Aravei Saula i te Au Oa Muatangana e te Au Enemi o Mua Ana

KARE e kore te matakutaku ua ra a Saula, tei kiteaia i muri mai e ko te apotetoro ko Paulo, i tona oki anga atu ki Ierusalema no te taime mua mei tona akaariu angaia mai ki te akonoanga Kerititiano. * E toru mataiti i muao kua akaruke aia i te oire ma te maata o te tuatua akamataku e ta i te au pipi a Iesu. E akauenga tana i orongaia mai kia opu i tetai ua atu Kerititiano ka kite aia i Damaseko.​—Angaanga 9:1, 2; Galatia 1:18.

I tona uaorai riro mai anga ei Kerititiano, kua akakite a Saula ma te mataku kore i tona akarongo i roto i te Mesia tei akatuakaouia mai. Tei tupu mai, kua inangaro te ngati Iuda i Damaseko e ta iaia. (Angaanga 9:19-25) Ka tau tika ainei iaia kia tapapa atu i tetai arikianga pumaana mei tona au oa ngati Iuda o mua ana i Ierusalema? Inara, ko te mea maata atu kia Saula koia oki, kia aravei i te au pipi a Karaiti i Ierusalema. Kare te reira i te mea ngoie.

“E tae aturā Saula ki Ierusalema, kua timata atura aia i te kapiti atu ki te au pipi ra: mataku anake iora ratou iaia, kare i akarongo e, e pipi aia.” (Angaanga 9:26) Te marama ua atura koe i te reira. To ratou kite openga anga iaia, e tangata takinga kino tikai aia e te tangi kore. Penei ka manakoia tana aaki anga i tona akarongo Kerititiano e  e akavare ua kia rauka iaia i te tomo ki roto i te putuputuanga. No reira te au Kerititiano i Ierusalema i kore ei inangaro i te piri atu kiaia.

Okotai ra ia ratou tei tauturu ia Saula. Te akakite maira te Pipiria e na Banaba i arataki i taua tangata takinga kino o mua ana “ki te au aposetolo,” e i tuatua atu kia Petero (Kepha) raua ko Iakobo, te teina o te Atu, i te akakite kia raua i to Saula akaariuangaia e tana tutuanga i Damaseko. (Angaanga 9:27; Galatia 1:18, 19) I akapeea ake a Banaba i irinaki ei ia Saula, kare te reira i akamaramaia mai. Kua kite ainei nga tokorua ia raua, i akakeuia ai a Banaba kia tirotiro marie ia Saula e oti ka akapapu ei e e ngakau tae tikai tona? Kua kite ainei a Banaba i te au Kerititiano i Damaseko e kua kite rai e kua taui takiri a Saula? Noatu eaa te tu, kua rauka ia Banaba i te takore atu i te manako tarotokaka no runga ia Saula. I te openga, kua noo a Saula e 15 ra ki ko i te apotetoro ko Petero.

Tai Ngauru ma Rima Ra i ko ia Petero

I rauka mai ta Saula angaanga mei ko tika mai ia Iesu e kare i anoanoia ana te akamanaanga a te tangata, mei tana i akapapu ki to Galatia. (Galatia 1:11, 12) Inara kare e ekoko kua kite a Saula e e mea puapinga maata roa kia kite meitaki no runga i te angaanga orometua a Iesu. Ka riro te noo anga ki ko ia Petero i te oronga i tetai tuatau tau no Saula kia rave i te reira. (Luka 24:12; 1 Korinetia 15:3-8) Kare e kore e maata ta Saula au apinga ka ui kia Petero raua ko Iakobo, e e maata rai ta raua au uianga  kia Saula no runga i tana orama e tana angaanga.

Akaoraia Mai mei te Au Oa o Mua Ana?

Kua karangaia e ko Setephano te Kerititiano mua tei tamateia. Ko te aronga tei taumaro ana a Setephano i muao no ko mai ratou i “te sunago i tuatuaia ra e, no te Libetino, e to Kurene, e to Alekanederea, e to Kilikia, e to Asia.” Ina teianei, te “taumāro atura [Saula] i te au [“ngati Iuda tuatua,” NW] Eleni ra,” me kore i te aronga irinaki i te au peu Ereni, i te tuatua anga atu kia ratou ma te mataku kore. Eaa ra to ratou manako? Kua inangaro ratou e ta iaia.​—Angaanga 6:9; 9:28, 29.

E tu natura ua kia inangaro a Saula i te akamarama i te aka tauianga i roto i tona oraanga e kia tauta i te ako atu ki te au oa o mua ana no runga i te Mesia. Inara, kua ariu mai teia au ngati Iuda irinaki peu Ereni ma te akakoro kino i taua tangata ra tei irinaki tikai ratou e e pikikaa.

Kua kite ainei a Saula e mei teaa te maata o te kino tei o atu aia ki roto? Ka tatau tatou e iaia e pure ra i roto i te iero, kua tareuia koia oki kua akangaroia tona manako e kua kite atura aia ia Iesu, tei akakite mai kiaia: “E ngakoikoi, e aere ke atu koe i tenana, akaruke mai i Ierusalema nei: kare oki ratou e akarongo i taau tuatua iaku.” Kua na ko atura Saula: “E te Atu, kua kite oki ratou e, i tapeka ana au e i pāpā ana oki au, i te aronga i akarongo ia koe i te au sunago katoa ra: Ka maringi ei oki te toto o te kite noou ra, ko Setephano, te tu katoa ra au i vaitata i te akatika ua anga i tona mate.”​—Angaanga 22:17-20.

Kua manako tetai papaki i te aiteanga i te pauanga a Saula e te kite ra aia e eaa te kino e o maira. Ko etai kua manako ratou e te karanga ra aia e: ‘I riro ana oki au ei tangata takinga kino mei ia ratou rai, e kua kite ua ratou i te reira. Tikaanga ka irinaki ratou e kua taui tika rai au. Penei ka rauka iaku i te tauturu ia ratou.’ Noatu rai, kua kite meitaki a Iesu e kare taua au ngati Iuda ra e akarongo mai i te tuatua a tetai “apoteiti.” Kua akakite aia kia Saula: “Ka aere ra, ka tono ke atu oki au ia koe ki te etene ra.”​—Angaanga 22:21, 22.

E kite akera te au taeake Kerititiano i te kino ka tupu, kua apai rapurapu atura ratou ia Saula ki te ava i te pae tai i Kaisarea e kua tuku atura iaia 500 kiromita te mamao ki Tareso, tona oire i anauia ai. (Angaanga 9:30) Kua pou rai etai au mataiti i mua ake ka oki akaou atu ei a Saula ki Ierusalema.

Penei kua riro taua takakeanga rapurapu ra ei paruru i te putuputuanga Kerititiano. E kino maata te ka tupu naringa taua tangata takinga kino o mua ana i noo ua atu. I muri ake i to Saula takake anga, ‘e au atura te au ekalesia ra i reira, e pini rava ake Iudea katoa e Galilea, e Samaria oki e kua maroiroi atura; mataku atura oki i te Atu i to ratou aerenga, e ma te akapumaana oki a te vaerua tapu, maata atura ratou.’​—Angaanga 9:31.

Au Apiianga Akamatakite

Mei te anere mataiti mua, penei ka tupu mai tetai au turanga te ka tau kia matakite meitakiia i teia tuatau. Kare a tatou tumuanga tau kia tarotokaka atu i te au tangata ke. Inara i tetai au taime, kua titau ana tetai aronga angaanga kino i te aru i te iti tangata o Iehova, i te akapuapinga anga ia ratou uaorai me kore i te takino i te putuputuanga. No reira, kia taangaanga tatou i te pakari kia kore tatou e inga i te au akavareanga a te aronga pikikaa.​—Maseli 3:27; 2 Timoteo 3:13.

Te akatutu maira te manako o Saula no runga i te tutuanga i Ierusalema, i tetai mataara ke mai ka tau te au Kerititiano kia matakite. Ko te akakitekite i roto i tetai au ngai me kore ki tetai au tangata, kapiti mai te au oa o mua ana, e tupu mai ana te kino​—i te pae kopapa, pae vaerua, me kore i te pae tu akono. Ka anoanoia kia matakite meitaki, e kia tau te iki anga i te taime e te ngai.​—Maseli 22:3; Mataio 10:16.

Papu ia tatou e ka tutu aereia te tuatua meitaki o te Patireia o te Atua i mua ake ka tae mai ei te openga o teia akatereanga kino. E akaraanga meitaki tikai ta Saula i akanoo i roto i taua tu ra, i te “tuatua anga ma te mataku kore i roto i te ingoa o te Atua” ki te au oa muatangana e ki te au enemi katoa o mua ana!​—Angaanga 9:28, NW.

[Tataanga Rikiriki i Raro]

[Tutu i te kapi 16]

I te tae anga atu ki Ierusalema, kua akakitekite atu a Saula ki te au ngati Iuda tuatua Ereni ma te mataku kore