E Mea Ora te Tuatua a Iehova

Au Manako Maata mei te Puka a Hosea

VAITATA rai e kua ngaro takiri te akamorianga mou mei te patireia tino ngauru o Iseraela i te tua tokerau. I raro i te tutaraanga a Ieroboama II, e turanga apinganui to Iseraela i te pae kopapa, inara kua kore te reira i muri poto ua ake i tona matenga. Tei aru mai e tuatau oripu ua e te marikonga kore i te pae poritiki. E toko a o te au ariki tei aru mai kua taiaia. (2 Ariki 14:29; 15:8-30; 17:1-6) Kua tae roa atu te 59 mataiti o to Hosea taoonga peroveta, tei akamataia i te mataiti 804 M.T.N., ki roto i teia tuatau oripu ua.

Te akatutu meitakiia maira to Iehova manako no te iti tangata marikonga kore o Iseraela, e te au mea tei tupu i roto i te oraanga akaipoipo o Hosea. Te au tumu tuatua no ta Hosea karere, e akakiteanga te reira no runga i te ara a Iseraela e te au akavaanga tei totouia nona e te patireia o Iuda. I te taangaanga anga i te au tuatua maru e te ngata e te reo pakari e te taka taka meitaki, kua tata a Hosea i teia au mea pouroa ki roto i tetai puka e apai ra i tona ingoa. Ei tuanga no te Tuatua akauruia a te Atua, e ora e te ririnui ta te reira karere.​—Ebera 4:12.

“KA RAVE I TETAI VAINE MOEAANA NAAU”

(Hosea 1:1–3:5)

Kua akakite a Iehova kia Hosea e: “Ka aere, ka rave i tetai vaine [“moeaana,” NW] naau.” (Hosea 1:2) Kua akarongo a Hosea e kua anau maira i tetai tamaiti kia Gomera. I te akara anga i anau puti mai aia i nga tamariki e rua tei aru mai. Te tou ra te aiteanga o to raua ingoa, ko Lo-ruhama e Lo-ruami, ki to Iehova akakore anga i te aroa ia Iseraela e te kopae anga i tona iti tangata tiratiratu kore.

Mei teaa tikai to Iehova manako no runga i tona iti tangata meameaau? Kua akakite aia kia Hosea e: “Ka aere rai, ka inangaro atu i te vaine i inangaroia e te oa, e akaturi rai, mei te inangaro o Iehova ki te au tamariki o Iseraela, ko tei akara ki te au atua ke ra.”​—Hosea 3:1.

Pauia te Au Uianga Tuatua Tapu:

1:1​—Eaa ra a Hosea i taiku pouroa mai ei i te au ariki toko a e tutara ra i Iuda i te tuatau o tana angaanga orometua e oti akera e tai rai tutara o Iseraela i akakiteia mai te ingoa? Te tumu no te mea ko te au ariki ua mei te pamiri o Davida tei arikiia ei au tutara tika tikai no to te Atua iti tangata ikiia. Kare te au ariki o te patireia i te tua tokerau e no roto i te uanga o Davida, ko to Iuda ua ra.

1:2-9​—Kua rave tika tikai ainei a Hosea i tetai vaine moeaana? Ae, kua akaipoipo a Hosea i tetai vaine tei riro mai ei vaine akaturi i muri mai. Kare te tuatua a te peroveta e karanga ra e e orama me kore e moemoea ua te au mea tana e akakite maira no runga i tona oraanga ngutuare.

1:7​—I naea te ngutuare o Iuda i aroaia mai ei e i akaoraia ai? I akatupuia teia i te mataiti 732 M.T.N, i te tuatau o te Ariki ko Hezekia. I taua tuatau ra, kua takore a Iehova i te tamataku a to Asura ia Ierusalema na te tono anga i tetai angera kia ta e 185,000 vaeau o te enemi i tetai po okotai ua. (2 Ariki 19:34, 35) I reira kua akaora maira Iehova i te ngati Iuda, kare ra e na “te ana, e te koke, e te tamaki, e te oroenua, e to reira akaoro ra,” na te angera okotai ra.

 1:10, 11​—I te mea e i takoreia te patireia o Iseraela i te tua tokerau i te mataiti 740 M.T.N., akapeea ra te tamariki o Iseraela i “akaputuputu ei” ki roto i tetai turanga rotai ma te tamariki a Iuda? E manganui tei aere atu mei te patireia i te tua tokerau ki Iuda i mua ake ka apaiia ai te au tangata o Iuda ei tuikaa i Babulonia i te mataiti 607 M.T.N. (2 Paraleipomeno 11:13-17; 30:6-12, 18-20, 25) I te oki anga te au tuikaa ngati Iuda ki to ratou enua anau i te mataiti 537 M.T.N., ko te uanga o te patireia o Iseraela i te tua tokerau tetai i rotopu i te aronga tei oki atu.​—Ezera 2:70.

2:21-23​—Eaa ra tei totouia mai e ta Iehova au tuatua: “E e ruru au [ia Iezereela] i te enua nei naku uaorai; e akaperepere oki au iaia i tei kore i akaperepereia ra”? Te ingoa o ta Hosea tamaiti mua na Gomera ko Iezereela. (Hosea 1:2-4) E aiteanga totou to taua ingoa ra e, “Ka Ruru Ua te Atua,” no te akaputuputu mai anga a Iehova i te toenga o te aronga tiratiratu i te mataiti 537 M.T.N. e te ruru anga ia ratou mei te ua te tu ki Iuda. Teianei ka anoanoia taua enua ra tei vai tanea ua ana e 70 mataiti, kia akatupu mai i te titona, te uaina, e te inu orive. Na roto i te pee, te akakite ra te totou e ka pati teia au apinga memeitaki nei ki te enua kia tuku mai i tona mou, e ka pati te enua ki te au rangi kia akatopa mai i te ua. I reira te au rangi e pati ei ki te Atua kia oronga mai i te au tumurangi ua. Ko te akakoroanga o teia au mea pouroa koia oki kia akono meitakiia te au anoano o te aronga toenga tei oki mai. Te taangaanga ra te apotetoro ko Paulo raua ko Petero ia Hosea 2:23 ki te akaputuputuanga mai i te toenga o te Iseraela vaerua.​—Roma 9:25, 26; 1 Petero 2:10.

Au Apiianga no Tatou:

1:2-9; 3:1, 2. E akamanako ana ra i te akaatingaanga ta Hosea uaorai i rave na te noo ua anga i roto i tetai akaipoipoanga kia tau ki to te Atua anoano! No runga i te rave anga i to te Atua anoano, mei teaa ra te maata o ta tatou akaatinga puareinga ua anga i to tatou uaorai au anoano?

1:6-9. E mea rikarika rava na Iehova te akaturi pae vaerua, mei iaia katoa e rikarika i te akaturi pae kopapa.

1:7, 10, 11; 2:14-23. Kua akatupuia ta Iehova i totou no runga ia Iseraela e Iuda. E tupu ua ana rai te au tuatua a Iehova.

2:16, 19, 21-23; 3:1-4. Te inangaro puareinga ua maira a Iehova i te akakore i te ara a te aronga ngakau tataraara. (Nehemia 9:17) Mei ia Iehova, ei tu akaaroa rai to tatou e te aroa i roto i ta tatou au raveanga ki etai ke.

“E MĀRO ANGA OKI TA IEHOVA”

(Hosea 4:1–​13:16)

“E māro anga oki ta Iehova i te au tangata o te enua nei.” No teaa ra? No te mea “kare e tuatua-mou, e kare e aroa, kare oki e kite i te  Atua, i te enua nei.” (Hosea 4:1) Kua piri te iti tangata patoitoi o Iseraela ki roto i te angaanga pikikaa e te akamaringi toto e kua rave ratou i te moeaana i te pae kopapa e i te pae vaerua. Kare i akara ki te Atua no te tauturu, “te kapiki nei ratou kia Aiphiti, te aere nei ratou ki Asura.”​—Hosea 7:11.

E akakite iora a Iehova i tana akavaanga i te na ko anga e: “Kua apukuia Iseraela.” (Hosea 8:8) Kare te patireia o Iuda i matara mei roto i te apa. “E taumāro anga rai oki ta Iehova ia Iuda,” e akakite ra a Hosea 12:2, “e e akautunga atu aia ia Iakoba ki tei tau ki tona ra au aerenga; e tutaki atu aia iaia ki tei tau ki tana ra au ravenga.” Inara kua papu tikai te akaoki akaouanga, no te mea te taputou maira te Atua e: “E akaora au ia ratou i te mana o te vaarua ra; e oko atu au ia ratou mei te mate mai.”​—Hosea 13:14.

Pauia te Au Uianga Tuatua Tapu:

6:1-3​—Koai ra tei karanga e: “Ka aere mai, tatou ka oki kia Iehova ra”? Penei kua akamaroiroi ana te au ngati Iseraela tiratiratu kore i tetai e tetai kia oki kia Iehova. Me koia ia, te tataraara pikikaa ua ra ratou. Kua aite rai to ratou aroa takinga meitaki poto ua e te ngaro viviki ua mei “te tumurangi popongi, e mei te au e peke vave.” (Hosea 6:4) I tetai tua, penei e ko Hosea te tuatua ra i te pati ki te iti tangata kia oki kia Iehova. Noatu ra e koai, ka anoanoia rai te aronga patoitoi o te patireia tino ngauru o Iseraela kia akaari i te tu tataraara tika tikai e kia oki kia Iehova.

7:4​—Na teea tu te au ngati Iseraela akaturi i riro ei mei te [“umu ka ua,” NW]? Te akatutu maira teia akaaiteanga i te tu pakari o te au anoano viivii i roto i to ratou ngakau.

Au Apiianga no Tatou:

4:1, 6. Me inangaro tatou kia vai rai ki roto i ta Iehova akaperepereanga, ka anoanoia tatou kia apii atu rai i te kite nona e kia taangaanga i ta tatou i kite.

4:9-13. Ka akautunga a Iehova i te aronga e rave matau ra i te peu ainga tau kore e te piri ki te akamorianga ma kore.​—Hosea 1:4.

5:1. E tau te au arataki i rotopu i te iti tangata o te Atua kia kopae takiri i te apoteiti. Te openga, e riro aea ratou i te akatatipake i tetai papaki ki roto i te akamorianga pikikaa, e riro maira ei ‘ereere e ei kupenga’ no ratou.

6:1-4; 7:14, 16. Te tataraara vaa ua e pikikaa ua rai e te puapinga kore. E rauka ai te aroa o te Atua, ka anoanoia te tangata rave ara kia akaari mai i te ngakau tataraara, tei akapapuia mai na roto i tona oki mai anga ki tetai mea “teitei atu” koia oki, ki te tu akamorianga akateiteiia. Kia rotai tana au angaanga ki to te Atua au turanga.​—Hosea 7:16, tataanga i raro ake, NW.

6:6. Te rave matau i te ara e akairo te reira no te ngere i te aroa tiratiratu no te Atua. Noatu e eaa te maata o te atinga pae vaerua, kare rai e rauka i te tupau i teia tu ngere.

8:7, 13; 10:13. Te kaveinga e “ko ta te tangata e ruru ra, ko tana ra ïa e kokoti” kua tupu tika tikai te reira ki te au ngati Iseraela akaturi.​—Galatia 6:7.

8:8; 9:17; 13:16. Kua tupu tika atura te au totou no runga i te patireia i te tua tokerau i te peke anga tona oire maata, a Samaria, i to Asura. (2 Ariki 17:3-6) Ka rauka ia tatou kia irinaki tikai e ka rave te Atua i tana i tuatua e ka akatupu i tei tuatuaia e ia.​—Numero 23:19.

8:14. Kua tuku maira Iehova i “te ai ki runga i te au oire [o Iuda]” i te mataiti 607 M.T.N. na roto i to Babulonia, i te akataneaanga ia Ierusalema e i te enua o Iuda mei tei totouia. (2 Paraleipomeno 36:19) Kare rava te tuatua a te Atua e poka.​—Iosua 23:14.

9:10. Noatu e kua akatapuia ratou ki te Atua mou, kua “aere atura ra [te ngati Iseraela] ki Baala-peora, e kua akataka ke ia ratou uaorai ki taua mea akama ra.” E tu pakari ia to tatou kia akarongo ki te akamatakiteanga o ta ratou akaraanga kino e kia  matakite auraka e aati i ta tatou akatapuanga kia Iehova.​—1 Korinetia 10:11.

10:1, 2, 12. E tau tikai ia tatou kia akamori i te Atua ma te ngakau pikikaa kore. Me ‘ruru tatou uaorai i te ua ma te tuatua-tika, ka kokoti tatou kia tau i te aroa takinga meitaki o te Atua.’

10:5. Ko Bete-avene (te aiteanga “Are o te Mamae Anga”) e ingoa akakino te reira i tapaia kia Betela (te aiteanga “Are o te Atua”). I te apaiia anga te itoro puakatoro o Bete-avene ki roto i te tuikaaanga, kua eva ua te au tangata o Samaria i te ngaro anga te tumu no ta ratou akamorianga. E puapinga kore tikai te tuku i te irinakianga ki roto i tetai itoro kare ua e rauka i te paruru iaia uaorai!​—Salamo 135:15-18; Ieremia 10:3-5.

11:1-4. E akono ua ana rai a Iehova i tona iti tangata ma te aroa. Kare te tu kauraro ki te Atua e akatupu ana i te kino.

11:8-11; 13:14. Kare ta Iehova tuatua no runga i te akaoki akaouanga o tona iti tangata ki te akamorianga mou i ‘oki puapinga kore ua ana kiaia’ e kare i akatupuia. (Isaia 55:11) I te mataiti 537 M.T.N., kua ope te tuikaaanga i Babulonia e kua oki tetai toenga ki Ierusalema. (Ezera 2:1; 3:1-3) Noatu e eaa ta Iehova i tuatua na roto i tona au peroveta ka tupu rai te reira.

12:6. E tau tatou kia akaari ngaueue kore i te aroa takinga meitaki, kia akono i te tuatua-tau, e kia tapapa marie rai i roto ia Iehova.

13:6. Te au ngati Iseraela kua “ki akera ratou, e teitei atura to ratou ngakau; i akangaropoinaʼi ratou [ia Iehova].” Ka anoanoia tatou kia matakite i tetai ua atu tu paruparu o te akateitei ia tatou uaorai.

“KUA TIKA OKI TE AU AERENGA O IEHOVA”

(Hosea 14:1-9)

Kua pati akatenga atura Hosea e: “E Iseraela e, e anga mai koe ki to Atua ra ia Iehova, no te mea kua inga koe i toou ra kino.” Kua akamaroiroi aia i te tangata kia tuatua kia Iehova e: “Ka akakore mai koe i te au kino katoa, ka āriki mai ei ia matou ma te aroa: ka oronga atu ei matou i te atinga ra o to matou vaa.”​—Hosea 14:1, 2.

E tau kia aere mai te tangata rave ara kia Iehova, kia ariki i tona au aerenga, e kia oronga i te au atinga akapaapaa kiaia. No teaa ra? No te mea “kua tika oki te au aerenga o Iehova, e na te aronga tuatua-tika e na reira te aere.” (Hosea 14:9) Kare e aiteia to tatou rekareka no te mea e manganui te ka ‘mataku ia Iehova, e te meitaki nona, i te au rā openga ra’!​—Hosea 3:5.

[Tutu i te kapi 15]

Te akatutu maira to Hosea oraanga ngutuare i ta Iehova au raveanga kia Iseraela

[Tutu i te kapi 17]

I te inga anga a Samaria i te mataiti 740 M.T.N., kua akamutu rai te patireia tino ngauru o Iseraela