Au Uianga a te Aronga Tatau

Eaa te Ariki ko Saula i ui ei kia Davida, “E tamaiti koe naai ra?” i muri ake i te ta anga a Davida ia Golia, teia e e kua pati atu a Saula ia Davida i mua atu ei tavini nona?​—1 Samuela 16:22; 17:58.

Tetai pauanga mama ua koia oki kua ngaropoina ia Saula e koai a Davida no te mea e poto ua te tuatau i to raua araveianga mua. Inara, kare teia e tano roa ana, i te mea e te akaari maira te tataanga ia 1 Samuela 16:18-23 e kua pati tikai a Saula ia Davida e kua akaperepere maata rava tikai iaia e kua maani aia iaia ei tangata apai taoonga tamaki nona. Papu e kua matau meitaki tikai a Saula ia Davida.

E akamanako ana tetai aronga apiipii Pipiria ia 1 Samuela 17:12-31 e te 17:55–​18:5 ei au tataanga tei kapitiia mai i muri roa mai no te mea kare teia au irava e kiteaia i roto i tetai au kopi tikai o te Septuagint Ereni, e urianga o te au Tuatua Tapu Ebera tei oti mai i te tataia i te rua anere mataiti M.T.N. Inara, i te akamouanga i te reira taopenga anga i runga anake ua i te tumu anga o teia au kopi o te Septuagint, kare e tano ana, i te mea e kiteaia ana teia au irava i roto i tetai atu au tataanga puapinga maata o te Tuatua Tapu Ebera. *

I te akaraanga, na te uiuianga na mua ia Abenera e oti ia Davida uaorai, kare e te inangaro ua ra a Saula i te kite i te ingoa o te metua o Davida. I te kite anga ia Davida i roto i tetai turanga ou takiri ei tangata akarongo maata e te mataku kore, koi autu ua akenei ia Golia, kua inangaro a Saula i te kite mai i te tangata tikai tei utuutu mai i te reira tamaiti. Penei te akamanako ra a Saula i te kapiti mai anga i te papa o Davida, ko Iese, me kore tetai atu o tona mema pamiri ki te vaeau, i te mea i te kite anga i te mataku kore e te tu toa i roto ia Davida penei ka kitea katoaia mai i roto ia ratou.

Noatu e te kapiti maira a 1 Samuela 17:58 i te pauanga poto ua a Davida e, “e tamaiti na to tavini ra na Iese i Betelehema ra,” ko tei aru maira i muri akera te akakite maira e penei e maata atu tei tuatuaia i roto i taua pukapukaanga. No runga i teia manako, e akara ana i te au tuatua a C. F. Keil raua ko F. Delitzsch: “Te taka meitaki ua ra mei te tataanga i roto ia [1 Samuela 18:1], “e kia akaoti akera aia i taua tuatua anga kia Saula ra,” e kua pukapuka ua atu rai a Saula kiaia no runga i te turanga o tona pamiri, i te mea e te akakite maira te reira au tuatua tikai i tetai pukapukaanga roa.”

Mei teia au mea katoatoa, ka rauka ia tatou i te taopenga e na roto i tana uianga e, “E tamaiti koe naai ra?” kare e te inangaro ra a Saula i te kite mai e koai a Davida, no te mea kua kite ke ana aia, mari ra te inangaro ra aia i te kite i te tupuanga o Davida.

[Tataanga Rikiriki i Raro]

[Tutu i te kapi 31]

Eaa a Saula i ui ei kia Davida e e tamaiti aia naai?