Tei Runga Ainei te Mata o te Atua ia Koe?

TE KITE maira ainei a Iehova, te Pu Maata Tei Anga mai? Ae te kite maira aia! Te akataka tika ua maira te Pipiria e: “Kare ainei tei anga i te mata nei e akara?” (Salamo 94:9) E ririnui rava atu to Iehova mata kia akara i to te tangata. Kare anake ua aia e kite maira ia vao i to tatou tu, koia katoa ra “tei timata i te ngakau,” e ka rauka katoa iaia i te ‘kimi matatio i te ngakau.’ (Maseli 17:3; 21:2) Ae, ka kite aia e mei teaa tikai te tu o to tatou aerenga manako, akakeuanga, e te oonuanga o to tatou au anoano.

Te kite maira a Iehova i te au tu ngata ta tatou ka kite i roto i te oraanga, e ka ariu mai aia ki ta tatou au patianga. Kua tata te tata taramo e: “Tei te aronga tuatua-tika ra to Iehova mata, e tei ta ratou kapiki tona taringa. Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:15, 18) E pumaana tikai kia kite e te marama ua maira a Iehova i to tatou au turanga e ka ariu mai aia ki ta tatou au pure ngakau tae!

Te kite maira te Atua ko Iehova i te au angaanga muna tei raveia i roto i te poiri. Ae, “te vai ua nei ra te au mea katoa ma te maeu rava ki mua i tona mata, tei iaia te tuatua ia tatou nei.” (Ebera 4:13) No reira noatu e meitaki me e kino ta tatou au angaanga, te kite pouroaia maira te reira e te Atua. (Maseli 15:3) Ei akaraanga, te akakite maira a Genese 6:8, 9 e “karekā Noa, i kite aroaia mai aia e Iehova ra” e kua “aaere a Noa raua ko te Atua.” Ae, kua rauka ia Noa ta Iehova akaperepereanga e te akameitakianga no te mea kua akarongo e kua akono marie aia i ta te Atua au kaveinga tuatua tika. (Genese 6:22) I tetai tua, e kino tikai te tangata i to Noa tuatau e te viivii. Kare te Atua i te kite kore i teia turanga. ‘E kite akerā aia, e kino maata to te tangata i te enua nei, e kua kino anake te au manako katoa, e te akakoroanga katoa o to ratou ngakau i te au rā katoa ra.’ I te openga, kua akapou takiri akera a Iehova i te aronga kino e kua akaora ra ia Noa e tona pamiri.​—Genese 6:5; 7:23.

Ka akara aroa mai ainei a Iehova ia koe? E tika rava e, ko nga mata o Iehova ‘te akara nei ia e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.’ (2 Paraleipomeno 16:9) Kare e roa atu ka akapou akaou aia i te aronga kino i te enua nei e ka akaora i te aronga tei akaaka te ngakau.​—Salamo 37:10, 11