‘E Iehova, e Timata mai Koe Iaku’
‘E Iehova, e Timata mai Koe Iaku’
“KO IEHOVA ra tei timata i te ngakau.” (Maseli 17:3) Tikaanga ka akamaroiroi maata tikai tera ia tatou katoatoa. No teaa ra? No te mea kare mei te tangata rai i te akava ua i ta te mata e akara ra, kareka to tatou Metua i te rangi e “akara ïa i te ngakau.”—1 Samuela 16:7.
E tika rai e, kare katoa tatou e tau ei au akava i to tatou uaorai au akakoroanga e te au manako ngakau oonu. No teaa ra? No te mea e “pikikaa maata to te ngakau i te au mea katoa nei, e kua kino takiri: koai te kite?” Inara, kua kite ua te Atua i te reira no te mea te akakite ra aia e: “Ko au ko Iehova, tei kimi matatio i te ngakau, tei timata i te manako.” (Ieremia 17:9, 10) Ae, te marama ua ra a Iehova i “te ngakau”—kapiti mai i to tatou au akakoroanga tikai—pera katoa “te manako,” koia oki te oonuanga o to tatou manako e te ngakau.
Eaa ra ka Timataia Ai?
No reira rai te Ariki ko Davida i taito i tuatua ai ki te Atua e: “E unuunumou mai koe iaku, e timata mai, e Iehova; e akamakitoro marie mai koe i toku manako e toku ngakau.” (Salamo 26:2) E tu tiama takiri ainei to Davida i roto i tana e rave ra e tana e tuatua ra, no reira me timata mai a Iehova iaia kare ana apinga e mataku? Kare! Mei ia tatou rai a Davida, e apa ua e kare roa e taeria iaia to te Atua au turanga apa kore. No tona au tu paruparu ua, e maata rai ta Davida au tarevake kino i rave, noatu ra kua ‘aere aia, ma te akono meitaki o te ngakau.’ (1 Ariki 9:4) I akapeea ra? Na te ariki anga i te ako e te akatika anga i tona au arataa. Kua akaari aia e e aroa mou tikai tona ia Iehova. Kare e mea toe i tona inangaro i te Atua.
Peea tatou i teia tuatau? Kua kite a Iehova e e aronga apa ua tatou e ka ara rai i roto i ta tatou tuatuaanga e ta tatou ka rave. Kare ra aia e tuku mai i te kaveinga no to tatou oraanga na te taangaanga anga i tona kite no runga i to tatou tuatau ki mua. Kua anga aia ia tatou ei au rima rave rangatira, e te akangateitei maira aia i to tatou tikaanga rangatira kia iki—e apinga aroa tei oronga aroa ua mai aia na tatou.
Noatu ra, i tetai au taime e timata mai ana rai a Iehova i te tu o to tatou ngakau tei kapiti mai i to tatou au akakoroanga tikai. Penei ka rave aia i teia na te akatika anga i tetai au tuatau no tatou kia akaari mai i te turanga o to tatou ngakau. Penei ka akatika katoa aia i tetai au turanga tuke tuke me kore i tetai au akaaoanga kia akaari mai i te oonuanga tikai o to tatou aerenga manako. Na teia e oronga mai i te tuatau no tatou kia akaari kia Iehova e mei teaa tikai te pakari o to tatou inangaro e te tu tiratiratu. Penei na taua au timataanga ra ta Iehova i akatika e akapapu i te tu tikai o to tatou akarongo e, me te ‘meitaki rava ra, ma te apa kore, auraka e ape toe.’—Iakobo 1:2-4.
Timataanga Taito o te Akarongo
Kare te timataanga o te akarongo e te akakoroanga i te mea ou ki to Iehova au tavini. Ka akamanako ana i te pateriareka ko Aberahama. “Kua timata te Atua ia Aberahama.” (Genese 22:1) I te tuatua angaia taua au tuatua ra, kua timata ke ia atu ana to Aberahama akarongo i roto i te Atua. I te au mataiti i mua atu, kua pati a Iehova ia Aberahama kia aere e apai i tona pamiri mei te oire taurekareka o Ura ki tetai enua kare ratou i kite. (Genese 11:31; Angaanga 7:2-4) Ko Aberahama, penei kua tu ana i tona uaorai kainga i Ura, kare ra aia i oko ana i tetai kainga tinamou i Kanaana, te ngai i noo ei aia no tetai au rau ngauru mataiti. (Ebera 11:9) Kua riro to Aberahama turanga tuitarere ei tuku iaia e tona pamiri ki roto i te turanga kino o te onge, te aronga taonga tamaki, e te au tutara peikani o te reira ngai. I roto i taua au turanga pouroa ra, kua akapapuia mai te tu teitei rava atu o to Aberahama akarongo.
E oti kua tuku a Iehova ia Aberahama na roto i tetai timataanga maata roa atu. “Ka rave i taau tamaiti i tenana, i taau tamaiti okotai ra ko Isaaka . . . ka apai mai ei iaia i reira, ei atinga karakaratio.” (Genese 22:2) Kia Aberahama, kare a Isaaka i tetai tamaiti noa ua nei. Koia ua rai te tamaiti okotai a Aberahama raua ko tana vaine, ko Sara. Ko Isaaka te tamaiti o te koreromotu, to Aberahama manakonakoanga okotai ua rai e riro ei te enua Kanaana ei tuanga no tona “uanga” e ei akameitakianga no te manganui, kia tau ki ta te Atua i koreromotu mai. I na oki e ko Isaaka te tamaiti e tapapaia ra na Aberahama e ko tei anau mai i muri ake i tetai temeio mei ko mai i te Atua!—Genese 15:2-4, 7.
Ka rauka ua ia koe i te akamanako e mei teaa ra te ngata no Aberahama kia marama i teia akauenga. Te umuumu maira ainei a Iehova i tetai atinga tangata? Eaa ra a Iehova ka tuku ei ia Aberahama kia kite i te rekarekaanga mou o te rauka anga mai tetai tamaiti nana i tona ruaineanga e oti, te pati ra iaia kia akaatinga i taua tamaiti ra? *
Ma te kore e pauanga taka meitaki ki teia au uianga nei, kua akarongo tika atura Aberahama. Kua pou iaia e toru ra i tae atu ei ki te maunga tei ikiia. I reira kua patu aia i tetai atarau e kua apapa i te vaie ki runga. Teianei ko te taime tikai teia no taua timataanga ra. Kua rave maira Aberahama i te matipi ei ta, inara iaia e aere ra ka tamate i tana tamaiti, kua tapu maira Iehova iaia na roto i tetai angera e kua karanga maira e: “Kua kite oki au i teianei e, e mataku toou i te Atua, ko koe kare i karapii i to tamaiti, i to tamaiti okotai roa ra, iaku.” (Genese 22:3, 11, 12) E akamanako ua ana i te akameitakianga maata tei rauka ia Aberahama i te rongo anga i taua au tuatua ra! Kua tika rai ta Iehova i manako no runga i tona akarongo. (Genese 15:5, 6) I reira rai, kua akaatinga atura Aberahama i tetai toa mamoe ei mono i te ngai o Isaaka. E oti kua akapapu maira Iehova i tana koreromotu i taputou no runga i to Aberahama uanga. Mei tei maramaia, kua kiteaia a Aberahama ei oa no Iehova.—Genese 22:13-18; Iakobo 2:21-23.
E Timata Katoaia Ana to Tatou Akarongo
Kua kite ua tatou e kare e kore ana to te Atua au tavini i teia tuatau i te timataia. Ko tatou ra, penei e maata atu to tatou timataanga i roto i ta Iehova e akatika ra kia tupu, kare ra i roto i tana e akakite maira kia rave tatou.
Kua tata te apotetoro ko Paulo e: “Te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timoteo 3:12) Ko taua au takinga kinoanga ra penei ka na roto mai i to tatou au oa apii, au taeake, kopu tangata, tangata tupu, me kore i te aronga mana kavamani tei pikikaaia. Penei ka o mai te tuatua akakino e te ta e pera katoa te tamanamanata anga i tetai Kerititiano i te kimi ravenga no tona oraanga. E kite katoa ana rai te au Kerititiano mou i te au manamanata matauia e te tangata—te maki, te au tu taitaia, e te tu tuatua tika kore. Pouroa taua au timataanga ra ka timata te reira i te akarongo o tetai tangata.
Te akakite maira te apotetoro ko Petero i te au tu puapinga me timataia to tetai akarongo: “Taitaia poto ua rai kotou i teianei no te mea tika ïa i te au timataanga tu ke ke ra: Kia riro te timata anga o to kotou akarongo, ko tei maata rava i te meitaki i to te auro ngaro ua nei, timata uaʼi i te ai, ei akameitaki, ei teitei, e ei meitaki, i te mama anga mai o Iesu Mesia.” (1 Petero 1:6, 7) Ae, te akaaiteia ra te au tu ta te timataanga ka akatupu, ki te auro tei tamaia e te ai. Ka akaari mai te tamaanga i te mea ma tikai e ka akaatea i te au mea viivii. Mei te reira rai te tupu ana ki to tatou akarongo me rokoia tatou e te au timataanga.
Ei akaraanga, penei ka riro tetai u anga me kore tetai tumatetenga natura i te akatupu i te au tu ngata. Noatu te reira, kare rai te aronga e akarongo mou tikai to ratou e tuku puapinga kore ua atu ki ta te manamanata. E rauka ana to ratou pumaana i roto i te akapapuanga a Iehova e: “Kare rava au e akaruke atu ia koe, kare oki au e taka ke ia koe, kare, kare rava atu.” (Ebera 13:5) Ka tuku ua rai ratou i te au mea pae vaerua na mua, i te irinaki anga e ka akameitaki mai te Atua ko Iehova i ta ratou au tautaanga kia rauka mai te au mea tikai tei anoanoia. Ka tauturu to ratou akarongo ia ratou na roto i te au tuatau ngata e ka paruru ia ratou kia kore e akangata atu i to ratou turanga na te apiapi puapinga kore ua anga.
E tika e noatu ka akaari mai te timataanga i tetai tu paruparu i roto i to tatou akarongo, e puapinga katoa to te reira me kite tatou i te anoano kia rave i tetai au akatikatikaanga. E mea meitaki roa kia ui tetai kiaia uaorai e: ‘Ka akapeea ra au i te akamatutu anga i toku akarongo? Ka anoanoia ainei au kia akamaata atu i te taime i te akamanako anga na roto i te pure e te akamaaraaraanga no runga i te Tuatua a te Atua? Te taangaanga meitaki tikai ra ainei au i te au akanoonooanga kia tae ki te au uipaanga ma te au oa irinaki? Te irinaki ua ra ainei au ki runga iaku uaorai me te anoanoia ra tikai e kia tuku au i toku au manamanata ki te Atua ko Iehova na roto i te pure?’ Ko te akamataanga ua ra oki tera, o taua au tu kimi matatio anga ra.
Ei akamatutu i to tetai akarongo, penei ka anoanoia kia akameitaki atu i to tetai kaki pae vaerua, i te akaari anga i te ‘kaki tikai mei te tamariki anau ou, i te u iro koreia ra, i te tuatua.’ (1 Petero 2:2; Ebera 5:12-14) E tauta tatou kia aite mei te tangata a te tata taramo e akataka maira: “Ko tei inangaro ra i te ture a Iehova; e tei tana ture tona manako anga i te po e te ao.”—Salamo 1:2.
No teia e maata atu te anoanoia ra i te tatau ua anga i te Pipiria. E mea puapinga kia akamanako tatou no runga i ta te Tuatua a te Atua e akakite maira kia tatou e oti ka taangaanga ai i te akoanga tei orongaia mai. (Iakobo 1:22-25) Te openga, ka tupu ua atu to tatou aroa no te Atua, ka akataka meitaki tikaiia ta tatou pure e to tatou uaorai manako ngakau, e ka matutu roa atu to tatou akarongo i roto iaia.
Te Puapinga o te Akarongo Tei Timataia
Ko te kite e e puapinga tikai te akarongo i roto i te rauka mai anga ia tatou ta te Atua arikianga, e akakeuanga ririnui tikai ia no te akamatutu atu i te reira. Te akamaara maira te Pipiria ia tatou e: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) No reira, kia tau rai to tatou manako mei to te tangata tei pati akatenga kia Iesu e e: “Tauturu mai koe i toku nei akarongo mea ngiti”—Mareko 9:24.
Ka riro katoa te au timataanga o to tatou akarongo ei tauturu i etai ke. Ei akaraanga, me takake ake to tetai Kerititiano taeake akaperepere i roto i te mate, ka riro tona akarongo pakari i roto i ta te Atua taputou no te tuakaouanga ei akamaroiroi iaia. Ka eva aia, inara kare aia e “taitaia, mei tetai papaki kare o ratou tiakianga ra.” (1 Tesalonia 4:13, 14) Ko te aronga i reira e kite ra i te mana akamaroiroi o te akarongo o tetai Kerititiano, penei ka ariki aia e e apinga puapinga tikai tana i rauka. Penei ka akatupu teia i te anoano i roto i to ratou ngakau kia rauka taua tu akarongo ra, i te akakeu anga ia ratou kia apii i te Tuatua a te Atua e kia riro ei au pipi na Iesu Karaiti.
Kua kite a Iehova e e puapinga maata to te akarongo tei timataia. Kapiti mai, ka tauturu te au timataanga o te akarongo ia tatou kia kite e me e mana akamaroiroi tikai to to tatou akarongo. Ka tauturuia tatou kia kite i te au ngai paruparu i roto i to tatou akarongo, te ka tuku ia tatou ki roto i tetai turanga meitaki roa atu no te akatikatika i te au mea ravarai. E i te openga, penei ka riro te na roto anga tatou i te au timataanga ma te manuia ei tauturu i etai ke kia riro ei au pipi na Iesu. No reira kia tauta pakari tatou i te tamou marie i te akarongo ketaketa —te tu akarongo tei timataia ana i tera taime e i tera taime e i muri iora kua riro “ei akameitaki, ei teitei, e ei meitaki, i te mama anga mai o Iesu Mesia.”—1 Petero 1:7.
[Tataanga Rikiriki i Raro]
^ para. 11 No te aiteanga puapinga o te akatutuanga o te “atinga” a Isaaka, akara i The Watchtower, Tiurai 1, 1989, kapi 22.
[Tutu i te kapi 13]
Kua akariro te au angaanga akarongo a Aberahama iaia ei oa no Iehova
[Au Tutu i te kapi 15]
Ka riro te au timataanga ei akapapu mai e e mana akamaroiroi tikai to to tatou akarongo
[Akameitakianga no te Tutu i te kapi 12]
From the Illustrated Edition of the Holy Scriptures, by Cassell, Petter, & Galpin