Kia Kite ua Atu i te Puapinga no te Akameitakianga

KUA rongo ana ainei koe i tetai tangata e akaapa ra e kare tona pu e akameitaki roa ana iaia? Kua akono katoa ana ainei koe i te reira akaapaanga? Me kore me e tangata mapu koe, kua tuatua katoa ana ainei koe i te reira no runga i toou nga metua me kore i toou au puapii?

Penei te tano ua ra tetai o teia au akaapaanga. Inara te karanga ra tetai tangata tereni akamaroiroianga no Tiamani e, me akaapa ana te aronga angaanga mei teia tu rai, kare e te mareka kore ra ratou no tei kore ratou i akameitakiia mai, mari ra, no te kare te pu e akaari atu ana i te tu inangaro uaorai ki roto ia ratou. Noatu e eaa te au tumu, te taka ua ra e apinga tetai e ngere ra. E nga tu puapinga maata tikai te akameitakianga e te tu manako inangaro uaorai me ka inangaro tatou i te au pirianga mataora.

No runga i te akamorianga, te tika katoa ra te reira. Ka anoanoia te putuputuanga Kerititiano kia akairoia e te vaerua no te akameitakianga, te pumaana, e te tu manako inangaro uaorai. E akatupu ana e e tamou marie ana tona au mema i te reira turanga meitaki na te akonoanga i te au kaveinga Pipiria. Inara, noatu te tu aroa tikai o to tatou putuputuanga, ka rauka rai te reira i te akamaata atuia. I te akamanakoanga i teia, kia akamanako tatou e toru nga akaraanga meitaki no te oronga anga i te akameitakianga: Te tavini o te Atua ko Eliu, i mua ake i te tuatau Kerititiano, te apotetoro ko Paulo, e ko Iesu Karaiti uaorai.

Akoanga Takinga Meitaki e te Akangateitei

I te akaraanga, e tuanga maata ta Eliu, tetai kopu tangata o Aberahama, i te tauturuanga ia Iobu kia akono i tetai akamanakoanga meitaki no runga i tona pirianga ki te Atua. E tangata takinga meitaki a Eliu e te akangateitei katoa. Kua tiaki marie ua aia i tona taime i te tuatua atu. Kare oki mei te au taeake akatutu ua o Iobu, te akaapa ua ra iaia, kua oronga a Eliu i te akoanga, e kua viviki katoa i te akameitaki ia Iobu no tona aerenga tika. Kua rave aia i te reira ma te pumaana e ma tetai tu manako papu no te inangaro uaorai ei taeake, i te taikuanga i to Iobu ingoa, kare mei tona au taeake rai. Kua pati maru ua atu aia e: “E Iobu, ka akarongo mai koe i taku tuatua nei.” I te akamanako tau ua anga iaia uaorai i roto i to Iobu turanga, kua karanga atu aia e: “I na, ko taau rai oki i inangaro, ei kauono au na te Atua: e karakaraea katoa oki au i te anga angaia.” E oti i te akameitakianga kua karanga aia e: “E te vai na taau tuatua, ka tuatua mai: e tuatua koe, te inangaro nei oki au i te akatika ia koe.”​—Iobu 33:1, 6, 32.

Na te akono anga i tetai ke ma te takinga meitaki e te ngateitei, ko tetai mataaraia i te akameitakianga ia ratou. Ko te tikaanga, te akakite ra tatou ki ta tatou aronga e akarongo maira e, ‘Te irinaki nei au e kua tau rai kia akamanako atu au ia koe e kua tau katoa rai koe kia akangateiteiia.’ Te akaari ra tatou i reira i tetai manako pumaana e te akaari ra i to tatou inangaro uaorai i roto iaia.

 Kia akaari i te takinga meitaki, e maata atu te anoanoia ra i te aru ua anga i te au ture no te au tu akono meitaki. Kia itae i te ngakau o tetai ke, ka anoanoia to tatou tu takinga meitaki ei mea tika tikai e mei roto mai i te ngakau. Kia riro te reira ei akakiteanga tika tikai no te inangaro e te aroa.

Oronga Tau ua i te Akameitakianga

Kua akaari te apotetoro ko Paulo i te puapinga o te tu tau i te akameitakianga i tetai ke. Ei akaraanga, iaia e tutu aere ra i Atene i te rua o tona tereanga mitinari, kua paruru aia i te akonoanga Kerititiano i tona tuatuaanga ki tetai aronga kite pakari o Ereni. E akara ana e akapeea aia i te akono tau anga i teia angaanga ngata. “Kua taumāro maira kiaia ko e tokotai puke tangata pakari Epikuro, e te Setoiko. Kua na ko akera oki e tokotai, E akapeea maira teianei tangata tuatua tarevakaua kia tuatua mai? kua na ko akera tetai pae, E mea tu demoni ke tana e tuatua aere nei.” (Angaanga 17:18) Noatu te reira au tuatua, kua noo maru ua a Paulo e kua pau atu e: “E te au tangata Atene nei, e maata ua to kotou mātau i te akamori i te demoni, kua kite io nei au.” Kare oki i akaapa ana i ta ratou akamorianga itoro, kua akameitaki ra a Paulo ia ratou ei aronga inangaro tikai i te akonoanga.​—Angaanga 17:22.

Kua akaari ainei a Paulo i te tu pikikaa? Kare rava. Kua kite oki aia e, e auraka e kia akava atu i tana aronga akarongo; no te mea kua kite meitaki ana aia e, i te taime mua e, koia katoa tikai tetai tei marama kore ana i te tuatua mou. Ko tana angaanga, koia oki kia oronga i te karere a te Atua, kare e kia akava atu i tetai ke. Kua kite mai aia mei tei tupu tikai kiaia i ta te Au Kite o Iehova e manganui e kite maira i teia tuatau e: Tetai aronga turuturu ngakau tae no te akonoanga pikikaa, kua riro mai ratou i te openga ra, e ko tetai aronga turuturu maroiroi roa atu no te akonoanga mou.

E puapinga tikai ta Paulo araveianga, e kua tupu te au tupuanga meitaki. “Kua akarongo maira tetai pae tangata, e kua kapiti maira kiaia; ko Dionusio no te Areopago tetai, e tetai vaine ko Damari te ingoa, ma e tokotai puke tangata uaorai oki.” (Angaanga 17:34) E tu kite pakari tikai to Paulo i te akameitakianga i te au Atene no to ratou irinakianga ngakau tae​—noatu e kua tarevake te reira​—kare ra aia i akaapa ana ia ratou no to ratou ngere i te kite tika tikai! Te maataanga o te taime, te au tangata tei arataki ke ia e te au akakiteanga tarevake, e ngakau meitaki to ratou.

I te kapikiia anga kia oronga i tetai akakiteanga ki mua ia Heroda Ageripa II, kua taangaanga katoa a Paulo i tetai araveianga tau. Kua kite pouroa te au tangata e te moe kapiti ra a Heroda ki tona tuaine ko Bernice, ko tetai apinga tikai e akaapa ra te Tuatua a te Atua. Noatu rai, kare a Paulo i tuatua akaapa ana i te reira. Mari ra, kua kite mai aia i tetai tumuanga tika no te akameitakianga ia Heroda. “E te ariki, e Ageripa, kua meitaki rava au, ko au e tuatua iaku uaorai i teianei rā ki mua i toou aroaro nei, i te au mea katoa i tapepeia mai ei au e te ngati Iuda nei: No te mea, kua kite koe i te au peu ravarai, e te au tuatua katoa, a te ngati Iuda.”​—Angaanga 26:1-3.

E meitaki atu me taangaanga katoa tatou i te reira araveianga tau i te akonoanga i tetai ke! I te akameitakianga i tetai tangata tupu, tetai oa apii, me kore tetai oa angaanga, te akatupu ra i te au pirianga au e te akamaroiroi ra i te tu mako meitaki. Na te itae anga i te ngakau na roto i te akameitakianga tau tikai, penei ka rauka ia tatou i tetai au taime i te akakeu i te au tangata ngakau tae kia taui i to ratou au akamanakoanga e te au angaanga tarevake ki te au mea te rotai ra ki te kite tika tikai.

To Iesu Akaraanga Apa Kore i te Oronga Anga i te Akameitakianga

Kua oronga a Iesu i te akameitakianga. Ei akatauanga, i muri ake i tona tuakaouanga e tona oki anga ki runga i te rangi, ma te aratakianga a te Atua, kua tuatua a Iesu na roto i te apotetoro ko Ioane ki te putuputuanga e itu i Asia Minora. Kare aia i ngere ana i te akameitaki i te aronga tei tau kia akameitakiia. Ki te au putuputuanga i Ephesia, Peregamo, e Tuatira, kua taangaanga aia i te tuatua mei te: “Kua kite au i taau angaanga, e toou roiroi, e toou akakoromaki, e kare koe e tau i te aronga kikino ra”; “e te mou marie ua na koe i toku nei ingoa, e kare koe i uuna i to akarongo iaku”; e “kua kite au i taau angaanga, e toou aroa, e toou takinga-meitaki, e te akarongo, e toou akakoromaki, e taau au angaanga; ko tei maata ïa i tei muatangana ra.” I Saradi katoa, e kua anoanoia te putuputuanga kia ako pakariia, kua kite katoa  a Iesu i te aronga tei tau kia akameitakiia, i te na ko anga e: “Te vai na ra tetai aronga tangata ki oou i Saradi na, ko tei kore akenei i akaviivii i to ratou kakau, e aaere ïa ratou e ko au katoa ma te kakau teatea; e tau oki ratou.” (Apokalupo 2:2, 13, 19; 3:4) E akaraanga meitaki tikai ta Iesu i akanoo mai!

I te aruanga ia Iesu, auraka rava tatou e akaapa i tetai pupu katoa no te tarevake o tetai pae me kore kia oronga i te akoanga umuumuia ma te kore e oronga katoa anga i te akameitakianga tau. Inara, e mea meitaki i te akamanako e, me ka oronga ua tatou i te akameitakianga me te parani ra tatou i te oronga i te akoanga, penei i tetai taime kare ta tatou akameitakianga e arikiia mai. Me rauka te tuatau, kia maoraora ua koe i te oronga anga i te akameitakianga! E i reira, me orongaia te akoanga i tetai atianga ke, ka ariki ngoie uaia mai te reira.

Aronga Pakari Tei Oronga i te Akameitakianga Tau

Te maara ra ia Cornelia, tetai vaine Kerititiano e tavini nei i roto i te opati manga o te Au Kite o Iehova i Europa e, i te au mataiti mua o te 1970, kua ui mai te akaaere tutaka atoro kiaia e te peea ua ra aia i tana apiianga uaorai e tana tatauanga uaorai o te makatini. “Kua manga akama mai au,” i karanga ai aia. Inara kua karanga rai aia e kare i rauka ana iaia i te tatau pouroa i te au atikara i roto i te makatini. “Kare aia i ako mai ana iaku no runga i te reira,” te maara ra iaia, “kua akameitaki mai ra aia iaku no te maata taku i rauka mai i te tatau. Kua akamaroiroi tikaiia au e tana akameitakianga e, mei te reira taime mai kua tauta pakari au i te tatau pouroa i te au atikara tataki tai.”

Te maara nei ia Ray, te tavini ra i tetai opati manga i Europa, i tona ra mua o te tavinianga painia. Te akaaere akatere o te putuputuanga, e tangata pitiniti ma te au apainga pamiri e te au apainga e manganui i roto katoa i te  putuputuanga, kua tomo mai aia ki roto i te Are Uipaanga Patireia i taua aiai ra e kua aere tika roa atu kia Ray e kua ui atu e, “Peea toou ra mua i roto i te tavinianga painia?” I teianei, vaitata rai e 60 mataiti i muri mai, te maara nei rai ia Ray i te tu manakoanga meitaki o te reira tangata pakari.

Mei ta teia nga tupuanga e rua e akaari maira, ko tetai akakiteanga takinga aroa no te angaanga tei raveia e te au tangata​—kare e ko te au tuatua manako kore me kore te au akareka anga puapinga kore, te apinga​—e akatupu ana i te au tupuanga meitaki tikai. I roto i te putuputuanga Kerititiano, e maata ta tatou au apinga ka rauka i te akameitaki atu i to tatou au taeake irinaki. E akamanako ua ana i to ratou inangaro i te tavini ia Iehova, ta ratou au paupauanga akapapa meitakiia, to ratou tautaanga i te autu i te mataku kia tu ki mua i te tangata i te oronga anga i te au akoanga me kore kia piri atu ki roto i te au tuanga i runga i te uipaanga, to ratou maroiroi i roto i te tutuanga e te apiianga, e ta ratou au tautaanga kia akanoo na mua i te au inangaro o te Patireia e te au akakoroanga pae vaerua. Me oronga tatou i te akameitakianga ki tetai ke, e maata ta tatou tutakianga. E mataora ana tatou i te reira e te oronga maira i te manako papu tikai kia tatou.​—Angaanga 20:35.

Ka tau te aronga pakari o te putuputuanga kia akameitaki i te putuputuanga no ta ratou au angaanga meitaki. E me umuumuia te akoanga, ka oronga ratou i te reira na roto i te tu takinga aroa. I tetai tua ra ka kopae ratou i te irinaki maata anga e kia tika rava ua te raveanga i te au mea katoatoa, e me kare tetai apinga e tano meitaki ana, kua manakoia te reira ei tu paruparu kino pakari tikai.

Te aronga pakari Kerititiano te aru ra i te akaraanga no te akangateitei e te akamanakoanga aroa tei akaariia e Eliu, te tu araveianga tau tei taangaangaia e Paulo, e te akamanakoanga aroa tei akaariia e Iesu, ka riro ratou ei tumu akamaroiroianga tikai ki to ratou au taeake. Ka akamaroiroi te akameitakianga i te tu meitaki rava i roto i tetai ke e ka taki atu ki te au pirianga mataora e te taokotaianga au. Mei teaa atura tikai te rekareka ta Iesu i kite mai i tona papetitoanga, i te rongo atu anga i tona Metua i te rangi e akameitaki maira iaia ma te au tuatua e: “Ko taku Tamaiti akaperepere koe, kua mareka rava au ia koe”! (Mareko 1:11) Kia rauka ia tatou i te akakeu i te au ngakau o to tatou au taeake kia mataora ratou, na roto i ta tatou au tuatua akameitakianga ngakau tae, e te puapinga tikai.

[Au Tutu i te kapi 15]

Kua apai mai te araveianga tau i te au tupuanga meitaki kia Paulo, ka rauka katoa ia tatou te reira

[Tutu i te kapi 16]

E akatupu ana te akameitakianga pumaana e te ngakau tae i te au tupuanga meitaki tikai