Tataanga​—Tona Puapinga i Iseraela Taito Ra

KUA tatau ana ainei koe i tetai o te Iliad me kore te Odyssey, e nga tua pee maata e rua no Ereni taito ra? Kua manakoia e kua atuia te reira i te iva me kore i te varu anere mataiti M.T.N. Akapeea me akaaiteia atu teia au tataanga ki te Pipiria, kua akamataia i te tataia i te au anere mataiti e manganui i mua atu ana? Te akakite maira te voriumu The Jewish Bible and the Christian Bible e: “Mei te 429 papaanga o te Pipiria i tataia e kua tataia ki roto i te au pepa. E puapinga maata tikai teia me akamaaraia e te oronga maira te Iliad e tai ua papaanga ki te tataanga e kare e tataanga i roto i te Odyssey.”

Te akamarama maira The Oxford Encyclopedia of Archaeology in the Near East e “i Iseraela i taito ra i te akara anga e tuanga maata te tataanga no te akamorianga i roto i te akonoanga.” Ei akaraanga, kua tataia te Ture koreromotu e i muri mai kua tatau putuputuia atu ki mua i te au tangata ravarai, te au tane, te au vaine, e te tamariki. Kua tatau katoaia e kua apiiia te reira e te au tangata i roto i te au pupu e i te ngai muna. I muri ake i te akamanako anga i etai au tu o te Ture, kua taopenga a Alan Millard, e puapii maata i te Apii Teitei o Liverpool, e: “I te akara anga, kua manakoia e kua akakeu te tatauanga e te tataanga i te oraanga i roto i te au tu ravarai.”​—Deuteronomi 31:9-13; Iosua 1:8; Nehemia 8:13-15; Salamo 1:2.

Te akamarama maira te apotetoro ko Paulo e akapeea te au Kerititiano i te akamanako anga i te au tataanga tapu: “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.” Te ariki ngateitei tikai ra ainei koe i te Pipiria na te tatau putuputu anga i te reira?​—Roma 15:4.