Eaa te Mamae Anga Katoatoa ka Ope Ei Kare e Roa Atu Ana

“Ko te Mato aia ko tei tika rava tana angaanga ra.”​—DEUTERONOMI 32:4.

1, 2. (a) Eaa koe i akaperepere ei te manakonakoanga i te nooanga e tuatau ua atu? (e) Eaa te tapu ra i te manganui kia kore e irinaki i te Atua tei oronga mai i teia au taputou mataora no te tuatau ki mua?

E REKA ana koe i te akamanako i te oraanga i roto i te Parataito? Penei te kite ra koe ia koe uaorai e ori aere ra i runga i teia paraneta manea tikai e te kite atu anga i to te reira au tu oraanga tukeke e manganui. Me kore penei te akamanako ra koe i te tu merengo anga taau ka kite mai ia koe e angaanga kapiti atura ki tetai ke i te akonoanga i te enua e te tauturuanga i te taui i te reira ki roto i tetai paka takapini i te ao katoa nei. Me kore te tapapa atura koe i te au tareni taau ka akatupu i roto i te ati, te parani are, te akatangianga imene, me kore i tetai atu au aruaruanga e kare oou taime ki te reira i roto i teia oraanga apiapi i teia tuatau nei. Noatu rai, te akaperepere ra koe i te manakonakoanga i te akonoanga i ta te Pipiria e karanga maira e ko “te oraanga tikai”​—te oraanga ta Iehova i akakoro no tatou kia akono atu, ma te tuatau mutu kore i te akamanakoanga.​—1 Timoteo 6:19, NW.

² E rekareka tikai e te arikianga ngateitei i te akakite atu anga i te reira manakonakoanga tei akatumuia ki runga i te Pipiria ki tetai ke, kare ainei? Inara, e manganui, te ariu ke ra mei te reira manakonakoanga. Kua manako atu ratou i te reira ei mea manako ua, ei moemoea ua no te au tangata vare ua. Penei e aka angaanga ia ratou i te irinaki i roto i te Atua e taputou maira i te oraanga mutu kore i roto i tetai Parataito. Eaa te tumu? No tetai pae, te apinga e taii ana ratou koia oki ko te manamanata no te kino. Kua manako oki ratou e me te vai ra te Atua e e ririnui aia e te takinga meitaki, kare e rauka te mamaeanga e te kino e tupu ra i roto i teianei ao, i te akamaramaia. Te manako ra ratou e, kare e Atua e akakoromaki ua ra i te kino e vai ra​—me kare me te vai ua ra aia, penei kare aia i te mana katoatoa me kore kare aia e manako mai ana ia tatou. Ki tetai pae, te tano ua ra teia tu akamanakoanga. E kikite tikai a Satani i te akapoiri anga i te au manako o te tangata.​—2 Korinetia 4:4.

3. Eaa te uianga pakari ka rauka ia tatou i te tauturu i te tangata kia pau, e eaa i rauka ai ia tatou i te rave i te reira?

³ Ei Au Kite no Iehova, ka rauka ia tatou i te tauturu i te au tangata te akavareia ra e Satani e te kite pakari o teianei ao. (1 Korinetia 1:20; 3:19) Te kite ra tatou i te tumu i kore ei te manganui e irinaki ana i roto i te au taputou a te Pipiria. Kare ua ratou i kite ia Iehova. Penei kare ratou i kite i tona ingoa me kore i te puapinga o te reira, e penei ake e iti ua me  kore kare takiri a ratou apinga i kite no runga i tona au tu me kore i tona rekoti i te akonoanga i tana au taputou. Manuia tatou no te rauka anga i te reira kite. I tetai au taime, e mea meitaki no tatou kia uriuri akaou e akapeea tatou i te tauturuanga i te au tangata tei “manako akapoiriia” kia kite mai i te pauanga ki te uianga pakari rava atu e uiia ana e te au tangata e, “Eaa te tumu i akatika ai te Atua i te kino e te mamaeanga?” (Ephesia 4:18) Te mea mua, ka akamanako tatou e akapeea i te itae meitakianga i tetai pauanga. E oti ka uriuri tatou e akapeea e kiteaia ai to Iehova au tu i te mataara i akono ei aia i te turanga no te kino.

Kimi Anga i te Ravenga Tau

4, 5. Eaa ta tatou ka rave mua me ui mai tetai tangata i te uianga e eaa te tumu i akatika ai te Atua i te mamae anga? E akataka mai.

⁴ Me ui mai ana tetai tangata eaa te tumu i akatika ai te Atua i te mamae anga, akapeea tatou i te pauanga? Penei ka viviki tatou i te oronga i tetai akamaramaanga akataka meitakiia, akamataanga ki tei tupu mai ki roto i te kainga i Edene. Penei i tetai au taime, te meitaki ua ra te reira. Inara, e akamatakiteanga tetai. Penei ka anoanoia tetai kimikimianga. (Maseli 25:11; Kolosa 4:6) Ka akamanako tatou e toru tumu maata te ka tauturu ia tatou i te tauturu i tetai tangata i mua ake ka oronga ei tatou i te pauanga ki te uianga.

⁵ Te mea mua, me te manamanata tikai ra tetai tangata i te maata o te kino i roto i te ao nei, penei kua tupu tikai tetai kino kiaia me kore ki tetai tangata tana i akaperepere ei. E mea meitaki i reira, kia akamata atu na te akaarianga i te tu tangi tikai. Kua ako te apotetoro ko Paulo i te au Kerititiano e: “Ka aue katoa oki i te aronga e aue ra.” (Roma 12:15) Te akaarianga i te tu tangi, me kore te “manako ngakau aroa,” penei ka akakeu te reira i te tangata ra. (1 Petero 3:8, NW) Me te marama maira aia e te manako ra tatou iaia, i te akaraanga ka keu aia i te akarongo mai ki ta tatou ka tuatua atu.

6, 7. Eaa tatou ka tau ei kia akameitaki i te tangata ngakau tae tei ui mai i te uianga taitaia i te pae vaerua?

⁶ Te rua, penei ka rauka ia tatou i te akameitaki i te tangata ngakau tae no te uianga mai i teia uianga. E manako ana tetai pae tangata e no te mea te taii ra ratou no runga i teia au uianga, kare o ratou akarongo me kore te akangateitei kore ra ratou i te Atua. Penei i akapera mai ana tetai orometua i te tuatuaanga kia ratou. Inara, kare e ko te tumu ua rai te reira. Ko te tikaanga, kua ui katoa rai te au tangata tiratiratu katoatoa i roto i te au tuatau Pipiria i te reira au uianga rai. Ei akaraanga, kua ui te tata taramo ko Davida e: “Eaa koe, e Iehova, i akaateaʼi? eaa koe i pipini ei i te tuatau tumatetenga nei?” (Salamo 10:1) Kua ui katoa rai, te peroveta ko Habakuka e: “Mei te aa te roa, e Iehova, o toku kapiki anga, e kare koe akarongo mai! o toku kapiki anga, e kare koe akarongo mai! o toku kapiki nui anga tau ia koe i te takinga-kino, e kare koe i akaora? Eaa ra oki koe i akakite mai ei iaku nei i te kino, akara uaʼi koe i te mate nei? te vai nei oki te āru e te rave aroa kore ki mua iaku nei: e te vai nei oki te aronga e akatupu i te karo e te tauetono.”​—Habakuka 1:2, 3.

⁷ E au tane tiratiratu aere teia tei akangateitei maata tikai i te Atua. Kua akoia ainei ratou no te uianga i te reira au uianga taitaia? Kare rava, kua inangaro a Iehova kia rekotiia ta ratou au uianga ngakau tae ki roto i tana Tuatua. I teia tuatau, penei tetai tangata e manamanata ra no runga i te maata o te kino te pongi tikai ra aia i te pae vaerua​—te inangaro ra i te au pauanga te ka rauka anake ua i te Pipiria i te oronga mai. E akamaara, kua tuatua meitaki a Iesu i te aronga tei pongi i te pae vaerua, me kore tei “manako i to ratou anoano i te pae vaerua.” (Mataio 5:3, NW) Mei teaa tikai te ariki rekareka i te tauturu anga i te reira au tangata kia kite mai i te mataora ta Iesu i taputou mai!

8. Eaa te au apiianga tarevake e taki ra i te au tangata kia irinaki e na te Atua i apai mai i te mamaeanga, e akapeea tatou i te tauturuanga ia ratou?

⁸ Te toru, penei ka inangaroia tatou i te tauturu i te tangata kia kite mai e kare no te Atua te tarevake i maata ei te kino i roto i te ao nei. E manganui te au tangata e apiiia ra e ko te Atua teia e tutara nei i te ao e noo nei tatou ki roto, e kua akakoro ke roa ana te Atua i te au apinga pouroa te ka tupu kia tatou, e e au tumu muna e te kitea koreia tana no te apai anga mai i te kino ki runga i te au tangata ravarai. E au apiianga pikikaa aere teia. Te akangateitei kore ra te reira i te Atua e te akatutuia maira aia e nona te tarevake i tupu ei te kino e te mamaeanga i roto i te ao nei. No reira penei ka anoano ia tatou kia taangaanga i te Tuatua a  te Atua i te akatikatika i te reira au manako. (2 Timoteo 3:16) Kare e ko Iehova te tutara o teia akatereanga kino o te au mea nei; ko Satani te Tiaporo ia. (1 Ioane 5:19) Kare a Iehova e akakoro ke ana i te oraanga o tana au mea ora kite; kua oronga aia kia ratou tataki tai i te tu rangatira e te au atianga kia iki i rotopu i te meitaki e te kino, te tika e te tarevake. (Deuteronomi 30:19) E kare rava e ko Iehova te tumu no te kino; e rikarika ana aia i te kino e te manako aroa ra i te aronga tei rokoia e te kino.​—Iobu 34:10; Maseli 6:16-19; 1 Petero 5:7.

9. Eaa tetai au tauturu ta “te tavini akono meitaki e te pakari” e oronga maira kia tauturu i te au tangata kia marama i te tumu i akatika ai te Atua ko Iehova i te mamae anga?

⁹ Me oti mai ana taau kimikimianga, penei ka kite mai koe e kua papa taau tangata e akarongo maira i te kite i te tumu i akatika ua ai te Atua i te mamae. Kia tauturu ia koe, kua oronga mai “te tavini akono meitaki e te pakari” i te au tauturu e manganui. (Mataio 24:45-47) Ei akatauanga, i te Uruoaanga Tapere “Te Akarongo Tu Atua” no te 2005/06, kua tukunaia mai tetai aenga pepa tei tapaia e Te Mamaeanga Katoatoa Kare e Roa Atu ka Ope! Me kua rauka teia aenga pepa i roto i toou reo, kore koe e akamatau ia koe ki te au tataanga i roto i te reira? Mei te reira katoa rai, kua akanooia tetai pene i roto i te puka Eaa Tikai ta te Pipiria e Apii Maira?, te rauka ra i roto i te 157 reo, ki teia uianga puapinga maata. E taangaanga meitaki tikai i te reira au tauturu. Te akamarama meitaki maira te reira i te au tupuanga Tuatua Tapu no runga i te maroanga no te turanga ngateitei i te ao katoa e pini ua ake tei uiia i Edene e te tumu i akono ei a Iehova i tana i rave no runga i te reira akaaoanga. E akamanako katoa e, ia koe e uriuri ra i teia manako, te akakite ra koe ki taau tangata e akarongo maira i te tumu kite puapinga maata rava atu e vai ra. Ko te kite te reira no Iehova e tona au tu manea tikai.

Akamou ki Runga i to Iehova Au Tu

10. Eaa i ngata ei no te manganui i te marama i ta te Atua akatika ua anga i te mamae, e eaa te kite te ka tauturu ia ratou?

¹⁰ Ia koe e tauturu ra i te au tangata kia marama i te tumu i akatika ai a Iehova i te au  tangata kia tutara i rungao ia ratou uaorai i raro i te akakeuanga a Satani, e tauta i te arataki i te manako ki to Iehova au tu manea tikai. E manganui te au tangata tei kite e e Atua ririnui aia, e kua matau ratou i te akarongo anga iaia i te kapikiia anga e ko te Atua Mana Katoatoa. Inara, penei e ngata ia ratou i te marama i te tumu i kore ei aia i taangaanga i tona mana maata i te takore viviki atu i te tika kore e te mamaeanga. Penei kare ratou e marama ana i tetai au tu ke mai o Iehova, mei tona tu tapu, tuatua tika, pakari, e te aroa. E akaari mai ana a Iehova i teia au tu nei na roto i tetai mataara tano meitaki ua e te apa kore. Te karanga maira te Pipiria i reira e: “Tika rava tana angaanga ra.” (Deuteronomi 32:4) Akapeea koe i te akakite atu anga i teia au tu ia koe e pau ra i te au uianga e ui putuputuia ana no runga i teia maroanga? E akamanako ana tatou i tetai nga mea akaraanga ua.

11, 12. (a) Eaa te akakore anga ara i kore ei e e tikaanga i te ara anga a Adamu raua ko Eva? (e) Eaa a Iehova ka kore ei e akakoromaki i te ara e tuatau ua atu?

¹¹ Kare ainei e ka ngoie ua ia Iehova i te akakore i te ara a Adamu raua ko Eva? I teia atianga nei kare te akakore anga ara i te tikaanga. Ei nga tangata apa kore, kua akono a Adamu raua ko Eva i tetai ikianga akakoro kia kopae i te turanga ngateitei o Iehova e kia ariki atu i reira i te aratakianga a Satani. Kare i te mea poitirere, e kare rava e akakiteanga no te tataraara i te tua o te nga meameaau. Inara, me ui mai ana te au tangata no runga i teia manako no te akakore anga ara, penei te kimikimi tikai ra ratou i te tumu i kore ei a Iehova i taakaaka i tona turanga e kia akakoromaki ua i te tupuanga o te ara e te meameaau. Te piri atura te pauanga ki tetai tu te puapinga ra ki te tu natura tikai o Iehova​—tona tu tapu.​—Exodo 28:36; 39:30.

¹² E manganui te au taime e taiku ana te Pipiria i to Iehova tu tapu. Inara, ma te tangi, e iti ua te au tangata i roto i teia ao kino nei e marama ra i te reira tu. E Atua ma, e te iro kore a Iehova e e tu takake rava mei te au tu ara ravarai. (Isaia 6:3; 59:2) No runga i te ara, kua akanoo aia i tetai ravenga no te tapokianga i te reira, i te akakoreanga i te reira inara kare aia e akakoromaki ua rai i te reira. Naringa ka akakoromaki mutu kore ua atu rai a Iehova i te ara, kare o tatou manakonakoanga no te tuatau ki mua. (Maseli 14:12) I te tuatau tikai e tau iaia, ka akaoki pouroa mai a Iehova i te au apinga angaia ki tetai turanga tapu. E papu tikai te reira, no te mea ko te anoano te reira o Tei Tapu.

13, 14. Eaa a Iehova i iki ei kia kore e takore i te aronga meameaau i Edene?

¹³ Kare ainei e ka ngoie ua ia Iehova i te takore ua i te aronga meameaau i roto i Edene e e akamata akaou? Tei iaia te ririnui i te rave i te reira; kare e roaia ka taangaanga aia i te reira ririnui i te takore i te kino katoatoa. ‘Eaa te tumu,’ e manako ra tetai pae, ‘i kore ei aia i rave i te reira e e toru ua rai aronga ara i roto i te ao katoa e pini ua ake? Kare ainei te totoaanga o te ara​—e te au taitaia pouroa ta tatou e kite nei i roto i teianei ao​—e kopaeia atu?’ Eaa te tumu i kore ei a Iehova i iki mai i te rave i te reira? Te akakite maira a Deuteronomi 32:4 e: “Tika rava tana angaanga ra.” E pakari tikai to Iehova manako no runga i te tika. Ko te tikaanga, “E mea inangaro na Iehova te tu tika.” (Salamo 37:28, NW) No tona inangaro i te tu tika, kua kopae a Iehova i te takore anga i te aronga meameaau i Edene. Eaa te tumu?

¹⁴ Kua akatupu ta Satani meameaauanga i tetai uianga no runga i te tika anga o te turanga ngateitei o te Atua. Te umuumu maira to Iehova tu tika e kia orongaia tetai pauanga tika ki ta Satani akaaoanga. Kare te takore viviki anga i te aronga meameaau, noatu e te tano ua ra ia, e oronga mai i te pauanga tika. Ka oronga mai te reira i tetai akapapuanga akaou i te tu ririnui maata o Iehova, inara kare te uianga e no runga i tona ririnui. Pera katoa, kua akakite a Iehova i tana akakoroanga kia Adamu raua ko Eva. Ka uanga raua e ka akaki i te enua, ka akavi i te reira, e ka mana raua ki rungao i te au apinga katoatoa i angaia i te enua nei. (Genese 1:28) Naringa a Iehova i takore ia Adamu rauka ko Eva, kua puapinga kore ua tona akakoroanga no runga i te au tangata nei. Kare rava to Iehova tu tika e akatika i te reira tupuanga, no te mea e akatupu uaia ana tona akakoroanga.​—Isaia 55:10, 11.

15, 16. Me oronga mai tetai tangata i tetai “au ravenga” ke ki te akaaoanga tei akatupuia i Edene, akapeea tatou i te tauturuanga ia ratou?

¹⁵ Ka rauka ainei i tetai ua atu i roto i te ao katoa e pini ua ake i te akono i te meameaau ma  te kite maata atu ia Iehova? Penei ka akakite mai tetai pae tangata i ta ratou uaorai “au ravenga” ki te meameaau i Edene. Inara, i te rave anga i te reira, kare ainei e te karanga ra ratou e kua manako mai ratou i tetai au mataara meitaki atu no te akonoanga i te reira maroanga? Penei kare o ratou akakeuanga kino i te rave anga i te reira, inara kare o ratou maramaanga no runga ia Iehova e tona kite umere rava. I te tataanga ki te au Kerititiano i Roma, kua kimi oonu te apotetoro ko Paulo i te kite o te Atua, kapiti mai te “tuatua ngaro” no runga i ta Iehova akakoroanga kia taangaanga i te Patireia o te Mesia kia apai mai i te akaoraanga o te au tangata tiratiratu ravarai e kia akatapuia Tona ingoa tapu. Eaa to Paulo manako no runga i te kite o te Atua tei akatupu i teia akakoroanga? Kua taopenga te apotetoro i tana reta ma teia au tuatua nei e: “Ei te Atua pakari anake ra te kakā, ia Iesu Mesia nei, e tuatau ua atu. Amene.”​—Roma 11:25; 16:25-27.

¹⁶ Kua marama a Paulo e ko Iehova ‘anake te pakari’​—te tumu tikai no te pakari i roto i te ao katoa e pini ua ake. Koai ia tangata apa kore ka rauka i te akamanako i tetai mataara meitaki atu i te akono anga i tetai ua atu apinga—​akarukena atu te akaaoanga ngata rava roa atu tei akonoia no runga i to te Atua pakari? Ka inangaro tatou, i reira, i te tauturu i te au tangata kia kite mai i te umere ta tatou e kite nei no te Atua “pakari o te ngakau.” (Iobu 9:4) Te meitaki atu i to tatou maramaanga i to Iehova pakari, te maata atu ia i to tatou irinaki anga e e meitaki atu rai tana mataara i te akonoanga i te au mea aere.​—Maseli 3:5, 6.

Ariki Anga i to Iehova Tu Ngateitei Rava Atu

17. Akapeea te maramaanga maata tikai o te aroa o Iehova i te tauturuanga i te aronga tei taitaia i to te Atua akatika ua anga i te mamaeanga?

¹⁷ “Ko te Atua oki te aroa.” (1 Ioane 4:8) Ma te reira au tuatua takake rava, te akamarama maira te Pipiria i to Iehova tu maata, te tu meitaki rava roa atu o tona au tu ravarai e te akapumaana rava roa atu ki te aronga e manamanata ra i te maata o te kino. Kua akaari mai a Iehova i te aroa i roto i te au tu ravarai i tona akonoanga i te tumatetenga kino pakari no te ara ki runga i tana au mea i anga mai. Kua akakeu te aroa ia Iehova kia oronga i te manakonakoanga ki te uanga a Adamu raua ko Eva tei ki i te ara, i te oronga anga kia ratou i tetai ravenga kia aere atu Kiaia e kia akanoo i tetai pirianga akatikaia e Ia. Kua akakeu te aroa i te Atua kia oronga mai i tetai oko te ka akatuera i te mataara kia akakore pu tikai ia te au ara e kia akaoraia ki te oraanga apa kore e te mutu kore. (Ioane 3:16) E kua akakeu te aroa iaia kia akakoromaki i te au tangata ravarai, i te oronga anga ki te au tangata e manganui i te atianga kia patoi ia Satani e kia iki ia Iehova ei Ngateitei no ratou.​—2 Petero 3:9.

18. Kua akameitakiia tatou no teea kiteanga, e eaa ta tatou ka akamanako atu i te atikara e aru mai nei?

¹⁸ I te tuatuaanga tetai orometua ki tetai pupu tangata tei taokotai mai i te akono i te akamaaraanga o tetai tamaki tamatakuanga rikarika, kua karanga aia e: “Kare tatou i kite i te tumu i akatika ua atu ei te Atua i te kino e te mamae.” Aue te tangi tikai! Kare ainei e kua akameitakiia tatou no tei rauka mai te kite pakari no runga i teia tumu tuatua? (Deuteronomi 29:29) E i te mea e e kite pakari a Iehova, e tika, e te aroa, kua kite tatou e kare e roa atu ana ka takore pouroa aia i te au mamaeanga. Ko te tikaanga, kua taputou aia e ka rave aia i te reira. (Apokalupo 21:3, 4) Akapeea, i reira, te aronga katoatoa tei matemate i roto i te au anere mataiti? Kua akaruke ainei ta Iehova mataara i te akonoanga i teia akaaoanga i Edene, ia ratou ma te kore e manakonakoanga? Kare. Kua akakeu te aroa iaia i te tauturu katoa ia ratou, na roto i te ravenga o te tuakaouanga. Ko te tumu manako te reira i te atikara e aru mai nei.

Akapeea Koe me Pau?

• Eaa ta tatou ka tuatua atu ki tetai tangata e ui ra e eaa te tumu i akatika ai te Atua i te mamaeanga?

• Akapeea to Iehova tu tapu e tona tika i te akaari anga i te mataara i akono ei aia i te aronga meameaau i Edene?

• Eaa tatou ka tauturu ei i te au tangata kia marama roa atu i to Iehova aroa?

[Au Uianga Apii]

[Tutu i te kapi 21]

E kimi i te tauturu i te aronga e taitaia ra i te mamae i roto i te ao nei

[Au Tutu i te kapi 23]

Kua ui a Davida e Habakuka tiratiratu i te au uianga ngakau tae ki te Atua