Puapinga Maata Rava Atu i te Reva

VAITATA rai, e au materi aere ta te au pa enua ravarai no runga i te reva: E rangi muramura i te po, e rekarekaanga ia na te mataro; e rangi muramura i te popongi, e akamatakiteanga ia ki te mataro. Kua oronga mai te aronga apiipii reva i teia tuatau i te au tumu ngata e eaa i tupu ei te au turanga o te reva mei ta te materi rai e akakite maira.

I te tuatau o Iesu, kua matau katoa rai te au tangata i te apiianga i te rangi e te akamarama mai anga i to te reira tu. Kua karanga atu a Iesu ki tetai au ngati Iuda e: “Kia tae ki te aiai, te karanga na kotou, Kua muramura te rangi, ka rangi marie. E i te popongi ra, Ka uriia akonei; kua muramura oki te rangi e kua takapakapa. E te au pikikaa e, te kite nei kotou i te tu o te rangi nei; kare ra . . . ” Kare ra i teaa? Kua tuatua a Iesu i tetai tuatua tuke ua ake rai: ‘Kare ra e kite i te au akairo o teianei tuatau.’​—Mataio 16:2, 3.

Eaa ra teia ‘au akairo o teianei tuatau’? Ko te au akakiteanga taka meitaki e manganui e ko Iesu te Mesia mou tikai tei tonokia mai e te Atua ra. Kua kitea meitaki ia tikai tana au angaanga mei te muramura rai o te rangi. Inara, kua kopae te maataanga o te au ngati Iuda i te au akairo e akaari maira e kua aere mai te Mesia​—e akatupuanga tei puapinga maata rava atu i te reva.

I teia tuatau, katoa, e akairo tetai tei puapinga maata rava roa atu kia maramaia i to te kara o te rangi tikai. Kua totou a Iesu e ka takoreia teia ao kino kia rauka i tetai ao meitaki atu i te akamataia. E maata tana au tupuanga i taiku mai e me kapitiia ka akaari mai e aea teia tupuanga e akamata ei. I roto i te reira ko te au tamaki e te au onge i te ao katoa. Kua karanga mai a Iesu e me kiteaia teia au apinga nei, te vaitata maira te tuatau no te Atua kia akao mai iaia ki roto.​—Mataio 24:3-21.

Te kite ra ainei koe i ‘te au akairo o teianei tuatau’?