Au Uianga a te Aronga Tatau

I te mea e kua akaueia te ngati Iuda e auraka e kapiti mai i te “mea akaopueia” i te tuatau o te Pasa, eaa a Iesu i taangaanga ei i te uaina​—ei apinga akaopueia—​i te akanooanga i te Akamaaraanga o tona mateanga?​—Exodo 12:20; Luka 22:7, 8, 14-20.

Ko te akonoanga i te Pasa, tei akairo i te Aerenga o te au tamariki a Iseraela mei Aiphiti ra, kua akanooia i te 1513 M.T.N. I te oronga anga i te au ikuikuanga kia akonoia te reira, kua karanga a Iehova e: “Auraka roa kotou e kai i te mea akaopueia; ei areto akaopue koreia ta kotou e kai i to kotou au nooanga ravarai ra.” (Exodo 12:11, 20) Teia araianga a te Atua, te tuatua ra ki te varaoa ua te ka kaingaia i te tuatau o te Pasa. Kare rava e tuatua no runga i te uaina.

Te tumu maata i tureia ai te opue koia oki kua akarapurapuia te ngati Iseraela i to ratou akarukeanga ia Aiphiti. “Kua rave iora to Iseraela i ta ratou faraoa oi, kare i akaopueia,” te akamarama maira a Exodo 12:34, “i vaîia ta ratou au oinga kai i roto i to ratou kakau, tuku akera ki runga i to ratou pakuivi.” I te mea e kare te opue i kapitiia mai ki roto i te au akonoanga o te Pasa tei aru mai, ka akamaara te reira i te au uki a muri ake i teia tumu puapinga maata.

Aere rai, e akamanako putuputuia ana te opue ei akairo no te ara me kore te kino. I te taikuanga i tetai tangata akono tau kore i roto i te putuputuanga Kerititiano, kua ui te apotetoro ko Paulo e: “Kare kotou i kite e, e opue te putunga katoa i te akaopue mea ngiti ra?” E oti kua karanga aia e: “Ka tamā ana i te akaopue taito, kia riro kotou ei putunga ou, kia kore te akaopue ia kotou na: ko te Mesia oki ta tatou pasa i taia ïa na tatou. E teianei, e akono tatou i taua oroa ra, eiaa ma te akaopue taito, eiaa katoa ma te akaopue akamoupuku e te kino, ma te kai akaopue koreia ra, ko te pikikaa kore e te tuatua-mou.” (1 Korinetia 5:6-8) Ko te varaoa akaopue kore ua te tau ra kia taangaangaia ei akatutuanga o to Iesu kopapa tangata apa kore.​—Ebera 7:26.

Ko te taangaanga anga o te uaina i te akonoanga i te Pasa, kua kapitiia mai i muri akera e te ngati Iuda. Penei, kua kapitiia mai te reira i muri ake i to ratou oki mai anga mei te tuikaa i Babulonia. Kare a te Pipiria tataanga i te patoianga i teia kapitianga, e no reira kua rauka ia Iesu i te taangaanga meitaki i te uaina i te kai anga i te Pasa. E tika, te akaopue anga natura tei tupu i roto i te uaina i te au tuatau taito, e tuke rai mei te akaopue anga tei kapitiia i roto i te varaoa. No runga i te varaoa mata tei tavaiia, kua anoanoia te iiti, me kore te opue no te reira kia akaopueia. Te uaina tei maaniia mei te au vine, kare te reira e inangaroia. E au mea akaopue uaorai to te au vine. Kare te vai vine kairo koreia i rauka ana i te Pasa no te mea kare te reira e vai opue kore ua mei te tuatau kokotianga i te tuatau pururuanga rau e tae rava atu ki te Pasa i te tuatau tupuanga rau.

No reira, i to Iesu taangaanga anga i te uaina ei akatutuanga no te Akamaaraanga, kare rava i taii ana ki te au ikuikuanga no te Pasa no runga i te opue. Ka rauka i te taangaanga i tetai ua atu uaina muramura e kare i taveneia, me kore i kairoia, me kore i takakaraia, ei akatutuanga o to Karaiti “toto apinga maata ra.”​—1 Petero 1:19.