“Ka Akatinamouia Taau i Akakoro Ra”

NA ROTO i te imene tana i atu, kua pure te tata taramo ko Davida e: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei. E akaoki mai kiaku i te rekareka o te ora naau ra; e kia tauturuia mai au e te ngakau oronga ra.” (Salamo 51:10, 12) I muri ake i tona ara anga kia Bate-seba, kua pati marie atura a Davida tei tataraara i roto i teia irava ki te Atua ko Iehova kia tama mai i tona ngakau e kia anga i te manako maroiroi ki roto iaia kia rave i te mea tika.

Ka anga tikai ainei a Iehova i te ngakau ou ki roto ia tatou, e ka tuku katoa ainei ki roto ia tatou tetai vaerua ou e te papa ua? Me kore e ngakau ma ainei ta tatou ka tauta kia rauka mai e kia paruru? “Ko Iehova ra tei timata i te ngakau,” inara mei teaa ra te mamao o tana akao mai anga iaia ki te tupu ra i roto i to tatou ngakau? (Maseli 17:3; Ieremia 17:10) Mei teaa ra te maata o tana akakeuanga ki runga i to tatou oraanga, i to tatou au akakoroanga, e te angaanga.

I te taangaanga anga i te ingoa o te Atua e varu taime, te akaari maira e iva au irava mua o Maseli pene 16 kia tatou e akapeea tatou i te tuku anga na te Atua e akatere i to tatou oraanga kia rauka i te ‘akatinamou i ta tatou i akakoro ra.’ (Maseli 16:3) Te irava 10 ki te 15 te akamou ra te reira ki runga i te apainga a tetai ariki me kore a tetai tutara.

“Te Teateamamao o te Ngakau”​—Naai?

“Te teateamamao o te ngakau, tei te tangata ïa,” e akakite ra a Maseli 16:1a. Te taka meitaki ra e ko, “te teateamamao o te ngakau” na tatou te reira apainga. Kare a Iehova e akateateamamao temeio ua i to tatou ngakau e kare katoa e oronga temeio ua mai i tetai vaerua puareinga ua. Ka anoanoia tatou kia tauta pakari kia rauka te kite tika tikai no tana Tuatua, i te Pipiria, kia akamanako meitaki no runga i ta tatou e apii ra, e kia tarotai mai i to tatou manako kia tau ki tona.​—Maseli 2:10, 11.

Inara te akaari maira te patianga a Davida no “te ngakau mā” e “te vaerua tika tikai,” e te ariki ra aia e e turanga ara tona e ka anoano aia i te tauturu a te Atua kia tama i tona ngakau. No te tu apa ua, penei ka timataia tatou kia piri ki roto i “te au angaanga a te kopapa.” (Galatia 5:19-21) Kia “tamate i to [tatou] au melo i te au mea o teianei ao; te akaturi, te tuatua viivii, te anoano viivii ra, te inangaro tika kore, e te noinoi apinga,” ka anoano tatou i te tauturu a Iehova. (Kolosa 3:5) E mea puapinga tikai e kia pure tatou no tana tauturu kia rauka ia tatou i te kopae i te au timataanga e te takore atu i te au tu kino mei to tatou ngakau!

Ka rauka ainei ia tatou i te tauturu atu i etai ke i “te teateamamao” i to ratou ngakau? “Te tangata vaa karea ua ra, e tau ïa ki te koputaputa koke ra,” e akakite ra te Pipiria, “ko te arero ra o te aronga pakari ra, mei te vairakau ïa.” (Maseli 12:18) Eaa te taime e riro ei ta tatou tuatua ei mea pumaana? I te taime ua rai e “ko te tuatua a te vaa ra, no ko ïa ia Iehova ra,” koia oki, me tuatua tatou i te au tuatua mou tika i te pae vaerua me kore a te Pipiria.​—Maseli 16:1e.

“E pikikaa maata to te ngakau i te au mea katoa nei, e kua kino takiri,” e karanga ra te Pipiria. (Ieremia 17:9) Ka inga rai to tatou ngakau akatutu i te maani kotoeanga e kua tika tatou e i te akavare ia tatou uaorai. I te akamatakite mai anga no runga i teia kino, te na ko  maira te Ariki ko Solomona o Iseraela i taito e: “Te mā anake ra to te tangata nei au aerenga i tona uaorai mata: te kimi matatio rā Iehova i te vaerua.”​—Maseli 16:2.

Penei ka riro te tu akaperepere ia tatou uaorai i te akakeu ia tatou kia maani kotoeanga no to tatou au tarevake, kia uuna i te au tu kino, e kia akakorekore i to tatou uaorai tu kino. Inara, kare a Iehova e vare. Te akara matatio ua maira aia i te au vaerua. Te vaerua o te tangata, ko tona manako ngakau e e pirianga to te reira ki te ngakau. Tona tupuanga, tei runga te maataanga o te reira i te angaanga a te ngakau akatutu, tei kapiti mai i to tatou au manako, tu manako ngakau, e te au mea e akakeu ra ia tatou. Ko te vaerua “tei timata i te ngakau” e akara matatio maira, e kare tana au akavaanga e papaki tai ana. E pakari ia to tatou kia paruru i to tatou vaerua.

“E Tuku Atu i Taau Angaanga kia Iehova”

Kia rave i ta tatou i akakoro ka anoanoia te taangaanga i to tatou manako​—tetai angaanga ia a to tatou ngakau. Tei matauia ko te angaanga te aru mai ana i te mea tei akakoroia. Ka puapingaia ainei ta tatou au tautaanga? Te na ko maira a Solomona: “E tuku atu i taau angaanga kia Iehova ra, e ka akatinamouia taau i akakoro ra.” (Maseli 16:3) Kia tuku i ta tatou au angaanga ki runga ia Iehova tera te aiteanga kia tuku i to tatou irinakianga ki roto iaia, kia irinaki ki runga iaia, kia tuku ia tatou uaorai ki raro ake i tana akatereanga​—kia uri i te apainga mei to tatou pakuivi i na te reira tuatua ai, ki runga i tona. Te imene ra te tata taramo: “E uri atu i to aerenga ki runga ia Iehova; e irinaki iaia, e nana e akatupu i te reira.”​—Salamo 37:5.

Inara no ta tatou au parani kia akatinamouia, ka anoanoia te reira kia rotai ki te Tuatua a te Atua, e kia tupu mai te reira mei te au akakeuanga tau. Tetai, e mea tau kia pure tatou kia Iehova no tetai tauturu e te turuturu e kia rave i te ka rauka ia tatou i te aru i te ako a te Pipiria ma te akava ngakau meitaki. E mea puapinga tikai e kia ‘tuku i ta tatou apainga kia Iehova’ me rokoia tatou e te au timataanga me kore e te au tu ngata, no te mea ‘nana tatou e tauturu mai.’ E tika tikai e, “kare rava aia e vaoo ua atu i te tangata tuatua-tika kia akangaueueia.”​—Salamo 55:22.

“Kua Angā Iehova i te Au Mea Katoa nei Nona Uaorai”

Eaa atu tetai ka tupu mai me uri tatou i ta tatou au angaanga ki runga ia Iehova? “Kua angā Iehova i te au mea katoa nei nona uaorai,” e na ko maira te ariki pakari. (Maseli 16:4a) E Atua no te akakoroanga Tei Anga mai i te ao katoa e pini ua ake. Me uri tatou i ta tatou au angaanga kiaia, ka ki ua to tatou oraanga i te au angaanga puapinga, kare ra e kaimoumou ua me kore e puapinga kore. E ko to Iehova akakoroanga no te enua e te tangata i runga i te reira, no te tuatau mutu kore ia. (Ephesia 3:11) Kua akatumu aia i te enua e kua anga i te reira “kia tangataia.” (Isaia 45:18) Pera katoa, tana i akakoro no te tangata ki runga nei i te enua i te akamataanga e mea papu roa e ka tupu rai. (Genese 1:28) Te oraanga akonoia no te akamori i te Atua mou kare te reira e ope e e aiteanga puapinga tikai to te reira e mutu kore ua atu.

 Kua akataka a Iehova i “te aronga kino katoa no te rā kino ra.” (Maseli 16:4e) Kare nana i anga i te aronga kino, no te mea e “tika rava tana angaanga ra.” (Deuteronomi 32:4) Inara, kua akatika aia ia ratou kia vai mai e kia ora atu rai e tae ua atu ki tona tuatau tau e rave ei aia i tana akavaanga. Ei akaraanga, kua na ko atura Iehova kia Pharao o Aiphiti: “No reira tika rai oki au i vaoo ei ia koe, ei akakite anga atu ia koe i toku nei mana, e kia akakiteia toku ingoa e pini ua ake te ao katoa nei.” (Exodo 9:16) Ko te Au Mate Ngauru e te pou o Pharao e tona au nuku i roto i te Tai Muramura e akaarianga umere tikai i to te Atua mana aite koreia.

Ka rauka katoa ia Iehova i te akanoo i te au turanga na roto i te mataara e riro ei te aronga kino i te rave kite kore ua i tona akakoroanga. Kua na ko maira te tata taramo e: “Ka akameitakiia oki koe i te riri o te tangata nei; te toenga o taua riri ra, [na Iehova] ïa e tāpu.” (Salamo 76:10) Penei ka akatika a Iehova i tona au enemi kia akaari mai i to ratou riri i tona au tavini ​—ei ako ua ra i tona iti tangata e i tereni ia ratou. Tei maata atu i teia, na te Atua ia e tapu.

Ia Iehova e turu ra i tona au tavini akaaka, akapeea i reira i te aronga ngakau parau e te akatietie? “Te rikarika rā Iehova i te aronga katoa i parau te ngakau ra,” e karanga ra te ariki o Iseraela. “Tuikau ua rai te rima, kare aia e kore i te akautunga.” (Maseli 16:5) Te aronga tei “parau te ngakau” penei ka taokotai ratou i te turuturu kapiti anga, inara kare ratou e ora i te akautungaanga. No reira kia pakari tatou i te tatanu i te tu vaerua akaaka noatu e marama maata to tatou me kore kua rauka ia tatou tetai tu kite me kore au angaanga takake.

“I te Mataku ia Iehova”

No tei anauia mai i roto i te ara, ka tarevake rai tatou. (Roma 3:23; 5:12) Eaa te ka tauturu ia tatou kia kopae i te akakoroanga te ka taki atu ki tetai arataa kino? Te akakite ra a Maseli 16:6 e: “Te tamāia nei te ara e te aroa e te tuatua-mou: e te akaruke nei te tangata i te kino i te mataku ia Iehova.” Noatu te tamaia nei ta tatou ara e te aroa e te tuatua-mou a Iehova, na te mataku ra ia Iehova e tauturu ia tatou kia kopae i te rave i te ara. No reira kapiti mai i te aroa i te Atua e te ariki rekareka i tona aroa takinga meitaki, e mea puapinga tikai kia tatanu tatou i te tu mataku i te akamareka kore atu iaia!

Ka o te mataku i te Atua ki roto i to tatou ngakau me akatupu tatou i te tu akatapu e te akangateitei no to te Atua mana vavaria. E akamanako ana ra i tona mana e akaariia maira i roto i te au mea i angaia! Na te akamaara angaia no runga i te mana tei kiteaia i roto i te au angaanga tei angaia e te Atua, i tauturu ia Iobu kia akatikatika i tona aerenga manako. (Iobu 42:1-6) Kare katoa ainei e mei te reira rai tatou me tatau e me akamanako no runga i te au papaanga o ta Iehova au raveanga ki tona iti tangata mei tei rekotiia i roto i te Pipiria? Kua imene te tata taramo: “E aere mai e akara i te au angaanga a te Atua! e mea mataku tana i rave i te tamariki a te tangata nei.” (Salamo 66:5) Auraka roa te aroa takinga meitaki o Iehova kia akariroia ei mea puapinga kore ua. I to te ngati Iseraela ‘meameaau anga, e kua akariri i tona vaerua tapu: riro iora a Iehova ei enemi no ratou, e kua tamaki maira ia ratou.’ (Isaia 63:10) I tetai tua, “kia tau anake to te tangata nei aerenga kia Iehova ra, kua akaongi aia i tona au enemi kiaia ra.” (Maseli 16:7) E paruruanga tikai te mataku ia Iehova!

“E ngari ake te apinga iti poepoe ma te tuatua tika ra, i te apinga maata rava ra ma te tika kore,” e na ko maira te ariki pakari. (Maseli 16:8) Te akakite ra a Maseli 15:16 e, e: “Iti ua rai taau ma te mataku rai ia Iehova ra; e meitaki ïa i te apinga maata roa ma te pekapeka.” Ka anoano maataia te mataku akatapu i te Atua kia rauka i te noo marie ua i te arataa o te tuatua tika.

“Te Kimi ra te Ngakau Tangata i Tona Aerenga”

I angaia mai te tangata kia rave i tana uaorai ikianga, kia rauka i te iki i rotopu i te tika e te tarevake. (Deuteronomi 30:19, 20) Ka rauka i to tatou ngakau akatutu i te akamanako i te au ikianga tukeke e kia akamou i tona akakoroanga ki runga i tetai ua me kore maata atu. I te akaari mai anga e na tatou rai te apainga o te ikianga, te karanga maira a Solomona e: “Te kimi ra te ngakau tangata i tona aerenga: na Iehova ra e akakite i tona takainga.” Me oti ana teia i te  raveia, “na Iehova ra e akakite i tona takainga.” (Maseli 16:9) I te mea e ka rauka ia Iehova i te arataki i to tatou au takainga vaevae, e pakari ia to tatou kia kimi i tana tauturu i te ‘akatinamou i ta tatou i akakoro.’

Mei ta tatou i kite ke ana, e e pikikaa oki to te ngakau e ka rauka ua i te reira i te akatupu i te manako tarevake. Ei akaraanga, penei ka rave tetai tangata i te ara, e penei ka kimi aia i tetai kotoeanga. I to te akaruke i tona arataa ara, penei ka kotoe taua tangata ra e e aroa maata to te Atua, e takinga meitaki, e tangi, e ka akakore ua i te ara. Ko taua tangata ra kua karanga aia i roto i tona ngakau e: “Kua ngaropoina ïa i te Atua; kua uuna ke tona mata; kare roa teia e akaraia mai.” (Salamo 10:11) Inara, e mea tau kore e e mea kino tikai te akariro i to te Atua tu akaaroa ei mea puapinga kore ua.

“Te Akairo Tika e te Aite, no ko ïa ia Iehova Ra”

I te tanga anga i tona manako mei te ngakau e te angaanga a te tangata ki to te angaanga a te ariki, te na ko maira a Solomona: “Ei tuatua taka meitaki to te vaa o te ariki e tikaʼi, kia kore e tatipake tona vaa kia tuku i te utunga.” (Maseli 16:10) Ka tika rava teia i tei akataoongaia ei Ariki ko Iesu Karaiti. Ka raveia rai tana tutaraanga i te enua nei kia tau ki to te Atua anoano.

I te akataka anga mai e koai tikai te tumu o te tu tika e te tuatua tika, te na ko maira te ariki e: “Te akairo tika e te aite, no ko ïa ia Iehova ra: te au toka katoa o te pute ra, nana ïa.” (Maseli 16:11) Na Iehova i oronga mai i te akairo tika e te aite. Ko taua au turanga ra kare te ariki e akanoo kia tau ki tona uaorai anoano. Iaia i te enua nei, kua akakite a Iesu e: “Kare ua e mea e tika iaku anake ra kia rave: te akatau nei au i taku e akarongo nei, e tuatua-tika oki taku ra akatau anga, kare au i kimi i toku uaorai anoano, ko te anoano ra o te Metua ko tei tono mai iaku nei.” Ka tau ia tatou kia tapapa atu i te tu tika apa kore mei te Tamaiti, ta te Metua i ‘tuku ua mai kia akava.’​—Ioane 5:22, 30.

Eaa tetai ka tau kia tapapaia atu i te ariki kauono o Iehova? “Kia rikarika te ui ariki ra i te tuatua kino e tikaʼi,” e karanga ra te ariki o Iseraela, “tei te tuatua-tika oki e mou ei te terono.” (Maseli 16:12) Te riro ra na te au kaveinga tuatua tika a te Atua e akaaere i te Patireia Mesia. Kare o te reira pirianga ki “te terono tuatua-kino.”​—Salamo 94:20; Ioane 18:36; 1 Ioane 5:19.

Rauka Anga Mai te Akaperepereanga a te Ariki

Ka akapeea ra te au tangata o te ariki ngateitei me ariu mai? Te karanga maira a Solomona e: “Te vaa tuatua-tika ra ta te ui ariki e tau atu e tikaʼi; e kia inangaro marie ratou i te aronga i tiki te tuatua e tikaʼi. E tau te riri o te ariki ra ki te karere ta tangata: e maru ra i te tangata pakari.” (Maseli 16:13, 14) Te akarongo nei to Iehova aronga akamori i teia tuatau, i teia au tuatua e te angaanga pakari nei ratou uaorai i roto i te angaanga tutu aere i te Patireia e te akariro i te tangata ei pipi. (Mataio 24:14; 28:19, 20) Kua kite ratou e ka riro te taangaanga anga i to ratou vaa na teia mataara, i te apai mai i te rekareka maata ki te Ariki Mesia, kia Iesu Karaiti. Te kopae anga atu i te tu mareka kore o tetai ariki tangata ririnui e te umuumu anga atu i tana akaperepereanga e mea pakari tika te reira. E pakari maata tikai i reira kia umuumu i te arikianga a te Ariki Mesia!

“Tei te mārama o te mata o te ariki ra te ora,” e kua na ko atu rai a Solomona e, “e tau oki tona akaperepere anga mai ki te tumurangi ua openga ra.” (Maseli 16:15) Ko “te mārama o te mata o te ariki ra, tona aiteanga ko tana akaperepereanga, mei ‘te mārama rai o to Iehova mata’ e akaari maira i te akaperepereanga a te Atua. (Salamo 44:3; 89:15) Mei te tumurangi e akapapu maira i te ua ei tauturu i te akapara te au one kai, e akapapuanga rai te tu meitaki o te ariki no te au mea memeitaki ka tupu mai. Ka maata roa te au akameitakianga e te turanga puapinga o te oraanga i raro ake i te tutaraanga a te Ariki Mesia, mei te tutaraanga rai a te Ariki ko Solomona i roto ra i tetai tu meangiti mai.​—Salamo 72:1-17.

Ia tatou e tiaki atura kia akatere te Patireia o te Atua i te au angaanga ravarai i raro ake i teia nei ra, e kimi tatou i tana tauturu i te tama anga i to tatou ngakau. Kia tuku katoa rai tatou i to tatou irinakianga ki roto ia Iehova e kia tatanu i te tu mataku i te Atua. I reira e rauka ai ia tatou i te irinaki pu tikai e ‘ka akatinamouia ta tatou i akakoro ra.’​—Maseli 16:3.

[Tutu i te kapi 18]

Na roto i teea tu i akariro ei a Iehova i “te aronga kino katoa no te rā kino ra”?