Mamae Otooto e te Ngaro Kore

TETAI taime ua akenei, kua inangaro tetai tangata kimikimi kia kite e eea ra ta te tuatau e akakite maira no runga i te manako ngakau o te aronga e mii ra i to ratou au akaperepere tei mate. Kua tuku atu aia i tetai au pepa uianga ki tetai au metua e tamariki ta ratou i mate i te au mataiti i mua atu. Ko tetai au metua ua tei pau mai. Tetai metua tane ko Vladimir te ingoa, kua mate tana tamaiti e rima mataiti i muao, kua akamarama mai aia e te ngata nei rai i te tuatua no runga i tana tamaiti. *

Kare taua tu tumatetenga ngaro kore ra i te mea matau koreia e te au metua e mamae ngakau ua ra. E tai ngauru mataiti i topa akenei kua maremoia te tamaiti a William e 18 ona mataiti e kua mate. Kua tata a William e, “Te kite nei rai au i te mamae o taua mate ra, e ka vai ua rai taua mamae ra e ope ua atu toku oraanga.” E rima mataiti i muri ake i te mate anga te tamaiti a Lucy no tetai maki kare i manakoia ana, kua tata mai aia: “No te au ra mua, kua akamanako ua rai au e, ‘Kare teia i te tika.’ Mei te mea atura e te moemoea kino nei au e kare e roa atu ka ara mai. I tetai taime ra i muri mai kua kite au e e tika tikai teia, e kare aia e oki akaou mai ki te kainga. E rima mataiti i topa akenei i mate ei taku tamaiti, inara i tetai au taime, me ko au anake ua, ka aue rai au iaia.”

Eaa ra te tumu e kite nei rai te au metua e mamae ngakau ua ra mei ia Vladimir, ia William, e Lucy, i te mamae otooto e te ngaro kore? Ka akamanako ana tatou i tetai au tumu.

Eaa ra i Maata Roa ai te Tumatetenga?

Me anauia mai tetai pepe ki roto i te pamiri, ka kite nga metua i te au tu manako ngakau kare takiri e kiteaia ana i vao ake i tetai ua atu pirianga tangata. Ka riro te mou ua anga i ta raua pepe, te akara ua atu anga iaia e moe ra, me kore i te kite ua atu anga i tona mata katakata, i te akatupu i te mataora e te mareka maata kia raua. E mea akaperepere roa na nga metua akono meitaki, ta raua tamariki. Ka tereni raua ia ratou kia kite i te akamako e te akangateitei. (1 Tesalonia 2:7, 11) I te tamariki e ariu maira ki teia au tautaanga nei, ka ngakau parau roa nga metua e ka maata atu to raua au manakonakoanga no ratou.

Ko te au metua akaperepere i ta ratou tamariki e angaanga pakari ana i te akono anga i ta ratou anau. Penei ka akataka ua rai ratou i tetai moni me kore i tetai au apinga materia kia rauka i te tauturu atu i ta ratou tamariki i te akamata i tetai pamiri no ratou uaorai i te tuatau ki mua. (2 Korinetia 12:14) E tai rai tumu maata ta teia aka akapouanga aroa, te taime, te maroiroi, e te moni, e akakite ua maira​—te utuutu nei te au metua i ta ratou tamariki kia ora, kare kia mate. Me mate tetai tamaiti, kare te angaanga o  te utuutu anga iaia i akaotiia, e te au manakonakoanga o nga metua nona, kua takoreia. Kua mutu rai te inangaro e te aroa pumaana i rotopu i nga metua e te tamaiti, kua araiia e te tara ngaueue kore o te mate. Te ngai akaperepereia i vai ana i roto i to raua ngakau no ta raua tamaiti me kore tamaine, e anga ua rai i teianei. Kare te tumatetenga maata e kite ra nga metua e ngaro ngoie ua.

Te akapapu maira te Pipiria e e maata te mamae ta te au metua e mamae ngakau ua ra e kite ra e ka vai ua rai te reira. I te akataka anga e eaa tei tupu i te rongo anga te pateriareka ko Iakoba e kua tamateia tana tamaiti, te na ko maira te Pipiria e: “Kua aae iorā Iakoba i tona kakau, kua pareu iora ki te kakau paoa, aue iora i tana tamaiti e manganui te rā. Kua timata iora tana katoa ra au tamariki tamaroa e te au tamaine katoa i te akapumaana iaia; kare akerai i tika iaia; e kua tuatua maira aia, E aere roa au ki raro i te vaarua ma te aue i taku tamaiti.” I te au mataiti i muri mai, te mii ra rai a Iakoba no tana tamaiti, tei manako aia e kua mate. (Genese 37:34, 35; 42:36-38) Tetai akaraanga Pipiria ke mai te o maira tetai vaine akarongo ko Naomi tona ingoa tei kite ana i te mate o tana nga tamariki tamaroa e rua. No te taitaia maata, kua inangaro aia kia tauiia tona ingoa mei ia Naomi, kia Mara.​—Ruta 1:3-5, 20, 21.

Inara, kare te Pipiria e tuatua ua maira no te mii ta te au metua e kite ra. Te akakite katoa maira te reira e peea a Iehova i te oronga mai anga i te maroiroi no te aronga e mii ua ra. I roto i te atikara ka aru mai, ka akamanako tatou i tetai au mataara e oronga mai ana te Atua i te pumaana ki te aronga e eva ra.

[Tataanga Rikiriki i Raro]