‘E Metua Aroa to Kotou’

“E aroa oki to kotou, mei to kotou Metua e aroa maira.”​—LUKA 6:36.

1, 2. Akapeea ta Iesu au tuatua ki te au tata tuatua e te au Pharisea e ki tana au pipi i te akaari anga mai e e mea inangaroia te tu akaaroa?

TE VAI ra mei etai 600 au umuumuanga e te au ikuikuanga i roto i te ture tei orongaia kia Mose. Noatu e te anoanoia ra e kia akonoia te Ture a Mose, e puapinga maata katoa te akaarianga i te tu akaaroa. E akamanako ana i ta Iesu i tuatua ki te au Pharisea, tei akaari i te tu akaaroa kore. E rua atianga tona akoanga ia ratou, i te taikuanga e kua akaue mai te Atua e: “Ko te aroa taku i anoano, auraka te atinga.” (Mataio 9:10-13; 12:1-7; Hosea 6:6) I te pae openga o tana angaanga orometua, kua karanga a Iesu e: “Aue kotou, e te au tata tuatua, e te au Pharisea e, e aronga pikikaa! te oronga nei kotou i te ngauru o te minete e te aneto e te kumino, e te akaruke nei i te au mea mamaata o te ture, te tuatua-tau, te aroa, e te akarongo.”​—Mataio 23:23.

² Kare e ekokoanga, e kua akamanako a Iesu i te tu akaaroa ei tu puapinga maata tikai. Kua karanga aia ki tana au pipi e: “E aroa oki to kotou, mei to kotou Metua e aroa maira.” (Luka 6:36) Inara, kia ‘aru i te Atua’ i roto i teia tu, ka anoanoia tatou i te kite i te aiteanga tikai no te tu akaaroa. (Ephesia 5:1) Tei runga ravao ra, i te maramaanga i te au puapinga no te tu akaaroa, ka akakeu ia tatou kia akaari maata atu i teia tu i roto i to tatou au oraanga.

E Akaaroa i Tei Ngere

3. Eaa tatou ka akara ai kia Iehova kia apii mai i te aiteanga tikai o te tu akaaroa?

³ Kua imene te tata taramo e: “E takinga-meitaki e te aroa to Iehova; kare e riri vave, e te akaperepere maata. Takinga-meitaki to Iehova ki te tangata ravarai; e te vai ra tona aroa akaperepere ki runga i tana katoa ra au angaanga.” (Salamo 145:8, 9) Ko Iehova “te Metua o to tatou Atu ra o Iesu Mesia, te tumu o te aroa.” (2 Korinetia 1:3) E akaariia ana te tu akaaroa na te akonoanga i tetai tangata i roto i te tu tangi aroa. E tuanga maata teia i te tu o te Atua. Ka rauka tona akaraanga e tana au ikuikuanga i te apii ia tatou i te aiteanga tikai o te tu akaaroa.

4. Eaa ta Isaia 49:15 e apii maira ia tatou no runga i te tu akaaroa?

⁴ Mei tei rekotiia ia Isaia 49:15, te karanga ra a Iehova e: “E tika ainei i te vaine kia akangaropoina i tana tamaiti kai u e kare atura e tangi ki te tamaiti a tona uaorai kopu?” Te au tuatua Epera te piri vaitata atura ki te tuatua tei uriia i konei e e “tangi” te taangaangaia ra i te piri atu anga ki te tu akaaroa i roto ia Salamo 145:8, 9, tei taikuia i runga akenei. Te manako ngakau te akakeu ra ia Iehova kia akaaroa atu, te akaaiteia ra ki tetai pirianga maanaana  o tetai mama ki tana tamaiti kai u. Penei e pongi te pepe me kore e anoano ke atu tona. No te mea kua akakeu teia i roto iaia i te au manako tangi aroa me kore te tangi, kua akono te mama i te anoano o tana pepe. Mei tera katoa rai to Iehova au manako ngakau maru no te aronga e akaaroa ana aia.

5. Akapeea a Iehova i te akaarianga iaia uaorai e kua “aroa maata” aia ia Iseraela?

⁵ E apinga ke rai te tangi aroa inara e apinga ke rava atu i te taangaanga i te reira ei puapinga no te aronga tei ngere. E akamanako ana e akapeea a Iehova i te ariu anga i te tuikaaia anga tona aronga akamori i Aiphiti mei etai 3,500 mataiti i topa. Kua karanga aia kia Mose e: “Kua akara tikai au i te mate o toku iti-tangata i Aiphiti; e kua akarongo au i to ratou aue i to ratou au akaaiteite angaanga; kua kite oki au i to ratou mamae; E i aere mai nei au ki raro nei e akaora ia ratou i te rima o to Aiphiti, e e arataki ke mai oki ia ratou i taua enua ra, ki tetai enua meitaki e te maata, e enua e taʼe a vai ua te u, e te meli.” (Exodo 3:7, 8) Mei etai 500 mataiti i muri ake i to Iseraela akaora angaia mai mei Aiphiti ra, kua akamaara a Iehova kia ratou e: “I arataki mai au i to Iseraela mei Aiphiti mai, e kua akaora au ia kotou i te rima o to Aiphiti, e i te rima o te au basileia katoa i tinai-mate mai ia kotou na.” (1 Samuela 10:18) No te mea kua aere ke ratou mei te au turanga tuatua tika a te Atua, kua o putuputu atu te ngati Iseraela ki roto i te au turanga taitaia. Inara, kua tangi aroa a Iehova ia ratou e kua tauturu putuputu aia ia ratou. (Te Au Akava 2:11-16; 2 Paraleipomeno 36:15) Te akatutu maira teia i te tu e ariu mai ana te Atua takinga meitaki ki te aronga e inangaro tauturu ra, tei roto i te tumatetenga, me kore tei roto i te tu ngata. E “aroa maata” to Iehova.​—Ephesia 2:4.

6. Akapeea a Iesu Karaiti i te aruanga i tona Metua i te akaarianga i te tu akaaroa?

⁶ Iaia i te enua nei, kua aru apa kore a Iesu Karaiti i tona Metua i te akaarianga i te tu akaaroa. Eaa ta Iesu i rave i te patianga tetai nga tangata matapo e rua iaia, i te na ko anga e: “Te Atu, e te Tamaiti a Davida, e aroa mai koe”? Te pati ra raua ia Iesu kia rapakau i to raua matapo na te angaanga temeio. Kua rave a Iesu i te reira, inara kare aia i rave ana i teia temeio ma te tu tangi kore. “Aroa aturā Iesu ia raua,” te karanga ra te Pipiria, “akatukia atura i to raua mata; puera akera to raua mata i reira ra.” (Mataio 20:30-34) Kua akakeu te tu akaaroa ia Iesu kia rave i te au temeio e manganui tei rapakau i te matapo, te aronga i uruia e te temoni, te repera, e te au metua o te au tamariki maki.​—Mataio 9:27; 15:22; 17:15; Mareko 5:18, 19; Luka 17:12, 13.

7. Eaa te au akaraanga a te Atua ko Iehova e tana Tamaiti e apii maira kia tatou no te tu akaaroa?

⁷ Te akaari maira te au akaraanga o te Atua ko Iehova e Iesu Karaiti e e rua tuanga to te tu akaaroa​—te au manako no te tangi aroa, te tu tangi, me kore te tangi no te tangata tei ngere e te angaanga i raveia ei tauturu i te tangata. Ka umuumuia teia nga tuanga e rua i te akaarianga i te tu akaaroa. I roto i te au Tuatua Tapu, e taiku putuputuia ana te tu akaaroa ki tetai akakiteanga papu no te takinga meitaki ki te aronga e inangaro tauturu ra. Akapeea ra te tu akaaroa i te akaariangaia i roto i tetai turanga no te akavaanga? Te o katoa maira ainei tetai angaanga tei akamanakoia e e tau kore, mei te tapu anga i te akautungaanga?

E Akaaroa i te Aronga Rave Ara

8, 9. Eaa te kapiti maira ki te tu akaaroa tei akaariia kia Davida i muri ake i tona ara anga kia Bate-seba?

⁸ E akamanako ana i tei tupu i muri ake i te araveianga te peroveta ko Natana i te Ariki ko Davida o Iseraela taito no runga i to Davida pirianga akaturi kia Bate-seba. Kua tataraara a Davida e kua pure atu e: “E aroa mai koe iaku, e te Atua e, i toou ra takinga-meitaki; no te maata o toou ra aroa, e taparapara koe i taku nei au ara. E orei takiri mai koe iaku i toku nei kino; e tamā mai iaku i taku nei ara. Te aaki nei oki au i taku nei ara, e te vai ua  nei rai toku kino i mua iaku. I mua i to aroaro, toou anake ra, i ara ai au nei, e i mua i to mata i rave ei au i teianei kino.”​—Salamo 51:1-4.

⁹ Kua puta te ngakau o Davida. Kua akakore a Iehova i tana ara e kua tapu marie i te oronga anga i te akavaanga ki runga iaia e Bate-seba. Kia tau ki te Ture a Mose, ka tamateia a Davida raua ko Bate-seba. (Deuteronomi 22:22) I te mea e kare raua i ora mai ana mei te au tupuanga kino katoatoa o ta raua ara, kua akatikaia ra raua kia ora ua atu. (2 Samuela 12:13) I to te Atua taangaanga anga i te tu akaaroa, te kapiti maira te akakoreanga i te tarevake. Inara, kare aia e tapupu ana i te oronga anga i te utunga tau.

10. Noatu e e akaari ana a Iehova i te tu akaaroa i te oronga anga i te akavaanga, eaa tatou ka kore ei e irinaki ua ki runga i tona tu akaaroa?

¹⁰ I te mea e “no te tangata [Adamu] okotai ra i o mai ei te kino i te ao nei” e e ‘mate te utunga no te ara,’ kua tau rai te au tangata ravarai kia mate. (Roma 5:12; 6:23) Kia mataora tatou e e akaari ana a Iehova i te tu akaaroa me oronga i te akavaanga! Inara, kia matakite tatou e auraka e irinaki ua ki runga i to te Atua tu akaaroa. ‘E tu tika katoa to Iehova au aerenga,’ te karanga ra a Deuteronomi 32:4. I te akaari anga i te tu akaaroa, kare te Atua e kopae ana i tana au turanga apa kore no te tu tika.

11. Akapeea a Iehova i te akaarianga i te tu tau no te tu tika i te akavaanga ia Davida no tana ara kia Bate-seba?

¹¹ No runga ia Davida raua ko Bate-seba, i mua ake ka akaitiia mai ei te akavaanga no te utunga no te mate, ka anoanoia ta raua ara kia akakoreia. Kare te au akava o Iseraela i akamanaia kia rave i te reira. Naringa e kua akatikaia ratou i te rave i teia akavaanga, kare atu a ratou ravenga mari ra kia tuku i te utunga no te mate. Ko teia ta te Ture e umuumu maira. Inara, no tana koreromotu kia Davida, kua inangaro a Iehova i te akara e me e tumuanga rai tetai kia akakoreia te ara a Davida. (2 Samuela 7:12-16) E no reira, kua iki te Atua ko Iehova, “te Akava i to te ao katoa nei,” e tei ‘unuunumou i te ngakau,’ e nana uaorai e rave i teia akavaanga. (Genese 18:25; 1 Paraleipomeno 29:17) Kua rauka i te Atua i te tatau meitaki i te ngakau o Davida, i te akara matatio i te tu tika tikai o tana tataraara, e kia oronga i te akakoreanga ara.

12. Akapeea te au tangata ara i te akapuapinga anga ia ratou uaorai mei to te Atua tu akaaroa?

¹² Ko te tu akaaroa ta Iehova e akaari mai ana kia tatou na te akamataraanga ia tatou mei te utunga no te ara, te rotai ra ki tona tu tika. Kia rauka te akakoreanga ara, ma te kore e aati i tona turanga no te tu tika, kua oronga mai a Iehova i te atinga oko o tana Tamaiti, ko Iesu Karaiti​—ko te akakiteanga maata rava atuia no te tu akaaroa tei akaariia.  (Mataio 20:28; Roma 6:22, 23) Kia puapinga tatou mei to te Atua tu akaaroa, te ka akaora mai ia tatou mei te utunga no te ara, ka anoanoia tatou kia “akarongo i te Tamaiti.”​—Ioane 3:16, 36.

E Atua Akaaroa e te Tu Tika

13, 14. Te akamaru ra ainei to te Atua tu akaaroa i tona tu tika? Akamarama mai.

¹³ I te mea e kare to Iehova tu akaaroa e aati ana i tona turanga no te tu tika, te akakeu ra ainei te reira i tona tu tika? Te akaiti maira ainei te tu akaaroa i te akakeuanga ki runga i ta te Atua akavaanga? Kare, kare rava ia.

¹⁴ Na roto i te peroveta ko Hosea, kua akakite a Iehova ki te ngati Iseraela e: “E akaau atu au ia koe naku, e tuatau ua atu: koia tikai, e akaau atu au ia koe naku ma te tuatua-tika, e te [“tu tika,” NW], e ma te akaperepere maata, e ma te aroa.” (Hosea 2:19) Te akaari meitaki maira teia au tuatua e, to Iehova taangaanga anga i te tu akaaroa, e rotai ua ana rai ki tona au tu tuke atu, kapiti mai te tu tika. E “Atua akaaroa e te aroa ua [a Iehova], . . . te akakoreanga i te tarevake e te apa e te ara, inara kare rava aia e tuku ua atu kia kore e akautungaia.” (Exodo 34:6, 7, NW) E Atua a Iehova no te tu akaaroa e te tu tika. No runga iaia, te karanga ra te Pipiria e: ‘Ko te Mato aia ko tei tika rava tana angaanga ra; e tu tika katoa tona au aerenga.’ (Deuteronomi 32:4) E apa kore to te Atua tu tika, mei tona tu akaaroa rai. Kare tetai e teitei atu i tetai, e kare katoa tetai e anoano atu i tetai kia akamaru mai i tona tupuanga. Mari ra, te angaanga rotai ra teia nga tu e rua ki tetai e tetai ma te tu apa kore tikai.

15, 16. (a) Eaa te akaari maira e kare te tu tika o te Atua e kino pakari ana? (e) Me rave a Iehova i tana akavaanga ki runga i teia akatereanga kino o te au mea nei, eaa te ka papu i te aronga e akamori ra iaia?

¹⁵ Kare to Iehova tu tika e kino pakari ana. Vaitata rai e te piri atura te tu tika ki te au tupuanga i te pae o te ture, e tei matauia te anoano maira te akavaanga i te tukuanga i te utunga tau no te aronga tei rave i te kino. Inara, te piri katoa maira te tu tika o te Atua i te ora no te aronga e tau ra i te reira. Ei akaraanga, i te takoreia anga te aronga kino i roto i te au oire o Sodoma e Gomora, kua akaoraia te pateriareka ko Lota e tana nga tamaine e rua.​—Genese 19:12-26.

¹⁶ Ka papu ia tatou e me rave a Iehova i tana akavaanga ki runga i teia akatereanga kino o te au mea nei, ka akaoraia te “aronga maata rava” o te aronga akamori mou, tei “orei i to ratou kakau, e kua akateatea i te toto o te Punua-mamoe ra.” I reira ratou e “aere mai [ei] mei roto i te tumatetenga maata.”​—Apokalupo 7:9-14.

Eaa ka Akaaroa Atu Ei?

17. Eaa te tumu maata kia akaari i te tu akaaroa?

¹⁷ Te apii meitaki maira te au akaraanga a Iehova e Iesu Karaiti ia tatou i te aiteanga tikai o te tu akaaroa. I te oronga mai anga kia tatou i tetai tumu maata kia akaaroa atu, te akakite maira a Maseli 19:17 e: “Ko tei aroa i te ao ra, kua oronga aia i te apinga na Iehova; e nana rai e tutaki mai iaia i taua mea ra.” E mataora ana a Iehova me aru tatou  iaia e tana Tamaiti na te akaarianga i te tu akaaroa i to tatou akonoanga i tetai e tetai. (1 Korinetia 11:1) E e akamaroiroi ana te reira i tetai ke kia akaaroa atu, no te mea e tupu ana te tu akaaroa me akaariia te tu akaaroa.​—Luka 6:38.

18. Eaa tatou ka aruaru ei kia akaari i te tu akaaroa?

¹⁸ Ko te tu akaaroa e kapitianga te reira i te au tu meitaki e manganui. Te o maira te tu akono meitaki, aroa, takinga meitaki, e te meitaki. Te au manako maru no te tangi aroa me kore te tu tangi, ko te akakeuanga maata te reira o te au angaanga no te tu akaaroa. I te mea e kare to te Atua tu akaaroa e akakore ana i te tu tika, e tapu marie ana a Iehova i tona riri e e oronga marie ana aia i tetai tuatau tau kia rauka te aronga kino i te tataraara. (2 Petero 3:9, 10) No reira te piri atura te tu akaaroa ki te akakoromaki e te akakoromakianga roa. Ei kapitianga i te au tu meitaki e manganui​—kapiti mai te au tuanga tukeke o te ua o te vaerua o te Atua​—ka riro te tu akaaroa ei papaanga no teia au tu nei kia tatanuia. (Galatia 5:22, 23) E puapinga tikai kia aruaru tatou i te akaari i te tu akaaroa!

“E Ao to Tei Aroa”

19, 20. Na roto i teea tu e vi ana te tu akaaroa i te akavaanga?

¹⁹ Te akakite maira te pipi ko Iakobo kia tatou i te tumu ka akariro ei tatou i te tu akaaroa ei tu anoano maataia i roto i to tatou oraanga. Kua tata aia e: “E vi ra te [“akavaanga,” NW] i te aroa.” (Iakobo 2:13e) Te tuatua ra a Iakobo i te aroa ta tetai tangata akamori o Iehova e akaari ra ki tetai ke. E vi ana te reira i te akavaanga mei tera te tu e me tae te tuatau no tetai tangata kia “aaki i te tuatua iaia uaorai i te Atua ra,” ka akamanako a Iehova i tana au akonoanga tu akaaroa e ka akakore atu i tana ara i runga i te tumuanga o te atinga oko o Tana Tamaiti. (Roma 14:12) Kare e ekokoanga e, ko tetai tumu i akaariia ai te tu akaaroa kia Davida no tana ara kia Bate-seba koia oki e tangata akaaroa rai a Davida. (1 Samuela 24:4-7) I tetai tua ra, “to te [“akavaanga,” NW] anake tana e rauka, kare te aroa, ta tei kore rava i aroa ra.” (Iakobo 2:13a) No reira rai te aronga “aroa kore” i papaia ai i roto i te aronga ta Iehova e akara ra e ka ‘tau i te mate’!​—Roma 1:31, 32.

²⁰ I roto i tana Tuatua i runga i te Maunga, kua karanga a Iesu e: “E ao to tei aroa ia etai ke ra: e aroa katoaia mai ratou.” (Mataio 5:7) Mei teaa atura teia au tuatua e akaari pakari maira e te aronga e kimi ra i to te Atua tu akaaroa, kia akaari katoa ratou i te tu akaaroa! Ka uriuri te atikara e aru mai nei e akapeea tatou i te taangaanga anga i te tu akaaroa i roto i to tatou oraanga i te au ra ravarai.

Eaa Taau i Kite?

• Eaa te tu akaaroa?

• Na roto i teea au mataara e akaariia mai ana te tu akaaroa?

• I teea mataara a Iehova i riro mai ei e Atua akaaroa e te tu tika?

• Eaa tatou ka anoanoia ai kia akaari i te akaaroa?

[Au Uianga Apii]

[Tutu i te kapi 21]

To Iehova manako maru no te aronga e ngere ra, mei to te mama rai ki tana pepe

[Tutu i te kapi 23]

Eaa ta tatou i kite mai no te tu akaaroa mei te au temeio a Iesu?

[Tutu i te kapi 24]

Kua aati ainei a Iehova i tona tu tika i te akaarianga i te tu akaaroa kia Davida?

[Tutu i te kapi 25]

To te Atua tu akaaroa ki te au tangata ara, te rotai ra ki tona tu tika