E Tai Mataiti i te “Enua Meitaki”

I TE mataiti 1908 kua kiteaia mai tetai kimianga mataora tikai i te ngai o te oire i roto i te Pipiria ko Gezera, i te tua mataataa i taatai i te opunga ia Ierusalema: e papa toka ngaika meangiti ua, kua irinakiia e mei te tai ngauru anere mataiti M.T.N. Kua kitea mai i roto i reira, te tataanga taito Epera, tei manakoia e e urianga mama ua no tetai mataiti tanutanu anga, me kare no te aerenga o te tuatau, e ta te reira au angaanga tukeke. Kua kitea mai teia papa toka e ko te Karena Gezera.

Te akakite maira te papa toka i tetai ingoa: ko Abia. Noatu e kare te aronga kimikimi i te apinga taito katoatoa e ariki ana, e manganui te manako ra e e tataanga ia na tetai tamaiti apii tei akanooia ei pee. * Ka inangaro ainei koe i te kite i te aerenga o te au tuatau na roto i te nga mata o tetai tamaiti tei ora ana i te reira tuatau? Te rave anga i te reira penei te tauturu ra ia koe kia akamaara i etai au tupuanga o te Pipiria.

E Rua Marama no te Akaputuputu Anga

Kua akamata te tangata tata o teia karena taito ki te akaputuputu anga. Noatu e kua akapapa muaia i roto i teia karena, ka marama koe e eaa te au Iseraela i manako ei i teia akaputuputu anga e ko te mea openga, no te tuanga maata o te mataiti tanutanu anga. Aiteite ua te marama Etanima (tei tapaia i muri mai ko Titiri) kia Tepetema/Okotopa i runga i ta tatou karena i teia tuatau. I te oti anga te maata anga o te kokotianga, e tuatau rekareka tikai teia e ko Abia mapu tetai te ka o atu. E akamanako ana i tona mataora iaia e tauturu ra i tona metua tane i te maani i te puakapa te ka riro mai ei kainga no ratou e tai epetoma ia ratou e akameitaki rekareka ra ia Iehova no te uua anga o to ratou au kainga!​—Deuteronomi 16:13-15.

I teia taime nei, kua vaitata te au orive i te kokotiia e te pamiri o Abia na te papa anga i te au tumu atava, penei e aka angaanga na Abia mapu i te rave inara e mea reka i te akarakara atu. (Deuteronomi 24:20) Ka koi ratou i reira i te au orive e ka apai i te reira ki te toka taviri anga te vaitata  ua maira kia maani i te inu. Me kore ka rauka mai i tetai pamiri i te inu na tetai ravenga mama ua​—na te tuku anga i te au orive tei papaia me kore i ngaangaa ki roto i te vai e te kapu mai anga i te inu te panu maira ki runga. Noatu e eaa te tu, e maata atu ta teia inu puapinga maata ka oronga mai kare e ko te kai ua. Kua taangaanga katoaia te reira ei inu no te au mori e te rapakau anga i te au ngai uri kerekere e te au motumotu, te ka tupu mai ki tetai manga tamaiti mei ia Abia i te kangakanga aere anga.

E Rua Marama no te Ruru Anga

Me akamata mai te au ua mua, penei i mataora ana a Abia i te ua anuanu i runga i tona pakiri. Penei i akakite ana tona metua tane kiaia i te puapinga o te ua ki te enua. (Deuteronomi 11:14) Te one i tamaro pakariia e te ra i te au marama, kua akaparuparuia e kua papa no te arote anga. Ka arataki karape te tangata arote i taito i te arote rakau, penei e auri keokeo to mua i te ope, na te manu e uuti aere i te reira. Te akakoroanga kia tika te pa aroteanga i roto i te one. E puapinga tikai te enua, no reira kua taangaanga katoa te aronga tanutanu Iseraela i te au potonga enua rikiriki, e te au ngai tariva. Inara i runga i te ngai tariva penei te taangaanga ra ratou i te au apinga ko rima ua.

Me oti te one paruparu i te aroteia, ka ruruia te titona e te kerite. Ma te umere, te tataanga i aru mai i roto i te Karena Gezera te taiku maira ki te nga marama e rua no taua tanu anga ra. Penei ka apai aere te tangata ruru i te titona i roto i tona kakau aatuia e ka ruru i te ua na te takiri atea aere anga i tona rima.

 E Rua Marama no te Ruru Anga Openga

Kare e kore ana te “enua meitaki” i te akatupu mai i te kai. (Deuteronomi 3:25) I te tuatau ia Titema, e maata te ua e topa ana e kua ruperupe tikai te enua. E tuatau te reira no te ruru anga openga i te au tu pi katoatoa, pera katoa tetai atu au vetitaporo. (Amosa 7:1, 2) I runga i te papa toka, kua tapa a Abia i teia e ko te “ngangaere tupu anga rau” me kore, kia tau ki tetai urianga ke, te “tanu anga openga,” e tuatau ia no te au kai reka tikai tei tunaia ma te au vetitaporo e manganui o taua tuatau ra.

E maana maira te tuatau anu, kua pueraera te tumu tekati i te au tiare teatea e te tarona, e akairo no te tuatau tupu anga rau. Ka akamata mai teia i te maana anga mai, i te akamata anga mai a Tianuare.​—Ieremia 1:11, 12.

E Tai Marama no te Tipu Anga i te Oronga

Aru mai kua taiku mai a Abia i te oronga. Penei te akamaara maira te reira kia koe i tetai mea tei tupu i te anere mataiti i mua ake i to Abia tuatau i te tua itinga i runga i te au maunga o Iudea. I roto i te oire o Ieriko, kua uuna a Rahaba i nga tangata aroro e rua “ki te orongā i akapapaia” tei tukunaia ki runga i tona are kia tamaroia. (Iosua 2:6) Kua riro mai te oronga ei tuanga maata i roto i te oraanga o te iti tangata Iseraela. Kia akamatara mai i te kiriau o te oronga, ka tapeia te oronga na mua. Ka tape marie te au i teia me kore ka tape vivikiia na te tuku anga i te oronga ki roto i tetai puna vai me kore i tetai kauvai. Me matara ana, kua taangaangaia te kiriau o te oronga ei taura, e oti kua maaniia ei au kie, ei au puakapa, e ei au kakau. Kua taangaanga katoaia te oronga no te au viki mori.

Kua patoi etai i te manako e kua akatupuia te oronga i Gezera, e ngai kare e rava ana te vai. Kua manako tetai pae e e akatupuia ana te oronga i te openga roa o te mataiti. No reira rai tetai pae i irinaki ei e i roto i te Karena Gezera, aiteite te tuatua “orongā” ki te tuatua e kai “ngangaere.”

E Tai Marama no te Kokoti i te Kerite

I te au mataiti ravarai, i muri ake i te tipu anga i te oronga, kua akara a Abia i te kaui pi o te kerite, te kai tana i taiku i muri mai i runga i tana karena. Te marama aiteite i roto i te reo Epera ko Abiba, te aiteanga “Kaui Pi,” penei te taiku ra ki te tuatau me para mai te kaui inara e paruparu ua. Kua akaue a Iehova e: “E akono i te marama ra ia Abiba, e rave rai i te pasa a to Atua ra a Iehova.” (Deuteronomi 16:1) Aiteite a Abiba (tei tapaia i muri ake e ko Nisana) ki te marama o teia tuatau ia Mati e Aperira. Penei e tuanga maata to te tuatau tapara anga i te kerite i te akataka anga mai i te akamata anga o teia marama. Pera katoa i teia tuatau, e akara ana te au tangata  Iuda Karaite i teia tapara anga ei akatumu anga i ta ratou mataiti ou. Noatu e eaa te tu, ka ruruia te popo mua o te kerite ki mua i te aroaro o Iehova i te ra 16 o Abiba.​—Levitiku 23:10, 11.

E kai puapinga maata tikai te kerite i roto i te oraanga o te maataanga i te au tangata Iseraela i te au ra ravarai. Mama roa atu te kerite i te titona, ko te kerite te inangaro putuputuia ra no te varaoa, e te aronga putaua tikai.​—Ezekiela 4:12.

E Tai Marama no te Kokoti e te Akatuanga

Me oki koe i te akamanako i to Abia tuatau, ka rauka ia koe i te akamanako e i tetai popongi roa ake penei ka kite atu aia i te tiao rangi e ngaro atura​—kare e ua no tetai tuatau. Te irinaki nei i reira te au pu rakau o te enua meitaki ki runga i te au. (Genese 27:28; Zekaria 8:12) Kua kite te aronga tanu o Iseraela e te au kai e manganui i kokotiia i te au marama maanaana tikai i te mataiti te anoanoia ra te parani tau no te au matangi e tae ua atu ki te Penetekote. Penei na te matangi akarua anu e te mauu i akatupu puapinga mai i te au tiriera, inara na teia matangi e akakino ana i te au ua rakau me puera mai te reira. Na te matangi vera e te maro no tonga mai i tauturu i te akapuera e te poreneiti i te au tiare.​—Maseli 25:23; E Peʼe na Solomona 4:16.

Na Iehova, te Pu o te au turanga o te reva, i akanoo kia tano meitaki te akatere anga o te au tu reva. I to Abia tuatau, e “enua sitona [tikai a Iseraela], e te kerite, e te vine, e te suke, e te remuna; ki te enua inu olive, e te meli.” (Deuteronomi 8:8) Penei i akakite ana te tupuna tane o Abia kiaia i tetai tuatau tuke ake rai e maata tikai te kai i raro ake i te tutara a te ariki pakari ko Solomona​—e akapapu anga taka meitaki no ta Iehova akameitakianga.​—1 Ariki 4:20.

I muri ake i te taiku mai anga i te kokotianga, te vai ra i roto i te karena tetai tuatua te manako ra etai pae e te aiteanga e “akatuanga anga.” Penei te taiku ra te reira i te akatuanga angaia te mou kia orongaia te au tuanga ki te au pu o te kainga e ki te aronga angaanga me kore kia tutaki atu ei tero. Inara, kua marama tetai aronga apii i te tuatua Epera e e “kaikai anga” e te manako ra e akatutu anga teia ki te Oroa i te Epetoma, tei topa ki te marama Sivana (Me/Tiunu).​—Exodo 34:22.

E Rua Marama no te Aaki Anga Rau

Aru mai kua tata a Abia no runga i nga marama e rua no te akono anga i te au vine. Koia ainei tetai tei tauturu i te aaki i te au rau i runga i te au vine kia iti mai te ra ki runga i te au vine? (Isaia 18:5) Kua tae mai i reira te tuatau i te akaputuputu i te au vine, e tuatau mataora tikai ki tetai mapu o taua tuatau ra. Mei teaa te reka o te vine para mua! Penei i akarongo ana a Abia no runga i te aronga aroro e 12 ta Mose i tono ki roto i te Enua Taputouia. Kua aere atu ratou i te tuatau kua para te vine mua i te akara e mei teaa  te meitaki i taua enua ra. I taua atianga ra, okotai kaui vine e maatamaata tikai kua riro e na tetai nga tangata e rua i te apai anga i te reira!​—Numero 13:20, 23.

E Tai Marama no te Kai Para

Te tataanga openga i roto i ta Abia karena te taiku ra ki te kai para. I te pae Itinga Rotopu i taito, kua riro mai te tuatau maana ei tuanga no te mataiti tanutanu tei akanooia ki runga i te kai ua rakau. I muri ake i to Abia tuatau, kua taangaanga a Iehova i te tuatua “e kete kai para” ei akatutu mai i ‘te openga kua tae mai ki tona au tangata ia Iseraela,’ i te taangaanga anga i te tuatua “kai para” e te “openga” i roto i te reo Epera. (Amosa 8:2) Ka tau teia ei akamaara anga kia Iseraela akarongo kore e kua taeria te openga e te vaitata maira ta Iehova akavaanga. Kare e ekokoanga e ko te au tuke tetai au kai para ta Abia e taiku maira. Penei kua roromiia te tuke para ki roto i te au keke ei kai me kore kua taangaangaia ei vairakau tapiri no te au ee.​—2 Ariki 20:7.

Te Karena Gezera e Koe

Papu e i piri atu ana a Abia mapu i te au ravenga tanutanu i tona enua. Kua totoa ateaia te au angaanga pama i rotopu i te au tangata Iseraela i taua tuatau ra. Noatu e kare koe e o atu ana ki roto i te au angaanga tanutanu anga, ka rauka i te au papaanga i roto i teia papa toka no Gezera mai i te tauturu i te akaoraora mai i taau tatauanga i te Pipiria, i te akariro anga i te reira kia maramaia e kia puapingaia.

[Tataanga Rikiriki i Raro]

[Pia/​Tutu i te kapi 11]

KO TETAI URIANGA NO TE TATAANGA I TE KARENA GEZERA:

“Au marama no te uaina meitaki e te kokoti anga i te orive;

au marama no te ruru anga;

au marama no te ngangaere tupu anga rau;

marama no te uuti anga i te oronga;

marama no te kokoti anga i te kerite;

marama no te kokoti anga i te titona e te akatuanga anga;

au marama no te tope anga;

marama no te kai para.”

[tainaia:] Abia *

[Tataanga Rikiriki i Raro]

[Akameitakianga]

Archaeological Museum of Istanbul

[Au Tutu i te kapi 9]

(No runga i teia, akara i te puka)

NISANA (ABIBA)

Mati​—Aperira

IIARA (ZIFA)

Aperira​—Me

SIVANA

Me​—Tiunu

TAMUZA

Tiunu​—Tiurai

ABA

Tiurai​—Aukute

ELULA

Aukute​—Tepetema

TITIRI (ETANIMA)

Tepetema​—Okotopa

ETIVANA (BULA)

Okotopa​—Noema

KISILEU

Noema​—Titema

TABETA

Titema​—Tianuare

SEBATA

Tianuare​—Peperuare

ADAR

Peperuare​—Mati

VEADARA

Mati

[Akameitakianga]

Farmer: Garo Nalbandian

[Tutu i te kapi 8]

Kerianga i Gezera

[Akameitakianga]

© 2003 BiblePlaces.com

[Au Tutu i te kapi 10]

Tumu tekati

[Tutu i te kapi 10]

Pu oronga

[Akameitakianga]

Dr. David Darom

[Tutu i te kapi 10]

Kerite

[Akameitakianga]

U.S. Department of Agriculture