“Eaa ra Koe e te Atu, i Muteki ua Ai?”
“Eaa ra Koe e te Atu, i Muteki ua Ai?”
TEIA oki te tuatua a te Pope Benedict XVI, tei atoro atu i te puakapa tapekaanga i mua ana i Auschwitz, Porani, i roto ia Me 28, 2006. I ko i te ngai i tamate ei te au Nazi i te au anere ua atu au tauatini ngati Iuda e etai atu, kua tuatua katoa atu aia e: “E maata ua atu te au uianga tei uiia ana i roto i teia ngai! E ui putuputuia ana te uianga e: Teiea ra te Atua i taua au tuatau ra? Eaa ra aia i muteki ua ai? Eaa ra aia i akatika ua ai i teia taanga kia aere ua atu, i teia upokotu anga o te kino? . . . Kia aue atu rai tatou ma te akaaka e ma te manono pakari atu i te Atua kia: Tauturu mai! Auraka e akangaropoina i te tamariki a te tangata nei, taau i anga mai!”
Kua akatupu mai te tuatua a te pope i tetai au pauanga umere tikai. Kua kite ua tetai aronga e kua kopae akakoro tikai aia i te tuatua mai no runga i tetai au mea puapinga, mei te patoi anga i te ngati Iuda tei akapiriia atu ki te au kino rikarika roa atu tei raveia i Auschwitz. Tetai aronga kua kite ratou e te tauta ra aia i te akakorekore i te patianga a te Pope John Paul II kia akakoreia mai te au ara a te akonoanga i rave. Kua akakite tetai tangata Katorika tata nuti pepa, ko Filippo Gentiloni, e: “I tau atu ra, i te au vaa tuatua e manganui me uiia mai tetai au uianga ngata e teiea ra te Atua—e uianga kare ona pauanga—kia pati atu i tetai pauanga ki tetai uianga mama atu koia oki: Teiea ra a Pius XII?” Te tuatua ra te au vaa tuatua e eaa te Pope Pius XII i muteki ua ai i te tuatau o te Orokoti.
Ko te Orokoti, e te au angaanga pouroa i raveia i te tairipoti anga i te tangata i roto i te tuatua enua o te tangata, e akapapuanga te reira e “te tutara ra tetai tangata ki rungao i tetai, ei mate nona uaorai.” (Koheleta 8:9) Tetai, kare Tei Anga mai i te tangata i noo muteki ua ana i roto i teia tu rikarika maata. Na roto i te au kapi o te Pipiria, kua akakite mai aia i te au tumu i akatika ua ai aia i te rave kino. Kua akapumaana katoa mai te Atua ia tatou e kare aia i akangaropoina ia tatou. Ko te tika, kare e roa atu ka ope te tuatau tei akatikaia e te Atua kia tutara te tangata iaia uaorai. (Ieremia 10:23) Ka inangaro ainei koe kia kite maata atu no runga i to te Atua akakoroanga no tatou? Ka mataora roa te Au Kite o Iehova i te tauturu ia koe kia kite i te pauanga a te Pipiria ki te au uianga tei riro ei tamanamanata i te Pope Benedict XVI.
[Akameitakianga no te Tutu i te kapi 32]
Oświęcim Museum