Te Au Mapu​—Akakeuia e Kotou te Ngakau o to Kotou Au Metua

“KIA kite au e, te aere ra taku au tamariki na te tuatua-mou, kare oku e rekareka anga maata atu,” i tata mai ei te apotetoro tangata pakari ko Ioane. (3 Ioane 4) Noatu e te taikuia ra ki te au pipi Kerititiano te au tamariki i roto i teia irava Pipiria, te marama ua ra i tetai metua tei mataku i te Atua teia au tuatua tei tuatuaia mai e Ioane. Mei te au metua e akatupu ra i te tuke anga puapinga maata i roto i te oraanga o ta ratou anau, ka rauka i te tamariki i te akatupu i te tuke anga maata i roto i te oraanga o to ratou au metua.

Kua kite te Ariki ko Solomona o Iseraela i te akakeu anga maata a te tamariki ki to ratou au metua. Kua tata aia: “E tamaiti kite ra, e rekarekaanga ïa na te metua tane: kareka te tamaiti neneva ra, e aueanga ïa na tona metua vaine.” (Maseli 10:1) No reira, pouroa te tamariki​—e te aronga katoa tei pakari mai​—ka tau kia akamanako meitaki i te tupu anga o ta ratou au angaanga ka rave ki to ratou metua tane e te metua vaine. Eaa ra teia i tau ei?

E akamanako ana i te au mea katoatoa ta to nga metua tei mataku i te Atua i rave ana i te utuutu anga ia koe! To raua au manako e te au pure kua akamata ke ana i mua ake ka anauia mai ei koe. I muri ake i te anauia mai anga koe, kua rekareka te nga metua i te akatupu anga i tetai pirianga kia koe e penei kua akameitaki i te Atua no te akameitakianga umere e te apainga​—inara ma te tau​—no te ngakianga. Te akono ra raua i teianei i tetai pepe meangiti e kare e maroiroi ana, e ei nga tangata akamori ia Iehova, te akono ra raua i teia ma te ngakau tae.

No te mea e e nga Kerititiano mou toou nga metua, kua akara raua ki te Pipiria e ki te au puka tei akatumuia ki runga i te Pipiria no runga i te arataki anga irinakiia, e kua pati raua ki te aronga tei utuutu ana i te tamariki no runga i te akoanga. Kua akakite katoa raua i to raua nga manako ki te Atua na roto i te pure. (Te Au Akava 13:8) Ia koe e tupu maira, kua kite to nga metua i toou au maroiroi e te kite katoa ra i toou au tu paruparu. (Iobu 1:5) E au akaaoanga ou te ka tupu mai i te tuatau mapu. I tetai au taime, penei ka akameameaau koe, i maata ai te pure a to nga metua, te tatau anga, e te manako anga e akapeea raua i te tauturu anga ia koe kia akamori ua rai koe i to Metua i te rangi, ia Iehova.

Kare roa to nga metua i akamutu ana ei metua vaine e ei metua tane noou. Tei runga ua rai to raua manako i toou oraanga kopapa, i te manako, i te manako ngakau e i te pae vaerua e  maata ua atu koe. Inara, i taua taime rai, te maara ra i nga metua e e naau rai e rave i taau uaorai au ikianga e kare e akapapu anga e mei teaa te tu o toou oraanga. I te openga ra, naau e rave i te ikianga e ko teea aerenga taau ka aru.

Kare ainei e tau, i reira e, ‘kare e rekareka anga maata atu’ no nga metua i te kite anga e te ‘aere ra ta raua tamariki na te tuatua-mou,’ e e tika katoa ainei ra tetai tua? E tika rai, te tamariki te rave ra i te au mea neneva ka apai mai i te mamae ngakau ki to ratou nga metua. Kua akakite a Solomona e: “Te tamaiti neneva ra, e aue anga ïa na te metua tane, e te mamae oki no tei anau mai iaia ra.” (Maseli 17:25) Mei teaa atura te oonu o te mii ka kite nga metua me akaruke tetai tamaiti i te akamorianga i te Atua mou!

Te taka meitaki ra e, e akakeu anga maata ta kotou i roto i to kotou ngutuare e i vao atu. Te akakeu oonu ra toou tu i te ngakau o to nga metua. Me akaruke koe i te Atua e tana au kaveinga, ka tupu te mamae ngakau ki to nga metua. Inara, e tika katoa tetai tua. Me ka vai akarongo mou ua rai koe kia Iehova, ka rekareka to nga metua. E tauta i te akarekareka i te ngakau o to nga metua! Eaa ua atura ainei te apinga aroa akaperepereia ka rauka ia koe i te oronga ki te aronga tei utuutu, paruru, e te aroa mai ia koe?