Autu Anga i te Akavaanga i Europa No te Au Tika Anga Tangata

IA TIANUARE ra 11, i te mataiti 2007, kua tuku mai te Akavaanga i Europa no te Au Tika Anga Tangata i Strasbourg, Varani, i tetai manako okotai i te akatika anga i te Au Kite o Iehova i Rutia no ta ratou oroanga akaapa i te Taokotaianga Kavamani o Rutia. Kua turu te tukuanga i te tu rangatira o te akonoanga a te Au Kite o Iehova e to ratou tika anga ki tetai oroanga papakitai kore. Ka akamanako ana tatou e eaa tei arataki atu ki te oroanga.

Te maata anga o te aronga i roto i tetai putuputuanga o te Au Kite o Iehova i te oire o Chelyabinsk, i Rutia, e aronga kua turi te taringa. Te ngai e uipa ra ratou e ngai kua tutakiia e ratou ki te kaoreti terenianga no te angaanga. I te ra Tapati, ia Aperira 16, i te mataiti 2000, kua tamanamanataia ta ratou uipaanga e te vaine akaaere, me kore te Komitiona, o te Au Tika Anga Tangata Konitara no te enua e nga opita akava taoonga teitei e rua e tetai akava kare ona kakau akava. No te tu patoi anga, i te tua tikai o te Komitiona, kua tapuia te akaputuputuanga no te au akaapa anga pikikaa i te rave anga i te au uipaanga kare i tikaia e te ture. Mei ia Me ra 1, i te mataiti 2000, kua akakoreia te riiti no te otitoriamu.

Kua tuku atu te Au Kite o Iehova i tetai akaapa anga ki te roia akaapa o Chelyabinsk, inara kare e apinga i tupu mai ana. Kua akapapuia mai e te Ture Enua o Rutia e te Uruoaanga no te Paruruanga i te Au Tika Anga Tangata e te Au Tu Rangatira Puapinga Maata i te tu rangatira no te akonoanga e te tu rangatira no te kapitianga. No reira i raveia ai tetai oroanga ki mua i te akavaanga tapere tei aruia atu ki tetai patianga ki te akavaanga enua. I mua ake, ia Tiurai ra 30, i te mataiti 1999, kua akatika te akavaanga teitei i tetai oroanga e “kia tau ki te Ture o Rutia no te tu rangatira o te akava ngakau e te au kapitianga akonoanga, ko te tuatua ‘e kare e arai anga’ te aiteanga koia oki kare e umuumuia te akatika anga, me kore te akamana anga i mua ake ki te au mana akaaere no te akono anga i te au angaanga akonoanga ki roto i te au ngai tei orongaia mai [no taua akakoroanga].” (Na ratou te nga paraketi.) Noatu teia tupu anga i mua akenei, te au akaapa anga ki te au akavaanga tapere e to te enua kua takoreia te reira.

Ia Titema ra 17, i te mataiti 2001, kua apainaia mai te oroanga ki mua i te Akavaanga i Europa no te Au Tika Anga Tangata. Kua raveia te oroanga ia Tepetema ra 9, i te mataiti 2004. Te au tuatua e aru mai nei e tuanga no roto mai i te akavaanga openga tei orongaia mai e te Akavaanga:

“Kua kiteaia mai e te Akavaanga e kua tamanamanataia te tikaanga o te aronga na ratou te oroanga i te tu rangatira no te akonoanga koia oki, i te ra 16 o Aperira 2000, kua akamutuia e te au opita Enua ta ratou akaputuputuanga akonoanga i mua ake i te tuatau ka akaoti ei.”

“Te tumu anga ture no te tamanamanata anga i tetai angaanga a te akonoanga tei raveia i te ngai tei tutaki tikaiia no taua akakoroanga ra kare takiri e tikaanga i te ture.”

“Kua kitea mai e [te Akavaanga] e e putuputu roa teia au oroanga i roto i te Akavaanga Teitei o Rutia te aiteanga ra kare e umuumuia e te au akaputuputuanga akonoanga tetai akatika anga i mua ake mei, me kore i tetai akakiteanga ki, te au mana akaaere.”

“No reira kua aatiia e te Komitiona e tona au turuturu te Atikara 9 [tu rangatira no te akonoanga] o te Uruoaanga no te tamanamanata anga i te uipaanga akonoanga a te aronga na ratou te oroanga i te ra 16 o Aperira 2000.”

“Kua kiteaia mai e te Akavaanga e kua ngere te nga akavaanga tapere e te enua i ta ratou apainga . . . i te akaari e kua rongoia ana nga tua e rua ma te tu tau e te papakitai kore. Kua aatiia . . . te Atikara 6 [te tikaanga no tetai oroanga tau] o te Uruoaanga.”

Te akameitaki nei te Au Kite o Iehova i te Atua no te oronga anga mai kia ratou te autu anga i te Akavaanga i Europa no te Au Tika Anga Tangata. (Salamo 98:1) Mei teaa te atea ta te tukuanga tika a te Akavaanga i akatupu? Te akakite maira a Joseph K. Grieboski, te peretiteni no te Akaaere no Runga i te Akonoanga e te Ture a te Katoatoa e: “Ko teia tetai tukuanga tika puapinga maata no te akakeu anga i te tu rangatira o te akonoanga i roto ia Europa katoatoa, no te mea ka akakeu te tukuanga tika i te au tikaanga akonoanga i roto i te au enua katoatoa i raro ake i te Akavaanga i Europa no te Au Tika Anga Tangata.”