Te Akaperepere ra a Iehova i Toou Tu Akarongo

“E taku tamaiti, kia pakari koe, kia rekareka toku ngakau.”​—MASELI 27:11.

1. Eaa te vaerua e akaki nei i te taiate i teia tuatau nei?

KUA ki te ao i teia tuatau nei i te vaerua akatakake e te akarongo kore. Te akamarama maira te apotetoro ko Paulo i te tumu i roto i tana reta ki te au Kerititiano Ephesia e: “Ko to kotou ïa aerenga i muatangana ra ta to teianei ao ra, ta te ariki mana o te reva ua nei, te vaerua e angaanga ririnui nei i roto i te aronga akarongo kore.” (Ephesia 2:1, 2) Ae, penei ka karanga koe e, kua akaki a Satani te Tiaporo, “te ariki mana o te reva ua nei,” i te ao katoa ki te vaerua akarongo kore. Kua rave aia i te reira i te anere mataiti mua, e kua rave pakari roa atu aia i te reira i tona uriia anga mei te rangi mai i te tuatau o te Tamaki I o te Ao.​—Apokalupo 12:9.

2, 3. Eaa te au tumu ka akarongo ei tatou ia Iehova?

² Inara, ei au Kerititiano, kua kite tatou e ka tau tatou kia akarongo ngakau tae ki te Atua ko Iehova no te mea Nana i Anga mai ia tatou, koia Tei Akatinamou i to tatou oraanga, te Atu Ngateitei aroa, e to tatou Akaora. (Salamo 148:5, 6; Angaanga 4:24; Kolosa 1:13; Apokalupo 4:11) Kua kite te ngati Iseraela i te tuatau o Mose e ko Iehova Tei Oronga mai i to ratou ora e Tei Tauturu mai ia ratou. No reira, kua karanga atu a Mose kia ratou e: “E tenana, e akono kotou, e e rave i ta to kotou Atua ra ta Iehova i akaue mai ia kotou na.” (Deuteronomi 5:32) Ae, kua tau ratou kia akarongo kia Iehova. Inara, kua viviki ratou i te akarongo kore ki to ratou Atu Ngateitei.

³ Eaa te puapinga o to tatou akarongo ki Tei Anga mai i te ao katoa e pini ua ake? I tetai atianga kua maani te Atua i te peroveta ko Samuela kia akakite atu ki te Ariki ko Saula e: “E meitaki maata tei te akono i tei te atinga.” (1 Samuela 15:22, 23) Eaa i akapera ei?

Te Akarongo “E Meitaki Maata Atu i te Atinga”

4. I roto i teea tu e rauka ai ia tatou i te oronga i tetai apinga kia Iehova?

⁴ No te mea Nana i Anga, pouroa ta tatou au apinga i te pae materia na Iehova ia. Me ko te reira ia, e apinga ainei ta tatou ka rauka i te oronga atu kiaia? Ae, ka rauka ia tatou i te oronga i tetai apinga akaperepere maata tikai. Eaa te reira? Ka kite mai tatou i te pauanga mei te akoanga e aru mai nei e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” (Maseli 27:11) Ka rauka ia tatou i te oronga ki te Atua i to tatou akarongo. Noatu e e tukeke to tatou au turanga e te au tupuanga, na te akarongo  anga, ka rauka ia tatou tataki tai i te pau atu i te akaapaanga kino tikai a Satani e kare te au tangata e noo tiratiratu ki te Atua me aro atu i te au timataanga. E akangateiteianga tikai te reira!

5. Akapeea te akarongo kore anga i te akakeu anga i Tei Anga mai? Akatutu mai.

⁵ E inangaro to te Atua i te kite mai i te au ikianga ta tatou ka akono. Me akarongo kore tatou, te akakeu ra te reira iaia. Akapeea? E mamae ana aia i te kite anga i tetai ua atu tangata e aru ra i te mataara kino. (Salamo 78:40, 41) Akapeea me kare tetai tangata toto vene e aru i te kai meitaki i papaia ei meitaki rai nona, e kua kai ua atu rai i te kai te kino ra kiaia. Ka akapeea mai tona taote akono meitaki? Papu ia tatou e e mamae ana a Iehova me akarongo kore te au tangata iaia, no te mea kua kite aia i te au tupuanga no te kopaeanga i tana vairakau no te oraanga.

6. Eaa te ka tauturu ia tatou kia akarongo ki te Atua?

⁶ Eaa te ka tauturu ia tatou tataki tai kia akarongo? E mea tau no tatou tataki tai kia pati ki te Atua no tetai “ngakau [“akarongo,” NW]” mei ta te Ariki ko Solomona rai i pati. Kua pati aia i te reira ngakau kia rauka iaia i te ‘kite i te meitaki e te kino’ i te akava anga i tona au taeake Iseraela. (1 Ariki 3:9) Ka anoano tatou i tetai “ngakau [“akarongo,” NW]” me ka inangaro tatou i te kite i te meitaki e te tarevake i roto i tetai ao tei ki i te vaerua akarongo kore. Kua oronga mai te Atua kia tatou i tana Tuatua, te au tauturu no te apiianga Pipiria, te au uipaanga Kerititiano, e te aronga pakari akonokono o te putuputuanga kia rauka ia tatou i te tatanu i tetai “ngakau [“akarongo,” NW].” Te taangaanga meitaki ra ainei tatou i te reira au akanoonooanga takinga meitaki?

7. Eaa a Iehova i akaketaketa maata atu ei te akarongo i to te au atinga?

⁷ No runga i te reira, e akamaara ana e i te tuatau i topa, kua akakite a Iehova ki tona iti tangata taito e e puapinga rava roa atu te akarongo i tetai ua atu au atinga animara. (Maseli 21:3, 27; Hosea 6:6; Mataio 12:7) Eaa i akapera ei, i te mea e na Iehova i akaue i tona iti tangata kia oronga i te reira au atinga? I na, eaa te akakoroanga o te tangata e oronga ra i te atinga? Te rave ra ainei aia i te reira kia akarekareka i te Atua? Me te aru ua ra aia i tetai peu matauia? Me te inangaro tikai ra tetai tangata akamori i te akamareka i te Atua, ka akono meitaki aia i te akarongo pouroa ki te au akaueanga a te Atua. Kare o te Atua anoano no te au atinga animara, inara ko to tatou akarongo tetai apinga puapinga maata ka rauka ia tatou i te oronga kiaia.

Tetai Akaraanga Akamatakite Anga

8. Eaa te Atua i kopae ei ia Saula ei ariki?

⁸ Te akaari maira te rekoti Pipiria no runga i te Ariki ko Saula i te puapinga maata no te akarongo. Kua akamata a Saula ei tutara akaaka e te tau, e ‘akaaka ua i tona uaorai akara anga.’ Inara i muri mai, kua akamata te parau e te tamanakoanga tarevake i te akatere i tana au ikianga. (1 Samuela 10:21, 22; 15:17) I tetai atianga, kua aro atu a Saula i te au Philiseti i roto i tetai tamakianga. Kua akakite atu a Samuela ki te ariki kia tiaki iaia kia aere mai i te oronga i te au atinga kia Iehova e kia oronga mai i tetai au aratakianga. Inara, kare a Samuela i aere viviki mai ana mei tei manakoia atu, e kua akamata te tangata i te akaruke aere. I te kite anga i te reira, kua “apai [a Saula] i taua atinga karakaratio ra.” Kare a Iehova i rekareka ana i teia. I to Samuela tae anga mai i te openga ra, kua kotoe te ariki i tona uaorai akarongo kore, i te na ko anga e no te mea kua taroaroa a Samuela, kua ‘rave mamate oki aia’ i te oronga i te atinga karakaratio kia rauka i ta Iehova arikianga. Ki te Ariki ko Saula, e puapinga maata atu te oronga anga i te atinga i te akarongo anga ki te aratakianga tei tae mai kiaia kia tiaki ua ia Samuela kia oronga i te atinga. Kua karanga atu a Samuela kiaia e: “E ravenga neneva taau: kare koe i akono i te akauenga a to Atua ra a Iehova, tana i akaue mai kia koe ra.” No tona akarongo kore ia Iehova kua ngere a Saula i tona taoonga ariki.​—1 Samuela 10:8; 13:5-13.

9. Akapeea a Saula i te akaarianga i te akaraanga no te akarongo kore anga ki te Atua?

⁹ Kua kite ainei te ariki i tetai apiianga mei teia tupuanga? Kare! I muri mai, kua akaue a Iehova ia Saula kia takore atu i te pa enua o Amaleka, tei tamaki manako kore ua mai ki te ngati Iseraela i  mua atu ana. Kare oki a Saula i akatika katoaia ana i te akaora i ta ratou au animara rarata. Kua akarongo aia e tae rava atu ki te ‘ta atu anga i to Amaleka mei Havila atu e tae ua atura ki Sura.’ I te aere mai anga a Samuela i te aravei iaia, kua mataora tikai te ariki i te autuanga e kua karanga atu e: “Kia ora koe ia Iehova: kua rave au i ta Iehova i akaue maira.” Inara, ei tukeanga ki te au ikuikuanga taka meitaki tei tae mai kia ratou, kua akaora a Saula e tona iti tangata i te Ariki ko Agaga e “te au mamoe memeitaki, e te au puakatoro, e te au puaka a meitaki akera . . . te au punua mamoe; e te au mea memeitaki katoa ra.” Kua kotoe te ariki ko Saula i tona aerenga akarongo kore i te na ko anga e: “Kua vaoo oki te au tangata nei i te au mamoe memeitaki, e te au puakatoro ra, ei atinga na to Atua ra na Iehova.”​—1 Samuela 15:1-15.

10. Eaa te apiianga ta Saula i ngere i te kite mai?

¹⁰ No te reira, kua karanga atu a Samuela kia Saula e: “Tei te atinga karakaratio e te atinga ta Iehova i pingapingareka, mei tei te akarongo i te tuatua a Iehova ra? I na, e meitaki maata tei te akono i tei te atinga, e meitaki maata tei te akarongo i tei te tongaua mamoe ra.” (1 Samuela 15:22) I te mea e kua akakoro a Iehova kia tamateia te reira au animara, kare te reira i tau ana kia orongaia ei au atinga.

E Akarongo i te Au Apinga Katoatoa

11, 12. (a) Eaa to Iehova manako no ta tatou au tautaanga kia akamareka iaia i roto i ta tatou akamorianga? (e) Akapeea tetai tangata i te akavareanga iaia uaorai i te manakoanga e te rave nei aia i te anoano o te Atua e i te tikaanga te akarongo kore ra aia?

¹¹ Mei teaa tikai to Iehova rekareka i te kite anga i tona au tavini tiratiratu e akono tamou marie ra noatu te takinga kino anga, te akakiteanga i te Patireia noatu te tu manako kore o te tangata, e te aere anga ki te au uipaanga Kerititiano noatu te kite ra i te taomianga i te kimianga i tetai puapinga no te oraanga! To tatou akarongo i roto i te au tuanga puapinga maata o to tatou oraanga pae vaerua, te akarekareka ra i tona ngakau! Ta tatou au tautaanga i te akamorianga ia Iehova e akaperepere angaia kiaia me orongaia ma te aroa. Penei kare te au tangata e kite mai ana i ta tatou angaanga pakari, inara te kite meitaki maira te Atua i ta tatou au orongaanga ngakau tae e te maaraara ra i te reira.​—Mataio 6:4.

¹² Inara kia akamareka pu tikai i to tatou Atua, ka anoanoia tatou kia akarongo i roto i te au tuanga ravarai o to tatou oraanga. Auraka rava tatou e akavare ia tatou uaorai i te akamanako anga e ka rauka ia tatou i te aere ke mei te au umuumuanga a te Atua me te oronga ra tatou i te akamorianga kiaia i roto i tetai au tuanga ke mai o te oraanga. Ei akaraanga, penei ka akavare tetai tangata iaia uaorai i te akamanakoanga e me te akono ra aia i tetai tuanga o te akamorianga, te meitaki ua ra me rave aia i te ainga tau kore me kore me piri atu aia ki roto i tetai atu au  angaanga tarevake kino tikai. Mei teaa rai te reira i te manako tarevake anga!​—Galatia 6:7, 8.

13. I te ngai muna, akapeea to tatou akarongo kia Iehova i te timata angaia?

¹³ Ma te tau, ka rauka ia tatou i te ui kia tatou uaorai e, ‘Te akarongo ra ainei au ia Iehova i roto i taku au angaanga i te au ra ravarai, i roto katoa i te au angaanga e akaraanga muna ua?’ Kua karanga a Iesu e: “Ko tei akarongo mou i te mea ngiti ra kua akarongo mou katoa ia i te mea maata, e ko tei tuatua tika kore i te mea ngiti ra kua tuatua tika kore katoa ia i te mea maata.” (Luka 16:10, NW) Te ‘aaere ra ainei tatou ma te ngakau apa kore i roto katoa i to tatou uaorai nei ngutuare,’ te ngai e kare tetai ke e kite mai ia tatou? (Salamo 101:2) Ae, ia tatou i roto i to tatou ngutuare, penei ka timataia to tatou tiratiratu. I roto i te au enua, e manganui te au ngutuare tei tu i te au komupiuta, e ka rauka te au tutu viivii i te akaraia na te pata ua anga i te au pitopito. I nga mea mataiti ua i topa akenei, kare e rauka i tetai tangata i te akara atu i te reira au akatutuanga ma te kore e aere atu ki roto i te au ngai e akaariariia ra te reira tamataoraanga tau kore. Ka akarongo meitaki ainei tatou i te au tuatua a Iesu e: “Te karanga atu nei ra au kia kotou, Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau”? Ae, ka patoi ainei tatou i te akara ua atu anga i te au tutu viivii? (Mataio 5:28; Iobu 31:1, 9, 10; Salamo 119:37; Maseli 6:24, 25; Ephesia 5:3-5) Akapeea te au porokaramu ta i runga i te tivi? Te aite ra ainei to tatou manako ki te manako o to tatou Atua ra, e e ‘riri roa tona i tei inangaro i te takinga-kino’? (Salamo 11:5) Akapeea te inu maata anga i te kava i te ngai muna? Te akaapa maira te Pipiria i te kona kava, inara te akamatakite katoa maira te reira i te au Kerititiano e auraka e inu “maata i te wina.”​—Tito 2:3; Luka 21:34, 35; 1 Timoteo 3:3.

14. Eaa tetai au mataara i te pae o te moni e akaari maira i to tatou akarongo ki te Atua?

¹⁴ Tetai ngai katoa e anoanoia ra tatou kia matakite koia oki ko te au akonoanga i te pae o te moni. Ei akaraanga, ka piri atu ainei tatou ki roto i te au angaanga te piri vaitata atura ki te tu pikikaa kia moni vave ua atu tatou? Te timataia ra ainei tatou kia rave i te au ravenga tureia i te kopaeanga i te tutaki i te au tero? Me kare, te akono meitaki ra tatou i te akauenga kia “tuku atu i te mea tau i te tangata katoatoa ra, e taūnga tana ra, ei tautaūnga atu rai; e telo tana ra, ei telo ïa”?​—Roma 13:7.

Te Akarongo e Akatumuia ra mei te Aroa

15. Eaa koe i akarongo ei ki ta Iehova au akauenga?

¹⁵ Te oronga maira te akarongo anga ki te au ture a te Atua i te au akameitakianga. Ei akaraanga, na te kopaeanga i te kai avaava, te akonoanga i te au oraanga no te tu akono tau, e te akangateiteianga i te tu tapu o te toto, penei ka kopae tatou i te tu anga i tetai au maki aere. Kapitiia mai, na te noo rotaianga ki te tuatua mou Pipiria i roto i tetai au tuanga ke mai o te oraanga, penei ka puapinga tatou i te pae puapinga, te pirianga tangata me kore i te pae o te ngutuare. (Isaia 48:17) Ka rauka te reira au puapinga i te pae kopapa i te akamanakoia ei au akameitakianga te akapapu maira i te tu tau o te au ture a te Atua. E tika, te tumu maata e akarongo ana tatou kia Iehova koia oki no to tatou aroa iaia. Kare tatou e tavini ana i te Atua no te au tumu noinoi. (Iobu 1:9-11; 2:4, 5) Kua oronga mai te Atua kia tatou i te tu rangatira i te iki i te akamori atu i ta tatou ua e inangaro ra i te akamori. Te iki ra tatou i te akarongo kia Iehova no te mea te inangaro ra tatou i te akamareka iaia e no te mea te kimi ra tatou i te rave i te mea tika.​—Roma 6:16, 17; 1 Ioane 5:3.

16, 17. (a) Akapeea a Iesu i te akaarianga i te akarongo ki te Atua ma te aroa ngakau tae? (e) Akapeea tatou i te aruanga ia Iesu?

¹⁶ Kua akanoo a Iesu i te akaraanga apa kore no te akarongo anga kia Iehova ma te aroa ngakau tae Iaia. (Ioane 8:28, 29) Iaia i te enua nei, i kite mai a Iesu i te “akamoraro i tona au mate.” (Ebera 5:8, 9) I akapeea? Kua “taakaaka [a Iesu] iaia uaorai i te akonoanga e tae ua atu ki te mate, ki te mate satauro ra.” (Philipi 2:7, 8) Noatu e kua akarongo ke ana a Iesu i te rangi ra, kua timata akaouia tona akarongo i te enua nei. Papu ia tatou e kua tau meitaki tikai a Iesu i roto i te au tu ravarai kia tavini atu ei Taunga Maata  no tona au taeake pae vaerua e pera katoa no tetai ke o te au tangata irinaki ra.​—Ebera 4:15; 1 Ioane 2:1, 2.

¹⁷ Akapeea tatou? Ka rauka ia tatou i te aru ia Iesu i te oronga maata anga i te puapinga ki te akonoanga i te anoano o te Atua. (1 Petero 2:21) Ka kite tikai tatou i te merengo anga me akakeu to tatou aroa no te Atua ia tatou i te rave i ta Iehova i akaue mai, noatu i te au tuatau me maroia me kore me timataia tatou i te rave atu i tetai apinga ke. (Roma 7:18-20) Te kapiti maira teia i to tatou akarongo puareinga ua anga ki te au aratakianga mei te aronga e akono ra i te aratakianga i roto i te akamori mou, noatu e e aronga apa ua ratou. (Ebera 13:17) To tatou akarongo anga ki te au akauenga i roto i to tatou uaorai oraanga, e akaperepereanga ia i mua i te aroaro o Iehova.

18, 19. Eaa te akatupuia ra no to tatou akarongo ngakau tae anga ki te Atua?

¹⁸ I teia tuatau, penei ka o mai to tatou akarongo anga kia Iehova, i te akakoromakianga i te takinga kino anga kia akono tamou i to tatou tu tiratiratu. (Angaanga 5:29) Pera katoa, to tatou akarongo anga ki te akauenga a Iehova kia tutu aere e kia apii atu, te umuumu maira e kia tamou marie tatou e tae rava atu ki te openga o teia akatereanga o te au mea nei. (Mataio 24:13, 14; 28:19, 20) Ka anoanoia tatou i te akakoromaki kia taokotai ua atu rai ki to tatou au taeake, noatu e ka kite mai tatou i te taomianga maata mei te ao nei. Te kite pu ua maira to tatou Atua aroa i ta tatou au tautaanga kia akarongo i roto i te reira au tuanga aere. Inara, kia akarongo pu tikai, ka anoanoia tatou kia aruaru i te autu i to tatou kopapa ara e kia ariu ke mei te kino e te tatanu ra i te inangaro no te mea meitaki.​—Roma 12:9.

¹⁹ Me tavini tatou ia Iehova ma te aroa e te ngakau rekareka, nana e “tutaki mai [ia tatou tei] kimi tikai iaia.” (Ebera 11:6) Te umuumuia ra e te rekarekaia ra te au atinga tau, inara ko te akarongo pu tikai kia Iehova ma te aroa te apinga maataia te akamareka ra iaia.​—Maseli 3:1, 2.

Akapeea Koe me Pau?

• Eaa tatou ka tuatua ei e e apinga ta tatou ka oronga kia Iehova?

• Eaa te au tarevake ta Saula i rave?

• Akapeea koe i te akaarianga e te irinaki ra koe e e meitaki atu te akarongo i te atinga?

• Eaa te akakeu ra ia koe i te akarongo kia Iehova?

[Au Uianga Apii]

[Tutu i te kapi 26]

Akapeea tetai taote akono meitaki i te akamanakoanga i tetai tangata maki e kopae ra i tana au ikuikuanga?

[Tutu i te kapi 28]

Eaa a Iehova i riri ei i te Ariki ko Saula?

[Au Tutu i te kapi 30]

Te akono ra ainei koe i ta te Atua au akauenga i roto i te ngai muna o toou ngutuare?