Kino​—Te Maata ua Atura Ainei?

No te inangaro kia kite, kua mou mai tetai tamaiti meangiti i tetai apinga e vai ua ra i tetai ngai​—e maina enua​—e kua matapoia e kua paii takiri atura no tona oraanga katoa. Kua akaruke tetai metua vaine i tana pepe anau ou, i te uuna anga i te reira ki roto i te teita i te pae mataara. Kua oki tetai tangata tei akaateaia mai i te ngai angaanga ki ko i te ngai i angaanga ana aia, e kua pupui pouroa i te aronga tana e kite ra, e oti kua tamate iaia uaorai. Tetai tangata akangateitei maataia e takinga kino ana aia i te au tamariki kare e rauka i te paruru ia ratou uaorai na te rave anga i te ainga tau kore kia ratou.

TE MEA taitaia ra, kua riro ua te au ripoti no taua au angaanga kino ra ei mea noa ua i to tatou nei tuatau. Tei taitaia roa atu koia oki, te tangaro uaia nei teia au ripoti e te au tuatua o te tamaanga eteniki, te tairipotianga, e te tamatakuanga. “Ki tona kino pakari anga kua riro ana teia ei anere mataiti no Satani,” i akakite ei tetai tataanga tei neneiia i te 1995. “Kare atu e tuatau i mua ana tei akaariia te au tangata ma te maata o te anoano, e te kaki anga, no te tamate e mirioni ua atu au tangata no te au tumu nei o te kara tangata, te akonoanga me kore te pupu.”

I taua taime rai, te taviivii ra te tangata i te reva, te takino ra i te enua, te takore ra i te au mea puapinga ravarai o reira, e te tamatemate ra i te au tu apinga ora ravarai kia pou takiri. Ka rauka ainei te tangata i te akaaere i teia au kino e te akariro i teia ao ei ngai meitaki atu e te kino kore? Me ka aite ainei rai te rave anga i te reira ki te ope anga i te tai ki te purumu? Kua tuatua tetai poropeta e maata tana au tataanga no runga i te tumu manako o te kino e: “Kua inangaro ana rai au i te akatupu i tetai aka tauianga ki te turanga o teia ao, e kia akameitaki atu i teia ao. Me akaraia atu ra kare takiri teia ao e meitaki atu ana. Penei te manako akapera ra rai koe.

Ka tau kia akaaiteia te kaveinga o teia ao ki tetai pai e tere ra ki roto i te tai e pakari ua maira te ngaru e te kino i te au ra ravarai. Noatu e kare e tangata e inangaro ana i te aere na te reira mataara, te puapinga kore ua nei ra te au tautaanga kia taui i taua kaveinga ra. Te aere tika ua atura te pai ki roto i te uriia kare e rauka i te tapu.

I tetai tua, ka tau kia akaapaia te tu apa ua o te tangata no teia turanga kino. (Roma 3:23) Me akaraia te maata o te kino, tona tu pararauare, e tona tu tukumoe kore, e maata roa atu te reira i te kino ta te tangata anake ua i akatupu. Ka tika ainei e e mana ririnui kitea koreia e te kino te akanauru nei i te tangata? Me koia ia, eaa ra te reira, e ka akapeea ra tatou i te paruru anga ia tatou uaorai? Na te atikara ka aru mai e pau i teia au uianga.

[Akameitakianga no te Tutu i te kapi 3]

© Heldur Netocny/​Panos Pictures