“Te Kite Pikikaa Kore ki Runga i te Rangi Ra”

KO TE aronga tata pee e te imene e akapaapaa ua ana i te marama ei apinga manea. Ei akaraanga, ko tetai imene akauruia e te Atua te tuatua ra no tetai vaine “mei te marama te manea.” (E Peʼe na Solomona 6:10) E te kapiki ra te pee a te tata taramo i te marama e ko “te kite pikikaa kore ki runga i te rangi ra.” (Salamo 89:37) Eaa te puapinga o teia akakiteanga no runga i te marama?

Kare rava te marama e kore ana i te akaoti i tana takapini anga i te enua i te au 27.3 ra ravarai. No reira, te taikuia ra te tu pikikaa kore o te marama ki tona tu irinakiia. Inara, penei te manako ra te tata taramo i tetai aiteanga oonu atu. Kua kapiki aia i te marama e ko “te kite pikikaa kore” i roto i te imene totou no te Patireia ta Iesu i apii ki tana au pipi kia pure.​—Mataio 6:9, 10.

No tetai 3,000 mataiti i topa, kua papau te Atua ko Iehova i tetai koreromotu Patireia ma te ariki o Iseraela taito ko Davida. (2 Samuela 7:12-16) Ko te akakoroanga o taua koreromotu ra ko te akanoo i te tango tikai ko Iesu Karaiti, e tama ariki na Davida, kia riro iaia te terono e tuatau ua atu. (Isaia 9:6; Luka 1:32, 33) I te taikuanga i te terono o te “uanga” a Davida, kua imene te tata taramo e: “Ka akamouia ïa e tuatau ua atu mei te marama; e mei te kite pikikaa kore ki runga i te rangi ra.”​—Salamo 89:36, 37.

Te “turama iti, ei tutara i te po”​—ko te marama​—e akamaara anga tano meitaki te reira no te tu ngaueue kore i te tutara a te Karaiti. (Genese 1:16) No runga i tona Patireia, te akakite ra a Daniela 7:14 e: “Tona mana, e mana mutu kore ïa, kare ïa e kore, e tona basileia, kare ïa e pou.” Ko te marama te kite te akamaara maira kia tatou i taua Patireia e te au akameitakianga ka apai mai no te tangata.

[Akameitakianga no te Tutu i te kapi 32]

Moon: NASA photo