Maara Ainei ia Koe?
Maara Ainei ia Koe?
Te ariki rekareka ra koe i te tatau anga i te au itiu ou o Te Punanga Tiaki? Akara ana ra, me ka rauka ia koe i te pau i te au uianga ka aru mai:
• Na roto i teea au mataara e a e taangaanga ana te Tuatua Tapu Kerititiano Ereni i te tuatua “ekalesia”?
Te aite anga mua koia oki ki te pupu katoa o te au Kerititiano akatainuia (i roto i etai au tataanga kua kapitiia mai a Karaiti). I tetai atu au taime, ‘te ekalesia a te Atua’ te taangaangaia ra ki te au Kerititiano ravarai te noo ra i tetai tuatau tikai. Te toru o te aiteanga koia oki ki te au Kerititiano katoatoa i roto i tetai tuanga enua. I te openga ra, penei ka taangaangaia te tuatua ki te aronga i roto i te putuputuanga o te reira ngai.—4/15, kapi 21-3.
• Aea e akamutu ei te ikianga i te au Kerititiano no te manakonakoanga o te rangi?
Kare te Pipiria i akakite mai i te pauanga tikai ki taua uianga ra. Kua akamata taua ikianga i te mataiti 33 T.N. e tae ua mai ki teia tuatau. I muri ake i te mataiti 1935 kua tanga atu te akakoroanga maata o te akariro anga i te tangata ei pipi ki te akaputuputu mai anga o te aronga maata rava. Kua tae te akakite a te vaerua tapu ki tetai aronga tei papetitoia i muri ake i te mataiti 1935 e e manakonakoanga to ratou ki te rangi, no reira kare e rauka ia tatou i te akanoo i tetai tuatau tikai e akamutu ei taua ikianga. Kare te aronga tei akatainuia tikai e irinaki ra e kua rauka maata ia ratou te vaerua o te Atua, kare katoa ratou e tapapa ana kia taviniia mai ratou. Noatu e eaa to ratou manakonakoanga, te anoanoia ra te au Kerititiano kia tiratiratu e kia rave ua atu i to te Atua anoano.—5/1, kapi 30-1.
• Te tia anga a Iepheta i tana tia, kua papa ainei aia i te oronga i tana tamaine ei atinga karakaratio ki te Atua?
Kare. Papu te aiteanga o ta Iepheta tuatua e ka oronga aia i te tangata tana ka aravei ei tavini i te Atua anake ua, e akanoonooanga no te Ture a Mose. (1 Samuela 2:22) I te akatupu anga i te tia, kua tavini ua rai te tamaine a Iepheta i ko i te tapenakara, e akaatinga maata tikaiia no te mea kare roa aia i akaipoipo ana.—5/15, kapi 9-10.
• Eaa ta te codex tuanga i roto i te Akonoanga Kerititiano mua?
I te akaraanga kua taangaanga te au Kerititiano i te rora, me kore te pokaikai tuatua, e tae rava atu paa ki te openga o te anere mataiti mua T.N. I te rua o te anere mataiti, e putotoanga tetai i rotopu i te aronga turuturu no te codex e te aronga turuturu no te pokaikai tuatua. Te irinaki ra te aronga kite e no te mea kua taangaanga te au Kerititiano i te codex, ko te tumu maata ia i ariki ateaia ai te reira.—6/1, kapi 14-15.
• Eaa te Karena Gezera?
E papa toka ngaika meangiti ua te reira tei kiteaia mai i te mataiti 1908 i te ngai o te oire o Gezera. E manganui tei manako e na tetai tamaiti apii i tata i te papa toka ei tuanga no te apiipii anga. Te akataka maira te papa toka i tetai urianga mama ua no tetai mataiti tanutanu anga, me kore no te aerenga o te tuatau, akamata anga ki te tuatau kokotianga kai i roto i te marama tei aiteite kia Tepetema/Okotopa, e te taiku maira te reira i te au kai tukeke e manganui e te au angaanga tanutanu.—6/15, kapi 8.
• Eaa te aiteanga e kua ara i te vaerua tapu ra?
Ka rauka i te ara i te vaerua tapu o Iehova, e ara kare e akakoreia. (Mataio 12:31) Na te Atua e akara mai e me kua rave rai tatou i tetai ara kare e akakoreia, e ka rauka iaia i te akaatea i tona vaerua mei runga mai ia tatou. (Salamo 51:11) Me kua taitaia tikai tatou no tetai ara, i te akaraanga kua tataraara tikai tatou e no reira kare i ara ana i te vaerua.—7/15, kapi 16-17.
• I te mea e kua kapiti ana aia kia Davida i mua atu ana, eaa ra te Ariki ko Saula i ui ei e e tamaiti a Davida naai? (1 Samuela 16:22; 17:58)
Kare e te inangaro ua ra a Saula i te kite i te ingoa o te metua o Davida. I te kite anga ia Davida ei tangata akarongo maata e te mataku kore, koi autu ua akenei ia Golia, kua inangaro a Saula i te kite mai i te tu tikai o te tangata tei utuutu mai i te reira tamaiti. Penei te akamanako ra a Saula i te kapiti mai anga ia Iese, me kore tetai atu o tona mema pamiri ki te pupu vaeau.—8/1, kapi 31.