai i tetai turanga penei te inangaro ra tetai Kerititiano i te kapiti atu ki te au oa angaanga irinaki kore.

⁷ E akamanako ana i tetai akaraanga. E tangata mamaata ainei koe te tauta tikai ra i te akarekareka i to Iehova ngakau? (Maseli 27:11) Me koia ia, kia akameitakiia koe. Inara e akamanako ana i tetai manga tuatau e kua oake atu tetai au oa angaanga i tetai tiketi kia koe kia aru koe ia ratou ki tetai ngai tarekareka anga. Ko toou pirianga i te ngai angaanga ta ratou e reka ana e te inangaro ra i te taokotai mai kia koe i vao ake i te ngai angaanga. Penei te irinaki pakari ra koe e kare teia au tangata tataki tai nei i te au tangata kino. Penei e au tu meitaki to ratou. Eaa taau ka rave? E kino ainei i te ariki anga i te patianga? Akapeea te Tuatua a te Atua i te tauturu anga ia koe kia rave i tetai ikianga meitaki i roto i teia tumu manako?

8. Eaa te au kaveinga Tuatua Tapu te tauturu ra ia tatou kia akamanako no runga i te tumu manako no te au kapitianga?

⁸ E akamanako ana i te au kaveinga tokoiti ua no te Tuatua Tapu. Te mea mua ka marmaia te kiteaia ra i roto ia 1 Korinetia 15:33, te karanga ra e: “E kino te tuatua meitaki i te kapiti anga kikino ra.” Te aru anga i teia kaveinga te umuumuia ra ainei koe kia kopae takiri i te aronga irinaki kore? Te pauanga a te Tuatua Tapu ki tera uianga koia oki, kare. No te mea, kua akaari mai te apotetoro ko Paulo i te manako aroa no te “au mea katoa i te tangata ravarai,” i te kapiti anga mai i te aronga akarongo kore. (1 Korinetia 9:22) Te umuumu maira te tu tika tikai o te Akonoanga Kerititiano e e akaari tatou i te manako inangaro ki tetai ke​—i te kapiti anga mai i te aronga kare e ariki ana i to tatou au irinakianga. (Roma 10:13-15) E tika rai, akapeea tatou i te aru anga i te ako anga kia ‘takinga-meitaki i te tangata ravarai’ me ka akatakake tatou ia tatou uaorai mei te au tangata te anoano maira i ta tatou tauturu?​—Galatia 6:10.

9. Eaa te akoanga Pipiria te tauturu ra ia tatou kia parani i to tatou pirianga ki to tatou au oa angaanga?

⁹ Inara, te taka ua ra te tuke anga i rotopu i te oaoa anga ki tetai oa angaanga e te piri vaitata anga ki taua oa ra. Te o maira tetai kaveinga Tuatua Tapu i konei. Kua akamatakite te apotetoro ko Paulo i te au Kerititiano e: “Auraka kotou e  kapitiia ma te tau kore i te aronga akarongo kore ra.” (2 Korinetia 6:14) Eaa ra te aiteanga o te takiato tuatua e “auraka kotou e kapitiia ma te tau kore” ra? Kua uri tetai au urianga Pipiria i taua au tuatua e “auraka e akapupu,” “auraka e angaanga kapipiti,” me kore “akamutu i te akatupu i te au pirianga tau kore.” I teea taime ka riro mai ei tetai pirianga ki tetai oa angaanga ra ei mea tau kore? Eaa ra te kotinga no runga i te reira e te riro anga ei mea tau kore? Ka rauka i te Tuatua a te Atua, te Pipiria, i te arataki i toou takainga i roto i teia turanga.

10. (a) Akapeea a Iesu i te ikianga i te au oa? (e) Eaa te au uianga te tauturu ra i tetai tangata kia rave i te au ikianga meitaki no runga i te au kapitianga?

¹⁰ E akamanako ana i te akaraanga o Iesu, mei te tuatau i angaia ai te au tangata ra kua aroa aia i te au tangata. (Maseli 8:31) Iaia i te enua nei, kua akatupu aia i tetai pirianga vaitata ma tona au tavini. (Ioane 13:1) Kua “aroa” katoa atu aia i te tangata tei arataki keia e te akonoanga. (Mareko 10:17-22) Inara kua akanoo katoa a Iesu i te au kotinga taka meitaki no runga i tana ikianga i te au oa piri vaitata. Kare aia i akatupu ana i tetai pirianga vaitata ki te au tangata kare e manako tikai ana i te rave i te anoano o tona Metua. I tetai atianga, kua tuatua a Iesu e: “Ko kotou toku oa, kia akono kotou i te au tuatua katoa taku i akaue atu ia kotou na.” (Ioane 15:14) E tika rai, penei e oaoa ana koe ki tetai oa angaanga. Inara e ui kia koe uaorai e: ‘Te inangaro ra ainei teia tangata i te rave i ta Iesu i akaue mai? Te inangaro ra ainei aia kia apiiia no runga ia Iehova, ta Iesu i apii mai kia tatou kia akamori? Aiteite ainei tona au turanga akono tau mei iaku nei rai ei Kerititiano?’ (Mataio 4:10) Ia koe e pukapuka ra ki toou au oa angaanga e te akakite pakari anga i te taangaangaia anga te au turanga Pipiria, ka kitea uaia te au pauanga ki teia au uianga.

11. E akakite mai i tetai au turanga te arataki ra te au tuatua a te Atua i to tatou au takainga.

¹¹ E manganui ua atu te au turanga te riro ra te au tuatua a te Atua mei te ramepa rai ki to tatou vaevae. Ei akaraanga, penei ka orongaia ki tetai Kerititiano kare e angaanga ana tetai angaanga rapurapu ua. Inara, ka pou te taime ki te papaanga o teia angaanga, e me ka ariki aia i te angaanga, e maata te au uipaanga Kerititiano ka akatau aia e kare e o mai ki roto i tetai au angaanga te piri atura ki te akamorianga mou. (Salamo 37:25) Penei ka timata pakariia tetai Kerititiano kia akara i te tamataora anga te aati tikai ra i te au kaveinga Pipiria. (Ephesia 4:17-19) Penei ka riririri ua tetai i te au tu apa o te au taeake irinaki. (Kolosa 3:13) I roto i taua au turanga ravarai, e tuku tatou i te Tuatua a te Atua  ei ramepa no to tatou vaevae. Na te aru tikai anga i te au kaveinga Pipiria, ka autu tatou i te aro atu i tetai ua atu akaaoanga i roto i te oraanga. Te Tuatua a te Atua “e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.”​—2 Timoteo 3:16.

“E Turama no Toku nei Araata”

12. Akapeea te au tuatua a te Atua i te turama anga i to tatou arataa?

¹² Te akakite katoa maira a Salamo 119:105 e e turama te au tuatua a te Atua i to tatou arataa, i te turama anga i te mataara. Kare tatou i te aronga kite kore ua no runga i te tuatau ki mua, no te mea te akamarama maira te Pipiria i te aiteanga o te au turanga taitaia i teianei ao e eaa te ka tupu mai. Ae, te kite nei tatou e te noo nei tatou i roto i te “tuatau openga” o teia akatereanga o te au mea kino nei. (2 Timoteo 3:1-5) Te kite anga e eaa te vai nei no te tuatau ki mua i riro ei ei akakeu anga maata e akapeea tatou i te akono anga i te oraanga i teianei. Kua tata te apotetoro ko Petero e: “I te mea ka taravaiia teia au mea ravarai, mei te aa ra te tu tikai no kotou ei tangata i te au angaanga tapu e te au ravenga no te tu akono i te Atua ra, i te tatarianga e te tamou vaitata anga ki te manako i te taenga mai o taua ra o Iehova ra!”​—2 Petero 3:11, 12, NW.

13. Ka akapeea te tu rapurapu anga o to tatou tuatau i te akakeu anga i to tatou manako e to tatou tu oraanga?

¹³ E mea tau e te akakite maira to tatou manako e to tatou tu oraanga i to tatou irinaki anga ngaueue kore e “te ngaro ke nei teianei ao, ma to te reira katoa e anoano nei.” (1 Ioane 2:17) Na te taangaanga anga i te au kaveinga Pipiria e tauturu ei ia tatou kia rave i te au ikianga tau no runga i to tatou au akakoroanga no te tuatau ki mua. Ei akaraanga, kua tuatua a Iesu e: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:33) E akameitaki anga tikai i te kite atu anga i te au mapu te akarongo maira ki ta Iesu au tuatua na te aruaru anga i te angaanga orometua tamou! Kua neke atu tetai aronga​—e te katoaanga o te ngutuare—​ki te au enua te anoano maataia ra te aronga akakitekite i te Patireia.

14. Akapeea tetai ngutuare tangata Kerititiano i te akamaata anga i ta ratou angaanga orometua?

¹⁴ E akamanako ana i tetai ngutuare tangata Kerititiano e a ratou tei neke atu mei Marike ki Tominika Repapuriki kia tauturu i tetai putuputuanga i roto i tetai taoni e 50,000 tangata. I roto i te putuputuanga e 130 papuritia no te Patireia. Inara, ia Aperira 12, i te mataiti 2006, vaitata rai e e 1,300 aronga tei tae mai ki te Akamaaraanga i to Karaiti mate! Kua ‘teatea ua te  mou’ o te koro i taua ngai ra e e rima ua marama i muri ake, e rave ana teia metua tane, te metua vaine, te tamaiti, e te tamaine i te au apii Pipiria e 30. (Ioane 4:35) Kua akamarama mai te metua tane e: “I roto i te putuputuanga e 30 taeake e te au tuaine tei neke mai ki konei i te tauturu. E 20 no Marike mai, te toenga no Itaria, Kanata, Nu Tireni, Paama, e Paniora. Kua aere mai ratou ma te inangaro kia o mai ki roto i te angaanga orometua e e akakeu anga maroiroi tikai tei tupu ki te tu maoraora o te au taeake i teia ngai.”

15. Eaa te au akameitakianga taau i rekareka ana no te tuku anga i te au anoano o te Patireia ko te mea mua i roto i toou oraanga?

¹⁵ Tei maramaia, e maata te aronga kare e rauka i te neke atu ki tetai enua ke kia tauturu atu i te ngai te anoano maataia ra. Inara ko te aronga te rauka ra i te tauturu​—me kore i te akatanotano i to ratou au turanga kia oronga ia ratou uaorai​—ka kite tikai i te au akameitakianga maata na te piri atu anga ki roto i teia tu no te angaanga orometua. E noatu e teiea te ngai e tauturu ra koe, eiaa e akaruke i te rekareka te ka rauka ia koe me tavini koe ia Iehova ma toou maroiroi katoa. Me tuku koe i te au anoano o te Patireia ko te mea mua i roto i toou oraanga, te taputou maira a Iehova e ‘ka riringi mai i te apinga maata ua atu, kare e ngai e o ei, ei meitaki noou.’​—Malaki 3:10.

Puapinga Anga mei ta Iehova Aratakianga

16. Akapeea tatou i te puapinga angaia me tuku tatou i te au tuatua a te Atua kia arataki ia tatou?

¹⁶ Mei ta tatou i kite ana, te arataki nei te au tuatua a Iehova ia tatou i roto i nga mataara piri vaitata. Kua riro te reira ei ramepa ki to tatou vaevae i te tauturu anga ia tatou kia tere ki mua na te mataara tau e te aratakianga ia tatou me rave tatou i te au ikianga. E te turama ra te reira i to tatou arataa, i te tauturu anga ia tatou kia akara meitaki e eaa te vai ra ki mua. Aru mai, te tauturu ra te reira ia tatou kia aru i ta Petero akamatakiteanga e: “Ka tatua na i te taukupu o to kotou ngakau, kia akono meitaki, ka tatari ua atu ei i te aroa ua te ka apaiia mai no kotou i te mama anga mai o Iesu Mesia ra.”​—1 Petero 1:13.

17. Akapeea te apii Pipiria i te tauturu anga ia tatou kia aru i ta te Atua akauenga?

¹⁷ Kare e ekokoanga e te oronga maira a Iehova i te aratakianga. Te uianga i reira e, Ka kauraro ainei koe ki te reira? E marama ai i te akauenga ta Iehova i oronga mai, e rave koe i te ikianga papu kia tatau i tetai tuanga o te Pipiria i te au ra ravarai. E akamanako oonu i taau e tatau ra, e tauta i te akara i to Iehova anoano i roto i te au tumu manako, e e akamanako i te au mataara tukeke ka rauka te au manako i te taangaangaia i roto i toou oraanga. (1 Timoteo 4:15) No reira e taangaanga i toou “mana no te akamanako anga” me rave koe i taau uaorai au ikianga.​—Roma 12:1, NW.

18. Me tuku tatou i te Tuatua a te Atua kia arataki ia tatou, eaa te au akameitakianga ka rauka mai ia tatou?

¹⁸ Me ka akatika tatou i te reira, na te au kaveinga tei kiteaia i roto i te Tuatua a te Atua e akamarama mai kia tatou e te oronga mai kia tatou i te aratakianga ta tatou e anoano ra, me rave tatou i te au ikianga no runga i te aerenga tau kia aruia. Te irinaki nei tatou e te akariro ra ta Iehova au tuatua tei tataia kia “pakari ei te kamakura.” (Salamo 19:7) Me akatika tatou i te Pipiria kia arataki ia tatou, ka rauka ia tatou tetai akava ngakau ma e te marekaanga te ka tupu mai no te akamareka anga ia Iehova. (1 Timoteo 1:18, 19) Me tuku tatou i te au tuatua a te Atua kia arataki i to tatou au takainga i te au ra ravarai, ka tutaki mai a Iehova ia tatou ma te akameitakianga maata no te oraanga mutu kore.​—Ioane 17:3.

Maara Ainei ia Koe?

• Eaa ra i puapinga ai i te tuku e na te Atua ko Iehova e arataki i to tatou au takainga?

• Na roto i teea tu i riro ei te au tuatua a te Atua ei ramepa ki to tatou vaevae?

• Akapeea te au tuatua a te Atua i riro ei e turama i to tatou arataa?

• Akapeeea te apii Pipiria i te tauturu anga ia tatou kia aru i te akauenga a te Atua?

[Au Uianga Apii]

[Tutu i te kapi 15]

I teea taime ka riro mai ei te kapitianga ki tetai tangata irinaki kore ei mea tau kore?

[Tutu i te kapi 16]

To Iesu au oa piri vaitata ko te aronga tei rave i to Iehova anoano

[Au Tutu i te kapi 17]

Te akaari ra ainei to tatou tu oraanga e te tuku ra tatou i te au anoano o te Patireia ko te mea mua?