Turanga Pae Vaerua Mou Tikai—Akapeea e Rauka ai ia Koe te Reira?
Turanga Pae Vaerua Mou Tikai—Akapeea e Rauka ai ia Koe te Reira?
“KO TE manako i to te kopapa ra e mate ia; ko te manako ra i te au mea pae vaerua ra e ora ia e te au,” i tata ai te apotetoro ko Paulo. (Roma 8:6, King James Version) Na roto i taua au tuatua ra, te akakite maira te apotetoro e ko te riro ei tangata akono i ta te vaerua, e maata atu te o maira ki taau uaorai e inangaro ra me kore ki taau uaorai e manako ra. E turanga tikai teia no te ora e te mate. Na teea tu ra e rauka ai te ‘ora e te au’ i te tangata akono i ta te vaerua? Kia tau ki ta te Pipiria, te mareka ua nei taua tangata ra i te au i teianei—kiaia uaorai e ki te Atua—e ka akameitakiia aia ki te ora mutu kore i te tuatau ki mua. (Roma 6:23; Philipi 4:7) No reira a Iesu i karanga ai e: “E mataora to te aronga tei manako i to ratou anoano i te pae vaerua”!—Mataio 5:3, NW.
I te mea e te tatau ra koe i teia makatini te akaari maira te reira e te inangaro ra koe i te turanga pae vaerua—e e tu pakari oki te reira. Inara e maata te au manako tuke tuke no runga i teia tumu manako, no reira penei ka akamanako koe e: ‘Eaa ra te turanga pae vaerua mou tikai? E ka akapeea ra tetai e rauka ai iaia te reira?’
“Te Manako o Karaiti”
Kapiti atu ki te akakite anga mai i te puapinga e te au akameitakianga no te manako i te au mea pae vaerua, e maata rai te tuatua a te apotetoro ko Paulo no runga i te turanga pae vaerua mou tikai e, eaa tikai te reira. Ki te au Kerititiano i te oire taito o Korinetia, kua akamarama atu a Paulo i te tuke i rotopu i te tangata akono i ta te kopapa, koia oki, e tangata tei aru i te au anoano o te kopapa, e te tangata akono i ta te vaerua, e tangata akaperepere oki aia i te au mea pae vaerua. Kua tata a Paulo e: “Kare te tangata tei akono i ta te kopapa e ariki i te au mea o te vaerua o te Atua, no te mea e neneva ua ia kiaia.” I tetai tua, kua akamarama mai a Paulo e ko te tangata akono i ta te vaerua ka karangaia e kua rauka iaia “te manako o Karaiti.”—1 Korinetia 2:14-16, NW.
Te aiteanga tikai o te rauka anga “te manako o Karaiti” koia oki kia “tau i te anoano o te Mesia ra o Iesu.” (Roma 15:5; Philipi 2:5) Tera te aiteanga, ko te tangata tei akono i ta te vaerua e tangata aia tei aite tona aerenga manako mei to Iesu e tei aru i Tona takainga vaevae. (1 Petero 2:21; 4:1) Ko te maata atu i te manako o tetai tangata i te aite mei to Karaiti rai, ko te matutu roa atu ia tona turanga pae vaerua e ko te vaitata atu ia te rauka anga mai iaia te ‘ora e te au.’—Roma 13:14.
Akapeea e Rauka ai kia Kite i “te Manako o Karaiti”
Inara e rauka ai te manako o Karaiti, ka anoanoia tetai kia kite i tona aerenga manako na mua. No reira, ko te takainga mua i roto i te akatupu anga i te turanga pae vaerua koia oki kia rauka te kite i to Iesu aerenga manako. Inara ka akapeea koe e kite ei i te aerenga manako o tetai tangata tei noo ana i te enua nei e 2,000 mataiti i topa akenei? Ei akaraanga, i akapeea ra koe i kite ei no runga i te au tangata i roto i te tuatua enua o toou enua? Kare e kore e na roto i te tatau anga no runga ia ratou. Mei te reira rai te tatau anga i te tuatua enua tei tataia no runga ia Iesu, ko tetai mataara puapinga tera e rauka ai te kite i te manako o Karaiti.—Ioane 17:3.
No runga ia Iesu, e a au papaanga tuatua enua taka meitaki ua e vai ra—te au Evangeria, tei tataia e Mataio, Mareko, Luka, e Ioane. Na te tatau meitaki anga i teia au papaanga, ka tauturuia koe kia kite i to Iesu aerenga manako, i te oonuanga o tona manako ngakau, e te akakeuanga i muri i tana au angaanga i rave. Me akapou koe i tetai taime i te akamanakonako anga i taau i tatau ei no runga ia Iesu, ka marama koe i reira e mei teaa tikai tona tu. Noatu kua manako ke ana koe ia koe ei pipi na Karaiti, ka tauturu ra taua tatau anga e te akamanakonako anga ia koe “kia tupu [“ua atu,” NW ] ra te aroa ua ia kotou, e te kite i to tatou Atu ra, i te Ora, ia Iesu Mesia.”—2 Petero 3:18.
Ma te akamanako anga i te reira, ka akara marie ana tatou i tetai au irava i roto i te au Evangeria kia kite e eaa te mea i riro ei a Iesu ei tangata akono i ta te vaerua. E oti, ka ui ei kia koe uaorai e ka akapeea ra e rauka ai ia koe i te aru i te akaraanga tana i akanoo.—Turanga Pae Vaerua e “ta te Vaerua e Akatupu”
Kua akakite te tata Evangeria ko Luka e kua riringiia mai te vaerua tapu o te Atua ki rungao ia Iesu i tona papetitoanga e kua ‘ki iora Iesu i te Vaerua Tapu.’ (Luka 3:21, 22; 4:1) I reira, kua akamarama meitaki a Iesu ki tana au pipi i te puapinga kia riro na te vaerua tapu me kore te “mana ririnui” o te Atua e arataki ia ratou. (Genese1:2, NW; Luka 11:9-13) Eaa ra te reira i riro ei ei mea puapinga? No te mea e mana to te vaerua tapu o te Atua i te akatuke i te aerenga manako o tetai tangata, kia aite ki te manako o Karaiti. (Roma 12:1, 2) Ka akatupu te vaerua tapu ki roto i te tangata i te au tu mei te “inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki.” Ko teia au tu—ko ta te Pipiria ia e kapiki ra e ko “ta te Vaerua e akatupu” —ko te tu tikai teia o te tangata tei akono i ta te vaerua. (Galatia 5:22, 23) Tera oki i reira, ko te tangata tei akono i ta te vaerua te aratakiia ra aia e te vaerua o te Atua.
I roto i tana angaanga orometua kua akatutu mai a Iesu i ta te vaerua e akatupu. Kua kite pu uaia te au tu mei te aroa, te takinga meitaki, e te meitaki i roto i tona tu ki te aronga tei manakoia e ei au mema akaaka roa o te taiate tangata. (Mataio 9:36) Ka akara ana ra ei akatauanga, i tetai mea tei tupu ta te apotetoro ko Ioane i akakite mai. Ka tatau tatou: “E te aere ua ra [Iesu] ra, kite atura aia i tetai tangata matapo mei te anau anga mai.” Kua kite katoa te au pipi a Iesu i taua tangata ra kareka ra i to ratou manako, e tangata ara ua aia. “Naai te ara,” i ui atura ratou, “nana uaorai aina e na nga metua ainei?” Kua kite katoa te au tangata tupu o taua tangata ra iaia, kareka kia ratou pouroa e tangata patipati ua teia. “Kare ainei teia te tangata i noo ua ma te pati i te apinga ra?” i na ratou ei. Kareka ra a Iesu, kua kite atu aia i taua matapo ra ei tangata tei anoano i tetai tauturu. Kua tuatua atu aia ki taua tangata matapo ra e kua akaora atura iaia.—Ioane 9:1-8.
Eaa ta teia tu e akakite maira kia tatou no runga i to Karaiti manako? Te mea mua, kare a Iesu i kopae ana i te aronga akaaka mari ra kua akono aia ia ratou ma te ngakau aroa. Te rua, kua aere ua aia kua tauturu i etai ke. Te kite ra ainei koe ia koe uaorai e aru ra i teia akaraanga ta Iesu i akanoo? Te kite ra ainei koe i te tangata mei ta Iesu rai i kite, te oronga i te tauturu ta ratou e anoano ra ei akameitaki atu i to ratou oraanga e ei oronga i tetai manakonakoanga no to ratou oraanga i te tuatau ki mua? Me te inangaro ua ra koe i te aronga papanunui e te kopae ra i te aronga kare mei te reira? Me ko te tu mua, te aru meitaki ra koe i reira i ta Iesu akaraanga.—Salamo 72:12-14.
Turanga Pae Vaerua e te Pure
Te akaari maira te au papaanga a te au Evangeria e e pure putuputu ua ana a Iesu ki te Atua. (Mareko 1:35; Luka 5:16; 22:41) I te tuatau i tana angaanga orometua i te enua nei, e akataka tika ua ana a Iesu i tetai tuatau no te pure. Kua tata te pipi ko Mataio e: “E oti akera taua aronga maata ra i te tukuia e ia, aere atura [Iesu], koia anake ra, ki runga i tetai maunga e pure.” (Mataio 14:23) I taua au atianga ra e komunikeiti ana aia koia anake ua ki tona Metua i te rangi, e rauka mai ana to Iesu maroiroi. (Mataio 26:36-44) I teia tuatau, ka kimi ua rai te aronga e akaari ra i te turanga pae vaerua mou tikai i tetai au atianga kia rauka i te komunikeiti atu ki te Atua, no te mea kua kite ratou e ka riro teia ei akamatutu i to ratou pirianga ki Tei Anga mai ia ratou e te ka tauturu ia ratou kia aite te tu aerenga manako mei to Karaiti rai.
E akapou putuputu ana a Iesu i tetai au tuatau roa i te pure. (Ioane 17:1-26) Ei akatauanga, i mua ake ka iki ei aia i te au tangata 12 te ka riro mai ei au apotetoro nana, kua ‘aere a Iesu ki runga i tetai maunga e pure, e ao ua iora te po iaia i te pure anga ki te Atua.’ (Luka 6:12) Noatu kare tikai e akapou ana i te po katoa i te pure, ko te aronga ra e manako ra i te au mea pae vaerua, ka aru ratou i te akaraanga a Iesu. I mua ake ka rave ei i tetai au ikianga maata i roto i te oraanga, e maata te taime e akapou ana ratou i te pure ki te Atua, i te pati i te aratakianga a te vaerua tapu i te rave anga i te au ikianga te ka akameitaki roa atu i to ratou turanga pae vaerua.
I roto i tana au pure, e akaari katoa ana a Iesu i te oonuanga o tona manako ngakau te ka tau kia aru tatou i roto i ta tatou au pure. Akara ana ra i ta Luka i rekoti no runga i te mataara i pure ei a Iesu i te aiai i mua ake ka mate ei aia. “E no te mea te maata ua ra tona mamae aue, viviki rava atura tana pure: e mei te toto kurukuruatu ra tona ou i te topa anga ki raro i te one.” (Luka 22:44) Kua pure akatenga ana a Iesu i mua ana, kareka ra i teia atianga, no te aro atura i te timataanga pakari roa atu o tona oraanga i te enua nei, kua pure “viviki rava atura” aia—e kua pauia mai tana pure. (Ebera 5:7) Ko te aronga tei manako i te au mea pae vaerua, ka aru ratou i te akaraanga a Iesu. Me aro atu i te au timataanga pakari tikai, ka pure “viviki rava atura” ratou ki te Atua no te vaerua tapu, te aratakianga, e te turuturuanga.
No te mea te taka ua ra e e pure putuputu ua ana a Iesu, kare i reira i te mea poitirere e kua inangaro rai tana au pipi i te aru iaia i roto i teia tu. No reira, kua pati ratou kiaia e: “E te Atu, e apii mai ia matou nei i te pure.” (Luka 11:1) Mei te reira rai i teia tuatau te aronga tei akaperepere i te au mea pae vaerua e tei inangaro kia aratakiia e te vaerua tapu o te Atua, e aru ana ratou i te akaraanga a Iesu na roto i te mataara e pure ana ratou ki te Atua. E pirianga vaitata tikai to te turanga pae vaerua ki te pure.
Turanga Pae Vaerua e te Tutu Anga i te Tuatua Meitaki
I roto i te Evangeria a Mareko, ka kite tatou i tetai papaanga no te akaora anga a Iesu i te au tangata maki e manganui, te rave anga i te reira e tae ua atu ki te roa anga po. I te popongi roa i terao mai ra iaia e pure ra koia anake ua, kua aere maira tana au apotetoro e kua akakite maira kiaia e e maata te tangata e kimi ra iaia, penei te inangaro ra kia akaoraia. Inara kua akakite atu a Iesu kia ratou e: “Ka taki aere tatou i te au oire i vaitata nei, kia apii katoa atu au i to reira.” I reira kua akamarama atura a Iesu kia ratou e eaa te tumu: “Ko toku ïa tere i aere mai ei au nei.” (Mareko 1:32-38; Luka 4:43) Noatu e mea puapinga kia Iesu kia akaoraia te tangata, inara ko te tutu aere anga i te tuatua meitaki o te Patireia o te Atua ta Iesu angaanga maata.—Mareko 1:14, 15.
Teia tuatau, ko te akakite anga rai ki etai ke i te Patireia o te Atua tetai akairo tei akataka mai i te aronga tei rauka ia ratou te manako o Karaiti. Ki te katoatoa rava tei inangaro kia riro ei au pipi nana, kua oronga mai a Iesu i te akauenga: “E teianei, ka aere kotou, e akariro i to te pa enua katoa ei pipi, . . . Ma te apii atu ia ratou, kia akono i te au mea katoa taku i akaue atu kia kotou.” Mataio 28:19, 20) Kapiti atu, kua totou a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) I te mea te akaari maira te Tuatua a te Atua e na te mana o te vaerua tapu e akatupu nei i te angaanga tutu aere anga, ko te piri maroiroi anga ki roto i taua angaanga ra tetai akairo o te turanga pae vaerua mou tikai.—Angaanga 1:8.
(I te tutu aere anga i te karere o te Patireia ki te tangata takapini i teia ao, ka anoanoia te au tautaanga taokotai a te au mirioni ua atu au tangata. (Ioane 17:20, 21) Te aronga e piri nei ki roto i teia angaanga ka anoanoia kia manako i te au mea pae vaerua e kia akaaere meitaki katoaia i te ao katoa. Ka rauka ainei ia koe i te akataka mai i te aronga e aru ra i te takainga vaevae o Karaiti e te tutu aere ra i te tuatua meitaki o te Patireia takapini i teianei ao?
Te Rave ra Ainei Koe i tei Umuumuia Mai?
E tika, e au tu ke atu tetai tei akataka mai i te tangata tei akono mou tikai i ta te vaerua, inara te rave ra ainei koe i te au mea tei oti i te akamanakoia? Kia kite ei, e ui kia koe uaorai e: ‘Te tatau putuputu ua ra ainei au i te Tuatua a te Atua, i te Pipiria, ma te akamanako i taku e tatau ra? Te akaari maira ainei au i ta te vaerua e akatupu ra i roto i toku oraanga? E tangata me kore e vaine pure putuputu ua ainei au? Te inangaro ra ainei au i te kapiti atu ki te iti tangata e tutu aere nei i te tuatua meitaki o te Patireia o te Atua i te ao katoa nei?’
Ka riro te tirotiro matatio anga ia koe uaorai i te tauturu ia koe i te akapapu tikai i te oonuanga o toou turanga pae vaerua. Te raurau atu nei matou ia koe kia apai i te au takainga tau i teianei kia rauka ia koe te ‘ora e te au.’—Roma 8:6; Mataio 7:13, 14; 2 Petero 1:5-11.
[Pia/Tutu i te kapi 7]
AU AKAIRO O TE TURANGA PAE VAERUA
◆ Inangaro i te Tuatua a te Atua
◆ Akaari i ta te vaerua e akatupu
◆ Pure putuputu ua rai ma te ngakau tae ki te Atua
◆ Akakitekite aere i te tuatua meitaki o te Patireia ki etai ke
[Tutu i te kapi 5]
Na te Pipiria e tauturu ia koe kia kite i “te manako o Karaiti”