Akapeea Au i te Tauturu Anga i Taku Tamariki kia Rauka te Apiianga Mou Tikai?

KA TAU kia akaaiteia te apiianga i tetai tamaiti ki tetai tere mataora e te ngata. E tere teia ka aere kapiti koe e taau tamariki. Ka oronga koe i te akamaroiroianga e te aratakianga akaperepere no ratou, te tauturu anga ia ratou i te aerenga na te arataa o te ora. E maata ua atu te ka anoanoia ratou kia kite!

E rauka ai te puapinga mou e te mataora i roto i te oraanga, ka anoanoia te tamariki kia akatupu i te au tu puapinga o te tu akono i te pae vaerua, kia kite i te tika mei te tarevake. Me rauka ia ratou te kite e te aroa ia Iehova, ka puapinga maata roa ia ta ratou apiianga e ka vai rai te ikuikuanga tei rauka ia ratou e mutu kore ua atu. E tuanga maata ta kotou e te au metua i roto i te apii e apiiia ra ta kotou au tamariki, eaa te puapinga o te reira kia ratou, e eaa ta ratou i marama no runga i ta ratou e apii ra.

E maata te au akaaoanga ka anoanoia kia autu atu i roto i teia tere. E mea ngoie ua i te akakeu i te tamariki, e e maata ua atu te au apinga tau kore ta ratou ka mou mai mei tetai au ngai ke mai i vao ake i te pamiri. Te noo nei tatou i roto i tetai ao e akatereia nei e Satani te Tiaporo. (1 Ioane 5:19) E mea puapinga roa te apiianga a te tamariki kiaia, noatu no te au tumu tuke takiri roa. E puapii kite a Satani e te karape​—e puapii viivii ra oki. Noatu e akatutu ana aia iaia uaorai ei ‘angela no te mārama,’ e pikikaa ua ra te marama tana e oronga maira e kare takiri e tau ana ki te Tuatua a Iehova e tona anoano. (2 Korinetia 4:4; 11:14; Ieremia 8:9) E maata to te Tiaporo e to tana au temoni kite karape i te akavare, te turuturu i te tu manako iaia uaorai, te tu tika kore, e te viivii o te tu akono.​—1 Timoteo 4:1.

Eaa taau ka rave i te paruru i taau tamariki kia kore e akavareia? Akapeea koe i te apii anga ia ratou kia ariki i te mea tika e te puapinga? Tetai takainga puapinga e akara matatio ia koe uaorai. Ka anoanoia koe kia tuku i tetai akaraanga meitaki. E mea puapinga katoa kia ariki koe i taau apainga i te tereni i taau tamariki e kia akataka i te tuatau ka anoanoia i te rave anga i te reira. Inara i mua ake ka akamanako ei tatou i teia au takainga, ka akataka ana tatou e eaa tikai te tango no tetai apiianga puapinga.

Te Tango o te Apiianga Mou

Ka rauka ia tatou tetai apiianga mei to Iseraela Ariki ko Solomona, tetai o te au tangata pakari roa atu tei ora ana. Te akakite maira te Pipiria kia tatou e: “Kua oronga mai te Atua i te karape, e te kite, kia Solomona, e mea maata roa, e te maoraora maata o te ngakau, mei te one taatai ra. Maata rava atura to Solomona karape i to te aronga katoa i te itinga o te rā ra, e to Aiphiti katoa ra.” Ko Solomona e “toru tausani ana maseli i tuatua: okotai tausani ana peʼe e rima ara.” E kite maata tikai tona i roto i te au rakau tupu aere e i te oraanga o te manu. (1 Ariki 4:29-34) Kua riro katoa na te Ariki ko Solomona i akatere i te au angaanga akatu are a to Iseraela, tei kapiti mai i te patuanga o te iero mekameka o Iehova i Ierusalema.

Te akaari maira te au tataanga a Solomona, mei te au mea tei kiteaia i roto i te puka o Koheleta, e e maata tikai tona marama no runga i te tu o te tangata. Kua akauruia aia e te Atua kia akakite mai e eaa te tango o te apiianga mou tikai. Kua akakite a Solomona e: “Ko te akamataanga o te kite ra, ko te mataku ïa ia Iehova.” Kua akakite katoa mai te ariki pakari e: “Ko te akamataanga o te pakari ra, ko te mataku ïa ia Iehova: e te kite i te au mea tapu ra, ko te kite ïa.”​—Maseli 1:7; 9:10.

Me mataku tatou i te Atua, ka rauka ia tatou te tu akangateiteianga tapu nona e ka matakite tatou e auraka e akamareka kore atu iaia. Ka ariki tatou e koia Tei Teitei rava atu e ko ta tatou ka kauraro atu. Te aronga e kopae ra i tei oronga  mai i te ora no tatou penei te manako ra te tangata ia ratou e e aronga pakari, kareka ra taua tu pakari ra e “mea neneva ïa i te Atua.” (1 Korinetia 3:19) Ka anoano taau tamariki i tetai apiianga tei akatumuia ki runga i “te pakari no runga mai.”​—Iakobo 3:15,17.

Ko te mataku i te akamareka kore atu ia Iehova e pirianga piri tikai to te reira ki te aroa nona. Ko to Iehova anoano no tona au tavini koia oki kia mataku iaia e kia aroa iaia. Kua akakite a Mose: “E teianei, e Iseraela, eaa ta te Atua oou na ta Iehova i umuumu mai ia koe, mari ra e, kia mataku koe i to Atua ia Iehova, e kia aere koe na tona ra au arataa katoa, e kia [“aroa,” NW] koe iaia, e kia akamori koe i to Atua ra ia Iehova ma to ngakau katoa, e ma to vaerua katoa; Kia akono tikai koe i te au akauenga a Iehova, e tana au akonoanga, i taku e akaue atu kia koe i teianei rā, kia meitaki koe ra?”​—Deuteronomi 10:12, 13.

Me tuku tatou i te mataku akangateitei ia Iehova ki roto i ta tatou tamariki, te akanoo ra ia tatou i te tango no tetai apiianga te ka akatupu i te pakari mou ki roto i ta tatou tamariki. Ia ratou e patu ra ki runga i taua tango ra, ka maata rava atu to ratou akangateitei no Tei Anga mai ia ratou, koia oki te Tumu o te kite mou tikai. Ka tauturu teia i ta tatou tamariki kia marama meitaki i ta ratou e apii ra, e kare i reira e tarevake ta ratou marama anga. Ka akatupu ratou i te tu kite e “kite ei to ratou ngakau i te meitaki e te kino.” (Ebera 5:14) Ka tauturu katoa taua tango ra ia ratou kia vai akaaka ua e kia kopae i te rave i te kino.​—Maseli 8:13; 16:6.

Te Akara ua Maira Taau Tamariki ia Koe!

Ka akapeea ra tatou me tauturu i ta tatou tamariki kia aroa atu ia Iehova e kia mataku iaia? Ka kiteaia te pauanga o taua uianga ra i roto i te Ture ta Iehova i oronga ki te iti tangata o Iseraela na roto i te peroveta ko Mose. Kua akakiteia ki te au metua ngati Iseraela: “E teianei, e [“aroa,” NW] atu koe i to Atua ia Iehova ma to ngakau katoa, e ma to vaerua katoa, e ma to maroiroi katoa. E teianei au tuatua taku e akaue atu kia koe i teianei rā, ei roto i toou ngakau vai ei; E ka apii tamou tikai koe i te reira ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.”​—Deuteronomi 6:5-7.

Te apii maira teia tuanga i tetai apiianga puapinga ki te au metua. Teia oki tetai: Ei metua, ka anoanoia koe kia tuku i tetai akaraanga meitaki. Kia apii i taau tamariki kia aroa atu ia Iehova, ka anoanoia koe uaorai kia aroa atu i te Atua, e kia vai ua tana au tuatua ki roto i toou ngakau. Eaa ra teia i puapinga ai? No te mea ko koe te puapii mua o taau tamariki. Ta ratou ka kite mai mei taau akaraanga ka riro ei akakeuanga pakari ki runga ia ratou. Ko te akaraanga a te metua te akakeuanga pakari roa atu ki runga i te tamaiti i tetai ua atu apinga.

Ka akaariia mai toou uaorai au anoano, au manakonakoanga, au turanga puapinga, e te au mea inangaroia, i roto i taau tuatua e na roto katoa i taau e rave ra. (Roma 2:21, 22) Ka kite ua te tamariki na te akara meitaki anga i to ratou nga metua mei te varevareanga mai. Ka kite ua te tamariki e eaa te mea puapinga ki to ratou metua, e ko teia oki te au mea e riro mai ana ei  mea puapinga ki te tamariki. Me e aroa tika tikai toou ia Iehova, ka kite taau tamariki i te reira. Ei akaraanga, ka kite ratou e e mea puapinga tikai kia koe te tatau e te apii i te Pipiria. Ka kite i reira ratou e te tuku ra koe i te au anoano o te Patireia ei mea mua i roto i te oraanga. (Mataio 6:33) Ka riro taau aere putuputu ki te au uipaanga Kerititiano e te piri putuputu ki te angaanga tutu aere i te Patireia ei akaari kia ratou e ko te rave anga i te angaanga tapu a Iehova te mea puapinga maata roa atu kia koe.​—Mataio 28:19, 20; Ebera 10:24, 25.

E Amo i Taau Uaorai Apainga

Tetai apiianga ke mai ka rauka i te au metua kia tamou mai mei ia Deuteronomi 6:5-7 koia oki: Naau teia apainga no te tereni anga i taau tamariki. I roto i to Iehova iti tangata i te au tuatau taito, na te au metua e rave ana i te apiianga o ta ratou tamariki. I roto i te au Kerititiano i te anere mataiti mua, e tuanga puapinga rai ta te au metua i roto i te apii anga i ta ratou tamariki. (2 Timoteo 1:5; 3:14, 15) I te tata anga atu ki te au oa Kerititiano, kua akakite te apotetoro ko Paulo e na te au metua tane tikai “e apii ra [i ta ratou tamariki] kia pakari ma te ako a te Atu ra.”​—Ephesia 6:4.

No te taomiia nei e te au umuumuanga o teia tuatau, te angaanga, e te au angaanga ke atu e akapou ra i te taime, penei ka timataia te au metua kia vaoo i te apiianga o ta ratou tamariki ki etai ke, mei te au puapii e te aronga e akono tamariki ta ratou angaanga. Inara, kare e rauka i tetai tangata i te apai i te ngai o tetai metua aroa e te akaperepere. Auraka e akavaavaa i toou uaorai turanga puapinga e taau akakeuanga ririnui. Me inangaro koe i tetai tauturu, e iki i te reira ma te tu pakari, tera ra auraka rava e akaruke i taau angaanga akatapuia.

Akapou te Taime i te Tereni i Taau Tamariki

Inara ko tetai apiianga ke atu no te au metua kia tamou mai mei ia Deuteronomi 6:5-7 koia oki: Ka anoanoia te taime e te tautaanga i te tereni i te tamariki. Kua umuumuia te au metua ngati Iseraela kia “apii tamou tikai” i te tuatua mou a te Atua ki ta ratou tamariki. Te aiteanga o te reo Epera mua tei uriia no te “apii tamou tikai” koia oki “kia tuatua akaouia,” “kia tuatua taokiokiia.” Kia raveia teia i te ra katoa, ae, mei te popongi ki te aiai “i roto i to are” e “na te arataa.” Ka anoanoia te taime e te tautaanga i te apii i te tamariki e i te akatanotano i to ratou manako e to ratou tu kia riro ratou ei mea mareka roa ki te Atua.

Eaa i reira taau ka rave i te tauturu anga i taau tamariki kia rauka te apiianga mou tikai? E maata ua atu rai. E apii ia ratou kia aroa atu ia Iehova e kia mataku iaia. Akanoo i tetai akaraanga meitaki. E amo i taau uaorai apainga i te apii i taau tamariki, e e akapou i te taime tei anoanoia no te tereni anga ia ratou. E tu apa ua toou, e ka tarevake rai koe i tetai taime. Inara me tauta pakari koe ma te ngakau tae i te rave i to te Atua anoano, kare e kore ka mareka roa taau tamariki i taau au tautaanga e ka puapingaia mei te reira. “E apii i te tamaiti i te arataa e tikaʼi iaia kia aere ra,” e karanga ra a Maseli 22:6. “E kia pakari aia ra, kare e akaruke i taua arataa ra.” Ka tau rai taua kaveinga ra no te au tamaine.

Ko te apiianga, e tere te reira te ka vai rai no te roa anga o te oraanga. Me e aroa toou e to taau tamariki i te Atua, ka tauturu teia tere ia kotou kia perepere kavana e tuatau ua atu. Te tumu no te mea e maata ua atu rai te ka anoanoia kia kite tatou no runga ia Iehova e ka akapeea e rauka ai ia tatou i te akatupu i tona akakoroanga.​—Koheleta 3:10, 11.

[Tutu i te kapi 15]

Te tatau ra ainei koe i te Pipiria ki taau tamariki?

[Tutu i te kapi 16]

E akapou te taime i te apii i taau tamariki no runga i Tei Anga mai ia tatou