Tauturu mei “te Atua Nona te Akakoromaki e te Pumaana”

MEI tetai 2,000 mataiti i topa akenei, kua akataka mai te tangata tata Pipiria ko Paulo ia Iehova e ko “te Atua nona te akakoromaki e te pumaana.” (Roma 15:5) I te mea e te akapapu maira te Pipiria kia tatou e kare a Iehova e taui ana kia tau ki te tuatau, ka rauka ia tatou te irinaki e te oronga mai nei rai te Atua i te pumaana ki te aronga e tavini ra iaia. (Iakobo 1:17) E tika oki e, te akakite maira te Pipiria e te oronga ra Iehova i te pumaana na roto i te au mataara tuke tuke, ki te aronga e anoano ra i te tauturu. Eaa ra etai o teia au mataara? Te oronga maira te Atua i te maroiroi ki te aronga e uri ra kiaia na roto i te pure, i te pati i tana tauturu. Te akakeu katoa ra aia i te au Kerititiano mou kia oronga i te pumaana ki te au oa akarongo. E te oronga maira Iehova i te au papaanga pumaana i roto i tana Tuatua, i te Pipiria, tei riro ei akamaroiroianga tikai ki te aronga e mii ra i tetai tamaiti tei takake i roto i te mate. Ka akamanako tatakitai ana tatou i teia au tu akapumaanaanga e toru.

“Kua Akarongo Mairā Iehova”

Kua tata te Ariki ko Davida no runga i Tei Anga mai ia tatou, koia oki a Iehova: “E irinaki iaia, e te au tangata e, i te au tuatau katoa! e riringi i to kotou ngakau ki mua iaia! ko te Atua anake ra to tatou akapuanga.” (Salamo 62:8) Eaa ra i rauka ai ia Davida kia irinaki ki roto ia Iehova? I te tuatua anga no runga iaia uaorai, kua tata a Davida e: “Kua kapiki atura taua tangata i mate nei, e kua akarongo mairā Iehova, e kua akaora atura iaia i tona katoa ra au tumatetenga.” (Salamo 34:6) I te au turanga taitaia pouroa tei na roto ana aia, e pure ua ana a Davida ki te Atua kia tauturu mai, e e tauturu ua mai ana rai Iehova iaia. Kua kite a Davida mei tana i na roto ana e ka turuturu mai te Atua iaia e ka tauturu mai iaia kia akakoromaki.

 Ka anoanoia te au metua e mii ra kia kite e ka akamaroiroi mai a Iehova ia ratou i roto i teia turanga taitaia maata, mei tana i rave no Davida. Ka rauka ia ratou kia akavaitata atu ki “Tei akarongo i te pure,” i te irinaki anga e ka oronga mai aia i te tauturu no ratou. (Salamo 65:2) Kua tata mai a William, tei taikuia i roto i te atikara i mua akenei, e: “E maata ua atu te taime i manako ana au e kare e rauka akaou iaku i te akakoromaki i teia oraanga e kare taku tamaiti i konei, e kua pati ana au kia Iehova kia tauturu mai iaku. E oronga ua mai ana aia i te maroiroi e te ngakau toa kia noo ua atu rai au i te oraanga nei.” Me pure katoa rai koe kia Iehova ma te akarongo, ka tauturu mai te Atua ngateitei o te rangi ia koe. I na oki e, te taputou maira te Atua ko Iehova ki te aronga e tauta ra i te tavini iaia e: “Ko au oki to Atua ra, ko Iehova, ko tei akamaroiroi i to rima katau ra; ko tei tuatua atu ia koe e, Auraka e mataku, naku koe e tauturu.”​—Isaia 41:13.

Turuturuanga Orongaia Mai e te Au Taeake Mou

Ka anoanoia tetai tuatau no te aronga e mamae ngakau ra no te tamaiti i mate, kia eva ngaro ua e kia akana i to ratou ngakau. Inara, kare i te mea meitaki kia kopae ratou i etai ke atu no tetai tuatau roa. Te na ko maira te Maseli 18:1 e, “ko tei akatakake iaia uaorai” ka kite ia i te kino. (NW) No reira, kia matakite te aronga e mii ra auraka kia topa ki roto i te ereere o te akatakake anga ia ratou.

Ka rauka i te au taeake mataku Atua i te oronga atu i te tauturu ki te aronga e taitaia ra. Te akakite maira a Maseli 17:17 e: “E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.” Kua kite rai a Lucy, tei taiku katoaia mai i roto i te atikara i mua akenei, i te pumaana tei orongaia e te au oa mou i muri ake i te mate o tana tamaiti. I te tuatua anga no runga i tona au taeake i roto i te putuputuanga, kua tata aia e: “Kua riro ta ratou atoroanga ei aka tauturu, noatu kare e maata ana ta ratou tuatua i tetai au taime. Tetai taeake e atoro mai ana aia iaku i te au ra me ko au anake ua. Kua kite aia e te aue ua ra au, e e tapae putuputu ua mai ana aia e oti kua aue kapiti ua maua. E ringi ua mai ana tetai iaku i te au ra ravarai i te akamaroiroi iaku. Pera etai atu i te pati mai ia matou ki to ratou au ngutuare i te kaikai, e te pera nei rai ratou.”

Noatu kare e ngaro ngoie ua ana te mamae otooto o te au metua me mate ta ratou tamaiti, na te pure ra ki te Atua e te taokotai ua rai ki te au taeake Kerititiano e apai mai te pumaana tika  tikai ki te aronga e mii ra. Te kite ra te manganui ua atu o te au metua Kerititiano tei mate ta ratou tamaiti e tei vaitata ua ao Iehova ia ratou. Ae, ko Iehova “kua rapakau aia i te aronga ngakau paruparu ra, e kua tākai i to ratou au puta.”​—Salamo 147:3.

Au Papaanga Pipiria e Oronga Maira i te Pumaana

Kapiti mai ki te pure e te taokotaianga akamaroiroi, e tumu pumaana tikai te Tuatua a te Atua no te aronga e eva ra. Te akaari maira te Pipiria e e inangaro maata e te tu kite to Iesu i te takore i te mamae o te au metua e mamae ngakau ra, na te akaora akaou mai anga i tei mate. Te oronga maira taua au papaanga ra i te pumaana tika tikai ki te aronga e mii ra. Ka akamanako ana tatou e rua o taua au papaanga ra.

Te akataka maira a Luka pene 7 e eaa tei tupu i te aravei anga a Iesu i tetai pupu tanumanga i te oire ko Naina. Te aere ra te tangata ka tanu i te tamaiti okotai a tetai vaine takaua. Te akakite ra te irava 13 e: “E kia akara atura te Atu i taua vaine ra, aroa atura iaia, e kua karanga atura, Auraka e aue.”

E tokoiti ua ake te ka tae i te akakite ki tetai metua vaine i ko i te tanumanga o tana tamaiti e auraka e aue. Eaa ra a Iesu i tuatua akapera ai? No te mea kua kite aia e kare e roa atu ka ngaro te tumatetenga o taua metua vaine ra. Te na ko ra te papaanga e: “Kua akavaitata atura [Iesu], rave atura i taua paata tupapaku ra; kua tu ua iora te aronga i apai ra; kua karanga atura aia, E teianei tangata ou, ka tu ki runga, te karanga atu nei au kia koe. Kua tu maira taua tangata mate ra ki runga, e tuatua maira oki te vaa. Kua tuku atura aia iaia ki tona metua vaine ra.” (Luka 7:14, 15) I taua atianga ra, kare kore e kua aue akaou taua metua vaine ra, i teia taime ra e aue rekareka tikai.

 I tetai atianga ke, kua araveiia mai a Iesu e tetai tangata ko Iairo tona ingoa, tei pati mai i te tauturu no tana tamaine 12 mataiti tei rokoia e te maki maata. I muri poto ua ake, kua tae mai te tuatua e kua mate taua tamaine ra. Kua riro tikai teia nuti ei ati ngakau no Iairo, inara kua akakite atura Iesu kiaia e: “Auraka e mataku, ka akarongo ua mai koe.” I ko i te ngutuare o te pamiri, kua aere atu a Iesu ki roto i ko i te tamaine i mate. Kua rave akera aia i tona rima, e kua tuatua atura e: “E maine, ka tu ki runga, te akaue atu nei au ia koe.” Eaa tei tupu? “Kua tu maira taua tamaine ra ki runga i reira, aaere iora.” I akapeea ra tona nga metua? “Va maata ua iora ratou.” Ia Iairo raua ko tana vaine e takave ra i ta raua tamaine, kua ki iora raua i te mataora maata. Mei te mea ra e te moemoea ra raua.​—Mareko 5:22-24, 35-43.

Kia riro taua au papaanga Pipiria no runga i te akatuakaouanga o te tamariki ei akaari ki te au metua e mii ra i teia tuatau e eaa te ka rauka ia ratou kia tapapa atu. Kua akakite a Iesu: “Te vaitata mai nei oki te ora, e akarongo ei te aronga katoa i roto i te [“au menema akamaara anga,” NW] i tona reo, E kua aere mai ki vao.” (Ioane 5:28, 29) Kua akakoro a Iehova e kia oronga mai tana Tamaiti i te ora no te aronga i mate. E mirioni ua atu te au tamariki tei mate te ka ‘akarongo i tona reo’ me tuatua atu aia kia ratou e: “Ka tu ki runga, te akaue atu nei au ia koe.” Ka rauka i taua au tamariki ra i te aaere e i te tuatua akaou. E mei ia Iairo raua ko tana vaine, ka “va maata ua iora ratou” te au metua o taua au tamariki ra.

Me e tamaiti me kore e tamaine taau i mate, kia kite koe e ka rauka ua ia Iehova i te taui i toou tumatetenga ki te rekareka maata na roto i te tuakaouanga. E rauka ai te puapinga mei teia manakonakoanga kaka, e akarongo i te ako a te tata taramo: “E kimi ia Iehova, e tona ra ririnui; e kimi tamou i tona mata. E akamaaraara i tana au angaanga taka ke tana i rave ra; tana ra au ravenga taka ke.” (Salamo 105:4, 5) Ae, e tavini i te Atua mou ko Iehova, e e akamori iaia ma te tau tikai.

Eaa te ka tupu vave ua mai me ‘kimi koe ia Iehova’? Ka rauka ia koe te maroiroi na roto i te pure ki te Atua, ka pumaana koe i te manako aroa akaperepere o te au oa Kerititiano mou, e ka maata toou mataora i te apii i te Tuatua a te Atua. Tetai katoa, i te tuatau ki mua e vaitata maira, ka kite koe i te ‘au angaanga taka ke e te au ravenga taka ke’ ta Iehova ka akatupu no toou uaorai puapinga e no taau tamaiti i mate.

[Pia i te kapi 5]

“Apaina Mai te Vaine Tei Mate Tana Nga Tamariki”

Ko Kehinde raua ko Bintu, e nga Kite raua no Iehova i Naiteria, e kua mate e rua a raua tamariki i roto i tetai tumatetenga tei u te motoka. Mei reira mai, to raua kite ua anga i te mamae no teia mate kino tei tupu. Noatu rai, kua riro to raua irinakianga i roto ia Iehova ei tauturu ia raua, e kua rave ua atu rai raua i te akakitekite aere anga i te karere no te manakonakoanga o te Pipiria ki to raua au tangata tupu.

Te kite maira tetai aronga i te tu au ua e te maroiroi o Kehinde raua ko Bintu. I tetai ra kua akakite tetai vaine ko Mrs Ukoli Bintu e: “Apaina mai te vaine tei mate tana nga tamariki e te tutu aere ra rai i te karere a te Pipiria. Ka inangaro au kia kite e noea tona maroiroi i te akakoromaki.” I te tae atu anga a Bintu ki ko i te are o taua vaine ra, kua akakite mai a Mrs Ukoli kiaia e: “Ka inangaro au kia kite e eaa te tumu e tutu aere nei rai koe no runga i te Atua nana i tamate i to nga tamariki. Kua apai te Atua i taku tamaine okotai. Mei reira mai, kare oku taime akaou no te Atua.” Kua taangaanga a Bintu i te Pipiria i te akamarama i te tumu i mate ei te tangata e no teaa ka rauka ai ia tatou te manakonakoanga papu e ka akatuakaouia mai to tatou au akaperepere.​—Angaanga 24:15; Roma 5:12.

I muri mai, kua tuatua a Mrs Ukoli e: “E manako ana au e na te Atua e akatupu ana i te mate o te tangata. Teianei kua kite au i te tika.” Kua iki aia kia apii i te Pipiria ki te Au Kite o Iehova kia maata atu tona kite no runga i te au taputou a te Atua.

[Pia i te kapi 6]

‘Inangaro Au i te Tauturu, Kare ra Au i Kite e ka Akapeea’

I te au metua e te au taeake o te tamaiti i mate e kite ra i te tumatetenga maata, penei ka manga emiemi rai to ratou au taeake. Te inangaro ra ratou i te tauturu i te pamiri inara te manamanata ra e ka riro aea te rave anga me kore te tuatua anga i tetai apinga tarevake i te akakino roa atu i taua turanga taitaia ra. Teia tetai au tamanakoanga no te aronga e manako ra e, ‘Inangaro au i te tauturu, kare ra au i kite e ka akapeea.’

❖ Eiaa e kopae i tei rokoia e te mamae ngakau no te kare koe i papu e eaa taau ka rave me kore ka tuatua atu. Ka akamaroiroi roaia ratou no tei tae atu koe. Te ngata ra ainei ia koe i te kite e eaa taau ka tuatua? Ka riro te takave anga atu ma te tuatua aroa e “te akaaroa nei au e te tangi atu nei” ei akakite kia ratou e te manako atura koe ia ratou. Te mataku ra ainei koe e me aue koe, ka maata roa atu to ratou mii? Te na ko maira te Pipiria e: “Ka aue katoa oki i te aronga e aue ra.” (Roma 12:15) Te akaari maira toou roi mata e te kite ra rai koe i to ratou mii e e akapumaanaanga tikai te reira.

❖ Eiaa e tiaki, aere atoroia. Ka rauka ainei ia koe te akapapa i tetai manga kaikai na te pamiri? Ka rauka ainei ia koe te orei i te au mereki e te kapu e putunga ua ra? Ka rauka ainei ia koe te raverave i tetai au angaanga na ratou? Auraka e karanga e, “Akakite mai me inangaro kotou i tetai apinga.” Noatu i tuatuaia ma te ngakau tae, te akakite ra taua au tuatua ra ki te maata o te au metua e mamae ngakau ra e kare oou taime i te tauturu ia ratou. E ui ra e, “Eaa taku ka rave i te tauturu ia koe i teianei?” e oti e rave rai koe i ta ratou i pati mai. Inara e kopae i te aere ki tetai au ngai o te ngutuare kare oou tikaanga ki reira me kore i te au mea muna i roto i to ratou oraanga.

❖ E kopae i te karanga atu e, “Te kite nei au i toou manako ngakau.” Tuke tuke to te tangata ravarai tu me mate tetai tei akaperepereia. Noatu e e tamaiti katoa rai taau i mate, kare koe i kite tikai e mei teaa to ratou manako.

❖ E maata te tuatau ka pou i mua ake ka akaraanga ai e kua oki akaou te oraanga ki te tu i matauia ana i te ngutuare. E rave i taau ka rauka i te tauturu ua atu rai ia ratou. I te akamataanga e maata te taime e te akaperepere e orongaia ana ki te pamiri i rokoia e te mamae ngakau, inara e maata atu te ka anoanoia no ratou. E tauturu atu rai i te akono i to ratou au anoano i te au epetoma e te au marama ka aereia. *

[Tataanga Rikiriki i Raro]

[Au Tutu i te kapi 7]

Te akaari maira te au papaanga Pipiria e e mana e e inangaro tikai to Iesu i te akaora akaou mai i te tamariki