Au Uianga a te Aronga Tatau

E vaevae ainei to te ovi tei tuatua atu kia Eva?

Mei tei rekotiia i roto ia Genese 3:14, kua tuatua atu te Atua ko Iehova ki te ovi tei akavare ia Eva i roto i te kainga i Edene. Kua akakite te Atua: “Kia maata roa toou taumaa i to te au puaka katoa, e te au manu taae katoa o te enua nei, ko koe i akapera ra; ei raro to kopu totoro uaʼi koe, ka kai oki koe i te one-pueu, e ope roa ake toou puke ra i te ora anga na.” Kare te Pipiria i akakite mai tikai e e vaevae to te manu i muao ana, tei taangaangaia ana ei timata ia Eva inara kare ona vaevae akaou. Noatu te riro ra te aerenga tuatua o Genese 3:14 i te arataki i etai kia manako akapera, auraka ra tatou kia taopenga puapinga kore ua e kua tu ana te au ovi i te vaevae i muao i teia taumaaanga. No teaa ra?

Te mea maata roa atu no te mea ko te akakoroanga tikai o ta Iehova akavaanga koia oki ko Satani​—te vaerua kitea koreia tei taangaanga tau kore ua i taua manu akaaka ra. Te akataka maira te Pipiria ia Satani ei “metua oki no te pikikaa” e ko “taua ovi taito ra.” Te tou ra teia nga akatakaanga tuatua ki te taangaanga anga a Satani i tetai manu tikai, tetai ovi, ei vaa tuatua nona i te akanauru ia Eva kia akarongo kore i te akauenga a te Atua.​—Ioane 8:44; Apokalupo 20:2.

Kua anga oki te Atua i te au ovi, e i te akaraanga kua oronga a Adamu i te ingoa o te au ovi i mua atu i te ravenga akavare a Satani. Kare te apa e no te ovi kite kore tei tuatua kia Eva. Kare aia e kite ana e ko Satani te akaaere ra iaia, e kare rai aia e marama ana i te akavaanga ta te Atua i tuku ki runga i te aronga akarongo kore.

Eaa i reira te Atua i tuatua ai no runga i te tu taakaakaia o te ovi i te pae kopapa? Ko te tu o te ovi i roto i tona turanga natura, i te totoro i runga i tona kopu e te atero i tona arero mei te mea e te kai ra i te one pueu, te akatutu tau tika maira te reira i to Satani turanga taakaakaia. I mua ana kua noo rekareka ana aia ki tetai turanga ngateitei ei angera na te Atua, kua tukuia ra aia ki roto i tetai turanga akaaka rava tei karangaia i roto i te Pipiria e ko te Pirianganaoa.​—2 Petero 2:4.

Tetai katoa, mei te ovi tika tikai me taviri ki runga i te poo avae o tetai tangata, mei te reira rai a Satani i roto i tona turanga taakaakaia me ‘akaparuparu i te pooavae’ o te “Uanga” a te Atua. (Genese 3:15) Ko Iesu Karaiti te tuanga maata o taua uanga ra, tei kite poto ua i te kino i roto i te rima o te au rima rave o Satani. Kareka te upoko akatutu o Satani, kare e roa atu ana, ka akaparuparu takiri ravaia e Karaiti e e tona au taeake Kerititiano tei akatu akaouia mai. (Roma 16:20) No reira, te akatutu tau tika maira ta te Atua tuku anga i tana taumaa ki runga i te ovi akara mataia i te taakaaka takiri angaia e te takore takiri rava angaia o “taua ovi taito,” kitea koreia ra ko Satani te Tiaporo.