Tutauia e te Au Turanga Puapinga Meitaki Rava Atu

KUA ariki te au taiate tangata i tetai ture no te tu akono tau. Kare ainei koe e ariki ana e te akaperepereia ra taua au tu ra mei te tu tika, te aroa takinga meitaki, te tangi aroa, e te karapii kore takapini i teianei ao ei mea reka ki te maataanga ia tatou?

Naai te Au Turanga Puapinga?

I te anere mataiti mua T.N., i noo ana tetai tangata tei apii meitakiia ko Saula tona ingoa i rotopu i te au akatereanga no te akakeuanga maata i te turanga puapinga e toru​—te ngati Iuda, te Ereni, e te Roma. I te pae mai i te au  akonoanga akatakaia e te au ture tei tukunaia mai e taua au peu ra, kua kite a Saula e te aratakiia ra te maataanga o te au tangata e tetai manako tau tei akatuangaia mai. To tatou akava ngakau te reira. I muri ake i te riro anga mai a Saula ko te apotetoro Kerititiano ko Paulo, kua tata aia e: “Te etene oki kare a ratou ture ra, kia rave ua ratou i ta te ture ra [“na te tu natura,” The New Testament in Modern Speech], kore ua atu rai ta ratou ture, ko ratou uaorai ta ratou ture: Kua akakite ua oki ratou i ta te ture i tataia i roto i to ratou ngakau, te akakite ra oki to ratou akava-ngakau.”​—Roma 2:14, 15.

Inara, ka rava ua ainei kia arataki anakeia tatou “na te tu natura” me tauta tatou i te iki e eaa te mea tika e eaa te mea tarevake? Mei taau i kite ana, kua ki te tuatua enua o te tangata i te au mea kare i rauka ana i te aronga tataki tai e te au pupu i te rave. Na teia i akapapu mai ki te manganui e te anoano ra tatou i te aratakianga a tetai tumu teitei rava atu kia rauka i te akanoo i te au turanga puapinga meitaki roa atu kia aruia. E manganui te ka akakite mai e na Tei Anga maira i te tangata te turanga meitaki roa atu i te oronga mai i taua au turanga meitaki rava atu. I roto i tana puka The Undiscovered Self, kua tuatua a Dr. Carl Jung e: “Ko te tangata kare i tutauia ki te Atua kare e rauka iaia uaorai i te kopae i te au timataanga i te pae kopapa e te tu akono tau o teianei ao.”

Te rotai ra taua taopenga anga ra ki ta te peroveta i taito i tata e: “Kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” (Ieremia 10:23) Te karanga ra Tei Anga mai ia tatou e: ‘Te mea e puapingaʼi koe na, ko au tei akakite ia koe, ko tei arataki ia koe na te arataa e tau ei kia aere koe ra.’​—Isaia 48:17.

E Tumu Irinakiia no te Au Turanga Puapinga

Kua kiteaia te au tuatua i taikuia akenei i roto i te tumu anga tei tua maata aereia no te au turanga puapinga akono tau​—te au Tuatua Tapu. E mirioni ua atu au tangata takapini i te ao, pera katoa te aronga tataki tai kare i te Kerititiano e kare a ratou akonoanga, kua kimi i te tauturu a te au Tuatua Tapu no te kite e te pakari. Kua tata te tangata Tiamani atu pee ko Johann Wolfgang von Goethe e: “No taku tuanga nei, kua inangaro e kua akaperepere au [i te Pipiria], no te mea kua akakeuia toku tupu anga akono tau katoa e te reira.” Kua ripotiia mai e kua karanga ana te arataki Initu ko Mohandas Gandhi e: “E teianei e akamanako oonu i te au apiianga tei orongaia mai kia koe i roto i te Tuatua i runga i te Maunga [e tuanga no ta Iesu Karaiti apii tei kitea i roto i te Pipiria] . . . No tatou katoatoa tataki tai te apiianga o te Tuatua.”

Kua akakite mai te apotetoro ko Paulo, tei taikuia mai i mua akenei, i te tuanga puapinga ta te au Tuatua Tapu i rave i te oronga mai anga i te au turanga puapinga irinakiia e: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga.” (2 Timoteo 3:16) E tika ainei te reira?

Kore oki koe e akara? E akara matatio i te au kaveinga tei akapapaia i runga i te kapi e aru mai nei. E akara i te au turanga puapinga tau ta te reira e turuturu ra. E akamanako oonu e ka akapeea te au manako tei kapitiia mai ki roto i teia au apii i te akamanaia anga kia akapuapinga i te tu o toou oraanga e toou pirianga ki tetai ke.

Ka Puapinga Ainei Koe?

E akaraanga ua te au kaveinga tei papaia no te akoanga tau tei kitea i roto i te au Tuatua Tapu. I te pae mai i teia, tei roto i te Tuatua a te Atua te au akamatakite anga e manganui no runga i te au manako kino, te tuatua, e te au angaanga te ka akatupu i te kino ki to tatou oraanga.​—Maseli 6:16-19.

Ae, te oronga maira te au apiianga a te Pipiria i tetai apinga tei ngere maataia tikai e te maataanga o te taiate tangata​—e akoanga te tauturu ra i te au tangata kia akatupu i te au turanga tau meitaki rava atu. Te aronga tei ariki e tei akono i teia au apiianga te rave ra i tetai tauianga maata. Kua taui meitakiia te tu e manako ra ratou. (Ephesia 4:23, 24) Kua meitaki mai to ratou au akakoroanga. I te apiianga i te au turanga puapinga o te Atua tei akakiteia i roto i te Pipiria kua tauturu i te manganui kia  akaatea mai mei roto i to ratou au ngakau te manako iriiri tangata, te akavaavaa, e te makitakita. (Ebera 4:12) Te au Tuatua Tapu e te au turanga puapinga ta te reira e akamaroiroi ra kua akakeu i te au tangata kia akakore atu i te au tu kino ravarai e te angaanga kino kia riro mai ei au tangata meitaki.

Ae, kua tauturu te au turanga o te Pipiria i te au mirioni ua atu kia autu i te au peu tei akatumu oonuia e te au ravenga mei te aronga rai tei akakino i te au oraanga o tetai ke. (1 Korinetia 6:9-11) Te taui nei te au apiianga Pipiria i taua au tangata ra​—kare e ko ta ratou au peu ua mari ra to ratou ngakau, to ratou au manakonakoanga, to  ratou ngutuare. Noatu e eaa te maata o te kino i teianei ao, te taui nei te au tangata takapini i te ao kia meitaki atu. E kare teia e akamutu. “Te mae nei te ngangaere, te maeaea nei te tiare: kareka te tuatua a to tatou Atua, e tu ïa e rimua.”​—Isaia 40:8.

Inara, ka puapingaia ainei koe mei ‘te tuatua a te Atua’? Ka mataora te Au Kite o Iehova i te akaari kia koe e akapeea i te ariki anga i te au turanga puapinga o te Pipiria ei meitaki noou. Na te aru rotai anga i taua au turanga puapinga ko te aiteanga ka rauka mai to te Atua marekaanga i teianei e ka arataki atu ki tetai oraanga mutu kore tei akaaereia e te au kaveinga meitaki rava atu a te Atua.

[Pia/​Au Tutu i te kapi 6, 7]

AU KAVEINGA MEITAKI RAVA ATU

Te Ture Auro. “E te au mea katoa ta kotou i anoano ia etai ke ra, na reira katoa kotou ia ratou: ko ta te ture ïa, e ta te au peroveta.”​—Mataio 7:12.

Aroa atu i toou tangata tupu. “E aroa atu koe i toou tangata tupu mei te aroa ia koe uaorai.” (Mataio 22:39) “Kare rava te aroa e takinga-kino i te tangata tupu: ko te aroa mari te akatika anga i te ture.”​—Roma 13:10.

Akangateitei i tetai ke. “Ei kapiti anga aroa mou to kotou ia kotou uaorai, i te aroa taeake ra; i te akangateitei anga tetai ki tetai.”​—Roma 12:10.

Aruaru i te au. “E tamou oki i te au kotou kotou uaorai.” (Mareko 9:50) “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.” (Roma 12:18) “Kia aruaru tatou i te au mea ka akatupu i te au.”​—Roma 14:19, NW.

Kia akakore ua i te ara. “E akakore mai i ta matou ara, mei ia matou i akakore i ta tei ara ia matou nei.” (Mataio 6:12) “Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai.”​—Ephesia 4:32.

Kia tiratiratu. “Kia tiratiratu ki taau uaorai vaine e oronga i toou inangaro kiaia anake ua. . . . Kia rekareka i taau vaine e kia mataora i te vaine tei akaipoipoia e koe . . . E akono i tona tu meitaki ei akarekareka ia koe; e kia koropiniia koe e tona inangaro. . . . Eaa koe ka oronga ai i toou inangaro ki tetai vaine ke? Eaa koe ka anoano atu ei i te tu meitaki o te vaine a tetai tangata ke?” (Maseli 5:15-20, Today’s English Version) “Ko te akono meitaki i te mea ngiti ra, kua akono meitaki katoa i te mea maata; e ko te pikikaa i te mea ngiti ra, kare katoa ïa i akono i te mea maata.” (Luka 16:10) “E mea umuumuia oki i te akaaere nei, ei tangata akono tikai aia.”​—1 Korinetia 4:2.

Kia akakite i te tika. “E tuatua ainei au, e e ara kore tana ko tei rave i te aite kikino ra, e te pute toka pikikaa?” (Mika 6:11) “Kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.”​—Ebera 13:18.

Kia tuatua i te tuatua mou. “Kia rikarika i te kino, e kia inangaro i te meitaki, e akatinamou i te tuatua-tau i te ngutupa.” (Amosa 5:15) “Ei tuatua-mou ta te tangata katoa e tuatua ki tona tangata tupu; e akatupu kotou i te tuatua-tau tikai e te au i to kotou na au ngutupa.” (Zekaria 8:16) “E teianei kia kopae ua atu i te pikikaa, ‘ei tuatua-mou ta te tangata ravarai kia tuatua atu ki tetai.’”​—Ephesia 4:25.

Kia angaanga pakari. “Te akara ra koe i te tangata i maroiroi i tana taoonga? ei mua i te aroaro o te ui ariki aia e tu ei.” (Maseli 22:29) “Eiaa e akatau i te angaanga.” (Roma 12:11) “E ta kotou au mea e rave ra, e rave ïa ma te ngakau katoa, mei te mea e na te Atu, eiaa e na te tangata.”​—Kolosa 3:23.

Kia maru, aroa ua, takinga meitaki. “Ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia.”​—Kolosa 3:12.

Mate te kino i te meitaki. “E aroa ua atu i to kotou au enemi e te pure oki no te aronga e takinga kino mai ia kotou na.” (Mataio 5:44, NW) “Auraka e mate i te kino, kia mate ra te kino ia koe i te meitaki.”​—Roma 12:21.

Oronga pu tikai ia koe ki te Atua. “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata.”​—Mataio 22:37, 38.

[Au Tutu]

Te ariki anga i te au turanga puapinga o te Pipiria ka rauka i te tauturu ia tatou kia rauka te au akaipoipoanga puapinga, te au pirianga pamiri mataora, e te au pirianga oa mareka tikai