E Mea Ora te Tuatua a Iehova

Au Manako Maata mei te Puka a Ezekiela​—II

KO TITEMA 609 M.T.N. te tuatau. Kua akamata te ariki Babulonia i tana koropinianga openga o Ierusalema. Tei tupu akenei, kua akamouia te karere a Ezekiela ki te au tuikaa i Babulonia, ki runga i te tumu tuatua okotai, te inga anga e te takore anga o to ratou oire akaperepere, ko Ierusalema. I teianei ra, kua neke atu te tumu manako o ta Ezekiela au totou ki te tumatetenga o te pa enua peikani tei mataoraia no te kino tei tupu ki te iti tangata o te Atua. I te inga anga a Ierusalema e 18 marama i muri mai, e tumu tuatua ou ta te karere a Ezekiela: te akaora anga kaka o te akamori mou.

E au totou aere to roto ia Ezekiela 25:1–48:35 no runga i te au pa enua e koropini ra ia Iseraela e te akaoraanga o te iti tangata o te Atua. * Ko Ezekiela 29:17-20 ua, te aru pouroa ra te tataanga ki te papaanga o te tuatau e te papaanga o te tupuanga katoa. Inara, te tano ra te ngai o teia au irava e a no runga i te tupuanga. Ei tuanga o te au Tuatua Tapu akauruia, e karere ‘ora e te ririnui’ ta te puka a Ezekiela.​—Ebera 4:12.

‘TAUA ENUA NEI KA RIRO ÏA MEI TE KAINGA RA MEI IA EDENE’

(Ezekiela 25:1–39:29)

I te kite anga i ta ratou ka rave i te inga anga a Ierusalema, kua maani a Iehova ia Ezekiela kia totou i te akaapaanga ia Amona, Moabi, Philiseti, Turia, e Sidona. Ka noniia a Aiphiti. Kua akaaiteia te ‘ariki o Aiphiti ra ko Pharao, e tona tini ra’ ki tetai tumu rakau areti te ka tipuia e te “koke a te ariki o Babulonia.”​—Ezekiela 31:2, 3, 12; 32:11, 12.

Mei tetai ono marama i muri ake i te takoreanga o Ierusalema i te 607 M.T.N., kua aere mai tetai tangata tei ora mai e kua ripoti atu kia Ezekiela e: “Kua taia taua oire ra!” E “kare atura [te peroveta] i murare” i te au tuikaa. (Ezekiela 33:21, 22) E au totou akaoraanga tana i te akakite atu. Na Iehova ‘e tuku i te tiaki okotai ki runga ia ratou, tona tavini nei ko Davida.’ (Ezekiela 34:23) Ka akataneaia a Edoma, inara taua enua ra, ko Iuda, ka riro atura ‘mei te kainga ra ia Edene.’ (Ezekiela 36:35) Te taputou ra a Iehova i te paruru i tona iti tangata akaoraia mei te tamakianga a “Goga.”​—Ezekiela 38:2.

Pauia te Au Uianga Tuatua Tapu:

29:8-12​—I naea a Aiphiti i akataneaia ai e 40 mataiti? I muri ake i te takoreanga o Ierusalema i te 607 M.T.N., kua oro te toenga o te iti tangata o Iuda ki Aiphiti noatu te akamatakiteanga a te peroveta ko Ieremia. (Ieremia 24:1, 8-10; 42:7-22) Kare te reira i riro mai ana ei ora no ratou no te mea kua tamaki mai a Nebukanesa ia Aiphiti e kua autu atu i te reira. Penei kua aru mai te akataneaanga e 40 mataiti i te reira autu anga. I te mea e kare te tuatua enua o te ao nei e oronga mai ana i te akapapuanga o teia akataneaanga, papu ia tatou e kua tupu te reira no te mea ko Iehova Tei Akatupu i te totou.​—Isaia 55:11.

29:18​—Akapeea te ‘mimiti katoa i te pakikoia, e te pakuivi katoa i te pakikokikoia’? E kino pakari e te angaanga maata tikai te koropini anga i te oire o Turia e kua pakikoia te katu o te au vaeau o Nebukanesa no te uki anga ki runga i to ratou au pare e kua pakikokikoia to ratou au pakuivi mei te amo anga i te au apinga patu no te au punanga e te au paruruanga.​—Ezekiela 26:7-12.

 Au Apiianga no Tatou:

29:19, 20. I te mea e kua tari te au Turia i te maataanga o ta ratou apinga nui i te oro anga ki to ratou oire airani, e manga apinga ua ta te Ariki ko Nebukanesa i rauka mei ia Turia. Noatu e e tutara peikani ngakau parau, e te akamanako uaorai a Nebukanesa, kua tutaki a Iehova iaia no tana angaanga na te oronga anga kiaia ia Aiphiti ei ‘tutaki i tona ra nuku.’ Kare ainei e ka aru tatou i te Atua mou na te tutakianga i te au tero ki te au kavamani no te au angaanga ta ratou e rave ra no tatou? Kare te tu o te au mana akaaere o te ao nei e kare katoa te ravenga e taangaangaia ana te au tero e akakore ana i teia apainga.​—Roma 13:4-7.

33:7-9. Auraka te pupu tiaki o teia tuatau​—te toenga akatainuia​—e tona au taeake e tapupu mei te tutu anga i te tuatua meitaki o te Patireia e te akamatakite anga i te au tangata no runga i te “mate maata” e aere maira.​—Mataio 24:21.

33:10-20. Tei runga to tatou ora i to tatou anga ke anga mei te au arataa kino e te akono anga i ta te Atua e umuumu maira. E tikai, kua “tau” rai ta Iehova au arataa.

36:20, 21. No te mea kare ratou i akono ana i tei kiteaia e ratou, koia oki, ei ‘au tangata no Iehova,’ kua akaviivii te au Iseraela i te ingoa o te Atua i rotopu i te au pa enua. Auraka tatou e riro mai ei aronga akamori tutu ua no Iehova.

36:25, 37, 38. Te parataito pae vaerua ta tatou e mataora nei i teia tuatau, kua ki i “te anana tapu.” No reira, kia aruaru tatou kia vai tiama ua te reira.

38:1-23. E akapumaanaanga tikai i te kite e ka akaora a Iehova i tona iti tangata mei te tamakianga a Goga i te enua o Magoga! Ko Goga te ingoa tei orongaia ki “te ariki o teianei ao” ko Satani te Tiaporo, i muri ake i tona uriia anga mei te rangi. Te enua o Magoga, te taiku ra ki te tuanga i te enua nei, te ngai i tukunaia mai ei a Satani e tana au temoni.​—Ioane 12:31; Apokalupo 12:7-12.

‘KA AKAMOU EI TO NGAKAU I TE AU MEA KATOA TAKU E AKAARI ATU KIA KOE RA’

(Ezekiela 40:1–48:35)

Ko te 14 mataiti te tuatau, i muri ake i te takoreanga o te oire o Ierusalema. (Ezekiela 40:1) E 56 mataiti toe te vai ra rai o te tuikaanga. (Ieremia 29:10) Te vaitata nei a Ezekiela ki te 50 mataiti. I roto i tetai orama, kua apainaia atu aia ki te enua o Iseraela. Kua akakiteia aia e: ‘E te tamaiti a te tangata na, ka akara ana to mata, e akarongo oki to taringa, ka akamou ei to ngakau i te au mea katoa taku e akaari atu kia koe ra.’ (Ezekiela 40:2-4) Mei teaa tikai to Ezekiela mataora i te rauka anga tetai orama o tetai iero ou!

I roto i te iero kaka ta Ezekiela i kite atu, e 6 o te reira aua ngutupa, e 30 pia kaikaianga, e Ngai Tapu tetai, e Ngai Tapu Rava, e atarau rakau, e tetai atarau no te atinga karakaratio. Te “taʼe maira” te kauvai oiti mei te iero ra tei riro akera ei vai puke. (Ezekiela 47:1) Kua rauka katoa ia Ezekiela i tetai orama o te au  akatuanga anga o te enua o te au kopu tangata​—te oro ra te tuanga tataki tai mei te itinga ki te opunga ma tetai potonga akaaerenga i rotopu i te nga tuanga o Iuda e Beniamina. Tei roto “te are tapu o Iehova” e “te oire” tei tapaia e ko Iehova-Sama, i teia potonga ngai.​—Ezekiela 48:9, 10, 15, 35, tataanga i raro, NW.

Pauia te Au Uianga Tuatua Tapu:

40:3–​47:12​—Eaa te akatutuia ra e te iero i roto i te orama? Kare teia iero maatamaata tikai ta Ezekiela i kite atu i roto i te orama, i akatu tikaiia ana. Te akatutu ra te reira i te iero pae vaerua o te Atua​—tana akanoonooanga mei te iero rai no te akamori mou i to tatou tuatau nei. (Ezekiela 40:2; Mika 4:1; Ebera 8:2; 9:23, 24) Kua akatupuia te orama o te iero i “taua tuatau openga ra,” me akatikatikaia te taoonga taunga. (2 Timoteo 3:1; Ezekiela 44:10-16; Malaki 3:1-3) Inara, e akatupuanga openga tona i roto i te Parataito. Kua oronga mai te iero i roto i te orama i tetai taputou ki te au tuikaa ngati Iuda e ka akaoraia te akamori ma e ka tu te pamiri ngati Iuda tataki tai i tetai potonga enua.

40:3–​43:17​—Eaa te puapinga o te vaito o te iero? Te vaito anga o te iero, e akairoia e ta Iehova akakoroanga no runga i te akamori ma, e mea papu ka akatupuia.

43:2-4, 7, 9​—Eaa “te au turuma o to ratou au ariki” tei akaateaia mei te iero? I te akaraanga te taikuia ra te au turuma ki te au itoro. Kua akaviivii te au tutara o Ierusalema e tona iti tangata i te iero o te Atua ki te au itoro​—akariroanga ia ratou ei au ariki no ratou.

43:13-20​—Eaa te akatutuia ra e te atarau ta Ezekiela i kite i roto i te orama? Te atarau akatutu, ko te anoanoia o te Atua te piri atura ki te atinga oko o Iesu Karaiti. No teia akanoonooanga, kua karangaia te aronga akatainuia ei aronga tuatua tika e te “tangata maata rava” ei viivii kore e te tiama i roto i te mata o te Atua. (Apokalupo 7:9-14; Roma 5:1, 2) Ko te tumu paa te reira e kare te “āriki-vai maata akatoia” o te iero o Solomona​—tetai tapu vai maatamaata tei taangaangaia no te au taunga kia pai ki roto​—i taikuia ana i roto i te orama o te iero.​—1 Ariki 7:23-26.

44:10-16​—Koai te akatutuia ra e te pupu taunga? Te akatutu ra te pupu taunga i te pupu Kerititiano akatainuia i to tatou tuatau nei. Kua tupu to ratou tamaia anga i te 1918 i to Iehova noo anga ei “tamā e te akameitaki” i roto i tona iero pae vaerua. (Malaki 3:1-5) Ka rauka te aronga ma me kore tei tataraara i te angaanga ua atu rai i roto i ta ratou tavinianga akaperepere. I muri akera, ka angaanga pakari ratou kia kore ratou e “viivii i teianei ao,” riro mai anga i reira ei au akaraanga ki te “tangata maata rava,” tei akatutuia e te au kopu tangata e kare ratou i te taunga.​—Iakobo 1:27; Apokalupo 7:9, 10.

45:1; 47:13–​48:29​—Eaa ta “te enua” e ta te reira akatuanga anga e akatutu maira? Te akatutu maira te enua i te ngai angaanga o te iti tangata o te Atua. Noatu e teiea ngai te tangata akamori o Iehova, me akono aia i te akamori mou, ka noo ua rai te reira tangata i roto i te enua akaoraia. Te akatuanga anga o te enua, ka akatupuia tona tupuanga openga i roto i te ao ou me tu te tangata tiratiratu tataki tai i tetai potonga ngai.​—Isaia 65:17, 21.

45:7, 16​—Eaa te akatutuia ra e te atinga a te iti tangata ki te taoonga taunga e te ariki? I roto i te  iero pae vaerua, te taiku tikai ra teia ki te turuturuanga pae vaerua​—i te oronga anga i te tauturu e te akaarianga i te tu taokotaianga.

47:1-5​—Eaa te akatutuia ra e te vai o te kauvai o te orama a Ezekiela? Te akatutu maira te vai i te au akanoonooanga pae vaerua a Iehova no te oraanga, kapiti mai te atinga oko o Iesu Karaiti e te kite no te Atua tei kiteaia i roto i te Pipiria. (Ieremia 2:13; Ioane 4:7-26; Ephesia 5:25-27) Te oonu atura te kauvai i te akonoanga i te aere anga mai o te aronga ou tei ariki i te akamori mou. (Isaia 60:22) Ka tae ua te kauvai i te vai ora ririnui tikai i te tuatau o te Mareniamu, e ka kapiti mai te reira vai i tetai maramaanga akaou no roto mai i te “au pokaikai tuatua” te ka eeuia i te reira tuatau.​—Apokalupo 20:12; 22:1, 2.

47:12​—Eaa ta te au pu rakau uua e akatutu maira? Te akatutu maira te au pu rakau akairo i te au akanoonooanga pae vaerua a te Atua no te akaoraanga i te au tangata ravarai ki te turanga apa kore.

48:15-19, 30-35, tataanga i raro, NW​—Eaa te oire i roto i te orama a Ezekiela e akatutu maira? Tei roto a “Iehova-Sama” i te enua [“akaviiviiia,” NW], i te akakite mai anga e te akatutu ra te reira i tetai apinga i te enua nei. I te akaraanga te akatutu ra te oire i te akaaereanga i te enua nei te ka akapuapinga i te aronga i roto i te “enua ou” tuatua tika. (2 Petero 3:13) Te akatutu ra te nga ngutupa i nga tua roa ai i te tu ngoie ua i te tomo atu ki roto. Kia ngoie ua i te aravei atu i te au akaaere i rotopu i te iti tangata o te Atua.

Au Apiianga no Tatou:

40:14, 16, 22, 26. Te au taraianga o te au nu tamara i te ngai tomo atu anga o te iero, te akaari maira e ko te aronga tiratiratu akono tau ua te akatikaia ra i te tomo atu ki roto. (Salamo 92:12) Te apii maira teia ia tatou e ka ariki ua a Iehova i ta tatou akamorianga me tiratiratu tatou.

44:23. Mei teaa tikai to tatou rekareka no te au tauturu tei orongaia mai e te pupu taunga i teia tuatau nei! Te arataki ra “te tavini akono meitaki e te pakari” i te oronga anga i te kai pae vaerua tau te tauturu ra ia tatou i te kite i te tuke i rotopu i te mea viivii e te mea ma i roto i te mata o Iehova.​—Mataio 24:45.

47:9, 11. Te akatupu nei te kite​—tetai tuanga puapinga o te vai akatutu​—i te akaoraanga umere tikai i to tatou tuatau nei. Noatu te ngai e apiiia ra te reira, e akaora mai ana te reira i te au tangata i te pae vaerua. (Ioane 17:3) I tetai tua ra, te aronga kare e ariki i te vai e oronga maira i te ora, ka “vaioia ïa ei tai”​—ka takore tinamouia. E mea puapinga tikai kia ‘rave meitaki maata tatou i te akono meitaki i te tuatua mou ra’!​—2 Timoteo 2:15.

“E Akatapu Oki Au i Toku Ingoa Maata”

I muri ake i te akaateaia anga o te ariki openga o te uanga o Davida, kua akatika te Atua i tetai tuatau roa kia pati i mua ake i te aere anga mai o te “pu tikai” e tei iaia te tikaanga ki te taoonga ariki. Inara, kare te Atua i akakore ana i tana koreromotu kia Davida. (Ezekiela 21:27; 2 Samuela 7:11-16) Te tuatua ra te totou a Ezekiela i “toku tavini nei ko Davida,” te ka riro mai “ei tiaki” e “ei ariki.” (Ezekiela 34:23, 24; 37:22, 24, 25) Kare atu e tangata ke mari ra ko Iesu Karaiti i roto i te mana Patireia. (Apokalupo 11:15) Ka “akatapu oki [a Iehova] i [tona] ingoa maata” na roto i te Patireia o te Mesia.​—Ezekiela 36:23.

Kare e roa atu ana, ka takoreia te aronga pouroa e akakino ra i te ingoa tapu o te Atua. Inara te aronga e akapaapaa ra i te reira ingoa i roto i to ratou au oraanga na te akamorianga ia Iehova i roto i tetai tu tau, ka rauka ia ratou i te oraanga mutu kore. No reira kia taangaanga pu tikai tatou i te vai ora e tae maata ua maira i to tatou tuatau nei e kia akariro i te akamori mou e ko te mea puapinga maata i roto i to tatou oraanga.

[Tataanga Rikiriki i Raro]

[Tutu i te kapi 9]

Te iero kaka o te orama o Ezekiela

[Tutu i te kapi 10]

Eaa ta te kauvai o te ora i roto i te orama a Ezekiela e akatutu maira?

[Akameitakianga]

Pictorial Archive (Near Eastern History) Est.