Te Aru ra Ainei Koe ia Iehova i te Akono Anga i Etai Ke?

“E URI i to kotou tumatetenga katoa ki runga iaia; koia oki te tiaki mai ia kotou.” (1 Petero 5:7) E patianga pumaana tikai! Te manako ua maira te Atua ko Iehova i tona iti tangata. Ka rauka ia tatou kia noo ponuiaau ua i raro ake i tana paruruanga.

E mea tau kia tatanu tatou i taua tu akono ra e kia akaari rai i te reira ki etai ke. No te tu apa ua, ka anoanoia tatou kia matakite i tetai au ereere me akaari i to tatou uaorai inangaro i roto i etai ke. I mua ake ka akamanako ei i tetai pae o te reira, ka akara ana tatou i tetai au mataara e akono ana a Iehova i tona iti tangata.

Ei akatutuanga, i te taangaanga anga i tetai tiaki mamoe, kua akataka mai te tata taramo a Davida i to te Atua tu akono: “Ko Iehova toku tiaki; kare rava au e ngere. Te akamoe nei aia iaku i te au ngai ngangaere ruperupe ra; te arataki nei aia iaku na te pae i te vai taʼe marie. E akaoki rai aia i toku vaerua. . . . E kia aere ua atu au na te o ra o te maru-mate, kare rai au e mataku i te kino: tei vaitata katoao koe iaku.”​—Salamo 23:1-4.

No te mea e tiaki mamoe aia uaorai, kua kite a Davida eaa te anoanoia ra i te akono anga i tana anana. Ka paruru te tiaki mamoe i tana mamoe mei te au mea kino, mei te riona, te ruko, e te tapa koia oki te pea. Ka akaruru mai aia i te anana kia kore e pueu aere, ka kimi i te au mamoe ngaro, ka amo i te au punua mamoe roiroi ki runga i tona umauma, e ka akono i tei maki e tei kinokino. Ka akaainu aia i te anana i te au ra ravarai. Kare ra te aiteanga e ka akaaere te tiaki mamoe i to te mamoe au aerenga katoatoa. E tikaanga to te mamoe i tona au aerenga kareka ra te paruruia ra te reira.

Ko te tu tera e akono ana a Iehova i tona iti tangata. Kua akamarama mai te apotetoro ko Petero e: ‘Te tiakiia ra koe e te mana o te Atua.’ I konei, ko te tuatua “tiakiia” tona aiteanga tikai te akara uaia ra. (1 Petero 1:5) E manako ngakau tae tikai to Iehova i te akara ua maira rai ia tatou, e kua papa ua i te oronga mai i te tauturu me pati ua atu tatou. Inara, i anga mai a Iehova ia tatou ei au rima rave rangatira, no reira kare aia e tomo mai ana ki roto i ta tatou au angaanga e te au ikianga katoatoa e rave ana. Ka akapeea ra tatou i te aru anga ia Iehova i roto i teia tu?

Aru i te Atua i te Akono Anga i Taau Tamariki

“Te tamariki ra, e tuanga ïa no ko ia Iehova.” No reira, e mea tau kia paruru e kia akono te au metua i ta ratou tamariki. (Salamo 127:3) Penei ka kapiti mai te reira i te akamaroiroi anga i te tamariki e oti ka akamanako meitaki ei e eaa to roto i to ratou manako e to ratou ngakau me tuatua kia ratou. Me timata te au metua i te akaaere i te au angaanga katoatoa a te tamariki, i te kopae takiri anga i to ratou au anoano, ka aite rai te reira  ki te tiaki mamoe e titau ra i te akaaere i te mamoe ki te taura tavaa. Kare roa e tiaki mamoe e akono i tana anana na roto i taua mataara ra; e kare katoa a Iehova e tiaki ia tatou na roto i taua mataara ra.

Kua akakite a Mariko * e: “Kua roa te au mataiti i toku akakite ua anga ki taku tamariki e, ‘E rave kotou i teia’ e ‘Auraka kotou e rave i tera.’ Kua irinaki tikai au e ko taku apainga rai teia ei metua. Kare roa aku tuatua akameitaki, e kare katoa e komunikeitianga ngakau tae tikai kia ratou.” Noatu e pou ana te au ora me tuatua te tamaine a Mariko i runga i terepaoni ki tona au oa, kare ra e roa ana me pukapuka ki tona metua vaine. “I reira kua kite au i te tuke,” i karanga ai a Mariko. “Me tuatua ki tona au oa, ka taangaanga taku tamaine i te au tuatua e akaari ra i te tu tangi, mei te ‘Ae, ka akatika rai au’ me kore ‘Pera rai au.’ I na kua akamata rai au i te taangaanga i te au tuatua mei te reira i te akamaroiroi i taku tamaine, e i muri poto mai kua roa atu ta maua au pukapukaanga e te mataora.” Te akaari mai nei teia i te puapinga o te komunikeitianga meitaki, tei matauia e rua nga tangata kare e okotai ua.

Ka anoanoia te au metua kia akamaroiroi i ta ratou tamariki, e ka anoanoia rai te tamariki kia marama e eaa i riro ei te akono a te metua ei tiaki koia oki ei paruruanga. Te ako maira te Pipiria i te tamariki kia akarongo i to ratou au metua; e oti te akakite ra i te tumu: “Kia meitaki koe, e kia akaroaia toou puke rā i te enua nei.” (Ephesia 6:1, 3) Te au tamariki tei irinaki pakari tikai e e au puapinga to te tu kauraro ka ngoie maata atu ia ratou i te akarongo.

Te Akono Anga i te Anana a Iehova

Te akaataia maira to Iehova manako aroa i roto i te putuputuanga Kerititiano. Ei upoko no te putuputuanga, kua akakite a Iesu Karaiti ki te aronga pakari kia akono i tana anana. (Ioane 21:15-17) Ko te kupu Ereni no te akaaere e pirianga tona ki te verepa, tona aiteanga e “akara meitaki.” I te akapapu anga e ka akapeea te rave anga i teia, kua ikuiku a Petero i te aronga pakari: “Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau; Auraka ma te akaueue ua ki runga i te tuanga a te Atua ra, ei kaveinga ra kotou no te anana.”​—1 Petero 5:2, 3.

Ae, aite rai te angaanga a te aronga pakari ki ta te au tiaki mamoe. Kia tauturu te aronga pakari Kerititiano i tei maki i te pae vaerua e kia akatikatika atu ia ratou kia rauka i te akaata mai i te au turanga tuatua tika i roto i to ratou oraanga. Na te  aronga pakari te apainga o te akaaere i te au angaanga a te putuputuanga, te rave i te au akanoonooanga no te au uipaanga, e te akamou i te tu mako i roto i te putuputuanga.​—1 Korinetia 14:33.

Inara te akamatakiteia maira tatou e te au tuatua a Petero i runga akenei, no runga i tetai kino​—koia oki ko te aronga pakari i te “akaueue ua ki runga” i te putuputuanga. Tetai tu e akaariia mai ana te reira, me maani tetai tangata pakari i tetai au ture puapinga kore ua. Penei ka aere mamao roa tetai tangata pakari, no te anoano maata kia paruru i te anana. I roto i tetai putuputuanga i te Orieni, kua maani te aronga pakari i tetai au ture no te aravei anga i etai atu i roto i te Are Uipaanga Patireia​—e koai te ka tuatua na mua​—i te irinaki anga e ka riro te aru anga i teia ture ei tauturu i te akatupu i te au i roto i te putuputuanga. Noatu te meitaki ua ra tei akakoroia, inara te aru ra ainei taua aronga pakari ra i to Iehova tu i te akono anga i tona iti tangata? Kua akaata puia mai tikai te tu manako o te apotetoro ko Paulo i roto i tana au tuatua e: “Kare ra mei te mea e ko matou te atu o to kotou akarongo, ei tauturu ra matou i to kotou rekareka: e mou akarongo oki to kotou.” (2 Korinetia 1:24) Irinaki tikai a Iehova i tona iti tangata.

Kapiti mai ki te kopae anga i te akanoo i te au ture kare i akatumuia ki roto i te Tuatua Tapu, ka akaari te aronga pakari akono meitaki i to ratou manako ngakau tae tikai na te kore anga e akakite i te au mea muna. Ka akamanako ua rai ratou i te akamatakiteanga a te Atua e: “Auraka koe e aaki i tana ra tuatua muna ki tetai ke.”​—Maseli 25:9.

Kua akaaite te apotetoro ko Paulo i te putuputuanga o te au Kerititiano akatainuia ki te kopapa tangata: “Kua topiri marie ra te Atua i te kopapa katoa . . . Kia kore rava te tau kore i te kopapa nei; kia arite katoa ra to te au melo akono ia ratou uaorai.” (1 Korinetia 12:12, 24-26) Te aiteanga tikai o te tuatua Ereni no te “kia arite katoa ra to te au melo akono ia ratou uaorai” koia oki ‘kia apiapi no tetai e tetai.’ E mea tau no te au mema o te putuputuanga Kerititiano kia akamanako maata ua rai i tetai e tetai.​—Philipi 2:4.

Akapeea ra te au Kerititiano mou i te akaari anga i to ratou manako ‘apiapi no tetai e tetai’? Penei ka akaari ratou i to ratou manako no te au mema o te putuputuanga na roto i ta ratou au pure e na roto i te oronga anga tauturu ki te aronga ngere. Ka tauturu teia i te akaari mai i te tu memeitaki i roto i etai ke. E akamanako ana e i akapeea a Tadataka i te tauturu angaia e taua tu manako aroa ra. I tona papetitoia anga i te 17 mataiti, koia anake rai te tavini ra ia Iehova i roto i tona pamiri. Kua akakite mai aia e: “Tetai pamiri i roto i te putuputuanga e pati putuputu ua mai ana iaku ki te au kaikaianga e te au taokotaianga. Vaitata rai i te au popongi katoatoa me aere au ki te apii ka tapae atu au ki to ratou kainga i te uriuri i te tia o te Pipiria kia ratou. E rauka mai ana iaku te ako no te akono atu i te au manamanata i te apii, e e pure kapiti ana matou no runga i te reira. Kua mou mai iaku te vaerua oronga mei teia pamiri.” Teianei te taangaanga nei a Tadataka i tana i mou mai na roto i te tavini anga i ko i tetai opati manga o te Au Kite o Iehova.

Kua akamatakite mai te apotetoro ko Paulo no runga i tetai kino o te akaari anga i to tatou inangaro i roto i etai ke. Kua taiku mai aia i tetai au vaine tei riro mai ei aronga “apai tuatua oki, e te akara matariki i ta tetai ke ra akonoanga, i te tuatua anga oki i te au mea tika kore.” (1 Timoteo 5:13) Noatu te tika ua ra to tatou inangaro i roto i etai ke, kia matakite ra tatou e auraka kia tomo atu ki roto ta ratou au angaanga. Ka akakite mai te inangaro tau kore iaia uaorai na roto i te “tuatua anga oki i te au mea tika kore,” mei te au tuatua akaapaapa te tu.

E mea meitaki kia akamaara tatou e penei ka tuke rai ta te au Kerititiano akanoonoo anga i ta ratou uaorai au angaanga, ta ratou ka kai, e ko teea tu tamataoraanga tau ta ratou ka iki. I roto ake i te au kotinga ta te au kaveinga Pipiria i akakite mai, e tikaanga to te tangata tataki tai kia iki i tana ka rave. Kua ako atu a Paulo i te au Kerititiano Roma e: “E teianei, oti ra ua tatou i te akaapa tetai ki tetai. . . . ka umuumu tatou i te tuatua i akatupu i te au, e te tuatua e meitaki kapipiti ei ra.” (Roma 14:13, 19) E mea tau kia akaariia to tatou manako ngakau tae no tetai e tetai i roto i te putuputuanga, auraka ra na roto i te tomo anga atu ki roto i te au angaanga a etai ke, mari ra kia papa ua tatou i te tauturu atu. Me akono tatou i tetai e tetai na roto i teia mataara, ka tupu ruperupe te aroa e te tu rotai i roto i te pamiri e i roto i te putuputuanga.

[Tataanga Rikiriki i Raro]

[Tutu i te kapi 19]

Akamaroiroi i ta kotou tamariki ki te au tuatua akameitaki e te aroa