Ka ‘Akono Ainei Koe i ta te Vaerua’?
Ka ‘Akono Ainei Koe i ta te Vaerua’?
‘E akono i ta te vaerua ra, e auraka e akatupu i to te kopapa ra inangaro.’—GALATIA 5:16.
1. Akapeea te apiapi i te ara anga i te vaerua i te akakoreangaia?
E RAVENGA tetai i te akakore atu i te apiapi, e te ara ra tatou i te vaerua tapu o Iehova. Koia oki ko te rave anga i ta te apotetoro ko Paulo i akakite mai e: ‘E akono i ta te vaerua ra, e auraka e akatupu i to te kopapa ra inangaro.’ (Galatia 5:16) Me tuku tatou e na te vaerua tapu o te Atua e arataki ia tatou, kare tatou e rokoia e te au inangaro tau kore o te pae kopapa.—Roma 8:2-10.
2, 3. Me akono tatou i ta te vaerua, akapeea tatou i te akakeuangaia?
2 Ia tatou e ‘akono ra i ta te vaerua,’ ka akakeu te mana ririnui o te Atua ia tatou kia akarongo ia Iehova. Ka akaari tatou i te au tu o te Atua i roto i ta tatou angaanga orometua, i roto i te putuputuanga, i te kainga, e tetai atu au ngai ke. Ka kite puia te ua o te vaerua i roto i ta tatou akonoanga i to tatou tokorua akaipoipo, ta tatou tamariki, to tatou au taeake irinaki, e tetai atu.
3 Te akonoanga ‘i te Atua i te vaerua ra,’ te tauturu ra ia tatou kia kopae i te raveanga i te ara. (1 Petero 4:1-6) Me tei raro tatou i te akakeuanga a te vaerua, papu roa e kare tatou e rave i tetai ara kare e akakoreia. Inara na roto i teea atu au mataara puapinga e akakeuia ai tatou me akono tatou i ta te vaerua?
Noo Vaitata Atu ki te Atua e Karaiti
4, 5. Akapeea te akonoanga i ta te vaerua i te akakeuanga i to tatou akamanakoanga ia Iesu?
4 No te mea te akono ra tatou i ta te vaerua tapu, ka rauka ia tatou i te akono tamou i tetai pirianga vaitata ki te Atua e ki tana Tamaiti. I te tataanga no runga i te au apinga aroa pae vaerua, kua akakite a Paulo ki te au taeake irinaki i Korinetia e: ‘E teianei, e akakite atu au kia kotou, kare rava e tangata na te vaerua o te Atua tana tuatua, e karanga ia Iesu e, kua taumaaia; e kare rava e tangata e tika kia karanga e, ko Iesu te Atu, mari ra i ta te vaerua tapu ra.’ (1 Korinetia 12:1-3) Ko tetai ua atu vaerua e akakeu ra i te au tangata kia taumaa ia Iesu, no ko mai te reira ia Satani te Tiaporo. Ei au Kerititiano e akono ra i ta te vaerua tapu, kua irinaki tatou e kua akatu mai a Iehova ia Iesu mei te mate e kua akateitei atu iaia ki runga ravao i te au mea pouroa i angaia. (Philipi 2:5-11) E akarongo to tatou i roto i te atinga oko o Karaiti e kua ariki atu ia Iesu e ko te Atu akataoongaia e te Atua i rungao ia tatou.
5 Tetai pae Kerititiano akatutu ua o te anere mataiti mua T.N. kare i irinaki ana e kua aere mai a Iesu i roto i te kopapa tangata. (2 Ioane 7-11) I te arikianga i te reira manako tarevake, kua akatupu i tetai pae kia patoi i te au apiianga mou no runga ia Iesu, te Mesia. (Mareko 1:9-11; Ioane 1:1, 14) I te akonoanga i ta te vaerua tapu te paruru ra ia tatou kia kore e o atu ki roto i te reira apoteiti. Inara na te vai maroiroi ua anga i te pae vaerua e rauka ai ia tatou kia rekareka ua atu rai i ta Iehova takinga meitaki e kia ‘aere na te tuatua-mou.’ (3 Ioane 3, 4) Kia tauta pakari tatou i reira kia patoi i te apoteiti pouroa kia rauka ia tatou i te akono tamou i tetai pirianga ketaketa ki to tatou Metua i te rangi.
6. Eaa te au tu ta te vaerua o te Atua e akatupu ra i roto i te aronga e akono ra i ta te vaerua ra?
6 Kua papa a Paulo i te akamori itoro apoteiti e te au pupu akonoanga tukeke i roto i te “au angaanga a te kopapa” mei te pirianga ainga e te tu akono tau kore. Inara kua akamarama mai aia e: ‘Ko ratou oki ko to te Mesia ra, kua akasatauro ïa i te kopapa ma tona manako e te inangaro tika kore katoa ra. E te ora nei tatou i te vaerua ra, e aru tatou i ta te vaerua ra.’ (Galatia 5:19-21, 24, 25) Eaa te au tu ta te mana ririnui o te Atua e akatupu ra i roto i te aronga e akono ra e te aru ra i ta te vaerua tapu? ‘Ta te vaerua e akatupu,’ i tata ei a Paulo, “ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te [“akatere uaorai,” NW]: kare ua e ture e akakore i te reira.” (Galatia 5:22, 23) E akamanako ana tatou i teia au tuanga o te ua o te vaerua tapu.
‘E Aroa Tetai i Tetai’
7. Eaa te aroa, e eaa tetai atu au tu o te reira?
7 Te aroa—ko tetai tuanga o te ua o te vaerua tapu—te o putuputu maira i te inangaro oonu e te manako karapii kore no tetai ke, kapiti mai i te pirianga maanaana kia ratou. Te akakite maira te au Tuatua Tapu e “ko te Atua oki te aroa” no te mea koia tikai te tumuanga o taua tu ra. Te aroa maata o te Atua e tana Tamaiti no te au tangata ravarai, kua akatutuia mai i roto i te atinga oko o Iesu Karaiti. (1 Ioane 4:8; Ioane 3:16; 15:13; Roma 5:8) Ei au pipi na Iesu, kua akatakaia tatou no to tatou aroa i tetai e tetai. (Ioane 13:34, 35) Ko te tikaanga, te akaueia ra tatou kia ‘aroa tetai i tetai.’ (1 Ioane 3:23, NW) E te akakite maira a Paulo i te aroa e e akakoromaki e te takinga meitaki. Kare e vareae ana, e kare e akamaata ana, e kare e rave i te mea tau kore, me kore e kimi i tona uaorai meitaki. Kare te aroa e riri vave me kore e manako kino atu i etai ke. E rekareka ana te reira i te tuatua tika, kare i te tuatua tika kore. E tapoki ana, e akarongo ana, e manakonako ana e e akakoromaki ana te aroa i te au mea katoa. Tei runga ravao ra, kare ua te reira e kore.—1 Korinetia 13:4-8.
8. Eaa tatou ka akaari ei i te aroa no to tatou au taeake akamori ia Iehova?
8 Me tuku tatou i te vaerua o te Atua i te akatupu i te aroa i roto tikai ia tatou, ka kite uaia te reira tu i roto i to tatou au pirianga ki te Atua e te tangata tupu. (Mataio 22:37-39) “Ko tei kore e aroa i tona taeake, te vai ra ïa i roto i te mate,” i tata ei te apotetoro ko Ioane. “Ko tei makitakita i tona taeake, e ta tangata ïa: kua kite oki kotou e, kare o te ta tangata ra e ora mutu kore e vai i roto iaia.” (1 Ioane 3:14, 15) Ka kitea uaia mai e tetai tangata ta tangata te ora i roto i tetai oire akapuanga i Iseraela me kare aia e rikarika i te tangata i taiaia. (Deuteronomi 19:4, 11-13) Me aratakiia tatou e te vaerua tapu, ka akaari tatou i te aroa no te Atua, te aronga akamori mou, e tetai atu.
“Ko te Rekareka no Iehova ra ko to Kotou Punanga Ketaketa Ia”
9, 10. Eaa te rekareka, e eaa tetai au tumu ka rekareka ai?
9 Ko te rekareka e turanga mataora maata te reira. E “Atua mataora” a Iehova. (1 Timoteo 1:11, NW; Salamo 104:31) E rekareka ana te Tamaiti i te rave i te anoano o tona Metua. (Salamo 40:8; Ebera 10:7-9) E “ko te rekareka no Iehova ra ko to [tatou] punanga ketaketa ia.”—Nehemia 8:10, NW.
10 Te rekareka tei orongaia mai e te Atua, te apai maira i te akamerengo anga oonu kia tatou me rave tatou i te anoano o te Atua noatu i te au tuatau ngata, te mii, me kore te takinga kino anga. Mei teaa tikai te mataora ta “te kite tikai i te Atua ra” e apai maira kia tatou! (Maseli 2:1-5) Kua akatumuia to tatou pirianga rekareka ki te Atua ki runga i te kite tika tikai e te akarongo i roto iaia e i roto i te atinga oko o Iesu. (1 Ioane 2:1, 2) I te riro mai anga ei tuanga no te akataeakeanga mou anake ua i te pa enua ko tetai tumuanga akaouia no te rekareka. (Zephania 3:9; Hagai 2:7) To tatou manakonakoanga no te Patireia e te tikaanga manea i te akakitekiteanga i te tuatua meitaki, e akarekareka ana te reira ia tatou. (Mataio 6:9, 10; 24:14) E pera katoa te manakonakoanga no te oraanga mutu kore. (Ioane 17:3) I te mea e e au manakonakoanga umere rava to tatou, kia “rekareka tika rai” tatou.—Deuteronomi 16:15.
Akatupu i te Au e te Akakoromakianga Roa
11, 12. (a) Akapeea koe i te akamaramaanga i te au? (e) Eaa te akakeuanga a te au tu-Atua kia tatou?
11 Te au—ko tetai tuanga akaou o te ua o te vaerua tapu—ko te turanga maru ia e te apiapi kore. E Atua no te au to tatou Metua i te rangi, e te akapapuia maira kia tatou e: “E akameitaki mai a Iehova i tona au tangata i te au.” (Salamo 29:11; 1 Korinetia 14:33) Kua akakite a Iesu ki tana au pipi e: “E au taku e vaio ia kotou nei, ko taku nei au taku e o atu no kotou.” (Ioane 14:27) Akapeea te reira i te tauturuanga i tana au pipi?
12 Te au ta Iesu i oronga ki tana au pipi kua akamaru i to ratou ngakau e to ratou manako e kua akaiti mai i to ratou au mataku. Kua kite mai tikai ratou i te au i te rauka anga mai ia ratou te vaerua tapu tei taputouia. (Ioane 14:26) I raro ake i te akakeuanga a te vaerua e i te pauanga i ta tatou au pure i teia tuatau, te rekareka nei tatou i te ‘au aite koreia o te Atua’ te akamaru ra i to tatou ngakau e to tatou manako. (Philipi 4:6, 7) Tei runga ravao ra, e tauturu mai ana to Iehova vaerua ia tatou kia noo maru ua e kia noo au ua ma te au taeake irinaki e tetai atu.—Roma 12:18; 1 Tesalonia 5:13.
13, 14. Eaa te akakoromakianga roa, e eaa tatou ka akaari ei i te reira?
13 Te piri atura te akakoromakianga roa ki te au, no te mea te akakoromaki marie ra tatou i te akakokoanga me kore te tarevake ma te manakonakoanga e ka meitaki mai te reira turanga. E Atua akakoromakianga roa a Iehova. (Roma 9:22-24) Kua akatutu katoa rai a Iesu i teia tu. Ka rauka ia tatou i teia, no te mea kua tata a Paulo e: “Teia ra te mea i aroaia mai ei au, kia kitea te akakoromaki maata rava o Iesu Mesia iaku, i tei maata i te ara nei, ei akaraanga na te aronga e akarongo iaia a muri atu, e rauka atu te ora mutu kore.”—1 Timoteo 1:16.
14 Te tu akakoromakianga roa e tauturu ana ia tatou i te akakoromaki me tuatua mai me kore me rave tetai au tangata i te au raveanga kino me kore i te au apinga manako kore. Kua raurau a Paulo i te au taeake Kerititiano e: “Kia roa te akakoromaki anga i te tangata ravarai.” (1 Tesalonia 5:14) I te mea e kua apa pouroa tatou e e rave ana i te au tarevake, papu e ka inangaro tatou i te au tangata kia akakoromaki mai ia tatou, kia akakoromaki roa me rave tatou i te au tarevake i to tatou akonoanga ia ratou. Kia tauta pakari tatou i reira kia ‘akakoromaki ma te rekareka.’—Kolosa 1:9-12.
Akaari i te Takinga Meitaki e te Meitaki
15. Akamarama mai i te takinga meitaki, e e taiku mai i te au akaraanga no te reira.
15 E akatutuia ana te takinga meitaki me akaari tatou i te inangaro i roto i tetai ke na roto i te au tuatua e te au angaanga e te au tuatua oaoa e te tauturu. E Atua takinga meitaki a Iehova, e pera katoa tana Tamaiti. (Roma 2:4; 2 Korinetia 10:1) Te umuumuia ra te tu takinga meitaki i roto i te au tavini o te Atua raua ko Karaiti. (Mika 6:8; Kolosa 3:12) Kua akaari katoa tetai aronga tei ngere i tetai pirianga uaorai ki te Atua, i te “takinga-meitaki” maata rava. (Angaanga 27:3; 28:2) E mea tau i reira, e ka rauka ia tatou i te akaari i te takinga meitaki me ‘akono [tatou] i ta te vaerua ra.’
16. Eaa tetai au turanga te ka akakeu ia tatou kia akaari i te takinga meitaki?
16 Ka rauka katoa te takinga meitaki i te akaariia noatu me kua tano rai tatou i te riri no te au tuatua mamae me kore te au angaanga manako kore ua a tetai tangata. “Kia riri kotou ra, auraka kia araia,” i karanga ai a Paulo. “Auraka e topa te rā i to kotou riri anga: Auraka e tuku i ta te diabolo ngai kia o mai. Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai, mei ta te Atua i akakore mai i ta kotou i te Mesia ra.” (Ephesia 4:26, 27, 32) E mea tau tikai kia akaari i te takinga meitaki ki te aronga e kite maira i te au timataanga. Inara, kare i te mea takinga meitaki no tetai tangata pakari Kerititiano, me kare aia e oronga i te akoanga Tuatua Tapu i te kopae ua anga i te akamamaeanga i te ngakau o tetai tangata, te taka meitaki ra e te akaruke ra aia i te mataara “meitaki ravarai, e te tuatua-tika, e te tuatua-mou.”—Ephesia 5:9.
17, 18. Akapeea i te akamaramaanga i te meitaki, e eaa te angaanga ta teia tu e rave ana i roto i to tatou oraanga?
17 E ravenga tika e te tu meitaki rava te tu meitaki me kare e tu me kore e turanga meitaki te reira. E meitaki te Atua i te tu meitaki rava tikai. (Salamo 25:8; Zekaria 9:17) E tangata meitaki a Iesu e e meitaki rava tona tu. Inara, kare aia i ariki ana i te taoonga “meitaki” i tona kapikiia anga e e “Orometua meitaki.” (Mareko 10:17, 18) Te tumu no teia no te mea kua kite oki aia e ko te Atua te tumu teitei rava no te meitaki.
18 To tatou kite i te rave i te meitaki e tapuia ana e to tatou tu ara. (Roma 5:12) Noatu rai, ka rauka ia tatou i te akaari i teia tu me pure tatou ki te Atua kia ‘apii mai ia tatou i te akono meitaki.’ (Salamo 119:66) Kua akakite a Paulo ki tona au taeake irinaki i Roma e: “Ko au uaorai oki tei kite ia kotou, e aku au taeake, e kua ki katoa kotou i te meitaki, kua akakiia kotou i te kite.” (Roma 15:14) Ka anoanoia tetai akaaere Kerititiano ei “tangata [“inangaro i te,” NW] meitaki.” (Tito 1:7, 8) Me aratakiia tatou e te vaerua o te Atua, ka kite meitakiia tatou no te tu meitaki, ka ‘akamaara a Iehova ia tatou no te meitaki ta tatou i rave.’—Nehemia 5:19; 13:31.
“Akarongo Pikikaa Kore”
19. Akamarama mai i te akarongo, kia tau kia Ebera 11:1.
19 Ko te akarongo—e tuanga katoa o te ua o te vaerua—“ko te tumu tikai ïa i te au mea i tatariia nei, e te kite ïa i te au mea kare i akaraia nei.” (Ebera 11:1) Me e akarongo to tatou, papu ia tatou e pouroa te au apinga ta Iehova i taputou mai, e mea papu tikai ka akatupuia. E papu meitaki tikai te akapapuanga o te au mea akara koreia e kua karangaia te akarongo e te aite atura ki te reira akapapuanga. Ei akatauanga, te vai ua anga o te au apinga angaia, te akapapu ra kia tatou e te vai ra Tei Anga mai. Ko te tu akarongo te reira ta tatou ka akaari me akono tatou i ta te vaerua ra.
20. Eaa “te ara tei akapuereere ra ia tatou,” e akapeea tatou i te kopae anga i te reira e te au angaanga a te kopapa nei?
20 Te ngere anga i te akarongo ko “te ara tei akapuereere ra ia tatou.” (Ebera 12:1, NW) Ka anoanoia tatou kia irinaki ki runga i te vaerua o te Atua e rauka ai i te kopae i te au angaanga a te kopapa nei, te tu materia, e te au apiianga pikikaa te ka takore i te akarongo. (Kolosa 2:8; 1 Timoteo 6:9, 10; 2 Timoteo 4:3-5) E akatupu ana te vaerua o te Atua i roto i te au tavini o Iehova i teia tuatau nei i te akarongo mei te akarongo rai o te au kite i mua ake i te tuatau Kerititiano e tetai atu tei rekotiia i roto i te Pipiria. (Ebera 11:2-40) E penei ake ka akamaroiroi katoa to tatou uaorai “akarongo pikikaa kore” i te akarongo o tetai ke.—1 Timoteo 1:5; Ebera 13:7.
Akaari i te Maru e te Akatere Uaorai
21, 22. Akapeea te maru i te akamaramaangaia, e eaa tatou ka akaari ei i te reira?
21 Ko te maru te tu akaakaia i te manako ngakau e te tu akonoanga. Ko tetai tu o te Atua ko te tu maru ia. Kua kite oki tatou i teia no te mea, kua akatutu apa kore a Iesu, e tangata maru ua, i to Iehova tu. (Mataio 11:28-30; Ioane 1:18; 5:19) Eaa te umuumuia ra ia tatou ei au tavini no te Atua?
22 Ei au Kerititiano, te umuumuia ra tatou kia “akono i te mea maru i te tangata katoa ra.” (Tito 3:2) E akaari ana tatou i te maru i roto i ta tatou angaanga orometua. Te akoia ra te aronga tau i te pae vaerua kia akatikatika i tetai Kerititiano tei rave i te ara “ma te ngakau maru.” (Galatia 6:1) Ka rauka ia tatou katoatoa i te akamaroiroi i te taokotaianga Kerititiano e te au na te akaarianga i te “ngakau akaaka roa, e te maru.” (Ephesia 4:1-3) Ka rauka ia tatou i te akaari i te maru me akono tamou ua rai tatou i ta te vaerua e kia taangaanga i te akatereanga uaorai.
23, 24. Eaa te akatere uaorai, e akapeea te reira i te tauturuanga ia tatou?
23 E tauturu ana te akatereanga uaorai ia tatou kia akono i te au manako, te au tuatua, e te au angaanga meitaki. Kua “akatupua akenei” a Iehova i te akonoanga i te aronga Babulonia tei takore ia Ierusalema. (Isaia 42:14) Kua ‘vaoo mai tana Tamaiti i te akaraanga’ no tatou na te taangaanga anga i te akatereanga uaorai i tona tamamaeia anga. E kua ako atu te apotetoro ko Petero i te au taeake Kerititiano kia ‘kapiti katoa to ratou kite ki te noo marie.’—1 Petero 2:21-23; 2 Petero 1:5-8.
24 Te umuumuia ra te aronga pakari Kerititiano kia noo marie. (Tito 1:7, 8) Ko te tikaanga, ka rauka te aronga pouroa e aratakiia ra e te vaerua tapu, i te taangaanga i te akatere uaorai e te kopae ra te reira i te tu akono tau kore, te tuatua viivii, me kore tetai ua atu apinga te ka taki atu ki to Iehova mareka kore anga. Me tuku tatou i te vaerua o te Atua kia akatupu i te akatereanga uaorai i roto tikai ia tatou, ka kite meitakiia teia e tetai ke na roto i ta tatou au tuatua e to tatou tu.
E Akono ua Atu rai i ta te Vaerua
25, 26. Akapeea te akonoanga i ta te vaerua ra i te akakeuanga i to tatou pirianga i teianei e to tatou au manakonakoanga no te tuatau ki mua?
25 Me akono tatou i ta te vaerua, ka riro mai tatou ei aronga maroiroi i te akakitekite i te Patireia. (Angaanga 18:24-26) Ka riro mai tatou ei au taeake meitaki tikai, e ka rekareka tikai te aronga e tavini ra i te Atua i te akapiri mai kia tatou. Ei aronga tei aratakiia e te vaerua tapu, ka riro katoa mai tatou ei au tumu akamaroiroianga i te pae vaerua ki te au taeake akamori o Iehova. (Philipi 2:1-4) Kare ainei e ko te reira ta te au Kerititiano pouroa e inangaro ra kia riro mai?
26 I roto i teia ao i raro ake i te akatereanga a Satani, kare i te mea ngoie ua kia akono i ta te vaerua ra. (1 Ioane 5:19) Noatu rai, e mirioni ua atu te rave ra i te reira i teia tuatau nei. Me irinaki tatou i roto ia Iehova ma to tatou ngakau katoa, ka rekareka tatou i te oraanga i teianei e ka rauka i te aaere mutu kore ua atu rai i roto i te au mataara tuatua tika a Tei Oronga aroa mai i te vaerua tapu.—Salamo 128:1; Maseli 3:5, 6.
Eaa Taau Pauanga?
• Akapeea te ‘akonoanga i ta te vaerua ra’ i te akakeuanga i to tatou pirianga ki te Atua e tana Tamaiti?
• Eaa te au tu o te ua o te vaerua tapu?
• Eaa tetai au mataara i te akaari i te ua o te vaerua o te Atua?
• Akapeea te akonoanga i ta te vaerua i te akakeuanga i to tatou oraanga i teianei e to tatou au manakonakoanga no te tuatau ki mua?
[Au Uianga Apii]
[Tutu i te kapi 23]
E akamaroiroi ana te vaerua tapu o Iehova i te aroa no to tatou au taeake irinaki
[Tutu i te kapi 24]
Akaari i te takinga meitaki na roto i te au tuatua e te au angaanga akamaroiroi