E Rua “Tupuanga Umere Tikai” i Tetai Uruoaanga i Tiotia
E Rua “Tupuanga Umere Tikai” i Tetai Uruoaanga i Tiotia
KUA TUPU tetai tupuanga kare roa e ngaropoinaia, tei akairoia e nga “tupuanga umere tikai” e rua, i roto i te enua o Tiotia i te 2006. E toru ra, Tiurai 7 ki te 9, kua raveia te Uruoaanga Tapere “Te Vaitata Maira te Akaora Anga!” a te Au Kite o Iehova i roto i te au ngai e ono i te enua katoa. Ko tetai kaikaianga pae vaerua te reira tei mataoraia e tetai 17,000 tangata e tere atu.
I roto ia Tianuare 2006, kua akamata te au tautaanga kia kimi i tetai ngai tau no te akaputuanga o te au tauatini i roto i te oire tikai ka raveia ai te uruoaanga, ko Tbilisi, te oire maata o Tiotia. Ka kapitiia mai tetai atu au ngai uruoaanga na runga i te terepaoni.
Kua oronga marie uaia mai te tu rangatira no te akamorianga i Tiotia i roto i te au mataiti aere i topa. No reira, noatu te patoianga totoa i te tuatau i topa, kua tere marie ua te Au Kite ki mua, ma te irinaki papu e ka kitea mai tetai ngai uruoaanga i roto i te oire maata. E aronga maru ua e te maoraora katoa te iti tangata o Tiotia. Inara, tetai aronga maata, e pakari to ratou tu papakitai ki te akonoanga. Ka autu atu ainei ratou i to ratou au manako ngakau e ka akatika mai i te Au Kite kia tutaki i tetai ngai?
Kua atoro atu te au taeake i runga i te Kumiti Uruoaanga i te au taitiamu aere e te au ngai tarekarekaanga maata. Kua taputou mai te au manitia i to ratou au ngai inara kare i akatika mai ana i te patiia atu anga no te ra tikai o te tarauanga. Kua poitirere te kumiti, i reira, i te akatika mai anga te akaaerenga no te Philharmonic o Tbilisi i to ratou ngai ki te Au Kite o Iehova kia tarau. Tei rotopu tikai te ngai tamataoraanga i te oire maata, te ngai e raveia ana te manganui o te au tarekarekaanga maata.
Akamaroiroiia e kua puapinga iora ta ratou au tautaanga, kua akamata te kumiti i te parani i te uruoaanga i Tbilisi, e te au uruoaanga aere i roto i te au taoni e te au oire maata i roto katoa i te enua, kapiti mai ia Tsknori, Kutaisi, Zugdidi,
Kaspi, e Gori. E maata te angaanga tei raveia kia kapitiia mai teia au ngai uruoaanga pouroa na runga i te terepaoni kia akarongo te katoatoa i te porokaramu. Kua papa te au mea katoatoa. Inara, ma te poitirere, e tai epetoma i mua ua ake ka akamata ai te uruoaanga, kua tipu te aronga akaaere o te ngai tarekarekaanga o Philharmonic i Tbilisi i te koreromotu. Kare e tumu i orongaia mai ana.Te Tupuanga Umere” Mua
Eaa ta te au taeake ka rave i teia ora openga tikai? Te ravenga ua kia ratou koia oki kia aere atu ki Marneuli, tetai oire tangata pama e 40 kiro mita i vao mai ia Tbilisi. E manganui te au uruoaanga e raveia ana i runga i te potonga enua o tetai pamiri e e Au Kite ratou no Iehova. E aka ngai one kai te reira i te taime mua. E tai ngauru mataiti i teianei, ko te ngai ua te reira e rauka ana te au putuputuanga i Tbilisi i te taangaanga no te au uruoaanga. Inara, ko Marneuli katoa te ngai e kite mai ana te Au Kite o Iehova i te au takinokinoanga akapupuanga kino pakari.
Kua tupu tetai o teia au tupuanga ia Tepetema 16, 2000. Kua akanoo aere te akava o te oire maata o Marneuli i te au arairaianga kia tapu i te Au Kite mei te itae anga i te ngai o te uruoaanga. E oti kua aere mai tetai pupu aronga ta i runga i te au bus tei aratakiia e te orometua Otototi akapaeia ko Vasili Mkalavishvili. Kua tapu ratou i te au motoka e te au bus e aere ra ki te uruoaanga i Marneuli, kua kika atu i te au tereketi e manganui mei te au apinga akaoro, e kua taia meitakiia tikai ratou, e tetai atu aronga, kua keiaia ta ratou au apinga, kapiti mai ta ratou au Pipiria e te au puka Pipiria.
Kua takino katoaia te ngai uruoaanga i Marneuli e tetai akapupuanga e 60 tangata. Mei tetai 40 Kite tei takinoia. Kua patiaia tetai taeake i runga i te umauma ki te matipi. Te akaariari ra tetai aronga takinokino i te au pupui mamaata, ta ratou i pupui makitakita ua i roto i te mareva. Kua tou atu tetai ia ratou i tetai pupui ki te ona o te ngai e kua maro atu i tana moni e te au apinga akamanea. Kua eru te pupu tangata i tona are, i tetai tua mai o te potonga enua, e kua keia i tana au mea puapinga maata. I muri ake i te vavai anga i te au maramarama katoatoa i roto i te are, kua tutungi ratou i te au puka Pipiria e te au nooanga tei maaniia tikai no te uruoaanga. E tai e te apa tane puka tei tutungiia. Kare i tapu ana i te kino, kua piri atu te au akava i reira i roto i te angaanga kino tei raveia ki te Au Kite. *
Kare e te aro atura ua te Kumiti Uruoaanga i te kino ka tupu mai mari katoa i te akaaoanga i te akanooanga e 5,000 tangata i roto i tetai ngai e akanoo ua ana mei tetai 2,500 tangata. Akapeea teia manamanata i te akonoia anga i roto i tetai tuatau poto ua? Mei te temeio rai i te akaraanga, i te aere anga mai te nga ona o te nga potonga enua e rua i te pae mai e kua oronga mai i to raua aua one kai kia tarauia.
E aka angaanga tikai i te tauianga i te nga potonga enua ei ngai meitaki no te uruoaanga. Kua akatupu katoa te reva i te au turanga kino pakari—kua ua ana i te epetoma katoa i mua ake i te uruoaanga. Te potonga enua o te nga tangata i te pae mai kua tanuia ki te pitete, e kua anoanoia kia kokotiia. I te mea mua, kua akaputu mai te aronga tauturu i roto i te ua kia keri i te au pitete. E oti kua akaateaia te au aua e kua akatuia te au rakau ei tapokianga kia paruru i te au tangata mei te ra e te ua. Kua anoanoia kia maani akaouia tetai au nooanga rakau, e kua tukuna akaouia mai tetai apinga akatangi anga. Te keke anga, te patiatia anga, e te viri anga, kua angaanga te aronga tauturu i te ao e te po, tetai pae kare i moe ana.
“Akapeea me ka ua ua atu rai i te taime o te uruoaanga?” te manako ra te katoatoa. “Ka nanako ainei te au tereketi i roto i te vari?” Kua okonaia mai te matie maro ei tapoki i te one mau. I te openga iora, kua iti mai te ra! I te toru ra katoa o te uruoaanga, kua iti mai te ra manea, e te maanaana ki runga i te one.
I te tae anga mai te au tereketi, kua kite atu ratou i tetai ngai manea tikai. Mei te mea rai e te akatutu maira te akanoonooanga ponuiaau i tetai akaraanga poto ua o te ao ou. I te noo meitaki ua anga, kua koropiniia te au tereketi e te au tumu rakau tuke ra e tetai atu au tumu ua rakau e te one titona e te one tomati. Te paata i mua, kua akamaneaia a muri ki te au vine. Tetai taime i te tuatau o te porokaramu, ka rongo atu te au tangata i te toa moa e kakao ra e te au ua moa e maniania ra i ta ratou au uamoa e koikoiia ra. Te vai atura tetai atu au tangi anga matauia i te reira ngai, inara ki te aronga tei aere mai, e au mea tamataoraanga katakata ua te reira. Kare ratou i manamanata ana i te reira, kare takiri te au tangata i akamanako atu ana i te reira, no te mea te tauta pakari ra ratou i te akarongo atu ki te porokaramu meitaki rava tei akatumuia ki runga i te Pipiria. Inara, kare e ko te tuatau ua rai teia o te uruoaanga tei kare i ngaropoinaia.
Te Rua o te “Tupuanga Umere”
I te openga o te tuanga i te popongi Varaire, kua poitirere te au tereketi i te akakite anga mai tetai mema o te Pupu Akaaere no te Au Kite o Iehova, ko Geoffrey Jackson, i te tukuna mai anga i te katoaanga o te New World Translation * Kua ki te mata o te manganui i te roimata, e kua poitirere tikai ratou i te reira. Kua mataora tetai pamiri i te akakiteanga mai e: “Kare e rauka ia matou i te akamutu i te akakiteanga i to matou rekareka maata no teia temeio—ta Iehova temeio. E aka angaanga tikai tei raveia i roto i tetai tuatau poto ua!”
of the Holy Scriptures i roto i te reo Tiotia.Kua karanga mai tetai tuaine mei te taoni o Tsalendjikha, tei akarongo atu i te porokaramu na runga i te terepaoni e: “Kare e rauka iaku i te akataka atu i roto i te au tuatua i te rekareka taku i kite mai i te rauka anga ia tatou i te Pipiria katoa. Te inangaro nei au i te akameitaki atu ia kotou no teia uruoaanga takake rava e toru ra. E tupuanga puapinga rava tikai teia i roto i te tuatua enua.” Kua karanga mai tetai pamiri i roto i tetai putuputuanga i te tua opunga o Tiotia, te tiroa ra i te Tai Kerekere e: “Tae mai ki teia tuatau, e tai ua a matou Pipiria i roto i to matou pamiri, inara i teianei kua tu pouroa matou toko a i ta matou uaorai kopi o te New World Translation. I teianei ka rauka ia matou tataki tai i te apii uaorai i te Pipiria.”
Inara, tei kitea koreia e te katoatoa, kare te au apinga katoatoa i aere maru ua ana. Ei akatauanga, noatu e kua neneiia e kua tukuna vaveia atu te katoaanga o te New World Translation ki Tiotia no te uruoaanga, kare te aronga maata o te Tipatimani o te Custom i akatika ana i te reira au puka kia aere mai ki Tiotia. Kua aravei atu te au taeake i te Opati o te Ombudsman. Kua rauka te ombudsman i te tikaanga no te au Pipiria kia tukunaia mai i mua ua ake i raveia ai te uruoaanga tapere. Kua tono katoa atu aia i tona tauturu ki te uruoaanga i Marneuli kia tiki i tetai au kopi o te Pipiria ou no to ratou opati.
Turou Anga Maanaana, te Tu o to Tiotia
E tumu ke atu tetai i riro mai ei te uruoaanga tapere i Marneuli ei tupuanga puapinga maata tikai no te Au Kite o Iehova i Tiotia. Tei runga tetai mema o te Pupu Akaaere no te Au Kite o Iehova i te porokaramu. Kua rekareka tikai te katoatoa tei tae mai e kua inangaro ratou uaorai i te turou atu iaia na roto i ta ratou peu akonoanga maanaana. Kua roa te taeake ko Jackson i te tu ua anga, i mua ake e i muri ake i te uruoaanga, i te araveianga i te au taeake e te au tuaine, inara kua mataora aia i te raveanga i te reira.
I te 1903 i te openga o tetai uruoaanga, kua karanga tetai taeake e: “Kare roa au e apai e tai tauatini tara no te meitaki taku i rauka mai mei teia uruoaanga, e e tangata putaua nei au.” E anere mataiti e tere atu i muri mai, ko te manako tikai te reira o te Au Kite tei aere atu ki te au uruoaanga puapinga tei raveia i roto i te tuatau maana o te 2006 i roto i te enua o Tiotia.
[Au Tataanga Rikiriki i Raro]
^ para. 10 No tetai atu akakiteanga no runga i te takinga kino anga o te Au Kite o Iehova i Tiotia, e akara i te Tianuare 22, 2002, itiu o te Awake! kapi 18-24.
^ para. 16 Kua tukunaia mai te New World Translation of the Christian Greek Scriptures i roto i te reo Tiotia i te 2003.
[Pia i te kapi 19]
Kua Tupu “Te Mea Ngiti Okotai”
Kua tupu tikai te au tuatua a Isaia 60:22 i Tiotia: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.” I raro ua mai i te 20 mataiti, kua tupu te numero o te au papuritia no te Patireia i Tiotia mei raro ua mai i te 100 ki tetai 16,000 aere. Te akono nei teia au orometua maroiroi o te Tuatua a te Atua e vaitata atu ki te 8,000 au apii Pipiria i te kainga i te au epetoma tataki tai—tetai manakonakoanga manea rava no tetai tupuanga akaou i Tiotia.
[Tutu/Au Mapu i te kapi 16]
(No runga i teia, akara i te puka)
AU PATIREIA RUTIA
TIOTIA
⇨Zugdidi
⇨Kutaisi
Marneuli ⇨ Gori
⇨Kaspi
⇨Tsnori
TBILISI
TUREKI
AMENIA
ATIPATIANI
[Akameitakianga]
Globe: Based on NASA/Visible Earth imagery
[Tutu i te kapi 16]
Te tiki i Tbilisi
[Au Tutu i te kapi 17]
Kua kapitiia mai te ngai e rima ki te uruoaanga i Marneuli na runga i te au terepaoni “mobile”
[Au Tutu i te kapi 18]
Kua poitirere rekareka tikai te au tereketi i te tukunaia mai anga i te katoaanga o te “New World Translation” i roto i te reo Tiotia