Akarongo o Tetai Metua Vaine Kua Autu i te Tumatetenga

“Me te tatau ra kotou i teia reta, tera te aiteanga kare au i ora mai i te vaianga e kare au i rotopu ia kotou.”

TEIA te au tuatua mua o te reta tei tataia e tetai metua vaine Kerititiano, ko Carmen, ki tana au tamaine toko toru, e 25, 19, e te 16 mataiti. Mei tei tupu, kare i manuia ana te vaianga, e ko te mea tangi, kua mate a Carmen.

Ka mamae rai to taua ngakau i te akaruke mai anga e toko toru tamariki tamaine na roto i taua au tu taitaia ra. Kareka ra, to teia vaine akarongo ngaueue kore i roto ia Iehova e tana au taputou, kua autu te reira ki rungao i taua tumatetenga ra, tei oronga i te ngakau au kiaia mei tei kite meitakiia atu i roto i tana reta akaaroa tikai. Ka akara ana ra i tana tuatua ki tana au tamaine.

“Te mea mua, ka inangaro au i te akakite atu i toku inangaro ia kotou ma toku ngakau katoa. . . . Ko kotou te anau tamaine meitaki roa atu ka rauka i tetai ua atu metua vaine, e te ngakau parau nei au ia kotou.

“Toku inangaro tikai kia noo kapiti atu rai tatou e tae ua atu ki te ao ou ta te Atua i taputou mai . . . , no te mea ra e kare te reira e rauka, kua pati au kiaia kia tauturu mai ia kotou kia vai akarongo mou atu rai, mei ta kotou i rave mai ana. E manganui akenei to tatou au timataanga i akakoromaki kapiti ana, e kare rava a Iehova i akaruke ana ia tatou. . . . No reira e irinaki mou atu rai i tana aratakianga e oronga maira na roto i tona akaaerenga e e turuturu mou atu rai i te putuputuanga e te aronga pakari. E tutu putuputu katoa atu i te ka rauka ia kotou, e kia aroa atu i te au taeake pouroa.

“E takakeanga poto ua to tatou. . . . Te pati akatenga atu nei au kia akakore mai kotou i te au tarevake pouroa taku i rave e no te au taime pouroa kare au i marama atu ana ia kotou me kore kare i akakite atu ana i te maata o toku inangaro ia kotou. . . . Kua kite au e e au anoano rai to kotou tataki tai. E maata atu ra to Iehova kite i to kotou, e ka oronga mai aia i te au mea ravarai ta kotou e anoano ra e ka tutaki mai ia kotou no te au mea pouroa ta kotou i akakoromaki ana.

“Auraka rava e akangaropoina i to kotou akakoroanga​—koia oki te oraanga i roto i te ao ou​—e e tauta atu rai kia rauka te reira. Kia akameitaki mai a Iehova ia kotou e kia akamatutu mai ia kotou kia vai akarongo mou atu rai kotou e tae ua atu ki te openga. . . . Auraka e taitaia e taku anau tamaine akaperepere. Te inangaro nei au ia kotou!”

E tupu ana te tumatetenga i tetai ua atu taime. “E tuatau ra, e te manuia ua, to te tangata katoa ra,” i tata ai te Ariki ko Solomona i taito. (Koheleta 9:11) Kareka ra te aronga akarongo ngaueue kore i roto i te Atua, ka rauka ia ratou te akapumaanaanga mei ta te apotetoro rai ko Paulo, tei tuatua e: “Kua kite tikai oki au e, kare te mate, kare oki te ora . . . e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.”​—Roma 8:38, 39; Ebera 6:10.