Eaa ra te Atua i Akatika ua ai te Tu Kino?

KARE koe e anoanoia kia akara mamao kia kite i te maata o te kino e te mamae. Te tamate nei te au tamakianga i te tangata noa ua e te au vaeau katoa. Te totoa ua nei te tu apa i te ture e te ta ua. Penei ko koe tetai tei taii ana ki te tu akavaavaa me kore ki te angaanga tika kore. No taau i kite e tei tupu kia koe, penei kua ui ana rai koe e, ‘Eaa ra te Atua i akatika ua ai te tu kino?’

Kare taua uianga ra i te mea ou. Mei tetai 3,600 mataiti i topa akenei, kua ui ana rai tetai tavini tiratiratu o te Atua ko Iobu te ingoa e: “Eaa te mea i oraʼi te aronga kino nei?” (Iobu 21:7) No te taitaia i te au angaanga kino a tona enua tangata, kua ui te peroveta a Ieremia o te itu anere mataiti M.T.N. e: “No te aa i manuiaʼi te aerenga o te aronga kino? e noo rekareka ua ainei te aronga katoa i rave i te peu pikikaa maata?” (Ieremia 12:1) Kua kite a Iobu raua ko Ieremia e e tu tuatua tika to te Atua. Inara kua umere raua e eaa ra i maata roa ai te tu kino. Penei te umere ra rai koe i teia.

Te akaapa ra tetai aronga i te Atua no te tu kino e te mamae. Ko etai te ui ra e: ‘Me e mana katoatoa to te Atua, e tuatua tika, e te aroa, eaa aia i kore ei e takore i te kino e te mamae? Eaa ra aia i akatika ai kia vai ua rai te kino i to tatou nei tuatau?’ Ka akamanako te atikara ka aru mai i te au pauanga ki teia e tetai au uianga puapinga ke atu.

[Akameitakianga no te Tutu i te kapi 3]

AP Photo/​Adam Butler