Akapeea te Tatanuanga i te Aroa no te Atua i Roto i te Ngakau o Taau Tamaiti

I TEIA tuatau, e akaaoanga tikai no tetai tangata kia akatupu i tetai pirianga vaitata ki te Atua ko Iehova. (Salamo 16:8) Tika atura ki tei totouia, te noo nei tatou i roto te ‘au tuatau kikino tei ngata roa i te akono atu.’ Te maataanga o te au tangata e ‘aronga inangaro i te au mea navenave kare ei aronga inangaro i te Atua.’ (2 Timoteo 3:1-5, NW) Ae, ko te inangaro tikai i te Atua, e mea ngata tikai i te kite mai i roto i te ao nei i teia tuatau.

Kia akatupuia te aroa no te Atua i roto i te ngakau o tetai tamaiti, kare e rauka i te akaruke ua atu i te irinakianga e ka tupu ua mai te reira. Ka anoanoia te aroa no te Atua ko Iehova kia tatanuia ki roto i te au ngakau o ta tatou au tamariki. Akapeea tatou i te raveanga i te reira?

Komunikeitianga Ngakau Tae

Ka rauka ia tatou i te tatanu i te aroa no te Atua i roto i te ngakau o ta tatou tamariki me kua ki katoa to tatou uaorai ngakau i te aroa nona. (Luka 6:40) Te akataka maira te Pipiria i teia i te karanga anga e: “E teianei, e inangaro atu koe i to Atua ia Iehova ma to ngakau katoa, e ma to vaerua katoa, e ma to maroiroi katoa. E teianei au tuatua taku e akaue atu kia koe i teianei rā, ei roto i toou ngakau vai ei; E ka apii tamou tikai koe i te reira ki taau au tamariki.”​—Deuteronomi 6:4-7.

Akapeea tatou i te tatanuanga i te aroa no te Atua i roto i te ngakau o ta tatou tamaiti? Te mea mua, ka anoanoia tatou kia kite mai e eaa to roto i te ngakau o ta tatou tamaiti. Te rua, ka anoanoia tatou kia akakite e eaa to roto i to tatou uaorai ngakau.

I runga i te mataara e aere ra ki Emausa ma tana nga pipi e rua, ko te taime mua te reira i akamaroiroi ei a Iesu Karaiti i te nga pipi kia akakite mai i to raua au manakonakoanga e to raua au taitaia. Na te akarongo ua anga kia raua no tetai tuatau, i akatikatika ai a Iesu i to raua manakoanga na te akamarama anga i te au Tuatua Tapu. I muri akera kua karanga raua e: “Kare aina i maana rava to taua ngakau, ka tuatua mai ei aia kia taua?” Kua riro te reira pukapukaanga ei akaraanga meitaki no tetai komunikeitianga ngakau tae. (Luka 24:15-32) Akapeea tatou i te kite mai anga i te au manako o ta tatou tamaiti?

I tetai taime ua akenei, kua uiuiia tetai au metua no runga i te komunikeitianga ngakau tae ki ta ratou tamariki mamaata i teianei me kore te mapu maira e e akaraanga meitaki ratou i roto i te akarongo. Ei akatauanga, ko Glen, i Meiko, e a ana tamariki mamaata. * Kua karanga aia e: “Kare te pukapukaanga maoraora e tupu ua mai ana i rotopu i te au metua e te tamariki. Kua manako mai maua ko taku vaine kia akapae i te au angaanga kare e puapinga roa ana kia rauka ia maua i te akapou i tetai tuatau ki te tamariki. I to ratou mapu anga, tetai taime e noonoo ana maua kia ratou i te roaanga po, i te pukapukaanga i ta ratou apinga ua ka inangaro i te akakite mai. E pera katoa, i te au tuatau kaikaianga, na te akarongo anga ki ta ratou pukapukaanga, ka kite mai maua i te au manamanata e ma te tu maru, kua akatikatika atu i tetai akakeuanga tarevake, e e manganui te taime kare ratou e kite ana e te akatikatikaia ra ratou.”

Te o katoa maira i roto i te komunikeitianga ngakau tae, i te akakiteanga e eaa to roto i to tatou uaorai ngakau. Kua karanga a Iesu e: “E tuku mai te tangata meitaki i te mea meitaki no roto i te putunga meitaki i roto i tona ngakau, . . . no te ki oki o te ngakau i tuatuaʼi te vaa.” (Luka 6:45) Kua karanga a Toshiki, e te tavini ra tana nga tamariki e toru ei au orometua tamou i Tiapani e: “E maata toku taime i te akakiteanga kia ratou i te tumu tikai i tuku ei au i toku akarongo ki roto ia Iehova​—e akapeea au i te irinaki anga ma toku ngakau katoa i tona vai ua anga e akapeea te au apinga tei tupu tikai kiaku i te akapapuanga kiaku e e puka tika tikai te Pipiria e ko te aratakianga meitaki rava atu te reira i roto i te oraanga.” I Meiko, kua karanga a Cindy e: “E pure kapiti ua ana taku tane ma te tamariki. Me akarongo ratou i tana au tuatua ngakau tae, kua kite ratou e kare a Iehova ei mea tamanako ua.”

Te Mana o to Tatou Akaraanga

Ko te mea ririnui maata atu i te au tuatua, koia oki ko te tu o to tatou oraanga, no te mea te akaari ra te reira ki ta tatou tamariki i te maata o to tatou  aroa i te Atua. Na te akamanakoanga i to Iesu Karaiti akarongo kia Iehova, i kite mai ei te au tangata i te oonu o tona aroa no te Atua. “Kia kite ra to te ao e, te anoano nei au i te Metua,” i karanga ai a Iesu, “te akono nei au i ta te Metua i akaue mai iaku ra.”​—Ioane 14:31.

Te akakite maira a Gareth, tetai Kite no Iehova i Wales e: “Kia kite mai ta maua tamariki e te aroa ra maua ia Iehova e te tauta ra maua i te rave i te au apinga tana e inangaro ra. Ei akatauanga, te kite maira taku tamariki e, i te aru anga i ta te Atua e akakite maira kia maua, e akakite ana au i toku au tarevake. I teianei e tauta ana taku tamariki i te akono i te reira tu.”

Kua karanga a Greg, tetai tangata Autireria e: “Kua inangaro maua i ta maua tamariki kia kite mai e te akamou ra maua i to maua oraanga ki runga i te tuatua mou. Me rave maua i te au ikianga no runga i te angaanga me kore te kangakanga anga, e akamanako ana maua na mua me ka taii atu te reira ki ta matou au apainga Kerititiano. Te mataora nei maua i te kiteanga i ta maua tamaine e 19 mataiti i te akonoanga i teia tu akamanakoanga i roto i tana tavinianga painia tauturu.”

Tauturuanga i ta Tatou Tamariki kia Marama i te Atua

Kare e rauka ia tatou i te aroa me kore i te irinaki i tetai tangata e kare tatou i marama. I te inangaro anga te apotetoro ko Paulo i te au Kerititiano kia tupu to ratou aroa no Iehova, kua tata aia e: “Ko teia taku e pure ua atu nei, e kia maata ua atu oki to kotou aroa ma te kite tikai e te kite pakari.” (Philipi 1:9, NW) Te karanga ra a Falconerio, te utuutu nei e a tamariki i Peru e: “I te tatau e te apii putuputu anga i te Pipiria kia ratou, te akamaroiroi ra i to ratou akarongo. Tetai taime e ngere ana au i te apii kia ratou, e kua kite mai au i to ratou aroa no te Atua e paruparu atura.” Kua karanga a Gary, no Autireria mai e: “E akaari putuputu ana au ki taku tamariki i te akapapuanga e te akatupuia nei te au totou Pipiria. E akaari katoa ana au i te au puapinga i te akonoanga i te au kaveinga Pipiria. Ko te rave putuputu anga i ta matou apii pamiri Pipiria, ko te apinga puapinga maataia ki te akamaroiroianga i to ratou akarongo.”

Ka itae meitaki atu te kite i te ngakau o tetai tamaiti, me te tupu ra te turanga maru ua e te ngateitei, e e mataora tikai te apiianga. (Iakobo 3:18) “I te taime o te apii Pipiria pamiri, ka tauta maua kia kore e karo i ta maua tamariki, noatu me kua akamata ratou i te maniania mai,” i karanga ai a Shawn raua ko Pauline no Peritane mai, e a a  raua tamariki. “E taui ua ana maua i te tu e akono ana maua i te apii. Tetai taime e pati ana maua i te tamariki kia iki mai i tetai tumu manako. Kua taangaanga maua i te au vitio tei neneiia e te akaaerenga a Iehova. I tetai taime ka akaari akaou maua i tetai tuanga me kore ka tapu poto ua i te vitio kia rauka tetai uriurianga.” Pera katoa no Peritane mai, kua karanga tetai metua vaine ko Kim tona ingoa e: “E akapapa meitaki ana au no te apii pamiri kia rauka iaku i te ui i te au uianga te ka akakeu i taku tamariki kia akamanako meitaki ratou. E mataora ana matou i te apii. E kata ua ana matou.”

Ikianga i te Au Oa

Te tupu anga no te aroa no Iehova e te akangateitei no te akamori mou i roto i ta tatou tamariki, ka meitaki atu me koropiniia ratou e te au tangata e e au oa ratou no te Atua. I te akanoonooanga i te au oa e ka puapinga ta tatou tamariki i te pukapuka atu e te kangakanga atu, penei ka anoanoia te tautaanga. Inara e puapinga te ka rauka mai me raveia te reira! Tei runga ravao, e mea puapinga maata kia akatupu i te au atianga kia aravei ta tatou au tamariki i te Au Kite o Iehova tei akariro i te angaanga orometua tamou ei angaanga tinamou na ratou i roto i te oraanga. Ko te manganui tei iki atu i taua aerenga, kua rave i te reira no te mea kua piri atu ratou ki te au tavini maroiroi o te Atua. Kua karanga mai tetai tuaine tei riro mai ei mitinari e: “E maata te au taime i pati ana toku nga metua i te au painia kia aere mai i te kaikaianga. Kua mataora tikai ratou i roto i ta ratou angaanga orometua e kua inangaro mai au i te tavini katoa i te Atua na te reira mataara.”

E tika, ka rauka te tu o ta tatou tamariki i te akakeuia ki te tu meitaki e ki te tu kino. No reira, te au kino o te au akapirianga tau kore, e akaao ana i to tatou au tu kite pakari ei au metua. (1 Korinetia 15:33) E mea tu kite karape i te apii i te au tamariki e akapeea i te kopae i te piri atu anga ki te aronga e kare ratou e aroa ana ia Iehova e kare katoa e kite ana iaia. (Maseli 13:20) Kua karanga a Shawn, tei taikuia i mua atu ana e: “Kua apii maua i ta maua tamariki rikiriki kia oaoa atu ki te au oa apii inara kia akaruke atu i te reira au pirianga ki reira​—i te apii. Kua marama ua ta maua tamariki i te tumu i kore ei ratou e piri atu ki roto i te au angaanga i muri ake i te apii me kore i roto i te au angaanga tarekarekaanga a te apii.”

Te Puapinga o te Terenianga

Na te terenianga i ta tatou tamariki kia akamarama atu i to ratou akarongo, te tauturu ra tatou ia ratou kia maoraora ua i te akakitekite i to ratou aroa no te Atua. Te karanga ra a Mark, e noo ana aia i Marike e: “Kua inangaro maua i ta maua nga tamaroa i te kite mai i te mataora i te akakiteanga i to raua akarongo ki tetai ke i tetai ua atu taime, kare i te taime ua e akamanea ana raua i te piri atu ki roto i ta tatou angaanga orometua. E no reira me aere ana matou ki tetai ngai no te tamataoraanga, me ki tetai paka, i taatai, me kore tetai vao rakau, e apai ana matou i te au Pipiria e te au puka Pipiria, e kua pukapuka atu matou ki te au tangata i reira no runga i ta matou au apinga e irinaki ana. E mataora ana tikai te nga tamaroa i te kapiti anga mai kia maua i te akakitekite ua anga i roto i te reira tu. E piri mai ana raua ki roto i te au uriurianga e kua akakitekite atu no runga i to raua akarongo.”

E manganui te au tangata ta te apotetoro ruaine ko Ioane i tauturu kia tupu to ratou aroa no te Atua. No runga ia ratou, kua tata aia e: “Kia kite au e, te aere ra taku au tamariki na te tuatua-mou, kare oku e rekareka anga maata atu.” (3 Ioane 4) Me tatanu tatou i te inangaro no te Atua i roto i te au ngakau o ta tatou tamariki, ka kite katoa mai tatou i te reira mataora.

[Tataanga Rikiriki i Raro]

[Au Tutu i te kapi 9]

Kare te tuatua ngakau tae no runga i te au mea no te akarongo e tupu ua mai ana

[Tutu i te kapi 10]

Tereni i taau tamariki kia akakitekite i to ratou aroa no te Atua

[Akameitakianga]

Courtesy of Green Chimneys Farm