Eaa Ka Uipa Putuputu Ei?

MA TE poitirere, kua akaruke te tane a Christine iaia​—i muri ake i te akaipoipoanga no tetai 20 mataiti. Kua kite mai a Christine iaia uaorai e koia anake ua i te utuutu anga e itu tamariki tamaroa e tai tamaine. To ratou mataiti mei te 7 ki te 18. “I teianei naku uaorai e rave pouroa ana i te au ikianga puapinga maata,” i karanga ai aia. “Taitaia tikai au no te apainga e kua inangaro tikai au i te turuanga e te aratakianga.” I teea ngai e kitea ai e ia te tauturu te anoanoia ra?

“E aerenga ora te au uipaanga Kerititiano noku e no toku ngutuare tangata,” i akakite mai ei a Christine. “I ko i te au uipaanga, kua orongaia mai kia matou te turuanga no ko mai i to matou au oa e te aratakianga mei te Tuatua a te Atua. Na te aere putuputu anga ki te au uipaanga kua tauturuia mai matou i roto i te au turanga puapinga maata o to matou oraanga ngutuare tangata.”

I teia tuatau “kino maata,” ka anoanoia tatou pouroa kia akakoromaki i te au timataanga tukeke. (2 Timoteo 3:1) Mei ia Christine rai, penei ka akara koe i te au uipaanga a te Au Kite o Iehova ei aerenga ora i te pae vaerua, e tuanga puapinga maata no taau akamorianga ia Iehova. E mea papu, te akakeu ra te au uipaanga e rima a te putuputuanga tei akapapaia i te au epetoma ravarai i toou aroa no te Atua, i te akaketaketa anga i toou manakonakoanga no te tuatau ki mua, e te oronga anga kia koe i te aratakianga tei akatumuia ki runga i te Pipiria e ka akapeea i te akono anga i te au timataanga.

Inara, te vai ra tetai aronga e mea ngata ia ratou i te aere putuputu mai ki te au uipaanga. Kua roiroi ratou i te openga o te ra, e kua manako e te akamanea anga i roto i tetai tu tau e te aere anga ki te uipaanga i te akara anga penei e ngata tikai. Kua kite mai etai pae e te tamanamanata putuputu ra ta ratou akanoonoo anga no te angaanga i te aere anga ratou ki te uipaanga. Kia tae atu ki te au uipaanga katoatoa, ka meangiti mai ta ratou moni angaanga ka rauka me kore penei ka ruti ratou i ta ratou au angaanga. Penei kare etai pae e aere mai ana ki te au uipaanga no te mea te manako ra ratou e e akaangaroianga maata etai tu tarekarekaanga i te kapiti atu ki te putuputuanga.

No reira, eaa ra te au tumu akakeuanga kia aere atu koe ki te au uipaanga Kerititiano? Akapeea koe i te akariro anga i teia au uipaanga ei akaangaroianga kia koe uaorai? E tauturu ei i te pau i teia au uianga, ka akara matatio ana tatou i te patianga aroa a Iesu tei tataia i roto ia Mataio 11:28-30. Kua akakite aia e: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.”

“E Aere Mai Kotou Kiaku Nei”

Kua tuatua a Iesu e: “E aere mai kotou kiaku nei.” Ko tetai mataara kia ariu atu ki taua  patianga ra koia oki kia aere putuputu ki te au uipaanga. E tumu anga meitaki tetai kia aere, no te mea i tetai atianga, kua tuatua a Iesu e: “I te ngai e putuputu ei e toko rua e toko toru i toku nei ingoa, tei rotopu katoa au ia ratou i reira.”​—Mataio 18:20.

I te anere mataiti mua, kua pati a Iesu i te au tangata tukeke kia aru iaia. No reira kua oronga aia kia ratou i te tuatau kia rekareka i te kapitianga vaitata kiaia. Kua ariki viviki etai pae. (Mataio 4:18-22) Ko tetai pae kua tuku i taua au apinga ra mei te au anoano i te pae apinga i te tapu ia ratou kia kore e ariki atu i taua patianga ra. (Mareko 10:21, 22; Luka 9:57-62) Ki te aronga tei aru iaia, kua rave a Iesu i teia tuatua akapapu anga e: “Kare oki kotou tei iki mai iaku; ko au ra tei iki ia kotou.”​—Ioane 15:16.

I muri ake i tona matenga e te tuakaouanga, kare a Karaiti i te pae i tana au pipi i te pae kopapa. Inara tei te pae ua aia ia ratou na roto i te tu e te arataki ra aia i ta ratou angaanga e te akara maira i te ariu anga ratou ki tana akoanga. Ei akaraanga, mei tetai 70 mataiti i muri ake i tona tuakaouanga, kua oronga a Iesu i te akoanga e te akamaroiroianga ki te putuputuanga toko itu i Asia Minora. Te akaari maira tana au tuatua i tetai kite taka meitaki no te au tu maroiroi e te au tu paruparu o te aronga tataki tai i roto i taua au putuputuanga ra.​—Apokalupo 2:1–​3:22.

Te manako ua maira rai a Iesu i tana au pipi tataki tai. Te taputou maira aia e: “I na, tei vaitata ua ra au ia kotou, e tae ua atu ki te openga o teianei ao.” (Mataio 28:20) Te noo nei tatou i roto i te tuatau openga, e no reira te anoanoia ra tatou kia akono i ta Iesu patianga kia aru iaia. I tetai tuanga, i te rave anga i te reira te umuumuia ra kia aere putuputu tatou ki te au uipaanga. Te inangaro ra a Iesu ia tatou kia akarongo kiaia e kia “apiiia e ia” na roto i te au apii tei akatumuia ki runga i te Pipiria e te au akoanga tei riro ei au mea te rave putuputuia ra no te au uipaanga. (Ephesia 4:20, 21, NW) Te ariu ra ainei koe ki ta Iesu patianga e: “E aere mai kotou kiaku nei”?

“Ko te Aronga Katoa i Roiroi, e te Aronga Teiaa i te Apainga”

Ko tetai tumu puapinga maata kia aere ki te au uipaanga Kerititiano koia oki kia rauka mai te akamaroiroi anga. (Ebera 10:24, 25) E manganui i o tatou tei ‘roiroi e tei teiaa i te apainga’ i roto i te au tu tuketuke. Penei kua akateiaaia koe e te au apiapi naau uaorai, mei te au manamanata i te pae kopapa. I ko i te au uipaanga Kerititiano, ka rekareka koe i tetai tuatua akamaroiroi anga. (Roma 1:11, 12) Ei akatauanga, ka akarongo koe i te au tuatua akamaroiroi anga i te pae vaerua, ka akamaaraia atu kia koe toou manakonakoanga tei akatumuia ki runga i te Pipiria, e te akara anga i te akarongo o tetai ke tei tamou marie i te au timataanga. Ka riro teia pouroa ei tauturu ia koe kia akakoromaki e kia akono i toou au manamanata na roto i te manako tau.

E akamanako ana i te au tuatua a tetai vaine Kerititiano tei rokoia e tetai maki kino. “No toku tu maki te umuumuia ra kia noo au i roto i te are maki no tetai au taime,” i akamarama mai ei aia. “Te aere anga ki te au uipaanga i muri ake i te noo anga i roto i te are maki kua riro mai ei mea ngata, inara e ngai tau te reira noku. Te tu maana e te aroa o te au taeake e te au tuaine kua riro mai ei akamaroiroi anga i toku rekareka, e te apiianga e te aratakianga tei orongaia mai e Iehova raua ko Iesu te oronga maira i tetai akakoroanga no toku oraanga.”

“Te Maru nei Taku Amo, e te Māmā nei Taku Apainga”

E akara ana e i roto i te irava ta tatou e akarakara nei, kua karanga a Iesu e: “Kia apiiia kotou e au.” Na te apiiia anga e Iesu, ka riro mai tatou ei au pipi nana, e ka apai tatou i tana amo me rave tatou i tetai akatapuanga ki te Atua e te papetitoanga. (Mataio 28:19, 20) E puapinga maata tikai te o putuputu anga ki roto i te au uipaanga me inangaro tatou kia vai ua rai ei au pipi na Iesu. No teaa ra? No te mea i ko i te au uipaanga Kerititiano i apiiia ai tatou no runga ia Iesu, tana au apii, e tana au ravenga.

Eaa te apainga ta Karaiti e inangaro ra kia apai tatou? Ko taua apainga rai tana uaorai e apai ra​—te tikaanga i te akono i to te Atua anoano. (Ioane 4:34; 15:8) Te umuumuia ra te tauta anga kia akono i te au akauenga a te Atua, inara kare teia apainga i te mea teiaa roa i te apai anga. Penei e teiaa te reira me tauta tatou i te apai i te reira ma to tatou uaorai maroiroi. Inara, me ka pure tatou no te vaerua o te Atua e te kai i te kai  pae vaerua tei orongaia mai i ko i te au uipaanga, ka rauka ia tatou te “mana maata meitaki” tei orongaia mai e te Atua. (2 Korinetia 4:7) Na te akapapa anga no te au uipaanga e te o atu anga ki roto i te reira, ka ketaketa mai to tatou aroa no Iehova. E me akakeuia tatou e te aroa, ‘kare i te mea teiaa’ te au akauenga a te Atua.​—1 Ioane 5:3.

E aro ana te maataanga o te au tangata i taua au akaaoanga mei te angaanga moni, i te akono anga i te au mea o te oraanga kopapa, e te akono anga i tona uaorai au manamanata. Inara, kia akono i te reira, kare tatou e irinaki ki runga ua i te pakari o te tangata. Te tauturu ra te au uipaanga putuputuanga ia tatou e “auraka e apiapi,” no te mea na Iehova e akono i to tatou au anoano e te tauturu ra ia tatou kia akakoromaki i te au manamanata. (Mataio 6:25-33) E tika rai, kua riro te au uipaanga Kerititiano ei akakiteanga i te aroa o te Atua no tatou.

“Te Maru nei Au, e Ngakau Akaaka Toku”

E peu tikai ia na Iesu i te atoro i te tunako, e ngai te uriuriia ra te Tuatua a te Atua. I tetai atianga mei tera, kua rave mai a Iesu i te pokaikai tuatua a Isaia e kua tatau: “Tei rungao iaku te Vaerua o te Atu, koia i akatainu mai iaku ei tutu aere i te evangelia i te tangata rikiriki; kua tono mai iaku e akanā i te aronga ngakau aue, ei tutu aere i te ora no te aronga tuikaa, kia akara akaou te matapo, e e tuku oki i te aronga i tapekaia ra, Ei tutu aere i te mataiti inangaro a te Atu ra.” (Luka 4:16, 18, 19) Mei teaa atura te rekareka i te reira i te akarongo anga i to Iesu taangaanga anga i taua au tuatua i te na ko anga e: “Teianei tuatua i tataia nei, ta kotou i akarongo nei, kua tupu ïa i teianei rā”!​—Luka 4:21.

Te akaaere nei rai a Iesu, te “Tiaki maata” maru, i te akono i tana au pipi i te pae vaerua. (1 Petero 5:1-4) I raro ake i tana aratakianga, kua iki “te tavini akono meitaki e te pakari” i te au tane ei au tiaki i roto i te au putuputuanga no te Au Kite o Iehova takapini i te ao katoa. (Mataio 24:45-47; Tito 1:5-9) Ko teia au tane nei te “tiaki i te putuputuanga a te Atua” ma te maru e te akanoo ra i tetai akaraanga meitaki na te aere putuputu anga ki te au uipaanga. Ka rauka ia koe i te akaari i te ariki anga rekareka no teia “au apinga oronga ua i roto i te tangata nei” na te tae anga mai ki te au uipaanga, e rauka ai ia koe i te akamaroiroi i tetai ke no te tae anga koe e te paupau anga koe.​—Angaanga 15:30-33; 20:28, NW; Ephesia 4:8, 11, 12, NW.

“Rauka oki ia Kotou te Akaangaroianga i to Kotou Vaerua”

Me aere ana koe ki te au uipaanga Kerititiano, akapeea koe i te akapapu anga e e au atianga akaangaroianga tikai teia? Ko tetai mataara koia oki kia akono i ta Iesu akoanga e: “E matakite i to kotou akarongo anga.” (Luka 8:18) Ko te au tangata tei inangaro tikai ra i te kite kua akarongo pu tikai kia Iesu. Kua pati ratou kiaia kia akamarama mai i tana au akatutuanga e, tei tupu mai, kua akameitakiia ma te kite oonu.​—Mataio 13:10-16.

Ka rauka ia koe i te aru i taua aronga tei pongi ra i te pae vaerua na te akarongo meitaki anga i te au tuatua i ko i ta tatou au uipaanga. (Mataio 5:3, 6) E tauturu ei kia akamou marie i toou manako, e tauta i te aru i te aerenga manako o te vaa tuatua. E akamanako e e ui kia koe uaorai i teia au uianga mei teia rai: ‘Akapeea au i te akono anga i teia akakiteanga i roto i toku oraanga? Na roto i teea tu e taangaanga ai au i te reira i te tauturu anga i tetai ke? Akapeea au i te akamarama anga i teia manako?’ Kapiti katoa mai, e akara i te au irava tei tatauia mai e te vaa tuatua ei turu i tana au tumu maata. I te maata atu o toou matakite i taau e akarongo ra, ka riro mai te au uipaanga ei akaangaroianga maata.

I muri ake i te uipaanga, e uriuri i te manako o te porokaramu ki tetai ke. E akara tamou ki runga i te tumu manako e ka akapeea te reira i te taangaangaia anga. Ko te au tuatua akamaroiroi anga te akariro ra i te au uipaanga ei akaangaroianga tikai.

Kare e ekokoanga e e au tumu meitaki tikai to tatou no te uipa putuputu anga mai. I muri ake i te akara akaou anga i te au mea puapinga tei uriuri uaia akenei, eaa ka kore ei e ui kia koe uaorai e, ‘Ka akapeea ra au i te ariu anga ki ta Iesu patianga e: “E aere mai kotou kiaku nei”?’

[Au Tutu i te kapi 11]

Te tamanamanata ra ainei tetai au angaanga ke i te aere anga koe ki te uipaanga?